“Fadeso mbi ye fango tënë mingi”

MBI PERDRE NGIA TI MBI

Mawa ni ayeke so, na ngoi so mbi wara ngu 13 tongaso, kpengba songo so mbi yeke na ni na Jéhovah akomanse ti woko. Amba ti mbi ti ekole ayeke na liberté mingi, na mbi ye nga ti wara liberté tongana ala. Mbi bâ lani so andia ti babâ na mama ti mbi nga ye so ahunda na aChrétien akanga lege na mbi mingi, nga mbi bâ so vorongo Jéhovah ayeke mbeni ngangu kua. Mbi hinga lani lakue so Jéhovah ayeke dä, me mbi yeke nduru na lo ape.

Mbi zia lani fango tënë ape, me mbi fa tënë gï tongaso. Na ngoi so mbi yeke gue ti fa tënë, mbi yeke leke nga terê ti mbi ape, tongaso a yeke ngangu na mbi ti to nda ti lisoro na mbeni zo wala ti ngbâ ti sara ni. Ye so asara si mbi yeke na vizite wala étude ape, a nzere na mbi ape ti fa tënë, nga mbi ye même fango tënë encore ape. Mbi yeke hunda terê ti mbi, mbi tene: ‘Tongana nyen la mbeni zo apeut ti ngbâ ti fa tënë yenga na yenga nga nze na nze?’

Na ngoi so mbi wara ngu 17, mbi ye lani mingi ti duti na liberté. Tongaso, mbi leke aye ti mbi, mbi quitté yanga-da na mbi gue na Australie. Vundu asara babâ na mama ti mbi na ngoi so mbi yeke quitté. Ala gi lani bê ti ala, me ala pensé so mbi yeke ngbâ ti sara na Jéhovah.

Na Australie, aye so mbi yeke sara ti voro na Jéhovah akiri na peko même mingi. Mbi komanse ti kpe abungbi. Mbi sara kamarade na amaseka so, legeoko tongana mbi, a nzere na ala ti gue na abungbi na lakui me na ndade ni na lakui ala yeke gue ti nyon sämba nga ti dodo na yâ ti aboîte de nuit. Tongana mbi pensé na ndö ti ngoi ni so, mbi bâ so gere ti mbi oko ayeke na yâ ti tâ tënë nga mbeni oko ayeke na yâ ti dunia, me mbi hinga vrai ndo so mbi yeke dä ape.

MBI MANDA MBENI KPENGBA YE SO MBI KU TERÊ TI MBI NA NI APE

Ngu use tongaso na pekoni, teti mbeni kete ngoi, mbi tingbi na mbeni ita-wali so sân ti hinga lo sara si mbi komanse ti gbu li ti mbi na ndö ti ye so mbi yeke sara lani na yâ ti gigi ti mbi. Mbi na aita-wali kumbamba osio e lango da oko, na e tisa surveillant ti circonscription na wali ti lo, Tamara, ti lango na da ti e yenga oko. Na ngoi so koli ti Tamara ayeke bâ lege ti akua ti congrégation, lo yeke duti na terê ti e, na e na lo e yeke he ngia. Mbi ye tongaso. Lo yeke sara ye ahon ndo ni ape, nga a yeke ngangu ape ti sara lisoro na lo. Ahon gbungo li ti mbi so mbeni zo so ayeke sara kua ti Jéhovah mingi ayeke he ngia na azo tongaso.

Tamara ayeke zo so ayeke na ngia mingi. Yengo so lo ye na tâ tënë nga na fango tënë apusu nga azo ti ye ni. A nzere na lo mingi ti sara ye kue so lo peut ti sara ndali ti Jéhovah, me ti mbi, mbi yeke na ngia ape ndali ti so mbi yeke sara na Jéhovah gï kete. Nzoni bango ndo ti lo nga na ngia so lo yeke na ni asara ye mingi na ndö ti fini ti mbi. Tapande ti lo asara si mbi pensé na ndö ti mbeni kpengba tâ tënë ti Bible: Jéhovah aye ti tene e kue e sara na lo “na ngia na bê” nga “na dekongo ti ngia.”—Ps. 100:2.

