Ngbâ ti duti na nzoni bango ndo na ndö ti kua ti fango tënë

1. Tapande wa la Jésus azia na adisciple ti lo? Nyen la ala sara lani? (Bâ foto ti couverture ni.)

JÉSUS angbâ lani ti duti na nzoni bango ndo na ndö ti kua ti lo ti fango tënë, na lo ye ti tene adisciple ti lo asara nga tongaso (Jean 4:35, 36). Na ngoi so Jésus ayeke lani na terê ti adisciple ti lo, ala yapu lani ti fa tënë (Luc 10:1, 5-11, 17). Me na ngoi so a gbu Jésus nga a fâ lo, teti mbeni ngoi, adisciple ti lo ayeke na nzara ti fa tënë ape (Jean 16:32). Na peko ti so a zingo Jésus na kuâ, lo wa adisciple ti lo ti zia li ti ala na ndö ti fango tënë. Na peko ti so lo kiri na yayu, ala yapu mingi na fango tënë asara si awato ti ala adema terê ti ala, atene: “Bâ, ala sara si fango ye ti ala amû yâ ti Jérusalem kue.”—Kus. 5:28.

2. Tongana nyen la Jéhovah asara tufa na ndö ti kua ti fango tënë?

² Jésus afa lani lege na kua so akozo Chrétien asara, na Jéhovah asara si a maï. Na tapande, na Pentecôte ti ngu 33, azo 3 000 tongaso awara batême (Kus. 2:41). Wungo ti adisciple angbâ gï ti gue na li ni mingi (Kus. 6:7). Me Jésus atene lani so azo mingi ayeke yeda na nzoni tënë na lâ ti nda ni.—Jean 14:12; Kus. 1:8.

3-4. Ngbanga ti nyen la kua ti fango tënë ayeke ngangu na ambeni ita? Nyen la e yeke bâ na yâ ti article so?

³ E kue e ye ti ngbâ ti duti na nzoni bango ndo na ndö ti fango tënë. Na ambeni kodro, a yeke ngangu ape. Ngbanga ti nyen? Ngbanga ti so, so azo mingi aye ti manda Bible, ambeni adoit ti ku juska mbeni Témoin awara ngoi ti manda ni na ala. Me na ambeni kodro, fango tënë ayeke ngangu mingi na aita; a yeke ngangu ti wara azo na yanga-da, na azo so ayeke na yanga-da aye ti manda Bible ape.

⁴ Tongana mo yeke na mbeni ndo so kua ti fango tënë ayeke ngangu, peut-être awango so ayeke na yâ ti article so ayeke mû maboko na mo. E yeke bâ aye so ambeni ita asara ti wara azo mingi na fango tënë. E yeke bâ nga ndani so e lingbi ti ngbâ ti duti na nzoni bango ndo atâa azo amä e wala ala mä e ape.

DÉCOURAGÉ APE ATÂA A YEKE NGANGU TI WARA AZO

5. Akpale wa la aTémoin mingi awara?

⁵ A yeke ga gï ngangu ngangu na aTémoin mingi ti wara azo na yanga-da. Ambeni wafango tënë alango na ando so gbâ ti ada so zo alï dä kirikiri ape ayeke dä. Peut-être na ando ni so, agarde ayeke dä so ayeke ke na zo ti lï kâ tongana mbeni zo ti da ni atisa lo ape. Na ambeni ndo, a yeke ngangu ape ti tene aTémoin afa tënë da na da, me ala yeke wara azo mingi ape. Ti ambeni, ala yeke fa tënë na ando so ayo so azo ayeke dä mingi ape. Awafango tënë apeut ti gue ayo ti wara gï zo oko, me tongana ala si kä, peut-être lo yeke même na yanga-da ape. Tongana e wara mara ti akpale so, a lingbi e découragé ape. Nyen la e lingbi ti sara ti hon ndö ti mara ti akpale so nga ti fa tënë na azo mingi?

6. Na lege wa la awafango tënë ayeke tongana azo ti gingo susu?

⁶ Jésus ahaka lani kua ti fango tënë na kua ti gingo susu (Marc 1:17). Ambeni zo ti gingo susu apeut ti gi susu lango mingi sân ti wara ni. Me ala découragé ape; ala yeke changé ambeni ye. Ala yeke changé ngoi, ndo wala kode ti ala ti gingo na susu. E lingbi ti sara mara ti achangement so na fango tënë. Zia e bâ ambeni ye so e peut ti sara.

