Sara kua na site jw.org na fango tënë

Site ti e ayeke mbeni nzoni gbakuru so amû maboko na e ti fa nzoni tënë “juska na ambage ti sese so ayeke tâ yongoro.” (Kus. 1:8). Mingi ti azo ayeke wara site jw.org ala wani pëpe. Me, ala yeke hinga tënë na ndo ni gi tongana mbeni ita afa ni na ala.

Mbeni surveillant so ayeke gue na ando nde nde atéléchargé vidéo Ndani nyen ti manda Bible? na ndo ti téléphone ti lo na lo fa ni na azo lakue tongana lege ni azi. Na tapande, na ngoi so lo gue da na da, lo tene: “Mbi yeke sara lisoro kete na azo kue ti mû maboko na ala ti wara kiringo tënë na akota hundango ndo ota so: Ngbanga ti nyen dunia so asi singo na akpale tongaso? Tongana nyen la Nzapa ayeke leke ande akpale ni? Nga tongana nyen la e lingbi ti hon ndo ni laso? Nduru vidéo so akiri tënë na ahundango ndo so.” Lo zia vidéo ni na zo ni na lo ku ti bâ wala zo ni ayeke sara ye tongana nyen. Vidéo ni ayeke pendere mingi a sara si mingi ti azo so abâ ni aye ti zi lê ti ala na tere ti écran ni ape juska ahunzi. Na pekoni, surveillant ni atene: “Ala mä fade ge atene so ala lingbi ti hunda na ndo ti site ni ti tene mbeni zo aga amanda Bible na ala. Teti so mbi yeke ge awe, mbi lingbi ti fa na ala tongana nyen la e yeke manda Bible ka na azo.” Tongana zo ni ayeda, lo fa na lo tongana nyen a yeke sara étude ni na lege ti brochure Nzoni tënë. Tongana zo ni ayeke na ngoi pëpe, lo mä tere na zo ni ti kiri ti fa ni na lo na vizite ti peko. Na ngoi so lo gue na mbeni place ti nyongo café ti wu tere kete, lo yeke gi ka ti sara lisoro na mbeni zo so ayeke na tere ti lo so aga ti wu nga tere, na pekoni lo yeke tene na lo mara ti oko tënë ni so. Mo yeke sara kua na site jw.org na fango tënë?”