Lege ti ndoye Nzapa nga na mba ti mo

Atâa so aChrétien ayeke pëpe na gbe ti Ndia ti Moïse, acommandement use so ahon atanga ni kue so ahunda ti ndoye Nzapa nga na mba ti mo afa na nduru tënë ye so Jéhovah ahunda na e (Mt 22:37-39). A dü zo dungo na ndoye ni so ape. A lingbi zo agi lege ti duti na ni. Tongana nyen? Mbeni kpengba lege ni ayeke ti diko Bible lâ oko oko. Tongana e gbu li na ndö ti ambage nde nde ti sarango ye ti Nzapa so a fa ni na yâ ti Bible, e yeke bâ “nzoni ti Jéhovah”. (Ps 27:4). A yeke sara si e kiri e ye lo mingi nga apensé ti e ayeke gue oko na ti lo. Ye so ayeke pusu e ti bata acommandement ti Nzapa, so na popo ni a yeke wara ti so ahunda ti ndoye amba ti e (Jn 13:34, 35; 1Jn 5:3). Bâ ambeni lege ota so mo lingbi ti sara si dikongo Bible ti mo anzere mingi:

• Tara ti bâ aye ni na yâ ti li ti mo, zia terê ti mo na place ti azo ni. Tara ti bâ so mo yeke lani dä. Nyen la mo bâ, mo mä nga mo mä fion ni? Tënë ti bê ti azo ni ayeke peut-être so wa?

  

• Changé kode ti dikongo ye ni. Bâ ambeni lege ni la: Diko ye ni na kota go, wala mû peko ni na ngoi so mo yeke mä enregistrement ni. Diko ye na ndö ti mbeni zo so Bible asara tënë ti lo wala mbeni tënë nde ahon ti diko achapitre ni na peko ti terê. Na tapande, sara kua na A7 wala B12 na yâ ti Mbeti ti Nzapa ti fini dunia ti diko asango na ndö ti Jésus. Diko chapitre kue so a mû versê ti lâ oko oko na yâ ni. Diko abuku ti Bible na molongo so a sû na ni lani.

  

• Diko ye ni ti mä yâ ni. Même ti diko chapitre oko lango oko oko ti mä yâ ni nga ti gbu li dä ayeke nzoni mingi ahon gï ti diko gbâ ti achapitre. Gbu li na ndö ti ndo so ye ni asi dä. Gi ti bâ anzene nzene tënë na ndö ni. Sara kua na acarte nga na akete gere-mbeti so aversê ayeke na terê ni. Sara kamême recherche na ndö ti mbeni ye oko so mo mä yâ ni ape. Tongana lege ayeke dä, sara si ngoi so mo diko na Bible alingbi terê na ti so mo mû ti gbu li na ndö ni.