E fa ye na azo so ahinga ti diko mbeti nzoni pëpe
1. Kpale wa e lingbi ti wara na yâ ti fango tënë ti e?
1 Na yâ ti fango tënë ti e, ngoi na ngoi e yeke tingbi na kpale ti fango tâ tënë na azo so ayeke ngangu na ala ti diko mbeti. Nyen la e lingbi ti sara?
2. Tongana nyen na ngbanga ti nyen a lingbi e ne azo so ahinga ti diko mbeti nzoni pëpe?
2 E ne ala: A yeke dutingo ti bê ti zo ni la anzere na Jéhovah, me hingango mbeti ti lo pëpe (1 Sam. 16:7; aProv. 21:2). Tongaso, e yeke bâ tongana ambumbuse zo pëpe ala so ahinga ti diko mbeti nzoni pëpe. Mara ti azo tongaso ayeke duti ande nduru ti yeda ti tene e mû maboko na ala tongana e fa so e ne ala na e yeke na kangango bê (1 Pi. 3:15). So aye pëpe ti tene ti hunda na zo ni na ngangu ti diko mbeti ni. Tongana mbeni zo ayeke maï na yâ ti mandango pendere tâ tënë ti Mbeti ti Nzapa, lo lingbi ande nga ti duti na nzara mingi ti maï kode ti lo ti dikongo ye nzoni tongaso si lo lingbi ti hinga ngia ti ‘bi bê ti lo [wala ti “diko na kete go”, FD] lâ na bï’ Mbeti ti Nzapa.—Ps. 1:2, 3.
3. Kode wa e lingbi ti sara kusala na ni ti fa ye na azo so ahinga ti diko mbeti nzoni pëpe?
3 Akode nde nde ti manda Bible na ala: Afoto ayeke pendere lege ti fa ye na zo si lo bata na li ti lo. Mo lingbi ti hunda na wamandango ye ni ti fa bibe ti lo na ndo ti afoto so ayeke na yâ ti mbeti so mo yeke manda ye na lo na yâ ni. Na pekoni, hunda ambilimbili tënë ti mû maboko na lo ti gbu nda ti ye so foto ni afa. Diko aversê so afa atënë so foto ni asara tënë ni. Mo lingbi nga ti sara kusala na afoto ni ti dabe ti zo ni na ye so lo manda. Manda ye mingi mingi na zo ni na oko lango ni pëpe. Sigigi na mama-tene nga na akota tënë ti ye so ala yeke manda, na yôro na yâ ni ambeni tënë nde pëpe. Diko aversê ni tâ gi na yâ ti Bible ni, na hunda tënë na wamandango ye ni ti bâ wala lo mä yâ ti ye so lo diko. Ye so alingbi ti kono nzara ti lo ti maï kode ti lo ti dikongo ye nzoni si lo mveni lo lingbi ti gi nda ti tâ tënë so ayeke na yâ ti Bible.
4. Tongana nyen ti mû maboko na zo so e manda na lo ti maï kode ti dikongo mbeti ti lo?
4 Aye ti mû maboko na zo ti diko mbeti nzoni: Azo so ahinga ti diko mbeti nzoni pëpe wala so dikongo mbeti akpengba na ala alingbi ti hinga na ti bata nzoni mingi ye so a fa na ala. Mo lingbi ti wa azo tongaso ti mä dikongo ambeti ti e so ayeke na ndo ti kasete. Ti dengi më nzoni na wadikongo ye ni na ngoi so zo ayeke bâ gere ni na lê ti mbeti ti lo, même ti tara pekoni na gbe ti go ayeke mû ande maboko na lo ti hinga ti diko mbeti nzoni. Brochure I Sala Ngangu Kue ti Diko na ti Sû Mbeti ayeke duti ande nzoni mingi. Na ambeni ndo, a-ancien alingbi nga ti zia na sese ekole ti mandango dikongo mbeti na yâ ti congrégation. Awango so alingbi ti mû lege na e ti mû maboko na azo so ahinga ti diko mbeti nzoni pëpe ti hinga “aMbeti so ayeke nzoni-kue,” si ala wara ndara teti salut.—2 Tim. 3:15.