Hongo ndo ti akpale so andu fango tënë da na da
“E yeke na mbeto pëpe na yâ Nzapa ti e ti fa Tene-nzoni ti Nzapa na i na yâ tiri mingi.”—1 ATHES. 2:2.
1. Akpale wa Jérémie awara ni lani? Nyen la amû maboko na lo ti hon ndo ni?
JÉRÉMIE ayeke zo tongana e. Na ngoi so Jéhovah atene na lo so ni ye si lo ga “prophète ti amara”, Jérémie adekongo, lo tene: “Aï, Seigneur L’Eternel! bâ, mbi hinga lege ti sara tënë pëpe, teti mbi de molenge.” Ye oko, teti so Jérémie azia bê ti lo na Jéhovah, lo yeda ti sara kua so lo mû na lo (Jér. 1:4-10). Ahon angu 40 tongaso, azo asara nzara ti mä tënë ti Jérémie pëpe, ala ke lo, ala he lo nga ala sara aye ti ngangu na lo. Me na yâ ti angu so kue, Jérémie akanga bê na yâ ti akpale so (Jér. 20:1, 2). A si na mbeni ngoi, Jérémie aye ti ke kua ni. Ye oko, lo ngbâ lakue ti fa mbeni tënë so azo mingi aye ti mä ni pëpe. Na ngangu ti Nzapa, Jérémie asara ye so lo lingbi fade pëpe ti sara ni na ngangu ti lo wani.—Diko Jérémie 20:7-9.
2, 3. Na lege wa awakua ti Jéhovah laso ayeke tingbi na mara ti akpale so Jérémie atingbi lani na ni?
2 Bibe ti mingi ti awakua ti Jéhovah laso ague oko na ti Jérémie. Na ngoi so ala yeke pensé lani na ndo ti fango tënë da na da, ambeni ita atene na bê ti ala atene: ‘A yeke mbeni ye so mbi lingbi ande lâ oko pëpe ti sara ni.’ Ye oko, na ngoi so e bâ so Jéhovah aye si e fa nzo tënë na azo, e gi ti hon ndo ti ambeto ti e na e bi tere ti e na yâ ti kua ti fango tënë. Atâa so kue, mingi ti e atingbi na akpale so asara si, teti mbeni ngoi, a yeke ngangu na ala ti ngbâ ti fa tënë. Ti tâ tënë ni, a yeke kete ye pëpe ti to nda ti fango tënë da na da na ti ngbâ ti sara ni juska na nda ni.—Mat. 24:13.
3 A sara ambeni ngoi awe so aTémoin ti Jéhovah ayeke manda Bible na mo nga mo yeke gue na abungbi? Mo ye ti to nda ti fango tënë da na da me mo yeke gi bê ti mo? Mo yeke mbeni Témoin ti Jéhovah so awara batême awe me mo bâ so a yeke ngangu na mo ti fa tënë da na da, atâa so mo yeke na ngangu ti sara ni? Hinga so mara ti azo nde nde kue awara lege ti hon ndo ti akpale so andu fango tënë da na da. Tongaso, Jéhovah alingbi ti mû maboko na mo ti sara ni senge.
