2 | “Dengo bê so alondo na yâ ti Mbeti ti Nzapa”

BIBLE ATENE: “Aye kue so a sû ândö giriri na yâ ti Mbeti ti Nzapa, a sû ni ti tene a fa ye na e, si na lege ti gbungo ngangu ti e nga na lege ti dengo bê so alondo na yâ ti Mbeti ti Nzapa e duti na beku.”—AROMAIN 15:4.

Tënë so aye ti tene nyen?

Bible akpengba e na lege ti atënë ti dengo bê so apeut ti aidé e ti gbu ngangu tongana e yeke na asioni pensé. Atënë ti Bible amû nga na e beku so na yâ ti kete ngoi aye so asara e vundu ayeke duti ande dä encore ape.

Lege so Bible apeut ti aidé e

Parfois e kue e yeke na yâ ti angoi ti vundu; me azo so abâ pasi ndali ti dépression wala gingo bê ayeke lakue na vundu. Tongana nyen la Bible apeut ti aidé e?

E yeke wara gbâ ti anzoni pensé na yâ ti Bible so apeut ti aidé e ti zi asioni ni (aPhilippien 4:8). Anzoni pensé ni so apeut ti dë bê ti e na ayeke aidé e ti hon ndö ti asioni pensé ti e.—Psaume 94:18, 19.
Bible apeut ti aidé e ti zia ti pensé so e yeke ye oko ape.—Luc 12:6, 7.
Gbâ ti aversê ti Bible adë bê ti e so e yeke gï e oko ape nga so Nzapa, Wasarango e, acomprendre asentiment ti e nzoni mingi.—Psaume 34:18; 1 Jean 3:19, 20.
Bible amû zendo so Nzapa ayeke sara ande si e dabe ti ape na aye ti sioni so asi na e ândö (Ésaïe 65:17; Apocalypse 21:4). Tongana e yeke bâ pasi ndali ti aye ti vundu so asi na e, zendo so apeut ti aidé e ti gbu ngangu.

Lege so Bible a-aidé Jessica

Mbi bâ pasi na dépression

“Na temps so mbi yeke lani na ngu 25, mbi yeke sara vundu mingi na a wara ngangu dépression na terê ti mbi. Mbi bâ pasi ndali ti aye ti vundu so asi na mbi ândö so ayeke ga gï hio tongaso na li ti mbi. Adocteur a-aidé mbi ti comprendre so dépression ti mbi ni ayeke ndali ti fason so mbi yeke pensé na ni na ndö ti aye ti vundu so asi na mbi ândö. Nde na yorö so mbi yeke nyon, mbi bezoin ti sara ambeni ye ti aidé mbi ti hinga nga ti corrigé fason so mbi yeke pensé na ni so ayeke na lege ni ape.”

Lege so Bible a-aidé mbi

“Tongana vundu ahon ndö ti mbi ngangu, li ti mbi ayeke ga kirikiri, mbi yeke gi bê ti mbi mingi nga mbi yeke lango ape. Mingi ni na bï, gingo bê ayeke hon ndö ti mbi na mbi peut ti controlé ni ape. Tongana ti so Psaume 94:19 afa, Nzapa apeut ti dë bê ti e nga ti mû na e siriri tongana agingo bê ahon ndö ti e. Tongaso, mbi zia Bible ti mbi nga na mbeni mbeti so mbi sara aversê ti Bible so adë bê ti zo dä na terê ti gbogbo ti mbi. Tongana lango akpe na lê ti mbi, mbi yeke diko ambeni versê ti Bible, na sarango tongaso mbi zia si apensé ti Nzapa adë bê ti mbi.

“Bible a-encouragé e ti hon ndö ti apensé so ague nde na ye so e hinga na ndö ti Nzapa. Kozo, mbi pensé so mbi yeke ye oko ape nga mbi kpa ti tene a ye mbi ape. Me mbi manda so mara ti apensé tongaso ague nde na ti Bible, so afa so Nzapa ayeke mbeni Babâ so andoye e, lo bâ mawa ti e nga lo bi bê na e oko oko. Yeke yeke mbi gi ti controlé apensé ti mbi ahon ti tene mbi zia si apensé ti mbi ahon kirikiri. Mbi manda ti bâ terê ti mbi tongana ti so Nzapa abâ na mbi. A yeke kota ye so la a-aidé mbi ti hon ndö ti sioni bango ndo so mbi yeke na ni na ndö ti mbi wani.

“Mbi yeke ku kungo ngoi so aye kue so asara zo vundu nga na asioni pensé ayeke duti ande dä ape. Mbi hinga so kobela ti li ayeke duti ande dä ape. Ye so a-aidé mbi ti gbu ngangu laso nga mbi yeke ku kungo ngoi so dépression ayeke ande dä ape.”