Lege ti mû maboko na azo so ayeke na kpale ti dikongo mbeti

1. Ngbanga ti nyen ayeke lege ti ndara ape ti to nda ni hio ti manda buku Bible afa nyen na mbeni zo so ayeke na kpale ti dikongo mbeti?

¹ Azo so ayeke na kpale ti dikongo mbeti aye peut-être aye ti yingo, me ala lingbi ti duti na mbeto ti diko Bible wala ambeni mbeti nde. Ti mû buku Bible afa nyen na mara ti azo tongaso kpâ, alingbi ti duti nzoni ape. Tongana nyen la e lingbi ti mû maboko na ala na lege ti yingo? E hunda awafango tënë na yâ ti akodoro ahon 20 tongaso, ala yeke na akode mingi na ala fa aye so ala sara. Awango ti ala ayeke ga na gbe ni ge.

2. Ambeti wa la ayeke nzoni ti manda na ye na zo so ayeke na kpale ti dikongo mbeti?

² Tongana zo ni ahinga mbeti ape wala lo hinga mbeti mingi ape, mo lingbi ti to nda ni na brochure Mä Nzapa wala Mä Nzapa si mo wara fini ti lakue lakue. Mbeni ita-koli so ayeke pionnier na Amerika ayeke fa ti lo brochure so use kue na zo ni na pekoni lo hunda na lo ti soro ti so anzere na lo. Filiale ti Kenya atene so abrochure so ayeke anzoni ye ti sarango na kua ndali ti so na akodoro ti Afrika, a yeke fa ye na azo mingi na lege ti ambaï wala atere ahon ti fa ye na ala na lege ti hundango tënë na kiringo tënë. Zo so ahinga mbeti alingbi ti yeda hio ti diko mbeti na ti hunda tënë, me kode so alingbi ti nzere pëpe na mbeni zo so ahinga mbeti gi kete. Ti mingi ti awafango tënë, tongana ala bâ so zo ni ahinga ti diko mbeti gi kete, ala yeke komanse ti manda ye na lo na yâ ti abrochure tongana Nzoni tënë so alondo na Nzapa!, Mo lingbi ti Duti Ndeko ti Nzapa!, wala peut-être buku Mbeti ti ambaï ti yâ ti Bible.

3. Aye wa la ayeke nzoni ti hinga ni si e lingbi ti fa ye nzoni na azo so ahinga ti diko mbeti ape?

³ Gonda ala: Kamene alingbi ti sara azo so ahinga mbeti ape, nga mingi ti ala abâ tere ti ala so ala yeke ye oko ape. Kozo ye so a lingbi e sara, a yeke ti mû maboko na ala ti zi kamene ti ala si e fa tënë na ala. Mingi ti azo so ahinga mbeti ape ahinga ndo nga ala lingbi ti manda ye. Duti na nzoni bango ndo na ndo ti ala nga mo ne ala (1 Pi. 3:15). Tongana ala hinga so mo yeke bâ angangu so ala yeke sara, a yeke sara si ala yeke ngbâ ti manda ye ni nga ala yeke maï na lege ti yingo. Tongaso duti nduru ti gonda ala.

4. Tongana nyen la e lingbi ti wa azo so ahinga ti diko mbeti gi kete ti leke tere ti ala ndali ti a-étude ti ala?

⁴ Même tongana wamandango ye ni ahinga mbeti mingi ape, wa lo ti leke étude ti lo kozoni. Ambeni wafango tënë na kodoro ti Afrika ti Mbongo ayeke wa azo so ala manda Bible na ala ti hunda na mbeni zo ti sewa wala kamarade ti ala so ahinga ti diko mbeti nzoni ti mû maboko na ala. Ti mû maboko na azo so lo yeke manda Bible na ala ti leke étude ti ala, mbeni ita na Angleterre ayeke mû buku ti lo wani na ala na ngoi ti mandango ye ni ti tene ala bâ ambeni paragraphe ti bâ tongana nyen ayeke ngangu pëpe ti wara akiringo tënë ni tongana a sû kamba na gbe ni. Mbeni ita-koli na kodoro ti Inde atene na azo so lo yeke manda Bible na ala ti bâ afoto so ayeke na yâ ti ye ti manda ti yenga ti peko nga ti gbu li na ndo ni kozoni.