Hongo ndo ti mbeto
4. Nyen la amû maboko na bazengele Paul ti fa nzo tënë na mbeto pëpe?
4 Kite ayeke dä pëpe so mo hinga so a yeke na ngangu ti zo pëpe wala ndara ti zo pëpe si a yeke fa nzo tënë na ndo ti sese kue, me a yeke na lege ti yingo vulu ti Nzapa (Zach. 4:6). Nga a yeke yingo vulu ti Nzapa la amû maboko na Chrétien oko oko ti fa tënë (2 aCor. 4:7). Bâ tapande ti bazengele Paul. Na ngoi so Paul adabe ti lo na ndo ti ngoi so lani awato asara ye ti ngangu na lo na amba ti lo amissionnaire, lo tene: “Tongana e wu pono awe, na ala sara ye ti kamene na e na kodoro ti Philippes, e yeke na mbeto pëpe na yâ Nzapa ti e ti fa Tene-nzoni ti Nzapa na i na yâ tiri mingi.” (1 aThes. 2:2; Kus. 16:22-24). Paul ayeke mbeni zo so aye fango tënë mingi. Ye oko, e lingbi ti gi li ti e gbä na ndani so ngoi na ngoi, a yeke ngangu na lo ti sara ni. Me, tongana ti so e kue e yeke sara, a hunda lani na Paul ti zia bê ti lo kue na ndo ti Jéhovah si lo fa nzo tënë na mbeto pëpe. (Diko aEphésien 6:18-20.) E yeke sara nyen ti mû tapande ti Paul?
5. Mbeni lege ti hon ndo ti mbeto si e fa tënë ayeke so wa?
5 Mbeni ye so ayeke mû maboko na e ti hon ndo ti mbeto si e fa tënë ayeke sambela. Mbeni pionnier atene: “Mbi sambela Nzapa ti mû na mbi ngangu ti sara tënë na mbeto pëpe, ti ndu bê ti azo nga ti wara ngia na yâ ti fango tënë. Kozoni kue, a yeke kua ti Jéhovah, a yeke kua ti e pëpe; tongaso tongana lo mû maboko na e pëpe e lingbi ti sara ye oko pëpe.” (1 aThes. 5:17). E kue e yeke na bezoin ti sambela Nzapa lakue ti tene yingo vulu ti lo amû maboko na e ti fa tënë na mbeto pëpe.—Luc 11:9-13.
6, 7. (a) Nyen la Ezéchiel abâ tongana suma? Ye so lo bâ aye ti tene nyen? (b) Ye so lo bâ afa nyen na awakua ti Jéhovah laso?
6 Mbeti ti Ezéchiel afa mbeni ye nde so alingbi ti mû maboko na e ti fa tënë na mbeto pëpe. Na yâ ti mbeni ye so Ezéchiel abâ tongana suma, Jéhovah amû na lo mbeni mbeti so a sû na lê ni mbage na mbage “bia ti vundu, tënë ti toto, na tënë ti vundu.” Jéhovah ahunda na Ezéchiel ti te mbeti so, lo tene: “Molenge ti zo, mo sara si yâ ti mo asi, na mo sara si vi ti mo asi na mbeti so Mbi mû na mo.” Ye so Ezéchiel abâ aye ti tene nyen? A hunda ti tene kozoni si Ezéchiel ague ti fa tënë ni, a lingbi lo gbu nda ti atënë ni nzoni si. A lingbi tënë ni agbu bê ti lo. Prophète ni atene: “Mbi te mbeti ni; a nzere na yanga ti mbi tongana ngu-lavu.” Na lê ti Ezéchiel, fango tënë ti Nzapa na gbele azo ayeke mbeni nzerengo ye mingi, tongana nzerengo ti mafuta ti wotoro. Lo bâ so ti tene peko ti yanga ti Jéhovah na azo nga ti sara kua so Nzapa amû na lo ayeke mbeni kota ye mingi, même tongana a hunda na lo ti fa mbeni ngangu tënë so azo mingi aye ti mä ni pëpe.—Diko Ezéchiel 2:8–3:4, 7-9.
7 Awakua ti Jéhovah laso ayeke na mbeni kpengba ye ti manda ni na yâ ti ye so Ezéchiel abâ tongana suma. E nga kue e yeke na mbeni ngangu tënë ti fa na azo so abâ na nene ni pëpe ngangu so e yeke sara. Ti tene e ngbâ lakue ti bâ fango tënë tongana mbeni kua so Nzapa la amû ni na e, a lingbi e ngbâ lakue ti diko Bible na ti manda ni. Tongana e manda ye gi tongaso wala e yeke na mbeni nzoni kapa ti mandango ye pëpe, ye so alingbi ti sara si e gbu nda ti Bible nzoni pëpe. Mo lingbi ti gi ti manda ye nzoni ahon ti kozo? Mo lingbi ti gi ti duti na mbeni nzoni kapa ti dikongo Bible nga na ti mandango ni? Mo lingbi ti mû ngoi lakue ti gbu li na ndo ti aye so mo yeke diko?—Ps. 1:2, 3.
