Atënë so azo ahunda
So Jésus atene: “Ala pensé pëpe so mbi ga ti zia siriri”, lo ye ti tene nyen la?
Jésus afa lani na azo ti duti na siriri na amba ti ala. Me mbeni lâ, lo tene na abazengele ti lo, lo tene: “Ala pensé pëpe so mbi ga ti zia siriri na ndö ti sese. Mbi ga ti zia siriri pëpe, me ti zia épée. Mbi ga ti zia kangbi: Molenge-koli ayeke ke babâ ti lo, molenge-wali ayeke ke mama ti lo nga wali ayeke ke mama ti koli ti lo.” (Mat. 10:34, 35). Jésus aye lani ti tene nyen la?
Jésus aye lani ti kangbi yâ ti azo ti sewa ape, me lo hinga so afango ye ti lo ayeke ga na kangbi na yâ ti ambeni sewa. Tongaso, azo so aye ti ga adisciple ti Christ nga ti wara batême abezoin ti hinga aye so ayeke ga na peko ti desizion ti ala. Tongana wali wala koli ti ala so ayeke Témoin ape wala ambeni zo ti sewa ti ala akanga lege na ala, a peut ti duti ngangu na ala ti ngbâ ti sara ye alingbi na afango ye ti Christ.
Bible awa aChrétien ti “duti na siriri na azo kue.” (aRom. 12:18). Me afango ye ti Jésus apeut ti sara kua tongana mbeni “épée” na yâ ti ambeni sewa. A yeke si tongana mbeni zo ti sewa ayeda na afango ye ti Jésus me ambeni ake ni. Tongana a si tongaso, afami ti zo so ayeke manda tâ tënë, so ti tene azo so lo na ala ayeke lango da oko, ayeke ga “awato” ti lo.—Mat. 10:36.
Na ambeni ngoi, adisciple ti Christ so alango ndo oko na afami ti ala so bungbi ti vorongo nzapa ti ala ayeke nde adoit ti mû desizion ti sara aye so azia ngia na bê ti Jéhovah na Jésus wala ti sara aye so azia ngia na bê ti afami ti ala. Na tapande, afami ti ala so ayeke aTémoin ape apeut ti pusu ala ti sara mbeni matanga so abungbi ti vorongo nzapa ayeke sara. Tongaso, a yeke na ala ti soro zo so ala yeke zia ngia na bê ti lo. Jésus atene: “Zo so aye babâ wala mama ti lo mingi ahon mbi, lo kpa ti duti disciple ti mbi pëpe.” (Mat. 10:37). Jésus aye lani ti tene ape so ti ga disciple ti lo, azo so ayeke manda tâ tënë adoit ti zia ti ye ababâ na amama ti ala mingi. Me lo yeke fa lani na ala tongana nyen ti soro aye so ayeke akota ye mingi na yâ ti fini ti ala. Tongana afami ti e so ayeke aTémoin ape akanga lege na e ti voro Jéhovah, e yeke ngbâ ti ye ala, me e hinga so Nzapa la e doit ti ye lo kozo.
Kite ayeke dä ape so tongana afami ti e akanga lege na e apeut ti sara e vundu mingi. Me adisciple ti Jésus ayeke girisa atënë ti lo so ape: “Zo so ayeda pëpe ti yô keke ti pasi ti lo na ti mû peko ti mbi, lo kpa ti duti disciple ti mbi pëpe.” (Mat. 10:38). Ti tene ni na mbeni lege nde, aChrétien abâ kangango lege ti azo ti afami ti ala tongana mbage ti apasi so adisciple ti Christ ayeke nduru ti yeda na ni. Me ala yeke na beku so ndali ti anzoni sarango ye ti ala afami ti ala ayeke changé ande bango ndo ti ala nga ala yeke yeda ti manda ye na ndö ti Bible.—1 Pi. 3:1, 2.