Ndoye nga na singila ti mo na Jéhovah ayeke pusu mo ti wara batême

1-2. Tongana ti so a fa na Kusala 8:27-31, 35-38, nyen la apusu lani mbeni kota zo ti Éthiopie ti wara batême?

MO YE ti wara batême ti ga mbeni disciple ti Christ? Ndoye nga na singila ti bê ti azo mingi apusu ala ti mû desizion so. Bâ tapande ti mbeni kota zo ti kua ti gbia-wali ti Éthiopie.

² Zo ti Éthiopie so asara ye hio alingbi na ye so lo manda na yâ ti Bible. (Diko Kusala 8:27-31, 35-38.) Nyen la apusu lo lani ti sara tongaso? Kite ayeke dä ape so lo bâ Mbeti ti Nzapa na nene ni mingi ndali ti so lo yeke diko lani mbeni versê ti mbeti ti Ésaïe na ngoi so lo yeke na yâ ti puse ti mbarata. Na ngoi so Philippe asara lisoro na koli so, koli ni akiri singila ndali ti ye so Jésus asara lani ndali ti lo. Me ngbanga ti nyen la kota zo ti Éthiopie so ague lani na Jérusalem? A yeke ngbanga ti so ndoye ti Jéhovah akomanse ti maï lani na yâ ti bê ti lo awe. E hinga ni tongana nyen? Lo londo lani ti voro Jéhovah na Jérusalem. Na bango ni, koli so azia lani awe bungbi ti vorongo nzapa so a dü lo dä na lo bungbi na oko mara so a zia azo ti yâ ni nde ndali ti tâ Nzapa. A yeke gï même ndoye ndali ti Jéhovah so la apusu koli so ti sara mbeni ye so ayeke kota mingi, so ayeke ti wara batême nga ti ga mbeni disciple ti Christ.—Mat. 28:19.

3. Nyen la apeut ti kanga lege na mbeni zo ti wara batême? (Bâ encadré “Nyen la ayeke na yâ ti bê ti mo?”)

³ Ndoye ti mo na mbage ti Jéhovah alingbi ti pusu mo ti wara batême. Me ndoye alingbi nga ti kanga lege na mo ti sara ni. Na alege wa? Gbu li na ndö ti atapande so. Peut-être mo ye mingi afami ti mo nga na akamarade ti mo so ayeke aTémoin ape, na peut-être mo sara mbeto so tongana mo wara batême, ala yeke ke mo ande (Mat. 10:37). Wala peut-être mo ye asarango ye so mo hinga so Nzapa ake ni nga peut-être mo bâ so a yeke ngangu ti zia lege ti mungo peko ti aye ni so (Ps. 97:10). Wala peut-être mo yeke sara amatanga so andu abungbi ti vorongo nzapa ti wataka depuis kete ti mo. Peut-être mo bata na li anzoni ye ti angoi ti amatanga ni. Ye so asara si peut-être mo bâ so a yeke ngangu ti zia lege ti asarango ye so anzere na Jéhovah ape (1 aCor. 10:20, 21). A lingbi mo hunda terê ti mo na hunda so: “Nyen la mbi ye ni mingi wala zo wa la mbi ye lo mingi?”

LO SO E DOIT TI YE LO AHON AZO KUE

4. Kota raison wa la ayeke pusu mbeni zo ti wara batême?

⁴ Anzoni ye mingi ayeke dä so mo ye ni nga mo kiri singila ndali ni. Na tapande, même kozo ti tene aTémoin ti Jéhovah amanda Bible na mo, peut-être mo bâ lani Bible na nene ni mingi. Nga peut-être mo komanse ti maï ndoye ti mo na mbage ti Jésus. Fadeso so mo hinga aTémoin ti Jéhovah, peut-être a nzere na mo mingi ti duti ndo oko na ala. Me a ye ti tene ape so gï yengo anzoni ye ni so ayeke pusu mo ti yeda ti mû terê ti mo na Jéhovah na ti wara batême. Kota raison so ayeke pusu mo ti wara batême ayeke so mo ye Jéhovah Nzapa mingi. Tongana mo ye Jéhovah ahon tanga ti aye kue, mo yeke zia pëpe si mbeni ye wala mbeni zo akanga lege na mo ti sara na lo. Yengo so mo ye na Jéhovah ayeke pusu mo ti wara batême nga ayeke mû maboko na mo ti ngbâ be-ta-zo na lo na peko ti batême ti mo.