Tongo nda ti lisoro na ndo ti Bible
8. Akode wa amû maboko na ambeni wafango tënë ti to nda ti lisoro na ndo ti Bible na azo na ngoi so ala yeke fa tënë da na da?
8 Mingi ti awafango tënë abâ so ye so ayeke tâ ngangu mingi na yâ ti fango tënë da na da ayeke tongo nda ti lisoro na azo. Ti tâ tënë ni, na yâ ti ambeni territoire, a yeke kete ye pëpe ti to nda ti lisoro na azo. Ambeni wafango tënë abâ so a yeke ngangu pëpe ti sara lisoro na azo na yanga-da ti ala tongana ala to nda ti lisoro ti ala na lege ti atënë so ala soro ni nzoni nga na pekoni ala mû tract na zo ni, tongana ti so a fa na yâ ti encadré na gbe ni ge. Kota li ti tënë ti tract ni wala pendere foto ni alingbi ti gboto lê ti zo ni, na a mû lege na e ti fa na nduru tënë ndani so e ga ti bâ zo ni nga ti sigigi na mbeni hundango tënë. Mbeni kode ni nde ayeke ti fa na zo ni tract ota wala osio tongaso na ti hunda na lo ti soro mbeni oko so agbu bê ti lo. Me, ye so e zia na gbele e ayeke pëpe gi ti zia tract na azo wala ti sara kua na ni na ayanga-da oko oko kue, me ti to nda ti lisoro so ayeke gue na e ti manda Bible na azo.
9. Ngbanga ti nyen a yeke kota ye mingi ti leke tere kozoni ti gue da na da?
9 Atâa kode wa la mo sara kua na ni, tongana mo leke tere ti mo nzoni, a yeke mû maboko na mo ti sara ye na dongo tere pëpe nga ti duti na ngia na ngoi so mo yeke fa tënë da na da. Mbeni pionnier atene: “Mbi yeke ka na ngia mingi tongana mbi leke tere ti mbi nzoni. A yeke sara si mbi ye ti fa na azo tënë so mbi leke ti tene ni.” Mbeni pionnier ni nde atene: “Tongana mbi hinga nzoni mingi atënë ti yâ ti mbeti so mbi ye ti zia ni na azo, mbi yeke na ngia ti sara kua na ni.” Atâa so tongana zo atene peko ti atënë so lo ye ti fa gi na yâ ti bê ti lo, a yeke ga na ye ti nzoni, awafango tënë mingi abâ so tenengo peko ti atënë ni na kota go ayeke mû maboko mingi na ala. Sarango tongaso amû maboko na ala ti sara kua ti Jéhovah nzoni mingi.—aCol. 3:23; 2 Tim. 2:15.
10. A lingbi ti sara nyen si abungbi ti fango tënë amû maboko na awafango tënë?
10 Abungbi ti fango tënë (so a sara ni nzoni) ayeke mû maboko na awafango tënë ti fa tënë nzoni nga ayeke sara si ala duti na ngia na ngoi so ala yeke fa tënë da na da. Tongana versê ti lâ oko oko ti lango ni andu fango tënë, a lingbi ti diko ni na ti sara lisoro na ndo ni. Ye oko, a yeke nzoni ita-koli so ayeke mû li ni na bungbi ti fango tënë amû ngoi ti sara lisoro wala ti sara adémonstration so akpengba pëpe na so alingbi biani na territoire ni. Wala lo lingbi nga ti bâ ambeni tënë so awafango tënë alingbi ti fa na tënë na yâ ti lango ni. Ye so ayeke kiri ti mû maboko na awafango tënë so aga na bungbi ni ti fa tënë nzoni mingi. Tongana a-ancien nga na aita-koli so ayeke mû li ni na abungbi ti fango tënë aleke tere ti ala nzoni, ala lingbi ti mû maboko na awafango tënë nga ti hunzi bungbi ni na yâ ti ngbonga so a hunda.—aRom. 12:8.
