Tënë ti Nzapa ayeke na ngangu ti sara ye

1. Mama-tene ti kota bungbi ti lango oko ti ngu 2014 ayeke nyen?

¹ Nde na aye kue so azo asigigi na ni; Bible ayeke na ngangu ti changé fini ti e, ti sara si apensé ti e na asarango ye ti e ague oko na ye so bê ti Jéhovah aye. Ngangu ti Tënë ti Nzapa ayeke tongana nyen? Tongana nyen la e lingbi ti sara kusala na ngangu kue so Bible ayeke na ni na yâ ti fini ti e? Na lege wa e lingbi ti sara kusala na ni mingi ahon ti kozo ti mû maboko na ambeni zo? E hinga biani so angbongboro tënë so e yeke mä ande na ngoi ti kota bungbi ti lango oko ti ngu 2014 so ayeke kpengba e kue na lege ti yingo. A gboto mama-tene ni na aHébreu 4:12 so atene: “Tënë ti Nzapa ayeke na ngangu ti sara ye.”

2. Ahundango tënë wa la a lingbi e gi akiringo tënë ni?

² Gi ti wara akiringo tënë na ahundango ndo so: Na ngoi so mo yeke dengi mê na kapa ni, sû akiringo tënë ti ahundango ndo so.

• Ngbanga ti nyen a lingbi e zia bê ti e kue na Tënë ti Jéhovah? (Ps. 29:4).

• Tongana nyen la e yeke bâ ngangu so Tënë ti Nzapa ayeke sara na yâ ti fini ti e? (Ps. 34:9).

• Na lege wa e yeke fa so Tënë ti Nzapa ayeke na ngangu na ngoi so e yeke fa tënë? (2 Tim. 3:16, 17).

• Tongana nyen la e lingbi ti kpe si e tï pëpe na yâ ti gbanda ti handango ndo ti dunia ti Satan? (1 Jean 5:19).

• Tongana nyen la amaseka alingbi ti wara ye ti nzoni na lege ti yingo? (Jér. 17:7).

• Na lege wa e lingbi ti wara ngangu atâa na ngoi so e woko? (2 aCor. 12:10).

• Nyen la alingbi ti mû lege na e ti ngbâ ti changé aye na yâ ti fini ti e, atâa tongana e yeke na asioni sarango ye so alingbi ti duti ngangu na e ti zia lege ni nga na asioni bango ndo? (aÉph. 4:23).

3. Nde na dengingo mê na kapa ni, ambeni ye ti nzoni wa e lingbi nga ti wara na ngoi ti kota bungbi ti lango oko so?

³ Bâ tongana nyen e yeke wara ye ti nzoni mingi tongana e dengi mê ti mä akpengba sango so! Na ndo ni, kota bungbi ti lango oko, legeoko na kota bungbi ti circonscription nga na kota bungbi ti district ayeke mû lege na e ti kono ndoye ti e na mbage ti aita ti ambeni congrégation nde (Ps. 133:1-3; 2 aCor. 6:11-13). Ni la, a lingbi e wara ngoi ti sara lisoro na aita so e hinga ala kozo nga na afini zo. Tongana mbeni ita so aga gango na tapande mbeni surveillant ti district wala mbeni ita so aga na iri ti Béthel ti mû diskur na ngoi ti kota bungbi ti lango oko ni, ngbanga ti nyen mo mû pëpe ngoi ni so ti sara lisoro na lo na wali ti lo? Tongaso, e yeke na araison mingi ti ku kungo lango ti kota bungbi ti lango oko so ayeke ga!