5. Aye wa la e yeke bâ na yâ ti article so?

⁵ Jésus atene so e doit ti ndoye Jéhovah na bê ti e kue, na âme ti e kue, na bibe ti e kue nga na ngangu ti e kue (Marc 12:30). Tongana nyen la mo lingbi ti gi ti ndoye Jéhovah nga ti ne lo mingi tongaso? Tongana e gbu li ti e na ndö ti ndoye so Jéhovah andoye na e ayeke pusu nga e ti ndoye lo (1 Jean 4:19). Tongaso, na yâ ti article so e yeke bâ aye so a lingbi mo sara ti maï ndoye ti mo na mbage ti Jéhovah na ti wara batême.

6. Ti gue oko na aRomain 1:20, mbeni lege so mo lingbi ti manda ye na ndö ti Jéhovah ayeke so wa?

⁶ Manda ye na ndö ti Jéhovah na lege ti aye so lo créé. (Diko aRomain 1:20; Apoc. 4:11.) Gbu li na ndö ti aye nga na anyama so Jéhovah asara nga tongana nyen la aye ni so afa so lo yeke na ndara mingi. Gbu li kete na ndö ti lege so Jéhovah aleke na terê ti mo so apika bê mingi (Ps. 139:14). Gbu nga li na ndö ti ngangu so Jéhovah asara lâ na ni nga hinga so lâ ayeke gï mbeni tongoro oko na popo ti ala milliard mingib (És. 40:26). Tongana mo sara tongaso, mo yeke kiri ti ne lo ande mingi. Ye oko, ti hinga ndara ti Jéhovah nga na ngangu ti lo ayeke gï mbage ti ye so ayeke na gunda ti songo ti mo na lo. Me ti ye Jéhovah ngangu, a lingbi mo hinga ambeni ye mingi na ndö ti lo.

7. Ti ye Jéhovah mingi, nyen la mo bezoin ti hinga na bê ti mo kue?

⁷ Mo bezoin ti hinga na bê ti mo kue so Jéhovah aye mo. A yeke ngangu na mo ti yeda so Lo so asara yayu na sese ahinga so mo yeke dä nga lo yeke pensé na mo? Tongana a yeke tongaso, girisa ape so Jéhovah ayeke “yongoro pëpe na e oko oko kue.” (Kus. 17:26-28). Lo “bâ yâ ti bê ti azo kue” nga lo tene na e so, tongana ti so David atene na Salomon, “tongana mo gi lo, lo yeke sara si mo wara lo”. (1 Chron. 28:9). Biani raison so mo yeke manda Bible ayeke so, tongana ti so Jéhovah atene: ‘Mbi gboto mo na mbage ti mbi.’ (Jér. 31:3). Tongana mo hinga aye kue so Jéhovah asara ndali ti mo, mo yeke ye lo mingi.

8. Tongana nyen la mo lingbi ti fa so mo kiri singila na Jéhovah ndali ti ndoye ti lo?

⁸ Mbeni lege ti kiri singila na Jéhovah ndali ti ndoye ti lo ayeke ti sara tënë na lo na lege ti sambela. Mo yeke ye Nzapa mingi tongana mo yeke fa na lo aye so agbu bê ti mo nga mo yeke kiri singila na lo ndali ti aye kue so lo sara ndali ti mo. Nga songo ti mo na Jéhovah ayeke kpengba tongana mo bâ tongana nyen la lo kiri tënë na asambela ti mo (Ps. 116:1). Mo yeke hinga na bê ti mo kue so lo comprendre mo. Me ti ga nduru na Jéhovah, a lingbi mo hinga ndani so lo ye ambeni ye, lo ke ambeni ye nga lo yeke sara ambeni ye. A lingbi mo hinga nga ye so lo ye na mbage ti mo. Oko lege so mo lingbi ti hinga na ni ayeke na lege ti mandango Mbeti ti lo, Bible.

9. Tongana nyen la mo lingbi ti fa so mo bâ Bible na nene ni?

⁹ Gi ti bâ Bible na nene ni. Gï na yâ ti Bible oko la mo yeke wara tâ tënë na ndö ti Jéhovah nga na ye so lo leke na bê ti lo ti sara ndali ti mo. Mo yeke fa so mo bâ Bible na nene ni tongana mo diko ni lâ na lâ, mo leke terê ti mo ndali ti étude ti mo nga mo sara ye alingbi na aye so mo manda (Ps. 119:97, 99; Jean 17:17). Eskê mo yeke na programme ti mo ti dikongo Bible? Mo yeke sara ye alingbi na ni, na lege so mo sara kue ti diko Bible lâ na lâ?

