‘Alingbi A Tara Ala’: Tongana Nyen?
1 Guengo na li ni lakue ti bungbi ti Jéhovah ahunda mingi ti wara aita so alingbi ti yö akungba ti serviteur ti mungo maboko. Mingi ti aita so ade ti hiri ala pepe na kusala nga na apendere, ayeke na nzala ti tene a mu na ala kusala na yâ ti kongrégation. Tongana a mu na ala ambeni kungba nde ti sala, ala yeke ba so ala lingbi ti sala ye, na ala hinga so ala yeke gue na li ni. Kozoni ti yö akungba so ayeke kota ahon, ‘alingbi a tara ala.’ (1 Tim. 3:10) Tongana nyen?
2 Kungba ti a-ancien: A-ancien ayeke gi ti ba gi pepe wala mbeni ita-koli alingbi na aye so a hunda ti ga serviteur ti mungo maboko, so a wara ni na 1 Timothée 3:8-13, me ala yeke ba nga angangu ti lo ti yö akungba. Ala lingbi ti hunda na lo ti mu maboko na kangbingo apériodique nga na ambeti, salango kusala na amicro, lekengo tele ti Da ti Royaume, na ambeni ye tongaso. Fade a-ancien ayeke ba tongana nyen lo yeke yö akungba so. Ala yeke gi alengo ti zo so ayeke ndulu ti sala kusala kue, zo so ayeke ga na l’heure, zo so ayeke mu li ni ti sala mbeni ye, zo so ahinga akatikati ti lo, zo so ayeke na yingo ti sala kusala na bê kue nga zo so ayeke ndulu ti sala songo na ambeni zo. (aPhil. 2:20) Lo yeke tapande na yâ yungo bongo ti lo na fango kua-li ti lo? Lo yeke na bibe ti yongo akungba? A-ancien aye ti ba ‘kusala ti lo na lege ti nzo tambela ti lo. A lingbi lo sala so na lege ti tâ be-ti-molenge na ti ndara.’ (Jacq. 3:13) Lo ye biani ti yö akungba na yâ ti kongrégation? Lo yeke bata komandema ti Jésus ti ‘sala si azo aga adisciple’ na mungo mbage ti lo na wâ na yâ kusala ti fango tene?—Mat. 28:19; ba La Tour de Garde ti lango 1 ti septembre 1990, alembeti 18-28.
3 Atä so Bible afa pepe mbeni ngu so alingbi zo awara ni kozoni ti ga serviteur ti mungo maboko, lo sala tene ti “ala so asala kusala [“akoli so asala kusala,” NW].” A yeke ngangu ti bi bê so tene “akoli” aba ala so ade ti si na lâ ti pendere ti ala pepe wala ala so angbâ pendere mingi, teti so a tene ala lingbi ti wara wali na amolenge. (1 Tim. 3:12, 13) A lingbi ala duti pepe na gbe ti “anzala ti lâ ti pendere,” me ala sala ye na tâ lege ni, na dutingo na nzoni tambela nga na nzoni yingo-ti-hinga na gbele Nzapa na azo.—2 Tim. 2:22, NW.
4 Atä so dutingo na ambeni kode ti salango ye ayeke nzoni, ye ti kota ahon ayeke ti wara mbeni nzoni bibe. Mbeni zo aye ti gonda Nzapa na ti sala na aita ti lo na tâ be-ti-molenge? Tongaso, fade Jéhovah ayeke deba nzoni na ndo angangu ti lo ti maï na yâ kongrégation.