Sara kua na site jw.org na fango tënë: “Ga kamarade ti Jéhovah”

Na yâ ti mbage “Ambeti ti e” so ayeke na ndo ti site jw.org a yeke wara “Ga kamarade ti Jéhovah” so a sigigi na ni ndali ti amolenge. Mo sara kua na ni na fango tënë awe? Tongana mo yeke manda Bible na mbeni babâ wala mbeni mama so ayeke na akete molenge, ngbanga ti nyen mo fa ni na lo ape? Ye so alingbi ti mû maboko na lo ti gi ti hinga ambeni ye nde na ndo ti site ti e.

Na ngoi ti kangbingo tract Sango ti Royaume No. 38, mbeni wali akomanse ti diko tract ni gi na peko ti so mbeni ita-koli amû ni na lo. Lo yeke na gbâ ti amolenge so aye ti hinga ye na ndo ti tract ni. Ita-koli ni asara lisoro na lo kete na ndo ti tract ni na lo fa na lo site ti e so ayeke na peko ti tract ni. Ndali ti so tënë ni anzere na wali ni, ita-koli ni afa na lo nga na amolenge ti lo mbeni oko ti avidéo ti Caleb na yâ ti téléphone ti lo.

Mbeni ita-wali asara tënë ti site ti e nga na atënë ti sewa so ayeke na ndo ti site ni na mbeni mama ti amolenge so lo na lo asara kua place oko. Wali ni na amolenge ti lo kue ague na ndo ti jw.org. Na pekoni, lo tene na ita-wali ni so amolenge ti lo ayeke he ka bia “Gue mo ‛fa tënë ni’” so ayeke oko ti abia ti yâ ti “Ga kamarade ti Jéhovah.”

A yeke nzoni mo gi ti hinga ye na ndo ti gbakuru so na ti téléchargé ambeni vidéo wala abia ni na ndo ti téléphone ti mo. Ye so ayeke mû maboko na mo ti sara kua na jw.org na fango tënë. So ayeke mbeni pendere ye so ayeke mû maboko na e ti sara kua na Seigneur tongana angbâa.—Kus. 20:19.