Jésus airi Matthieu ti mû peko ti lo

Kete na peko ti so lo sava koli so mbage ti tere ti lo akui, Jésus akiri na yâ ti kodro ti Capernaüm, na hongo na lê ti Kota ngu ti Galilée. Ge encore, gbâ ti azo aga na mbage ti lo, na lo komanse ti fa ye na ala. Tongana lo yeke tambela, lo bâ Matthieu so a iri nga lo Lévi, so angbâ ti duti na yâ ti da ti rongo nginza ti impôt. Jésus amû na lo mbeni pendere tisango ndo, a tene: “Mû peko ti mbi.”—Matthieu 9:9.

Legeoko tongana ti Pierre, André, Jacques na Jean, Matthieu kue adoit ti mä tënë kete na ndo ti aye ti kpene so Jésus asara lani na yâ ti kodro ni. Nga legeoko tongana ala, lo yeda na lê ni lê ni. Matthieu afa peko ti ye ni so na yâ ti Évangile so lo sû, lo tene: “Matthieu alondo amû peko ti” Jésus (Matthieu 9:9). Matthieu adö kua ti lo ti rongo nginza ti impôt azia, na lo ga mbeni disciple ti Jésus.

Na ambeni lango nde na pekoni, peut-être ti fa singila ti bê ti lo ndali ti so Jésus asoro lo, Matthieu asara mbeni kota matanga na yanga-da ti lo. Me nde na Jésus na adisciple ti lo, lo tisa nga azo wa na matanga ni? Lo tisa angbene kamarade ti lo, azo ti rongo nginza ti impôt. Azo ti rongo nginza ti impôt lani ayeke hunda ka impôt na ndo ti akungba so ayeke na yâ ti abateau, na ndo ti akungba so a ga na ni na ndo ti achameau nga na ndo ti akungba so azo alï na ni na yâ ti kodro ni. Ala yeke gue na nginza so ala ro na akota zo ti Rome so azo aye ka ala ape so. A-Juif ayeke bâ ka azo ti rongo nginza ti impôt tongana nyen? Azo aye ala ape ngbanga ti so ala yeke nzi ka azo na ziango mbeni wungo ti nginza na ndo ti impôt so zo adoit fade ti futa ni. Na ngoi ti matanga ni so, a yeke wara nga ‘awasiokpari’, so ti tene azo so azo ahinga ala tongana azo so ayeke sara ka ye na lege ni ape.—Luc 7:37-39.

Na bango Jésus na matanga ni so na tere ti mara ti azo tongaso, aFarizien so abâ tere ti ala wani mbilimbili so, na so ayeke na place ni so, ahunda adisciple ti Jésus, ala tene: “Ngbanga ti nyen maître ti ala ate kobe na azo ti rongo nginza ti impôt nga na awasiokpari?” (Matthieu 9:11). Teti so Jésus amä tënë ti ala ni, lo kiri tënë na ala, lo tene: “Azo so ayeke na nzoni tere ayeke na bezoin ti docteur ape, me gi azo ti kobela. Ala gue agi ti hinga nda ti tënë so atene: ‘Mbi ye sarango nzoni bê na zo, me mbi ye sandaga pëpe.’ Mbi ga ti iri azo ti mbilimbili pëpe, me awasiokpari.” (Matthieu 9:12, 13; Osée 6:6). A-Farizien airi Jésus Wafango ye, me tënë ti bê ti ala ayeke nde. Ye oko, ala lingbi kamême ti manda mbeni ye na mbage ti lo na ndo ti tënë ti sarango ye na lege ni.

Âmanke Matthieu atisa azo ti rongo nginza ti impôt nga na awasiokpari na da ti lo, ti mû lege na ala ti wara lege ti mä Jésus nga ti wara sava na lege ti yingo, na “ala gbani gbani la ayeda ti mû peko ti lo.” (Marc 2:15). Jésus aye ti aidé ala ti wara mbeni nzoni songo na Nzapa. Nde na aFarizien so abâ tere ti ala mbilimbili, Jésus ake mara ti azo tongaso ape. Lo sara ye na mbage ti ala na nzoni bê nga lo bâ mawa ti ala. Lo sara ye tongana mbeni docteur na lege ti yingo ndali ti azo kue so ayeke na kobela na lege ti yingo.

Jésus asara ye na nzoni bê na mbage ti azo ti rongo nginza ti impôt nga na mbage ti awasiokpari, pëpe na kangango lê na ndo ti asiokpari ti ala, me na dutingo na oko bibe so lo fa ni lani na mbage ti azo so tere ti ala ason. Na tapande lo bâ lani mawa ti mbeni zo ti buruma, na so lo tene na lo, lo tene: “Mbi ye. Zia tere ti mo aga nzoni.” (Matthieu 8:3). A yeke nzoni e kue e fa mara ti nzoni bê tongaso na e mû maboko na azo so ayeke na bezoin ni, mbilimbili na lege ti yingo!