Zo so acréé e andoye e mingi

1. ZO SO ACRÉÉ E ASARA SI LÂ ASU

Tongana lâ ayeke dä ape, ka fini ayeke na ndö ti sese ape. Ngangu ti lâ asara si akugbe, afleur, alê ti akeke nga na angongoa ni asigi. A sara nga si aracine ti akeke agboto ngu so ayeke na yâ ti sese ague na ni na yâ ti akugbe ti akeke ni, na pekoni ti tene aga guru ti ngu na ague na yâ ti pupu.

2. ZO SO ACRÉÉ E ASARA SI NGU APIKA

Nzapa amû ngu-nzapa ti sara si sese alë alê ti kobe ti tene e te. Lo mû na e ngu-nzapa so alondo na nduzu, angoi so alê ti kobe ayeke lë dä mingi nga na akobe mingi mingi, na lo sara si ngia asi bê ti e.

3. ZO SO ACRÉÉ E AMÛ NA E KOBE NA BONGO

Ababâ ayeke gi bê ti ala ti tene azo ti sewa ti ala awara kobe nga na bongo. Bâ tënë so Mbeti ti Nzapa atene: “Ala bâ andeke ti nduzu nzoni. Ala yeke lu ngongoa ti kobe pëpe wala ala yeke ko ye wala ala yeke bata ye na gogoro pëpe. Atâa so kue, Babâ ti ala so ayeke na yayu ayeke mû kobe na andeke so. Ngere ti ala ahon ngere ti andeke so ape?”—Matthieu 6:25, 26.

“Ala bâ afleur ti ngonda nzoni, ala bâ tongana nyen la afleur so ayeke kono. . . . Me mbi tene na ala so même [Gbia] Salomon na yâ ti gloire ti lo kue ayü bongo tongana mbeni oko ti afleur so pëpe. So Nzapa ayeke yü bongo tongaso na apere ti ngonda . . . , a yeke nzere ande mingi na lo ti yü bongo na ala ape?”—Matthieu 6:28-30.

So Nzapa apeut ti mû na e kobe nga na bongo, a fa so lo peut nga biani ti aidé e ti wara ambeni ye nde so e bezoin ni. Tongana e gi ti sara ye so bê ti Nzapa aye, lo peut ti sara tufa na ndö ti e ti wara kobe wala ti wara kua tongaso si e vo na aye so e bezoin ni.—Matthieu 6:32, 33.

Biani, ti gbu li na ndö ti lâ, ngu-nzapa, andeke nga na afleur ayeke pusu ande e ti ye Nzapa. Mbage so ayeke ga na peko ayeke fa tongana nyen la Zo so acréé e asara tënë na e azo.