4 | Bible amû anzoni wango

Tënë so aye ti tene nyen?

Atâa so Bible ayeke mbeni mbeti ti santé ape, lo mû awango so ayeke nzoni. Awango so apeut ti aidé mbeni zo so ayeke na kobela ti li. Bâ ambeni tapande ni.

Lege so awango ti Bible apeut ti aidé e

“Azo so ayeke na nzoni terê ayeke na bezoin ti wanganga pëpe, me gï azo ti kobela.”​—MATTHIEU 9:12.

Bible afa so peut-être e bezoin ti bâ mbeni docteur. Mingi ti azo so ayeke na kobela ti li awara mungo maboko na lege so ala yeke gi ti hinga vrai ye so asara ala nga ala gue ti bâ mbeni docteur.

“Angia so zo ayeke sara ti tene terê ti lo akpengba so ayeke sara nzoni na zo.”​—1 TIMOTHÉE 4:​8, Mbeti ti Nzapa, Fini Mbuki, 1995.

Ti sara aye so asara si nyama ti terê ti mo akpengba apeut ti aidé mo ti duti na nzoni seni. Aye ni so andu sarango sport lakue, tengo nzoni kobe nga ti tene zo alango nzoni.

“Bê so ayeke na ngia ayeke nzoni yorö, me bê so awoko kue azi ngangu ti zo kue.”​—APROVERBE 17:22.

Ti diko aversê ti Bible so akpengba zo nga ti zia a-objectif so mo peut ti si dä apeut ti aidé mo ti duti na ngia. Tongana mo zia li ti mo na ndö ti anzoni ye so ayeke na yâ ti gigi nga mo yeke na mabe so aye ayeke ga ande nzoni na yâ ti angoi so ayeke ga, a yeke aidé mo ti hon ndö ti kobela ti li ti mo ni.

“Azo so abâ terê ti ala kete, ala yeke na ndara.”​—APROVERBE 11:2.

Peut-être mo bâ so mo wani mo peut ti sara ape aye kue so mo ye, tongaso yeda na aide ti ambeni zo. Akamarade nga na afami aye peut-être ti mû maboko na mo, me ala peut ti hinga ye ti sarango ni ape. Fa na ala mbilimbili ye so ala peut ti sara ti aidé mo. Sara ye ahon ndö ni ape na ndö ti aye so ala peut ti sara ndali ti mo, na kiri singila lakue ndali ti aide ti ala.

Tongana nyen la anzoni wango ti Bible a-aidé azo so ayeke na kobela ti li?

“Mbi bâ so mbeni ye amarché na mbi ape, tongaso mbi gue lani ti bâ mbeni docteur. Lo fa na mbi vrai kpale ti seni ti mbi. Ye so a-aidé mbi ti yeda na situation ti mbi nga ti gi ti hinga akode ti soingengo na kobela ni tongaso si mbi bâ lege ti seni ti mbi nzoni.”​—Nicole,a so ayeke na kobela ti trouble bipolaire.

“Mbi bâ so dikongo Bible lakue legeoko na wali ti mbi a-aidé mbi ti komanse lango oko oko na mbeni nzoni pensé so akpengba zo. Na mingi ni, na alango so kobela ni ahon ndö ti mbi, mbeni mbilimbili versê ayeke ndu bê ti mbi.”​—Peter, so abâ pasi na dépression.

“A yeke lani ngangu na mbi ti sara tënë ti kobela ti mbi ni na azo ndali ti so asara mbi kamene mingi. Me mbeni kota kamarade ti mbi acomprendre mbi na lo zia terê ti lo na place ti mbi. Lo aidé mbi lani ngangu ti sentir terê ti mbi bien nga ti bâ so mbi yeke gï mbi oko ape.”​—Ji-yoo, so ayeke na kobela so asara si lo te ye nzoni ape.

“Bible a-aidé mbi ti duti na équilibre, ti wu terê nzoni nga ti sara kua ahon ndö ni ape. Tënë ti ndara so ayeke na yâ ti Bible a-aidé mbi ti hon ndö ti agingo bê ti mbi.”​—Timothy, so ayeke na kobela ti trouble ob­sessionnel-compulsif.