Afini bia ti voro na Jéhovah
1 Na lango 4 ti nze ti octobre ti ngu 2014, na ngoi ti kota bungbi ti ngu oko oko ti Watch Tower Bible and Tract Society of Pennsylvania so a sara ni ade ti ninga ape, a tene na aita so a yeke kiri ti changé ambeni ye na yâ ti mbeti ti bia ti e. So ayeke mbeni pendere tokua! A dabe ti azo kue so aga lani na kota bungbi ni so abia ti Royaume ayeke kota ye na yâ ti vorongo ti e.—Ps. 96:2.
2 Mo lingbi ti hunda tere ti mo: ‘Ngbanga ti nyen la a hunda ti changé ambeni ye na yâ ti mbeti ti bia ni?’ Anda ti tënë ni ayeke mingi. Kozoni kue, gbungo nda ti ye ti e na ndo ti Bible angbâ lakue ti gue na li ni, na ye so andu nga atënë ti yâ ti abia ti e (aProv. 4:18). Mbeni nda ti tënë ni nga ayeke so: Mingi ti atënë so ayeke na yâ ti mbeti ti bia so e yeke sara na kua fadeso a wara ni na yâ ti Fini dunia so asigigi kozo. A lingbi a changé atënë ti abia ti e ti lingbi na atënë ti Fini dunia so a kiri a leke yâ ni. A hunda ti sara ambeni kota kua ti tene atënë ti yâ ti abia ni ague oko na ti so e hinga fadeso, ni la a mû desizion ti zia ambeni fini bia na yâ ti mbeti ti bia ti e.
3 Eskê e yeke ku ti wara ande fini mbeti ti bia ni awe si e peut ti komanse ti he afini bia ni? Ên-ën. E yeke na ngia ti fa na ala so na yâ ti anze so ayeke ga, a yeke zia ande ambeni fini bia so na ndo ti site ti e jw.org! Tongana a zia mbeni fini bia na ndo ti site jw.org awe, a yeke hunda ti tene a he ni na hunzingo ti mbeni Bungbi ti Kusala na a yeke zia na tere ni “fini bia.”
4 Lege ti manda afini bia so: Mandango fini bia alingbi ti duti ngangu. Ye oko, na tapande ti mbeni wasungo psaume, e ye ti he bia na ngoi ti abungbi ti congrégation na ‘ti kaï pëpe.’ (Ps. 30:13). Ti manda mbeni fini bia, a yeke nzoni e mû peko ti aye so ge so.
Mä fani mingi bia so a yeke zia ni ande na ndo ti site ti e. Tongana mo mä bia ni fani mingi, a yeke ngangu pëpe ti tene mo hinga ni.
Manda atënë ti yâ ti bia ni, na tara ti bata ni na li ti mo.
He bia ni legeoko na mozoko ni. Sara tongaso juska mo hinga ni nzoni.
Na ngoi ti kapa ti vorongo Nzapa na yâ ti sewa, mû ngoi kete ti manda afini bia so juska sewa ti mo ahinga ni nzoni.
5 Na yâ ti anze so ayeke ga, tongana a hunda ti he mbeni fini bia na hunzingo ti Bungbi ti Kusala, a yeke zia ni ti tene aita amä ni kozo si. Na pekoni, aita ayeke he bia ni legeoko na mozoko tongana ti so e yeke sara ka lakue.
6 Tongana mo gbu li ti mo nzoni, mo yeke bâ so ti bungbi lego ti e oko ti he bia ti gonda na Jéhovah na ngoi ti abungbi ti e ayeke zia ngia na bê ti e. Ni la, tongana a ga ti he bia na ngoi ti abungbi ti e, a yeke nzoni e sigigi senge senge pëpe.
7 Mbeni ye ayeke nga dä so e lingbi ti sara ti fa so e bâ na nene ni abia so e yeke voro na Jéhovah. Na ngoi ti akota bungbi ti lango oko nga na ti lango ota, a yeke zia mbeni mozoko kozo si kapa oko oko ato nda ni. Fani use na yâ ti ngu oko oko, aita so aye Jéhovah na bê ti ala kue so alondo na ambage nde nde ti sese ayeke payé lege na nginza ti ala wani ti gue na Patterson, États-Unis, ti sigigi na apendere bia so e yeke mä ni wala e yeke he ni na yâ ti vorongo ti e. Ni la, tongana président ti kota bungbi ni ahunda na e ti tene e duti na e mä bia so aita so aleke, a lingbi e sara ni. Sarango tongaso ayeke mû ande maboko na e ti leke bê ti e ndali ti awango so ayeke ga na pekoni.—Esdras 7:10.
8 Na hunzingo ti bungbi ti e laso, e yeke he fini bia so li ni ayeke “Royaume akomanse kua awe, e ye si a ga!” A he bia so na ngoi ti kota bungbi ti ngu oko oko so a sara ni ade ti ninga ape. A sigigi na ni mbilimbili ti fa ngu 100 so Royaume akomanse kua awe.
9 Afini bia so ayeke “aye ti nzoni” so alondo na Jéhovah (Mat. 12:35a). Zia e leke na bê ti e ti manda afini bia so nga ti he ni na bê ti e kue, ti gonda nga ti sepela na Nzapa ti e ndali ti so a yeke na lege ni ti sara tongaso na lo.—Ps. 147:1.