10. Mbeni ye so asara si Bible ayeke tâ nde mingi ayeke so wa?

¹⁰ Mbeni ye so asara si Bible ayeke tâ nde mingi ayeke so na yâ ni a yeke wara atënë so alondo na azo so abâ Jésus. A yeke gï oko buku so afa ye so Jésus asara lani ndali ti mo. Tongana mo hinga aye so Jésus atene nga na aye so lo sara lani, mo yeke yeda ti lë songo ti kamarade na lo.

11. Nyen la ayeke mû maboko na mo ti ye Jéhovah?

¹¹ Gi ti ye Jésus na mo yeke ye Jéhovah ande mingi ahon ti kozo. Ngbanga ti nyen? Ngbanga ti so Jésus asara ye tâ gï tongana Babâ ti lo (Jean 14:9). Tongaso, tongana mo manda ye na ndö ti Jésus mingi, mo yeke hinga Jéhovah nzoni nga mo yeke bâ lo na nene ni mingi. Gbu li na ndö ti mawa so asara Jésus ndali ti azo so amba ti ala abâ ala tongana ambumbuse zo ndali ti so ala yeke awayere, ala yeke na kobela wala ala woko. Gbu li nga na ndö ti anzoni wango so lo mû nga tongana nyen la fini ti mo aga nzoni ahon ti kozo na ngoi so mo sara ye alingbi na ni.—Mat. 5:1-11; 7:24-27.

12. Tongana mo manda ye na ndö ti Jésus, a lingbi ti pusu mo ti sara nyen?

¹² Peut-être mo yeke ndoye Jésus mingi tongana mo gbu li mingi na ndö ti sandaga so lo mû tongaso si a lingbi ti pardonné siokpari ti e (Mat. 20:28). Tongana mo comprendre so Jésus ayeda na bê ti lo ti kui ndali ti mo, peut-être a yeke pusu mo ti changé bê ti mo nga ti gi ti tene Jéhovah apardonné mo (Kus. 3:19, 20; 1 Jean 1:9). Tongana mo ye Jésus na Jéhovah mingi, mo yeke ye mingi ti duti na terê ti azo so aye nga ala.

13. Nyen la Jéhovah aleke ndali ti mo?

¹³ Gi ti ye azo so aye Jéhovah. Peut-être azo ti sewa ti mo so ayeke aTémoin ape nga na angbene kamarade ti mo acomprendre ape ndani so mo ye ti mû terê ti mo na Jéhovah. Ala lingbi même ti kanga lege na mo. Jéhovah ayeke mû maboko na mo na lege so mo yeke wara na yâ ti congrégation aita so ayeke tongana mbeni sewa. Tongana mo ngbâ nduru na terê ti aita so, ala yeke ye mo nga ala yeke mû na mo maboko so mo bezoin ni (Marc 10:29, 30; aHéb. 10:24, 25). A si na mbeni ngoi, peut-être azo ti sewa ti mo ayeke sara nga na Jéhovah nga ala yeke mû peko ti afango lege ti lo.—1 Pi. 2:12.

14. Tongana ti so a fa na 1 Jean 5:3, nyen la mo bâ na peko ti so mo hinga afango lege ti Jéhovah?

¹⁴ Gi ti bâ afango lege ti Jéhovah na nene ni nga sara ye alingbi na ni. Kozo ti tene mo hinga Jéhovah, peut-être mo wani la mo yeke soro ye so ayeke nzoni na ye so ayeke sioni, me fadeso mo bâ so afango lege ti Jéhovah ayeke nzoni mingi. (Ps. 1:1-3; diko 1 Jean 5:3.) Gbu li na ndö ti awango so Bible amû na akoli ti awali, awali ti akoli, ababâ na amama nga na amolenge (aÉph. 5:22–6:4). So mo sara ye alingbi na awango so, eskê mo bâ so azo ti sewa ti mo ayeke na ngia mingi? So mo sara ye alingbi na afango lege ti Jéhovah na ndö ti sorongo anzoni kamarade, eskê mo bâ so mo ga nzoni zo mingi ahon ti kozo? Eskê mo yeke na ngia mingi? (aProv. 13:20; 1 aCor. 15:33). Peut-être mo yeke kiri tënë En na ahunda so.