Mango azo ayeke ga na aye ti nzoni mingi
11, 12. Na lege wa bango mawa ti zo na ngoi so e yeke mä lo alingbi ti sara si nzo tënë andu bê ti lo? Mû mbeni tapande.
11 Na ndo ti lekengo tere nzoni, bingo bê na azo ayeke mû maboko na e ti to nda ti lisoro na ala na ndo ti Bible nga ti ndu bê ti ala. Mbeni lege ti fa so e yeke bi bê ti e na azo ayeke lege so e yeke mä na ala. Mbeni surveillant so ayeke gue na yâ ti akongregation nde nde atene: “Ti fa so e yeke nduru ti mû ngoi ti mä azo asara si ala sara nzara ti mä nzo tënë nga afa so e yeke bi bê ti e mingi na ala.” Bango mawa ti zo na ngoi so lo yeke sara tënë alingbi ti sara si lo zi bê ti lo na e, tongana ti so paragraphe ti peko ayeke fa.
12 Mbeni wali atokua lettre na mbeni mbeti-sango (Le Progrès) ti gbata ti Saint-Étienne na France. Na yâ ti lettre ti lo ni, lo sara tënë na ndo ti vizite ti azo use so asi na yanga-da ti lo kete na pekoni so bébé ti lo ti nze ota akui. Lo tene: “Hio tongaso, mbi hinga so ala yeke aTémoin ti Jéhovah. Mbi yeke nduru ti tene na ala ti hon na devant, me mbi bâ so ala yeke na mbeni brochure so ala yeke kangbi ni na azo. Brochure ni ayeke na ndo ti ndani so Nzapa azia lege na pasi. Tongaso, mbi yeda ti tisa ala na yâ ti da ti mû lege na mbi ti fa na ala so tënë so ala yeke fa ayeke na lege ni pëpe. . . . A-Témoin ti Jéhovah so aduti na ndo ti mbi a hon ngbonga oko. Ala yeke bâ mawa ti mbi mingi na ngoi so ala yeke mä mbi nga na ngoi so ala londo ti hon, bê ti mbi adë mingi na a sara si mbi yeda ti tene ala kiri aga.” (aRom. 12:15). A si lani na mbeni ngoi, wali so ayeda ti manda Bible. Ye so e lingbi ti manda na yâ ti ye so ayeke so ye so wali so adabe ti lo mingi na ni ayeke pëpe ye so aita-wali ni atene me ayeke lege so ala mä na lo.
13. Na lege wa e lingbi ti leke tënë so e yeke fa si a lingbi na azo so e yeke tingbi na ala?
13 Tongana e yeke bâ mawa ti azo na ngoi so e yeke mä ala, e yeke zia lege na azo ti fa na e ndani so ala yeke na bezoin ti Royaume. So ayeke mbeni nzoni lege so azi na e ti fa nzo tënë na ala. Kite ayeke dä pëpe so mo bâ so anzoni wafango tënë ayeke mingi ni azo so ayeke mä azo (aProv. 20:5). Ala yeke fa so ala yeke bi bê ti ala biani na azo so ala yeke wara ala na ngoi ti fango tënë. Ala yeke sû gi pëpe iri ti azo ni na adresse ti ala na lê ti mbeti, me ala yeke sû nga note na ndo ti atënë so agbu bê ti azo ni nga na ye so ala yeke na bezoin ti hinga ye na ndo ni. Tongana mbeni zo afa so mbeni mbilimbili tënë agbu bê ti lo, awafango tënë so ayeke gue ti gi nda ti ye na ndo ni nga ala yeke kiri hio ti fa na zo ni ye so ala gi nda ni. Legeoko tongana ti bazengele Paul, ala yeke leke fango tënë ti ala ti Royaume si a lingbi na azo so ala yeke tingbi na ala. (Diko 1 aCorinthien 9:19-23.) Ti fa so mo yeke bi bê ti mo biani na azo ayeke sara si ala yeda ti mä nzo tënë. A yeke fa nga polele so “Nzapa ti e ayeke na be-nzoni”.—Luc 1:78.
