Maï akode ti fango tënë ti mo: Fa so mo bi bê na zo ni

Ndani so a yeke kota ye: Jésus afa lani so lo bi bê na zo oko oko, nga lo ndoye ala. Na tapande, na ngoi so lo ye ti sava mbeni koli so mê ti lo akanga, lo mû koli ni na popo ti gbâ ti azo ni na lo gue na lo yongoro kete (Marc 7:31-35). Lo fa lani so lo ne adisciple ti lo na lege so lo hinga akatikati ti ala nga lo fa na ala pëpe gbâ ti aye so ayeke ngangu na ala ti gbu nda ni (Jean 16:12). Atâa so lo yeke na kota ndo na yayu, Jésus afa so lo bi bê na azo kue (2 Tim. 4:17). Ndali ti so e yeke adisciple ti Christ, e ye ti sara ye tongana ti lo (1 Pi. 2:21; 1 Jean 3:16, 18). Na ndo ni, e yeke sara ande kua nzoni mingi na fango tënë tongana e fa so e ne azo na hingango so dutingo ti zo oko oko, aye so agbu bê ti lo, nga aye so lo gi bê ti lo na ndo ni ayeke nde nde. Lo yeke duti ande nduru ti mä e tongana lo bâ so e ga gi pëpe ti fa tënë wala ti zia na lo ambeti, me lo hinga so e yeke bi bê na lo.