15. Nyen la mo lingbi ti sara tongana mo bezoin ti tene a mû maboko na mo ti sara ye alingbi na amama-ndia ti Bible?

¹⁵ Na ambeni ngoi, peut-être mo bâ so a yeke ngangu ti hinga tongana nyen ti sara ye alingbi na amama-ndia ti Bible so mo manda. A yeke ndali ni la Jéhovah asara kua na bungbi ti lo ti mû na mo ambeti so asara tënë na ndö ti Bible ti mû maboko na mo ti hinga popo ti ye ti nzoni na ye ti sioni (aHéb. 5:13, 14). Tongana mo diko ambeti so nga mo manda ni, mo yeke bâ tongana nyen la ambeti so ayeke nzoni nga ayeke polele, na peut-être mo yeke yeda ti ga na yâ ti bungbi ti Jéhovah.

16. Jéhovah aleke yâ ti bungbi ti lo so azo ti lo ayeke na yâ ni tongana nyen?

¹⁶ Gi ti ye bungbi ti Jéhovah nga ti mû maboko na ni. Jéhovah abungbi azo ti lo na yâ ti acongrégation; Molenge ti lo, Jésus, la ayeke na li ti ala kue (aÉph. 1:22; 5:23). Jésus azia mbeni kete groupe ti akoli so a soro ala ti gue na yayu ti mû li ni ti bâ lege ti kua so lo ye ti tene a sara laso. Jésus atene groupe ti akoli so ayeke “ngbâa be-ta-zo so ayeke sara ye na ndara”, na ala bâ na nene ni kua so a mû na ala ti mû na mo kobe ti yingo nga ti bata mo na lege ti yingo (Mat. 24:45-47). Mbeni lege so ngbâa be-ta-zo ayeke mû maboko ti tene a bâ lege ti mo ayeke so ala yeke bâ nzoni si a zia a-ancien so alingbi ti fa lege na mo (És. 32:1, 2; aHéb. 13:17; 1 Pi. 5:2, 3). A-ancien ayeke nduru ti sara kue ti dë bê ti mo nga ti mû maboko na mo ti ga nduru mingi na Jéhovah. Me mbeni kota ye so ala lingbi ti sara ndali ti mo ayeke ti mû maboko na mo ti fa ye na azo na ndö ti Jéhovah.—aÉph. 4:11-13.

17. Ti gue oko na aRomain 10:10, 13, 14, ngbanga ti nyen la e yeke sara tënë na azo na ndö ti Jéhovah?

¹⁷ Mû maboko na azo ti ye Jéhovah. Jésus atene na adisciple ti lo ti fa ye na azo na ndö ti Jéhovah (Mat. 28:19, 20). E lingbi ti sara ye alingbi na commandement so ndali ti so e hinga so e doit ti sara ni. Me na ngoi so mo ye Jéhovah mingi, pensé ti mo ayeke gue oko na ti bazengele Pierre nga na ti bazengele Jean, so atene: “E lingbi ti kaï pëpe ti sara tënë na ndö ti aye so e bâ na e mä.” (Kus. 4:20). A yeke nzere na e mingi tongana e mû maboko na mbeni zo ti ye Jéhovah. Imaginé tongana nyen la terê ti Philippe anzere lani mingi na ngoi so lo mû maboko na mbeni zo ti Éthiopie so ti hinga tâ tënë so ayeke na yâ ti Mbeti ti Nzapa nga ti wara batême. Tongana mo mû tapande ti Philippe na mo sara ye alingbi na commandement so Jésus amû ti fa tënë, mo yeke fa so mo ye ti ga Témoin ti Jéhovah. (Diko aRomain 10:10, 13, 14.) Ti si juska ge, peut-être mo yeke hunda terê ti mo na même hunda so zo ti Éthiopie so ahunda lani: “Nyen la akanga lege na mbi ti wara batême?”—Kus. 8:36.

18. Nyen la e yeke bâ na yâ ti article ti peko?

¹⁸ Mo yeke mû kpengba desizion so ahon atanga ni kue na yâ ti fini ti mo tongana mo mû desizion ti wara batême. A lingbi mo gbu li ti mo nzoni na ndö ti aye so andu ni, ndali ti so a yeke kota desizion mingi. Nyen la a lingbi mo hinga na ndö ti batême? Nyen la a lingbi mo sara kozo na batême nga na pekoni? Article ti peko ayeke kiri tënë na ahunda so.