MBI KIRI MBI YE FANGO TËNË MINGI

Mbi ye lani ti duti na ngia tongana ti Tamara, me ti wara ni, mbi bezoin ti sara ambeni kota changement. A mû lani ngoi, me yeke yeke mbi komanse ti sara ambeni kete changement. Mbi komanse ti leke terê ti mbi ndali ti fango tënë, nga na ambeni ngoi mbi sara kua ti pionnier auxiliaire. Ye so amû maboko na mbi ti sara mbeto ape na fango tënë. So mbi sara kua na Bible mingi na fango tënë, a nzere na mbi mingi ti fa tënë. Kete na pekoni, mbi sara kua ti pionnier auxiliaire nze oko oko.

Mbi komanse ti sara kamarade na aita so ngu ti ala ayeke nde nde, so ayeke sara kua ti Jéhovah na bê ti ala kue nga so aye ni. Nzoni tapande ti ala amû maboko na mbi ti gbu li ti mbi na ndö ti ye so ayeke kota na yâ ti fini ti mbi nga ti komanse ti diko Bible lâ oko oko. Fango tënë akiri anzere na mbi mingi nga na nda ni mbi ga pionnier permanent. Na peko ti angu mingi, mbi bâ so mbi yeke na ngia nga mbi yeke nzoni na yâ ti congrégation.

MBI WARA MBENI ZO SO MBI NA LO E YEKE SARA KUA TI PIONNIER LAKUE

Ngu oko na pekoni, mbi na Alex e wara terê, lo yeke mbeni zo so asara ye na nzoni bê, so asara ye na bê ti lo kue, lo ye Jéhovah nga na kua ti fango tënë. Lo yeke lani wakua ti mungo maboko nga lo sara kua ti pionnier permanent a sara ngu omene awe. Alex afa nga lani tënë teti ambeni ngoi na ndo so a bezoin awafango tënë dä mingi na Malawi. Kâ, lo passé ngoi na amissionnaire so azia na lo nzoni tapande nga awa lo ti ngbâ ti zia aye ti Royaume na kozo ndo.

Na ngu 2003, mbi na Alex e sara mariage na e ngbâ na yâ ti kua ti ngoi kue juska laso. E manda apendere ye mingi, na Jéhovah asara tufa na ndö ti e na alege mingi.

JÉHOVAH ASARA TUFA NA NDÖ TI E ENCORE MINGI

Na ngu 2009, a tisa e ti sara kua ti missionnaire na Timor oriental, mbeni kete kodro na ndö ti azoa ti Indonésie. A étonné e ngangu, terê ti e anzere nga mbeto asara e na oko ngoi ni. Nze oku na pekoni, e si na Dili, li-kodro ti Timor oriental.

Guengo ti e kâ asara si e sara akota changement na yâ ti fini ti e. E doit lani ti changé alingbi na angobo ti fini ndo ni, yanga ti kodro ni, akobe ni nga na fason so azo ayeke vivre na ni. Na fango tënë, fani mingi e bâ awayere, azo so ahinga mbeti mingi ape nga na azo so a sara ye ti ngangu na ala. Nga, e bâ azo mingi so bira nga na aye ti ngangu so a sara na zo asara si ala yeke na angangu kpale nga na kä na bê ti ala.a

