Ngia alingbi ti duti na yâ ti sewa so koli wala wali ni ayeke Témoin pëpe

“Mo hinga tongana nyen so mo yeke sö ande [koli wala wali] ti mo pëpe?” ​—1 ACOR. 7:16.

MO LINGBI TI WARA AKIRINGO TËNË NI?

Nyen la mbeni Chrétien alingbi ti sara ti maï siriri na yâ ti sewa so ambeni zo ni ayeke aTémoin pëpe?

Mbeni Chrétien alingbi ti sara nyen ti mû maboko na amembre ti sewa ti lo ti yeda na tâ tënë?

Nyen la ambeni ita alingbi ti sara ti mû maboko na amba ti ala so ayeke na yâ ti sewa so ambeni zo ni ayeke aTémoin pëpe?

1. Tongana mbeni zo ayeda na tënë ti Royaume, a lingbi ti sara nyen na ndo ti azo ti sewa ti lo?

MBENI lâ Jésus atokua adisciple ti lo, lo tene na ala: “Tongana ala yeke gue, ala fa tënë, ala tene: ‘Royaume ti yayu aga nduru awe.’” (Mat. 10:1, 7). Nzoni tënë so ayeke ga na siriri nga na ngia na azo so ayeda na ni na bê ti ala kue. Ye oko, Jésus agboto mê ti abazengele ti lo so azo mingi ayeke kanga lege na kusala ti ala ti fango tënë ti Royaume so (Mat. 10:16-23). Mbeni kangango lege ni so ayeke mû vundu na zo mingi ayeke na ngoi so azo ti sewa ti zo ni ake ti yeda na tënë ti Royaume.​—Diko Matthieu 10:34-36.

2. Ngbanga ti nyen aChrétien so ayeke na yâ ti asewa so ambeni zo ni ayeke aTémoin pëpe alingbi ti duti na ngia?

² Ye so aye ti tene so adisciple ti Christ so ayeke na yâ ti sewa so koli wala wali ni ayeke Témoin pëpe alingbi ti duti na ngia pëpe? Oko pëpe! Atâa so ngoi na ngoi kangango lege ni alingbi ti duti ngangu mingi, na yâ ti asewa kue la a yeke tongaso pëpe. Nga, kangango lege ni alingbi ti ngbâ gi lakue pëpe. Atâa zo ni akanga lege wala lo sara sanka ti tâ tënë, mingi ni sarango ye ti mo Témoin ni na gbele aye ni so la ayeke sara si mo duti na ngia wala pëpe. Jéhovah ayeke iri tënë nzoni na ndo ti azo so ayeke be-ta-zo na lo nga lo yeke sara si ala duti na ngia atâa na yâ ti akpale. A-Chrétien alingbi ti duti na ngia tongana (1) ala sara ngangu ti maï siriri na yâ ti sewa ti ala nga (2) ala gi ti mû maboko na azo ti sewa ti ala ti yeda na tâ tënë.

GI TI MAÏ SIRIRI NA YÂ TI SEWA NI

3. Ngbanga ti nyen a yeke nzoni mbeni Chrétien so ambeni zo ti sewa ti lo ayeke aTémoin pëpe agi ti maï siriri?

³ Ti tene ngongoa ti ye so ayeke mbilimbili alë lengo na yâ ti sewa, a yeke kota ye ti tene siriri aduti na yâ ti sewa ni. (Diko Jacques 3:18.) Même tongana azo ti sewa ti mbeni Chrétien ade ti ga pëpe awakua ti Jéhovah, a lingbi lo sara kue ti maï siriri na yâ ti sewa ni. Lo yeke sara ni tongana nyen?

4. A-Chrétien alingbi ti sara nyen ti bata siriri ti bê ti ala?

⁴ A lingbi aChrétien abata siriri ti bê ti ala. Ti wara “siriri ti Nzapa” so mara ni ayeke use pëpe, a lingbi e sambela na bê ti e kue (aPhil. 4:6, 7). Ti hinga Jéhovah nga ti sara ye alingbi na aye so Mbeti ti lo afa ayeke sara si e duti na ngia nga na siriri (És. 54:13). A yeke nga kota ye ti gue na abungbi nga ti fa tënë na nzara ni tongana e ye ti duti na ngia nga na siriri. Mingi ni, lege ayeke dä ti tene aChrétien so azo ti sewa ti ala ayeke aTémoin pëpe asara akusala ti aChrétien. Bâ tapande ti Enzaa so koli ti lo akanga lege na lo ngangu. Lo yeke hunzi kua ti lo ti da awe si lo gue lo sara kusala ti sarango adisciple. Enza atene: “Na angoi kue so mbi sara ngangu ti fa nzoni tënë na azo, Jéhovah asara si mbi wara ye ti nzoni mingi na pekoni.” Aye ti nzoni ni so asara si lo yeke na siriri, ngia nga nzerengo tere.