Duti lakue na nzoni bango ndo
14. Na lege wa e lingbi ti fa asarango ye ti Jéhovah na gigi na ngoi so e yeke fa tënë?
14 So Jéhovah amû na e ngangu ti soro ye so bê ti e aye afa so lo ne e mingi. Atâa so lo yeke Nzapa ti Ngangu Ahon Kue, lo forcé zo oko pëpe ti sara na lo. Me lo ye si ndoye so lo yeke na ni na mbage ti azo apusu ala ti sara na lo, na lo yeke iri tënë nzoni na ndo ti azo so abâ na nene ni apendere ye so lo leke ti mû maboko na ala (aRom. 2:4). Na angoi oko oko kue so e yeke fa tënë, a yeke nzoni e so e yeke awakua ti Jéhovah e duti nduru ti fa nzo tënë na mbeni lege so afa na gigi nzoni bê so Nzapa ti e ayeke na ni (2 aCor. 5:20, 21; 6:3-6). Ti sara tongaso, a yeke nzoni e duti lakue na nzoni bango ndo na mbage ti azo ti yâ ti territoire ti e. Nyen la alingbi ti mû maboko na e ti sara ni?
15. (a) Jésus afa na abazengele ti lo ti sara nyen tongana azo ake ti mä tënë so ala yeke fa? (b) Nyen la alingbi ti mû maboko na e ti gi ti wara azo so alingbi?
15 Jésus afa na adisciple ti lo ti gi bê ti ala ahon ndo ni pëpe tongana ambeni zo ake ti mä tënë so ala yeke fa. Me lo fa na ala ti gi ti wara azo so alingbi. (Diko Matthieu 10:11-15.) Ti zia ambeni kete kete ye so e lingbi ti si dä na gbele e alingbi ti mû lege na e ti wara azo so alingbi. Na ngoi so mbeni ita-koli ayeke gi ti wara azo so ayeke na nzara ti mä tënë ni, lo yeke bâ tere ti lo tongana mbeni zo ti gingo mosoro ti gbe ti sese. Lo yeke tene lakue lo tene: “Mbi yeke gue ande ti wara mbeni lor laso.” Mbeni ita-koli ni nde afa ye so lo zia na gbele ti lo ti sara, lo tene: “Yenga oko oko, mbi yeke gi ti wara mbeni zo so asara nzara ti tënë ni nga ti kiri hio ti mû maboko na lo.” Ambeni wafango tënë aleke na bê ti ala ti diko kamême versê oko na azo kue so ala yeke wara ala na fango tënë da na da, tongana lege ayeke dä ti sara ni. Mbeni ye wa so mo lingbi ti si dä mo lingbi ti zia na gbele mo?
16. Araison wa apusu e ti ngbâ ti fa tënë?
16 Aye ti nzoni so e yeke wara na fango tënë da na da aluti pëpe gi na ndo ti sarango ye ti azo ti yâ ti territoire ti e na mbage ti tënë so e fa na ala. Ti tâ tënë ni, fango tënë ayeke mbeni kota ye so ayeke sara si azo so ayeke na nzara ti voro tâ Nzapa asö kuâ. Me, ambeni kota raison ayeke dä so apusu e ti fa tënë. Fango tënë amû lege na e ti fa so e ye Jéhovah (1 Jean 5:3). A yeke mû lege na e ti kpe ti tene ngbanga ti mênë ti azo aga na li ti e (Kus. 20:26, 27). A yeke sara si azo so ake Nzapa ahinga so “l’heure ti Lo ti fâ ngbanga asi awe”. (Apoc. 14:6, 7). Ahon kue, fango nzo tënë ayeke sara si azo agonda iri ti Jéhovah na ndo ti sese kue (Ps. 113:3). Ni la, atâa azo amä e wala ala mä e pëpe, a lingbi e ngbâ lakue ti fa nzo tënë ti Royaume. Biani, ngangu kue so e yeke sara ti fa nzo tënë ti Royaume ayeke mbeni pendere ye mingi na lê ti Jéhovah.—aRom. 10:13-15.
