Mo hinga?

A-impôt wa la azo ayeke futa lani na ngoi ti Jésus?

TETI angu mingi, azo ti Israël ayeke mû lani nginza ti mû maboko na tâ vorongo Nzapa. Me tënë ti futango impôt aga ngangu nga mbeni nengo kungba na ndö ti aJuif na ngoi ti Jésus.

Ti mû maboko na akua so a yeke sara na yâ ti tabernacle nga na pekoni na yâ ti temple, aJuif so ayeke akota zo adoit lani ti futa ndambo ti sicle (drachme use). Na ngoi ti Jésus, a yeke sara lani kua na anginza so ti bâ lege ti temple so Hérode asara nga ti vo na aye ti mungo na sandaga na yâ ti temple ni. Ambeni Juif ahunda Pierre ti hinga bango ndo ti Jésus na ndö ti impôt so, na Christ atene so a yeke sioni ape ti futa ni. Ti vrai ni, lo mû yanga na Pierre ti gi nginza ti futa na impôt so.—Mat. 17:24-27.

Awakua ti Nzapa ti ândö ayeke futa nga lani mbeni impôt nde so a iri ni dîme, so alingbi na dixième ti akobe ti yaka ti ala wala ti nginza so ala wara (Lév. 27:30-32; Nom. 18:26-28). Akota zo ti Nzapa atene lani so azo adoit ti futa dîme na ndö ti akugbe-kasa kue so ala lu, même na ndö “ti menthe, ti aneth na ti cumin.” Jésus atene ape so a yeke sioni ti futa dîme, me lo tene so fason so ascribe nga na aFarizien ayeke hunda na dîme ni ayeke na lege ni ape.—Mat. 23:23.

Me na ngoi ni so, aJuif ayeke futa nga lani gbâ ti a-impôt na aRomain so ayeke komande na ndö ti ala. Na tapande, azo so ayeke na yaka adoit ti futa impôt, ala yeke futa ni na nginza wala na aye. Tongana zo ni awara sac ti kobe osio, lo yeke mû oko na aRomain. Juif oko oko ayeke futa nga lani impôt ndali ti lo wani. Impôt so la aFarizien ahunda lani Jésus na ndö ni. Lo fa lani bango ndo so a yeke nzoni e duti na ni na ndö ti futango impôt, lo tene: “Tongaso, ala kiri na César aye so ayeke ti César, me na Nzapa aye so ayeke ti Nzapa.”—Mat. 22:15-22.

A yeke futa nga lani impôt na ndö ti akungba so a mû ni na mbeni ndo ti gue na ni na mbeni ndo nde. A yeke ro lani nginza ti impôt na aport, na yanga ti apont, na acroisement wala na lindango na yâ ti agbata wala na yâ ti agara.

A-impôt kue so azo ayeke futa lani na gbe ti komandema ti aRomain ayeke lani mbeni kungba so ane mingi. Tacite, mbeni wasungo mbaï ti Rome, atene so na ngoi ti komandema ti Togbia Tibère na ngoi so Jésus ayeke lani na sese, “azo ti Syrie na ti Judée avoro yanga ti tene a zi mbage ti impôt so ala yeke futa ndali ti so a yeke lani ngangu na ala ti futa ni.”

Kode so a yeke ro lani na anginza ti impôt asara si futango impôt akiri aga ngangu na azo. A yeke mû kua ti rongo nginza ti impôt na zo so ayeke na nginza mingi na popo ti azo so aye ti sara kua ni. Zo ni so ayeke mû ambeni zo na kua ti ro nginza ni; lo na ala kue ayeke wara go na ndö ti nginza so ala ro. Na bango ni, Zachée kue ayeke na mara ti azo ni so na gbe ti lo (Luc 19:1, 2). E comprendre ndani so azo aye lani kode ni so ape nga ala ke azo ti rongo nginza ti impôt.