5. Kpale wa mingi ni aChrétien so azo ti sewa ti ala ayeke aTémoin pëpe ayeke wara? Ala lingbi ti wara mungo maboko na ndo wa?

⁵ A lingbi e sara ngangu ti duti na siriri na azo ti sewa ti e so ayeke aTémoin pëpe. A lingbi ti duti kete ye pëpe ndali ti so na ambeni ngoi aye so ala hunda na e ti sara alingbi ti gue nde na aye so Bible ahunda na e ti sara. Ti sara ye lakue alingbi na afango ye ti Bible so ayeke mbilimbili alingbi ti son bê ti ambeni zo ti sewa ti e so ayeke aTémoin pëpe, me tongana e ngbâ ti sara ni mbeni lâ e lingbi ti duti na siriri na yâ ti sewa ni. Tâ tënë, ti luti nganganga na ndo ti mbeni ye so Bible ake ni pëpe alingbi ti ga na kpale senge senge. (Diko aProverbe 16:7.) Tongana e tingbi na mbeni kpale, a yeke kota ye ti gi wango ti Bible na yâ ti ambeti so ngbâa be-ta-zo so ayeke sara ye na ndara asigigi na ni nga na mbage ti a-ancien.​—aProv. 11:14.

6, 7. (a) Ngbanga ti nyen ambeni zo ayeke kanga lege na amembre ti sewa ti ala so ato nda ti manda Bible na aTémoin? (b) A yeke nzoni mbeni wamandango Bible wala mbeni Témoin asara ye tongana nyen na azo ti sewa ti lo so ayeke kanga lege na lo?

⁶ Ti gi ti duti na siriri na yâ ti sewa ahunda ti tene e zia bê ti e na Jéhovah nga e gi ti hinga atënë ti bê ti amembre ti sewa ni (aProv. 16:20). Même azo so ato nda ti manda Bible fini fini alingbi ti sara ye na ndara na ndo ti tënë so. Ambeni koli wala wali so ayeke Témoin pëpe alingbi ti ke pëpe ti tene wali wala koli ti ala amanda Bible. Ala lingbi même ti tene so mandango Bible ayeke sara nzoni na sewa ni. Ye oko, ambeni alingbi ti ke na kuru go. Esther so ayeke fadeso Témoin atene ni sara lani ngonzo ngangu na ngoi so koli ti ni ato nda ti manda Bible na aTémoin ti Jéhovah. Lo tene: “Mbi yeke tuku ambeti ti lo wala mbi gbi ni.” Howard, so na tongo nda ni akanga lege ti tene wali ti lo amanda Bible, atene so akoli mingi asara mbeto ti tene azo ahanda awali ti ala ague na ala na yâ ti mbeni secte. Lo tene nga so mbeni koli alingbi ti pensé so kengo ye ni na ngangu la alingbi ti kanga lege na sioni ye so ayeke hara wali ti lo.

⁷ A yeke nzoni a mû maboko na mbeni wamandango Bible so koli wala wali ti lo akanga lege na lo ti bâ so a lingbi lo zia lege ti mandango Bible ni pëpe. Mingi ni lo lingbi ti hon ndo ti akpale ni so tongana lo sara ye na ngangu pëpe nga lo ne koli wala wali ti lo ni (1 Pi. 3:15). Howard atene: “Mbi mû merci so wali ti mbi asara ye lani na ngangu pëpe nga lo sara ye ahon ndo ni pëpe.” Wali ti Howard atene so lo hunda na ni ti zia lege ti mandango Bible ni. Lo tene so aTémoin ni ayeke handa ni. Wali ni atene: “Ahon ti papa na lo, mbi tene na lo so lo lingbi peut-être ti duti na raison, me mbi tene nga na lo so ti tâ tënë ni mbi bâ ti mbi aye ni tongaso pëpe. Tongaso, mbi hunda na lo ti diko mbeti so mbi yeke manda ni so. Lo diko ni na lo bâ so tënë so mbi tene na lo ayeke tâ tënë. Ye so andu lani bê ti lo mingi.” A yeke nzoni e girisa pëpe so zo so ayeke Témoin pëpe alingbi ti bâ so koli wala wali ti lo so ayeke Témoin asara si lo ngbâ gi lo oko wala lo zia mariage ti ala na yâ ti kpale na ngoi so lo gue na bungbi wala na fango tënë. Me Témoin ni wala wamandango Bible ni alingbi ti sara tënë na nzoni bê nga na ndoye na koli wala wali ti lo. Ye so ayeke sara si lo gi bê ti lo pëpe.