Fango tënë kâ anzere na e lani mingi. Na tapande, mbeni lâ mbi wara Maria, mbeni maseka-wali ti ngu 13 so vundu asara lo.b Mama ti lo akui aninga kete awe nga lo yeke bâ babâ ti lo hio hio ape. Tongana ti amolenge mingi so ayeke na ngu ti lo, lo hinga ye so lo yeke sara na yâ ti gigi ti lo ape. Mbi dabe ti mbi so mbeni lâ, lo toto na ngoi so lo yeke fa na mbi atënë ti bê ti lo. Me mbi comprendre tënë so lo tene ape, ndali ti so ade mbi hinga yanga ti kodro ti lo nzoni ape. Mbi sambela Jéhovah mbi hunda na lo ti mû maboko na mbi ti dë bê ti lo nga na pekoni mbi komanse ti diko na lo aversê so akpengba lo. Ambeni ngu na pekoni, mbi bâ tongana nyen la tâ tënë achangé bango ndo ti Maria nga na gigi ti lo kue nga lo ga pendere. Lo wara batême nga laso, lo yeke manda Bible na azo. Laso, Maria ayeke na yâ ti kota sewa ti awakua ti Jéhovah nga lo bâ so a ye lo.

Jéhovah asara tufa na ndö ti kua ti fango tënë na Timor oriental. Atâa so mingi ti awafango tënë awara batême gï na yâ ti angu bale oko so ahon, ala mingi ayeke apionnier, awakua ti mungo maboko wala a-ancien. Ambeni ayeke sara kua na yâ ti bureau ti traduction so ayo na Béthel nga ala mû maboko ti kiri na peko ti ambeti ti e na ayanga ti kodro ti ndo ni. A nzere na mbi ti mä ala na hengo bia na ngoi ti abungbi, ti bâ ngia so ayeke na lê ti ala nga ti bâ so ala ga kamarade ti Jéhovah.

MBI PENSÉ LANI APE SO GIGI APEUT TI NZERE MINGI TONGASO

Gigi ti e na Timor oriental ayeke lani tâ nde mingi na ti Australie, me mbi pensé lani ape so gigi apeut ti nzere mingi tongaso. Na ambeni ngoi, e yeke voyagé na akete bus so azo asi yâ ni, so na yâ ni mo yeke wara ahulengo susu nga na akugbe ti kasa ti gara ti ndo ni. Na ambeni lango, e yeke sara mbeni étude na yâ ti mbeni kete da so yâ ni achauffé, so a cimenté ape nga so akondo ayeke hon na terê ti e. Ye oko, atâa akpale so kue, fani mingi mbi yeke tene ka: ‘Gigi ti mbi anzere na mbi mingi!’

Tongana mbi gbu li ti mbi na ndö ti ngoi so ahon, mbi kiri merci na babâ na mama ti mbi so asara kue ti fa na mbi ye na ndö ti Jéhovah nga so amû maboko na mbi même na ngoi so songo ti mbi na Jéhovah akpengba nzoni ape. Tënë so ayeke na aProverbe 22:6 aga tâ tënë na ndö ti mbi. Babâ na mama ti mbi apika kate na ndö ti mbi na Alex, a nzere na ala mingi ti bâ so e yeke sara kua ti Jéhovah. Ti londo na ngu 2016 ti ga na ni, e yeke sara kua ti circonscription na yâ ti territoire so ayeke na gbe ti filiale ti Australasie.

Na bango ni a yeke ngangu ti yeda so na mbeni ngoi lani, mbi ye fango tënë ape. Fadeso, mbi ye fango tënë mingi! Mbi ga ti bâ so atâa nyen la asi na yâ ti fini ti zo, lo yeke wara tâ ngia gï tongana lo sara na Nzapa na bê ti lo kue. Biani, na yâ ti angu 18 so mbi na Alex e sara na Jéhovah, mbi yeke na ngia mingi na yâ ti gigi ti mbi. Fadeso mbi hinga so atënë so David, mbeni zo ti sungo psaume, atene na Jéhovah ayeke tâ tene. Lo tene: “Azo kue so ague na mbage ti mo ti bata terê ti ala ayeke duti na ngia; ala yeke dekongo na ngia lakue. . . . Na azo so aye iri ti mo ayeke duti na ngia ndali ti mo.”—Ps. 5:11.