3 | Bâ nzoni na lege ti atapande ti Bible

BIBLE ASARA TËNË TI . . . Akoli na awali be-ta-zo so ayeke na “abibe tongana ti e.”—JACQUES 5:17.

Tënë so aye ti tene nyen?

Bible asi singo na ambaï ti akoli na ti awali so asentiment ti ala ayeke nde nde. Tongana e diko ambaï ti ala, peut-être e yeke bâ mbeni oko na popo ti ala so e yeke na même sentiment ti lo.

Lege so atapande ti Bible apeut ti aidé e

E kue e ye ti tene azo acomprendre e. Me surtout tongana e yeke na kobela ti li. Na ngoi so e yeke diko ambaï ti azo so Bible asara tënë ti ala, e yeke manda ye na ndö ti ambeni so apensé ti ala nga na asentiment ti ala ayeke même tongana ti e. Mandango ye ni ayeke sara si e ga ti bâ so gï e oko la e yeke na vundu wala gingo bê ape, me ambeni zo abâ lani mara ti pasi ti e ni nga ala yeke na même sentiment ti e.

Na yâ ti Bible, e yeke wara gbâ ti atënë ti azo so abâ lani so zo ti mungo maboko na ala ayeke dä ape nga ala yeke na gingo bê. Eskê mo tene lâ oko awe so ‘mbi peut ti ngbâ ti vivre tongaso ape’? Moïse, Élie nga na David apensé lani tongaso.—Nombre 11:14; 1 aGbia 19:4; Psaume 55:4.
Bible asara tënë ti mbeni wali so iri ti lo ayeke Hannah so bê ti lo “ason mingi” ndali ti so lo yeke na molenge ape, nga sambâ ti lo ayeke gi yanga ti lo lakue.—1 Samuel 1:6, 10.
Bible asara tënë ti mbeni koli so iri ti lo ayeke Job, so e peut ti comprendre lo. Atâa so lo yeke na mabe, lo bâ pasi ndali ti aye ti vundu so asi na lo na mbeni lâ lo tene: “Nzara ti gigi asigi na yâ ti mbi awe; mbi ye ti ngbâ na fini pëpe.”—Job 7:16.

Tongana e manda tongana nyen la azo so Bible asara tënë ti ala so ahon ndö ti asioni pensé ti ala, a peut ti aidé e ti wara ngangu so e yeke na bezoin ni ti hon ndö ti vundu ti e.

Lege so Bible a-aidé Kevin

Lege so kobela ti trouble bipolaire asara mbi pasi

“A wara kobela ti li so a iri ni trouble bipolaire na terê ti mbi na ngoi so mbi yeke na ngu 50 tongaso. Na ambeni ngoi, mbi bâ so mbi peut ti hon ndö ti akpale so mbi wara na yâ ti gigi ti mbi. Me parfois, nzara ti gigi ahunzi na yâ ti mbi.”

Lege so Bible a-aidé mbi

“Mbeni zo so Bible asara tënë ti lo so mbi peut ti comprendre lo ayeke bazengele Pierre. Lo sara lani afaute so asara si lo bâ so lo yeke ye oko ape. Me ahon ti tene Pierre angbâ na bango ndo ni so, lo gi lani ti ngbâ nduru na terê ti akamarade so abi bê na lo. Tongana kobela ti li ni asara si apensé ti mbi aga kirikiri, awokongo ti mbi apeut ti hon ndö ti mbi nga mbi bâ so mbi yeke ye oko ape. Tongana ti Pierre, mbi manda ti ngbâ nduru na terê ti akamarade ti mbi so aye ti aidé mbi ti gbu ngangu.

“Mbeni zo ni nde so Bible asara tënë ti lo so adë bê ti mbi mingi ayeke Gbia David. Mingi ni, vundu ahon ndö ti lo ndali ti ye so lo vivre ni nga lo regretté afaute so lo sara. Mbi peut ti comprendre lo ndali ti so parfois mbi tene wala mbi sara aye so mbi regretté ni. Mbi bâ so atënë ti David so ayeke na Psaume 51 adë bê ti zo. Na versê 3, David atene: ‘Mbi hinga nzoni mingi akengo ndia ti mbi, na siokpari ti mbi ayeke lakue na gbele mbi.’ Ye so afa vraiment asentiment ti mbi na ngoi so vundu ahon ndö ti mbi, na a peut ti duti ngangu na mbi ti duti na nzoni bango ndo na ndö ti mbi. Me mbi peut nga ti comprendre atënë so David atene na versê 10: ‘Nzapa ti mbi, sara si mbi wara mbeni bê so avuru, nga mbeni fini bibe so ayeke sara si mbi luti ngangu.’ Mbi sara kua na oko tënë ni so ti hunda Nzapa ti aidé mbi ti duti na nzoni bango ndo na ndö ti mbi wani. Na nda ni, versê 17 adë bê ti mbi. A tene: ‘Bê so ayeke na vundu nga so anze kue, Nzapa ti mbi, mo yeke ke ni pëpe.’ Versê so adë bê ti mbi so Nzapa aye mbi.

“So mbi zia lê ti mbi na ndö ti atapande ti Bible nga na aye so Nzapa amû na mbi laso, akpengba beku ti mbi ndali ti kekereke. Azendo ti Bible aga vrai ye na lê ti mbi nga a-aidé mbi ti gbu ngangu.”