7. Tongana e fa tënë na angoi nde nde, nyen la apeut ti si?

⁷ Gi ti wara azo na mbeni ngoi nde. E yeke wara azo mingi tongana e fa tënë na ngoi so e peut ti wara azo na yanga-da. Nyen na nyen, zo kue ayeke kiri na yanga-da na mbeni ngoi. Aita mingi abâ so a yeke nzoni ti fa tënë na peko ti midi wala na lakui ndali ti so ala yeke wara azo mingi. Na ndö ni, peut-être na angoi ni so, li ti azo ayeke kpô na ala yeke nduru ti sara lisoro. Peut-être mo peut ti gi ti sara ye so David, so ayeke mbeni ancien, asara. Lo tene so na peko ti so lo na ita so asigi na fango tënë afa tënë na yâ ti territoire teti mbeni ngoi awe, ala yeke kiri na ada so ala wara zo dä kozo ape. Lo tene: “Li ti mbi akpe so azo mingi ayeke na yanga-da na ngoi so e kiri na da ti ala ti use ni.”b

8. Tongana nyen la e lingbi ti sara ye alingbi na Zo-ti-fa-tene 11:6 na fango tënë?

⁸ A lingbi e découragé ape. A yeke ye so versê so ayeke mama-tene ti article so afa na e. (Diko Zo-ti-fa-tene 11:6.) David, so e sara tënë ti lo fade, adécouragé lani ape. Lo gue na mbeni da fani mingi juska lo wara mbeni zo. Koli ni aye lani ti sara lisoro na ndö ti Bible, na lo tene: “Mbi lango ge a sara ngu miombe tongaso, me lâ oko mbeni Témoin ti Jéhovah awara mbi na yanga-da ape.” David atene: “Mbi ga ti bâ so na nda ni, tongana mo wara azo na yanga-da, mingi ni ala yeke mä tënë so e fa.”

9. Nyen la ambeni Témoin asara ti wara azo so a yeke ngangu ti wara ala na yanga-da?

⁹ Gi ti fa tënë na mbeni ndo nde. Ti wara azo so a yeke ngangu ti wara ala na yanga-da, ambeni wafango tënë achangé ndo so ala yeke fa tënë dä. Na tapande, fango tënë na ndö ti lege wala na aprésentoir amû lege na ala ti wara azo so alango na ando so amû lege na zo pëpe ti fa tënë kâ da na da. A mû lege na ala ti sara lisoro na azo so alango na ando ni so. Na ndö ni, awafango tënë mingi abâ so azo ayeke nduru ti sara lisoro wala ti mû ambeti na yâ ti aparc, agara nga na ando ti dengo buze. Floiran, mbeni surveillant ti circonscription na Bolivie, atene: “E yeke gue ti fa tënë na agara nga na ando ti dengo buze na 13 h nga na 15 h na ngoi so azo ti kango ye ayeke na aclient mingi ape. Fani mingi, e yeke sara apendere lisoro nga e komanse même ti manda Bible na azo.”

10. Ambeni kode wa la mo lingbi ti sara kua na ni ti fa tënë na azo?

¹⁰ Tara mbeni kode nde. Bâ so mo gue na yanga-da ti mbeni zo fani mingi me mo wara lo ape. Mo gue na angoi nde nde, me kue gbä. Mbeni lege nde ti wara lo ayeke dä? Katarína atene: “Mbi tokua lettre na azo so mbi wara ala lâ oko na yanga-da ape; na yâ ti lettre ni, mbi tene atënë so tongana fade mbi wara ala mbi yeke tene.” Nyen la e manda dä? Na ngoi so mo yeke fa tënë, sara kue ti fa tënë na azo kue so ayeke na yâ ti territoire ti mo.

DÉCOURAGÉ APE ATÂA AZO AKE TI MÄ E

11. Ngbanga ti nyen la ambeni zo aye ti mä tënë ti e ape?

¹¹ Ambeni zo aye ti mä tënë ti e ape. Ala bâ so ala bezoin Nzapa wala Bible ape. Ala mä na bê na Nzapa ape ndali ti so ala bâ so pasi ayeke mingi na yâ ti dunia. Ala ke Bible ndali ti so ala bâ so akota zo ti nzapa ahanda lê ti azo ala tene ala yeke sara ye alingbi na Bible. Ti ambeni, li ti ala yeke gï na ndö ti akua ti ala, sewa ti ala wala akpale ti ala asara si ala pensé so Bible alingbi ti mû maboko na ala ape. Tongana nyen la e lingbi ti ngbâ ti duti na ngia atâa so azo so e yeke fa tënë na ala abâ ni na nene ni ape?