MÛ MABOKO NA ALA TI GA NA YÂ TI TÂ TËNË

8. Wango wa bazengele Paul amû na aChrétien so koli wala wali ti ala amä na bê pëpe?

⁸ Bazengele Paul awa aChrétien so asara mariage awe ti ke pëpe koli wala wali ti ala gi ndali ti so zo ni amä na bê pëpe.b (Diko 1 aCorinthien 7:12-16.) Tongana mbeni Chrétien adabe ti lo so koli wala wali ti lo so amä na bê pëpe alingbi ti ga Chrétien mbeni lâ, ye so ayeke mû maboko na lo Chrétien ni ti bata ngia ti lo atâa so lo yeke na yâ ti sewa so ala kue la ayeke aChrétien pëpe. Me na ngoi so lo yeke gi ti ndu bê ti koli wala wali ti lo na tâ tënë, a lingbi lo sara hange na ambeni ye tongana ti so aye so a fa na yâ ti aparagraphe ti peko afa.

9. Nyen la a lingbi mbeni Chrétien asara hange na ni na ngoi so lo yeke fa tâ tënë ti Bible na azo ti sewa ti lo?

⁹ Jason adabe ti lo na ndo ti sarango ye ti lo na ngoi so lo manda atâ tënë ti Bible fini fini, lo tene: “Mbi ye lani ti sara tënë ni na azo kue.” Tongana mbeni wamandango Bible aga ti bâ so aye so a fa na lo na yâ ti Bible ayeke tâ tënë, tere ti lo alingbi ti nzere mingi na asara si lo yeke sara tënë ni na azo na ngoi kue. Lo lingbi ti ku ti tene amembre ti sewa ti lo so ayeke aTémoin pëpe ayeda hio na tënë ti Royaume, me ala lingbi ti ke ni. Nzerengo tere so Jason ayeke na ni na tongo nda ni asara nyen na ndo ti wali ti lo? Wali ni atene so lani ni nyon ngu na lo ape. Mbeni wali so koli ti lo ayeda na tâ tënë asara ngu 18 awe si lo ga ti yeda na tâ tënë atene: “A lingbi mbi manda ni lani yeke yeke si mbi hinga ni.” Tongana mo yeke manda Bible na ndembe so na mbeni zo so koli wala wali ti lo aye pëpe ti bungbi oko na lo ti voro Jéhovah, ngbanga ti nyen mo mû pëpe ambeni ngoi ti mû maboko na wamandango Bible ni ti fa tâ tënë na koli wala wali ti lo na mbeni lege so ason bê ti lo pëpe? Moïse atene: “Wango-tene ti mbi ayeke tongana ngu-nduzu so apika; tënë ti mbi ayeke tongana mamio, tongana kete ngu-nduzu na ndo fini pere.” (Deut. 32:2). Mingi ni, tongana e sara tënë kete na ndo ti tâ tënë na mbeni lege so ayeke nzoni nga na ngoi so alingbi na ni, a yeke sara nzoni mingi ahon ti diko gbâ ti tënë.

10-12. (a) Wango wa bazengele Pierre amû na aChrétien so koli wala wali ti ala amä na bê pëpe? (b) Tongana nyen la mbeni zo so ayeke manda Bible amanda ti sara ye alingbi na wango so ayeke na 1 Pierre 3:1, 2?

¹⁰ Yingo ti Jéhovah apusu bazengele Pierre ti mû wango na awali Chrétien so akoli ti ala amä na bê pëpe, lo tene: “Ala woko tere na gbe ti akoli ti ala, si tongana ambeni koli ni ayeke dä so ayeda na tënë ti nzapa pëpe, a lingbi ti ga na ala ti mä na bê, na lege ti tënë pëpe, me na lege ti sarango ye ti tere ti awali ti ala, ngbanga ti so akoli ni abâ na lê ti ala sarango ye ti ala so sioni oko ayeke dä pëpe nga na nengo so ala ne na ala mingi.” (1 Pi. 3:1, 2). Mbeni wali alingbi ti ga na koli ti lo ti voro Jéhovah na lege so lo yeke woko tere na gbe ti koli ni nga lo ne lo mingi, même tongana koli ni asara ye na lo na ngangu. Legeoko nga, a lingbi mbeni koli so ayeke Chrétien asara ye na mbeni lege so afa so lo kpe mbeto ti Nzapa nga lo mû li ni na yâ ti sewa ti lo na ndoye même tongana wali ti lo so amä na bê pëpe akanga lege na lo.​—1 Pi. 3:7-9.

