Lege ti sara kusala na brochure Azo wa la ayeke sara laso ye so Jéhovah aye? A leke brochure so ti mû lege na awamandango Bible ti ga na bungbi
1. Ndali ti araison ota wa a sigigi na brochure Azo wa la ayeke sara laso ye so Jéhovah aye?
1 Mo to nda ni awe ti sara kusala na brochure Azo wa la ayeke sara laso ye so Jéhovah aye? A leke brochure ni (1) ti mû maboko na awamandango Bible ti hinga e aTémoin ti Jéhovah, (2) ti mû maboko na ala ti manda ye na ndo ti akusala ti e, nga (3) ti fa na ala lege so bungbi ti e ayeke tambela. A yeke wara na yâ ti brochure so na lembeti oko ye ti manda oko so e lingbi ti mû penze-ngbonga oku ti si na bale-oko ti sara kete lisoro na ndo ni na hunzingo ti a-étude oko oko.
2. Fa lege so a leke na brochure so.
2 Lege so a leke na ni: A kangbi yâ ti brochure so na ambage ota, mbage oko oko asara tënë na ndo ti bungbi ti Jéhovah, tongana ti so a fa ni na li ni ge. A sû li ti tënë ti aye ti manda 28 ni kue tongana mbeni hundango tënë, na akete li ti tënë ni so a sû ni vuko vuko na gbe ni afa kiringo tënë ni. Na yâ ni ayeke wara afoto so a mû na yâ ti akodoro ahon 50, so a fa so kua ti e amû ndo kue. Na yâ ti ambeni ye ti manda ni ayeke wara a-encadré so li ti tënë ni ayeke “Ye so mo lingbi ti sara”, so na yâ ni a yeke wara awango so mo lingbi ti fa na wamandango ye ni ti mû pekoni.
3. Tongana nyen la e lingbi ti sara kua na brochure so?
3 Lege so mo lingbi ti sara kusala na ni: To nda ni na gbotongo lê ti azo na ndo ti hundango tënë so ayeke li ti tënë ti ye ti manda ni. Na pekoni, tongana ala diko ye ti manda ni legeoko awe, gboto lê na ndo ti akete li ti tënë ni so a sû ni vuko vuko. Ti hunzi na ni, kiri mo bâ ahundango tënë ti dango bê so ayeke na gbe ti lembeti ni. Mo lingbi ti diko ye ti manda ni kue wala mo lingbi ti kangbi yâ ni. Soro na lege ti ndara aversê ti dikongo ni. Girisa pëpe ti sara tënë na ndo ti afoto nga na a-encadré ni. Mingi ni, a yeke nzoni ti sara aye ti manda ni na molongo ni. Me, mo lingbi nga ti sara lisoro hio na zo ni na ndo ti mbeni ye ti manda so agbu bê ti lo. Na tapande, tongana lango ti mbeni assemblée ayeke ga nduru, mo lingbi ti huru ti bâ ye ti manda 11.
4. Ngbanga ti nyen mo yeke lani na ngia ti wara gbakuru so?
4 Tongana e manda Bible na mbeni zo, e yeke mû maboko na lo ti hinga Babâ ti e ti yayu. Ye oko, e lingbi nga ti fa na lo ye na ndo ti bungbi ti Jéhovah (aProv. 6:20). So tâ ngia si e yeke lani na ni ti wara brochure so amû lege na e ti sara ye so!