12. Tongana nyen la ti sara ye alingbi na aPhilippien 2:4 alingbi ti mû maboko na e na fango tënë?

¹² Fa so mo pensé na azo ni. Azo mingi so kozo aye ti mä nzoni tënë ape achangé na pekoni na ngoi so ala bâ so mbeni wafango tënë afa so lo pensé na ala. (Diko aPhilippien 2:4.) Na tapande, David, so e sara tënë ti lo fade, atene: “Tongana mbeni zo atene so lo ye ti mä e ape, e yeke kiri na Bible wala mbeti ti e na yâ ti bozo, na mbi tene: ‘Pardon, nyen la asara si mo ye ti mä e ape?’” Tongana a pensé na mbeni zo, lo yeke hinga ni. Azo apeut ti girisa tënë so e tene na ala, me peut-être ala yeke girisa ape ye so e sara ti fa so e pensé na ala. Même tongana azo azia lege na e ti fa tënë na ala ape, e lingbi ti fa so e pensé na ala na lege ti sarango ye ti e nga na nzoni bê so e sara na ala.

13. Nyen la e lingbi ti sara ti tene zo oko oko kue so e fa tënë na lo ayeda ti mä e?

¹³ E yeke fa so e pensé na zo so e yeke fa tënë na lo tongana e changé tënë ti e alingbi na bezoin ti lo. Na tapande, eskê ambeni ye ayeke dä so afa so zo ni ayeke na amolenge? Awango ti Bible na ndö ti batango amolenge wala awango na ndö ti aye ti sara ti duti na ngia na yâ ti sewa apeut ti gbu bê ti babâ na mama ti amolenge ni. Eskê e bâ so gbâ ti amama ti clé ayeke na terê ti porte ti zo ni? Peut-être e yeke soro ti sara tënë na ndö ti sarango aye so ndia ake, so asara si azo mingi ayeke na mbeto. Peut-être a yeke nzere na zo ni ti hinga so aye ni so ayeke hunzi ande. Lakue tongana mo wara azo so aye ti mä mo, gi ti aidé ala ti hinga so awango ti Bible apeut ti mû maboko na ala. Katarína, so e sara tënë ti lo fade, atene: “Mbi dabe ti mbi na fason so tâ tënë asara si gigi ti mbi aga nzoni mingi.” Ye so asara si Katarína ayeke sara tënë na bê ti lo kue, na azo so lo yeke fa tënë na ala apeut ti bâ ni.

14. Tongana ti so aProverbe 27:17 atene, tongana nyen la azo so ayeke fa tënë legeoko apeut ti mû maboko na mba?

¹⁴ Gi mungo maboko ti amba ti mo. Na ngoi ti akozo Chrétien, Paul afa na Timothée akode ti lo ti fango tënë nga ti fango ye, na lo wa Timothée ti fa ni na aita (1 aCor. 4:17). Tongana Timothée, e lingbi ti manda ye na mbage ti aita so ahinga ye mingi na yâ ti congrégation ti e. (Diko aProverbe 27:17.) Bâ tapande ti mbeni ita-koli so iri ti lo ayeke Shawn. Teti mbeni ngoi, lo sara kua ti pionnier na mbeni ndo so ayo, so azo ni aye ti changé bungbi ti vorongo Nzapa ti ala ape. Nyen la lo sara lani ti ngbâ ti duti na ngia? Lo tene: “Lakue tongana lege ayeke dä, mbi na mbeni ita e yeke fa tënë. E yeke mû ngoi so e londo na mbeni da ti gue na mbeni ti mû maboko na mba ti maï akode ti fango tënë ti e. Na tapande, e yeke sara lisoro na ndö ti fason so e sara fade na lisoro na mbeni zo. Na pekoni, e yeke sara lisoro na ndö ti ye so e yeke changé ni tongana mbeni zo akiri atene na e mara ti tënë ni so.”

15. Ngbanga ti nyen la sambela ayeke kota ye mingi na fango tënë?

¹⁵ Sambela Jéhovah ti mû maboko na mo. Hunda Jéhovah ti mû maboko na mo na ngoi kue so mo yeke fa tënë. Tongana yingo vulu ti lo so ayeke ngangu mingi amû maboko na e ape, e peut ti sara ye oko ape (Ps. 127:1; Luc 11:13). Tongana mo sambela Jéhovah ti mû maboko na mo, fa mbilimbili ye so mo ye. Na tapande, hunda lo ti gue na mo na mbage ti zo so aye ti manda ye na ndö ti lo nga so ayeke nduru ti mä tënë. Na pekoni, sara ye alingbi na sambela ti mo na lege so mo fa tënë na zo kue so mo wara lo.