¹¹ Atapande mingi ti ngoi ti e afa so sarango ye alingbi na wango ti Pierre so ayeke nzoni mingi. Bâ tapande ti Selma. Na ngoi so lo to nda ti manda Bible na aTémoin ti Jéhovah, a nzere na koli ti lo Steve pëpe. Steve atene so ni sara lani ngonzo ngangu, ni sara mbanda nga mbeto asara ni. Selma atene so même kozoni si ni manda tâ tënë, sarango kodoro na lo ayeke ngangu mingi. A lingbi ni sara hange na yâ ti aye kue so ni yeke sara nga na atënë so ni yeke tene. Lo tene nga so lani koli ti lo ayeke sara ka ngonzo lakue, me kpale ni so akiri ahon ndo ni na ngoi so ni to nda ti manda Bible. Nyen la amû maboko na lo?

¹² Selma adabe ti lo na mbeni ye so lo manda na mbage ti Témoin so amanda Bible na lo. Lo tene: “Na mbeni lango, mbi ye ti manda Bible ni pëpe. Na bï so aga kozo na lango ni so, Steve apika mbi na ngoi so mbi yeke gi ti fa na lo mbeni ye, vundu ahon ndo ti mbi na mbi regretté. Na pekoni so mbi fa na ita-wali ni ye so asi nga vundu so asara mbi, lo hunda na mbi ti diko 1 aCorinthien 13:4-7. Na ngoi so mbi yeke diko ni, mbi to nda ti tene: ‘Steve asara anzoni ye so na mbi lâ oko ape.’ Me ita-wali ni apusu mbi ti pensé na mbeni lege nde, lo tene: ‘Na popo ti anzoni ye so, oke la mo sara na koli ti mo?’ Mbi tene so ‘mbi sara ye oko pëpe ndali ti so sarango kodoro na lo ayeke ngangu mingi.’ Ita-wali ni atene yeke na mbi lo tene: ‘Selma, zo wa la ayeke gi ti ga Chrétien? Mo wala Steve?’ Tongana mbi bâ so a lingbi mbi changé bibe ti mbi, mbi sambela Jéhovah ti mû maboko na mbi si mbi sara ye mingi na ndoye na mbage ti Steve. Yeke na yeke, aye ato nda ti changé.” Ngu 17 na pekoni, Steve ayeda na tâ tënë.

LEGE SO AMBENI ZO ALINGBI TI MÛ MABOKO

13, 14. Tongana nyen la azo ti yâ ti congrégation alingbi ti mû maboko na ala so ayeke na yâ ti sewa so ambeni zo ni ayeke aTémoin pëpe?

¹³ Na tapande ti ngu-nzapa so apika na sese asara si akugbe ti kasa wala akeke akono, gbâ ti azo so ayeke na yâ ti congrégation asara si aChrétien so azo ti sewa ti ala ayeke aTémoin pëpe aduti na ngia. Elvina so ayeke na Brézil atene: “Ndoye so aita ti mbi ayeke na ni na mbage ti mbi la amû maboko na mbi ti luti ngangu na yâ ti tâ tënë.”

¹⁴ Tongana aita ti congrégation asara ye na nzoni bê nga ala bi bê ti ala na zo, a lingbi ti sara ye mingi na ndo ti amembre ti sewa ti mbeni ita so ayeke Témoin pëpe. Na Nigeria, mbeni koli so ayeda na tâ tënë ngu 13 na pekoni so wali ti lo aga Témoin atene: “Na ngoi so mbi na mbeni Témoin e yeke voyagé, oto ti lo atï panne. Lo gi ambeni Témoin so ayeke na yâ ti mbeni kodoro so ayeke nduru na e, ala mû na e ndo ti tene e lango dä na bï. Ala bâ lege ti e mo bâ mo tene e na ala e hinga tere ngbene ye so e de kete. Hio tongaso mbi bâ ndoye so wali ti mbi ayeke sara tënë ni lakue so.” Na Angleterre, mbeni wali so ayeda na tâ tënë ngu 18 na pekoni so koli ti lo aga Témoin atene: “A-Témoin ayeke tisa lani e use kue ti te kobe. Lakue mbi bâ so a yamba mbi nzoni.”c Gi na yâ ti oko kodoro so mbeni koli so na nda ni lo ga Témoin atene: “Aita ayeke sara vizite na e, ala tisa e na ndo ti ala nga mbi bâ so ala yeke lani na nzoni bê. A sigigi polele na ngoi so mbi yeke lani na hôpital na gbâ ti aTémoin aga abâ mbi.” Mo lingbi ti gi ambeni lege ti bi bê ti mo legeoko tongaso na azo ti sewa ti aita so ayeke aTémoin pëpe?