17. Na yâ ti kete ngoi, azo ayeke hinga ande nyen biani?
17 Atâa so azo mingi abâ fango tënë ti e na nene ni pëpe, na yâ ti kete ngoi ala yeke changé ande bango ndo ti ala (Mat. 24:37-39). Jéhovah adë bê ti Ezéchiel so na ngoi so atënë ti ngbanga so lo yeke fa lani ayeke ga tâ tënë, fade azo ti Israël so li ti ala akpengba mingi ayeke “hinga so prophète ayeke [lani] na popo ti ala.” (Ezéch. 2:5). Legeoko nga, na ngoi so Nzapa ayeke sara ande ye alingbi na ngbanga so lo dë na ndo ti aye ti ngoi ti laso, azo ayeke hinga biani so tënë so aTémoin ti Jéhovah ayeke fa lani na ando so a yeke wara gbâ ti azo dä nga da na da alondo na oko tâ Nzapa, Jéhovah. Azo ayeke hinga nga so a yeke Jéhovah la ahunda lani na aTémoin ti lo ti fa tënë. So kota pasa si e yeke na ni ti tene iri ti Jéhovah aduti na ndo ti e nga ti tene e fa tënë ti lo na yâ ti akpengba ngoi so! Na ngangu ti Jéhovah, zia e ngbâ lakue ti hon ndo ti akpale so andu fango tënë da na da.
Mo yeke kiri tënë tongana nyen?
• Na lege wa e lingbi ti hon ndo ti mbeto si e fa tënë?
• Nyen la alingbi ti mû maboko na e ti to nda ti alisoro na ndo ti Bible na ngoi so e yeke fa tënë da na da?
• Na lege wa e lingbi ti fa so e yeke bi bê ti e biani na azo?
• Nyen la ayeke mû maboko na e ti ngbâ lakue ti duti na nzoni bango ndo na ndo ti azo ti territoire ti e?
[Encadré/Foto na lembeti 17]
Mbeni lege ti to nda ti alisoro na ndo ti Bible
Ti to nda ni:
◼ Na pekoni so mo bara zo ni awe, mo lingbi ti mû na lo mbeni tract, na mo tene: “Ndani so mbi ga ti bâ mo laso ayeke ti fa na mo mbeni pendere tënë na ndo ti kpengba tënë so.”
◼ Wala mo lingbi ti mû mbeni tract na zo ni, na mo tene: “Mbi ga ti sara nduru lisoro na mo laso ndali ti so a nzere na mbi mingi ti hinga tënë ti bê ti mo na ndo ti tënë so.”
Tongana zo ni amû tract ni awe:
◼ Sân ti ku a ninga, hunda na zo ni mbeni tënë so ayeke pusu lo ti fa bibe ti lo na ndo ti kota li ti tënë ti tract ni.
◼ Dengi mê nzoni ti mä ye so lo tene si mo hinga bango ndo ti lo. Gonda lo ndali ti so lo fa tënë ti bê ti lo na mo.
Ti ngbâ ti sara lisoro ni:
◼ Diko mbeni versê oko wala use tongaso na sara lisoro na ndo ni, sara tënë na ndo ti ye so agbu bê ti zo ni nga na aye so lo yeke na bezoin ti hinga ni.
◼ Tongana mbeni zo afa so lo sara nzara ti tënë ni, fa na lo mbeni mbeti nga tongana lege ayeke dä, fa na lo tongana nyen a yeke manda Bible na azo na lege ti mbeti ni. Leke ti kiri ande ti bâ zo ni.