Gi ti sara ye lakue na l’heure
1. Tongana a ndu tënë ti sarango ye na l’heure, Jéhovah azia na e tapande wa?
1 Jéhovah ayeke sara ye lakue na l’heure. Na tapande, lo yeke mû maboko na awakua ti lo ‘na ngoi so ala yeke na bezoin ti tene a mû maboko na ala.’ (aHéb. 4:16). Na lege ti yingo, lo yeke mû nga na ala “kobe ti ala na ngoi ni so alingbi”. (Mat. 24:45). E lingbi ti hinga na bê ti e kue so lâ ti ngonzo ti Jéhovah ayeke “si na l’heure ni” (Hab. 2:3). So ye ti nzoni si e wara na lege ti sarango ye ti Jéhovah lakue na ngoi ni! (Ps. 70:6). Me ndali ti so e yeke na aye mingi ti sara nga e yeke azo, alingbi biani ti duti ngangu na e ti sara ye na l’heure. Ngbanga ti nyen alingbi e gi ti sara ye lakue na l’heure?
2. Ngbanga ti nyen sarango ye na l’heure ayeke mû gonda na Jéhovah?
2 Sarango ye na l’heure aga ngangu na alango ti nda ni so azo mingi ayeke ndoye gi tere ti ala wani nga ala yeke kanga nzara ti bê ti ala pëpe (2 Tim. 3:1-3). Tongaso, tongana mbeni ita ayeke si na place ti kua ti lo, na rendez-vous, nga na abungbi lakue na l’heure, amba ti lo ayeke bâ ni, na ye so ayeke mû gonda na Jéhovah (2 Pi. 2:12). E yeke to nda ti akua ti e lakue na l’heure, me na ambeni ngoi e bâ so e yeke sara aye ti yingo na retard? Tongana e ga na bungbi na l’heure, si e he bia na e mä sambela ti tongo nda ni, e yeke fa so e ye ti mû tapande ti Babâ ti e so ayeke na yayu so ayeke sara ye lakue na lege ni.—1 aCor. 14:33, 40.
3. Ngbanga ti nyen sarango ye na l’heure afa so e ne amba ti e?
3 Ti sara ye na l’heure afa so e ne nga amba ti e (aPhil. 2:3, 4). Na tapande, tongana e yeke ga na abungbi ti congrégation nga na abungbi ti fango tënë na l’heure, e yeke gboto lê ti aita kirikiri pëpe. Na mbeni mbage, tongana e yeke ga ka lakue na retard, aita ayeke pensé so e bâ ngoi ti e wani la tongana kota ye ahon ti ala. Sarango ye na l’heure afa so e yeke sara ye alingbi na tënë ti yanga ti e, na yapungo tere, nga e yeke azo so ayeke be-ta-zo: azo so angoro e aye asarango ye tongaso mingi.
4. Tongana e yeke sara ka ye na retard, tongana nyen la e lingbi ti changé?
4 Tongana mo yeke sara ka ye na retard, gi ti hinga araison ni. Leke yâ ti kapa ti mo nzoni ti mû lege na mo ti sara akua ti mo na l’heure ni (Zo-ti. 3:1; aPhil. 1:10). Hunda na Jéhovah ti mû maboko na mo (1 Jean 5:14). Ti sara ye na l’heure ayeke mbeni oko ti alege so afa so e sara ye alingbi na akota commandement use so ahon atanga ni kue na yâ ti ndia so ayeke ti ndoye Nzapa nga na amba ti e.—Mat. 22:37-39.