16. Ngbanga ti nyen la e doit ti manda ye e wani tongaso si e fa tënë nzoni?

¹⁶ Mu ngoi ti manda ye mo wani. Bible atene: ‘Ala wani ala hinga ye so bê ti Nzapa aye, so ayeke nzoni, so anzere nga so ayeke mbilimbili-kue.’ (aRom. 12:2). Tongana e manda ye, e yeke hinga Nzapa nzoni mingi. Na pekoni, tongana e yeke sara tënë ti lo na azo, ala yeke bâ so e mä na bê biani na ye so e tene. Katarína, so e sara tënë ti lo fade, atene: “Ade ti ninga ape, mbi ga ti bâ so mbi bezoin ti kpengba mabe so mbi yeke na ni na ambeni kota fango ye ti Bible. Tongaso, mbi manda nzoni aye so afa so Lo so acréé aye kue ayeke dä, so Bible ayeke tënë ti Nzapa nga so Nzapa ayeke na mbeni bungbi so ayeke sara kua na iri ti lo laso. Katarína atene so mandango ye lo wani akpengba mabe ti lo nga asara si lo yeke na ngia mingi na fango tënë.

NDANI SO E NGBÂ TI FA TËNË NA NGIA

17. Ngbanga ti nyen la Jésus angbâ lani ti duti na nzoni bango ndo na fango tënë?

¹⁷ Jésus angbâ lani ti duti na nzoni bango ndo nga lo ngbâ ti fa tënë atâa so ambeni zo amä lo ape. Ngbanga ti nyen? Lo hinga lani so azo mingi abezoin ti hinga tâ tënë, nga lo ye lani ti mû maboko na azo mingi ti mä tënë ti Royaume. Lo hinga nga so ambeni zo so na tongo nda ni aye ti mä lo ape ayeke mä lo na pekoni. Bâ ye so asi na yâ ti sewa ti lo wani. Na yâ ti ngu ota na ndambo kue so Jésus afa tënë, mbeni ita ti lo ti koli aga disciple ti lo ape (Jean 7:5). Me na peko ti so a zingo lo na kuâ, ala ga aChrétien.—Kus. 1:14.

18. E ngbâ ti fa tënë ngbanga ti nyen?

¹⁸ E hinga ape azo wa la na nda ni ayeke yeda na atâ tënë ti Bible so e fa. Na ambeni zo, ti yeda na tënë so e fa amû ngoi mingi ahon ti ambeni. Même azo so aye ti mä tënë ti e ape abâ nzoni sarango ye ti e nga na nzoni bango ndo so e yeke na ni, na peut-être na nda ni ala peut ti komanse ti “mû gloire na Nzapa”.—1 Pi. 2:12.

19. Kozo mbeti na aCorinthien 3:6, 7 afa na e nyen na ndö ti fango tënë?

¹⁹ Atâa so e lu ye nga e tuku ngu dä, a lingbi e girisa ape so Nzapa la asara si a kono. (Diko 1 aCorinthien 3:6, 7.) Getahun, mbeni ita-koli na Éthiopie, atene: “Ahon ngu 20, gï mbi oko la mbi yeke lani Témoin na ndo so mbi yeke dä. Me fadeso, awafango tënë ayeke 14 ge. Awafango tënë 13 awara batême, na popo ti ala mo yeke wara wali ti mbi nga na amolenge ti mbi ota. Azo 32 tongaso ayeke ga ka na abungbi.” Getahun ayeke na ngia so lo ngbâ lani ti fa tënë na ngoi so lo kanga bê lo ku ti tene Jéhovah agboto azo so aye ti hinga tâ tënë na yâ ti bungbi ti Lo.—Jean 6:44.

20. Na lege wa la e yeke tongana azo ti songo azo?

²⁰ Jéhovah abâ fini ti azo kue na nene ni. Lo mû na e pasa ti sara kua maboko na maboko na Molenge ti lo na yâ ti bungbingo azo na popo ti amara kue kozo ti tene a futi dunia so (Ag. 2:7). Kua ti e ti fango tënë ayeke tongana kua ti songo azo. E yeke tongana azo so a tokua ala ti gue ti sö azo so ayeke na yâ ti mbeni bateau so ayeke gue ti lï ngu. Atâa so peut-être gï kete wungo ti azo la ayeke ngbâ na fini, kua so azo ni kue asara ayeke kota ye. Kua ti e ti fango tënë ayeke nga tongaso. E hinga ape azo oke la ayeke sö ande kuâ na yâ ti dunia ti Satan so. Me Jéhovah apeut ti sara kua na mbeni zo na popo ti e ti mû maboko na ala. Andreas, so ayeke na Bolivie, atene: “Mbi hinga so tongana mbeni zo amanda tâ tënë nga awara batême, a yeke ndali ti so aita mingi asara kua maboko na maboko ti aidé lo.” Zia e ngbâ ti duti na mara ti nzoni bango ndo so na ndö ti fango tënë. Tongana e sara ni, Jéhovah ayeke sara tufa na ndö ti e, nga fango tënë ayeke ga na e ngia mingi.