5. Tongana nyen la e lingbi ti fa so e kanga bê na ngoi so e yeke sara étude na mbeni zo?

⁵ Kanga bê ti mo: Atâa mbeti wa la mo yeke sara na kua, ngbâ gi na ndo ti akota tënë ni nga mû maboko na wamandango ye ni ti mä yâ ti aye ni nzoni. Na tongo nda ni, a yeke nzoni ti sara gi mbeni lisoro teti penze-ngbonga 10 wala 15 tongaso. Tara pëpe ti manda ngbâ ti aye na zo ni, peut-être gi mbeni kete wungo ti aparagraphe na ngoi ti mandango ye ni oko oko alingbi awe. Kanga bê ti mo tongana zo ni ayeke diko ye ni yeke yeke. Kite ayeke pëpe so lo yeke ye ande ti maï kode ti dikongo ye ti lo nzoni na ngoi so lo yeke gi ti hinga ye mingi na ndo ti Jéhovah. Ti mû maboko na wamandango ye ni ti sara tongaso, a yeke nzoni ti tisa lo ti ga na bungbi gi na tongo nda ni.

6. Tongana nyen la e lingbi ti mû maboko na azo ti manda ti diko mbeti?

⁶ Tongana awamandango ye ni ahinga ti diko mbeti nzoni, ala yeke gue na li ni hio na lege ti yingo (Ps. 1:1-3). Mingi ti aita amû maboko na azo so ala yeke manda ye na ala na lege so ala yeke mû ngoi kete na peko ti étude oko oko ti bâ brochure I sala Ngangu Kue ti Diko na ti Sû Mbeti. Tongana bê ti wamandango ye ni anze, peut-être mo lingbi ti kpengba lo na fango na lo ambeni ye so lo lingbi ti manda ti sara ni. Dë bê ti lo so Jéhovah ayeke iri tënë nzoni na ndo ti angangu so lo yeke sara, nga wa lo ti sambela ti wara mungo maboko (aProv. 16:3; 1 Jean 5:14, 15). Ambeni ita na kodoro ti Angleterre awa azo so ala manda Bible na ala ti zia na gbele ala ambeni nzoni ye ti si dä, peut-être ala gi kozoni ti hinga agere-mbeti ni, ala gi ti wara nga ti diko aversê so asoro ti diko ni, na nda ni ti diko ambeni versê ti Bible so asû ni na mbeni lege so akpengba pëpe. Ti mû maboko na azo ti diko mbeti ayeke pusu ala ngoi na ngoi ti sara nzara ti manda mbeti ni, ahon ti tene a fa gi ni na ala.

7. Ngbanga ti nyen a lingbi e ke pëpe ti fa tâ tënë na azo so ayeke na kpale ti dikongo mbeti?

⁷ Jéhovah ayeke bâ pëpe azo so ahinga mbeti gi kete tongana ambumbuse zo (Job 34:19). A yeke ye so ayeke na yâ ti bê ti zo la Jéhovah ayeke gi ni (1 Chron. 28:9). Tongaso, ke pëpe ti fa tâ tënë na azo so ayeke na kpale ti dikongo mbeti. Mo yeke na gbâ ti anzoni gbakuru so mo lingbi ti komanse na ni. Yeke yeke, mo lingbi ti kiri na étude ni na yâ ti buku Bible afa nyen tongaso si mo lingbi ti mû lege na lo ti hinga gbâ ti atâ tënë so ayeke na yâ ti Bible.