15, 16. Nyen la alingbi ti mû maboko na mbeni ita ti ngbâ ti duti na ngia na ngoi so azo ti sewa ti lo ade ti ga Témoin pëpe?

¹⁵ Tâ tënë, même tongana e sara ye so ayeke nzoni nga e fa tënë na kode teti angu mingi, azo kue ti yâ ti fami ti e la ayeke yeda na tâ tënë pëpe. Ambeni ayeke ngbâ ti sara sanka wala ti kanga lege ngangu na e (Mat. 10:35-37). Me, tongana e sara ye tongana aChrétien, a lingbi ti sara ye ti nzoni mingi na ndo ti azo. Mbeni koli so kozo gi wali ti lo la ayeke Témoin atene so mo lingbi même pëpe ti hinga tongana nyen apendere sarango ye ti aChrétien so ayeke sara ye na ndo ti bibe nga na bê ti koli wala wali ti ala so ayeke Témoin pëpe. Lo kiri lo tene: “Zia bê ti mo anze pëpe na mbage ti koli wala wali ti mo so ayeke Témoin pëpe.”

¹⁶ Même tongana azo ti sewa ti mbeni ita aga aTémoin pëpe, lo lingbi ti duti na ngia. Mbeni ita-wali so asara ye kue gbä teti ngu 21 me koli ti lo ayeda na tënë ti Royaume pëpe atene: “Mbi wara lege ti bata ngia ti mbi na lege so mbi sara ngangu ti nzere na lê ti Jéhovah, ti ngbâ be-ta-zo na lo nga ti sara ngangu ti kpengba songo ti mbi na lo. Ti bi tere ti mbi na yâ ti aye ti yingo, aye tongana mandango ye mbi wani, guengo na bungbi, fango tënë nga mungo maboko na azo na yâ ti congrégation asara si mbi ga nduru mingi na Jéhovah nga abata bê ti mbi.”​—aProv. 4:23.

ZIA BÊ TI MO AWOKO PËPE

17, 18. Mbeni Chrétien alingbi ti sara nyen ti ngbâ ti duti na beku même na yâ ti sewa so ambeni zo ni ayeke aTémoin pëpe?

¹⁷ Tongana mo yeke mbeni Chrétien be-ta-zo so ayeke na yâ ti sewa so ambeni zo ni ayeke aTémoin pëpe, zia bê ti mo awoko pëpe. Dabe ti mo so “ngbanga ti kota iri ti Lo, fade L’Éternel azia azo ti Lo pëpe.” (1 Sam. 12:22). Lo yeke ngbâ na tere ti mo tongana mo ngbâ nganganga na tere ti lo. (Diko 2 Chronique 15:2.) Tongaso “gi lege ti wara ngia ti mo na yâ L’Éternel”. Nga, “zia lege ti mo na tïtî L’Éternel; zia bê ti mo na Lo”. (Ps. 37:4, 5). “Ngbâ lakue ti sambela,” nga hinga na bê ti mo kue so Babâ ti e ti yayu so ayeke sara ye na ndoye alingbi ti mû maboko na mo ti gbu ngangu na yâ ti akpale kue.​—aRom. 12:12.

¹⁸ Sambela ti tene Jéhovah amû yingo vulu ti lo na mo ti mû maboko na mo ti maï siriri na yâ ti sewa (aHéb. 12:14). Tongana mo sara ni, mo yeke wara lege ti sara ye ti nzoni na ndo ti azo ti sewa ti mo so ayeke na yâ ti tâ tënë pëpe. Mo yeke duti na ngia nga na siriri ti bê tongana mo “sara ye kue teti gloire ti Nzapa.” (1 aCor. 10:31). Na ngoi so mo yeke sara ngangu ti sara aye so, hinga so na ndoye aita ti mo ti congrégation ayeke mû maboko na mo.

[Akete tënë na gbe ni]

[Foto na lembeti 28]

Soro nzoni ngoi ti fa aye so mo mä na bê na ni

[Foto na lembeti 29]

Bi bê ti mo na koli wala wali ti mo so ayeke Témoin pëpe