ARTICLE TI MANDANGO NI 30
Ngbâ ti maï ndoye ti mo ndali ti Jéhovah nga na aita
“Zia e kono na lege ti ndoye na yâ ti ye kue.”—A-ÉPH. 4:15.
BIA 2 Iri ti mo ayeke Jéhovah
AYE SO E YEKE BÂ NIa
1. Atâ tënë wa la mo manda na ngoi so lani mo komanse ti manda Bible?
ESKÊ mo dabe ti mo na aye kue so mo manda lani na ngoi so mo komanse ti manda Bible? Peut-être li ti mo akpe lani ti hinga so Nzapa ayeke na iri. Peut-être bê ti mo adë ti hinga so Nzapa ayeke sara pasi na azo na yâ ti enfer ape. Peut-être terê ti mo anzere nga lani mingi ti hinga so a yeke zingo ande na kuâ azo so mo ye ala mingi na mo na ala ayeke vivre ande na yâ ti Paradis na ndö ti sese.
2. Na ndö ti so mo manda atâ tënë ti Bible, nyen la mo sara ti gue na li ni? (aÉphésien 5:1, 2).
2 So mo manda Bible mingi, mo ye Jéhovah mingi. Ndoye so apusu mo ti sara ye alingbi na aye so mo manda. Mo mû anzoni desizion so ague oko na amama-ndia ti Bible. Mo changé bango ndo ti mo nga na asarango ye ti mo ndali ti so mo ye ti zia ngia na bê ti Nzapa. Tongana ti mbeni molenge so ayeke mû tapande ti babâ ti lo so aye lo, mo mû tapande ti Babâ ti mo ti yayu.—Diko aÉphésien 5:1, 2.
3. Ahunda wa la e peut ti hunda terê ti e na ni?
3 E peut ti hunda terê ti e, e tene: ‘Eskê laso mbi ndoye Jéhovah mingi ahon ti ngoi so mbi ga lani Chrétien pan? Depuis so mbi wara batême, eskê fason so mbi yeke pensé na ni nga na asarango ye ti mbi ayeke tongana ti Jéhovah, mbilimbili tongana a ndu yengo aita?’ Même tongana e ndoye Jéhovah nga na amba ti e tongana ti kozo ape, a yeke nzoni e découragé ape. Mara ti ye tongaso asi lani na akozo Chrétien. Jésus adécouragé lani na terê ti ala ape na lo yeke découragé nga na terê ti e ape (Apoc. 2:4, 7). Lo hinga so e peut ti kiri ti duti na ndoye so e yeke na ni lani kozo, na ngoi so e manda tâ tënë.
4. Nyen la e yeke bâ na yâ ti article so?
4 Na yâ ti article so, e yeke bâ tongana nyen la e peut ti ngbâ ti ye Jéhovah nga na amba ti e mingi. Na pekoni, e yeke bâ ambeni nzoni ye so e na amba ti e e yeke wara tongana e ye terê mingi.
NDOYE JÉHOVAH MINGI
5-6. Akpale wa la bazengele Paul awara lani na yâ ti kua ti lo ti fango tënë? Nyen la apusu lo ti ngbâ ti sara na Jéhovah?
5 Bazengele Paul ayeke sara lani na Jéhovah na ngia, me a yeke lakue kete ye na lo ape. Fani mingi, Paul asara lani voyage na ando so ayo, na ngoi ni so, voyage ayeke lani kete ye ape. Na yâ ti avoyage ti Paul, na ambeni ngoi lo yeke lani “na yâ ti akpale na lê ti akota ngu” nga “na maboko ti azo ti gbungo ye ti azo na ngangu”. Na ambeni ngoi, awato ti lo apika même lo (2 aCor. 11:23-27). A yeke nga pëpe lakue la aita ti Paul akiri singila na lo ndali ti a-effort so lo sara ti mû maboko na ala.—2 aCor. 10:10; aPhil. 4:15.
6 Nyen la a-aidé lani Paul ti ngbâ ti sara kua ti Jéhovah? Paul amanda ye lani mingi na ndö ti asarango ye ti Jéhovah na lege ti Mbeti ti Nzapa nga na aye so asi na lo. Paul ahinga na bê ti lo kue so Jéhovah Nzapa aye lo (aRom. 8:38, 39; aÉph. 2:4, 5). A sara si lo ye nga Jéhovah mingi. Paul afa so lo ye Jéhovah ‘na lege so lo sara kua na azo ti be-vulu na lo ngbâ ti sara kua na ala.’—aHéb. 6:10.
7. Mbeni ye wa la e peut ti sara ti ye Jéhovah mingi?
7 E peut ti ye Nzapa mingi tongana e manda Bible nzoni. Na ngoi so mo yeke diko Bible, gi ti hinga aye so mbage so mo yeke diko afa na ndö ti Jéhovah. Hunda terê ti mo: ‘Tongana nyen la mbaï so afa so Jéhovah aye mbi? Araison wa la mbaï so afa na mbi ti ye Jéhovah?’
8. Tongana nyen la sambela apeut ti aidé e ti ye Nzapa mingi?
8 Mbeni lege so e peut ti ye Jéhovah mingi ayeke ti tene lakue e zi bê ti e na lo na yâ ti sambela (Ps. 25:4, 5). Jéhovah ayeke kiri tënë na asambela ti e (1 Jean 3:21, 22). Ita-wali Khanh, so ayeke na Asie, atene: “Na tongo nda ni, mbi ye lani Jéhovah ndali ti aye so mbi hinga na ndö ti lo. Me mbi kiri mbi ye même lo mingi na ngoi so mbi bâ so lo kiri tënë na asambela ti mbi. A sara si mbi ye ti sara aye so azia ngia na bê ti lo.”b
NDOYE AMBA TI MO MINGI
9. Tongana nyen la Timothée afa so lo ye aita ti lo mingi?
9 Ambeni ngu na peko ti so Paul aga Chrétien, lo wara terê na Timothée so ayeke mbeni maseka so ayeke na anzoni sarango ye. Timothée aye lani Jéhovah nga lo ye azo. Ambeni ngu na pekoni, Paul atene na aPhilippien, atene: ‘Mbi yeke na mbeni zo nde pëpe so ayeke na mara ti bibe ti Timothée so ayeke bâ ande biani lege ti aye so agbu bê ti ala.’ (aPhil. 2:20). Ge, Paul ayeke gonda pëpe Timothée ndali ti so lo yeke na kode ti lekengo yâ ti aye wala kode ti sarango diskur, me a yeke polele so ye so apika bê ti Paul ayeke so Timothée aye aita ti lo mingi. Kite ayeke dä ape so acongrégation so Timothée ayeke sara vizite dä ayeke ku lo kungo.—1 aCor. 4:17.
10. Tongana nyen la Anna na koli ti lo afa so ala ye aita ti ala?
10 E nga kue e yeke gi alege ti aidé aita ti e (aHéb. 13:16). Bâ ye so Anna, so e sara tënë ti lo na yâ ti article so ahon, asara. Na peko ti mbeni ngangu pupu ti ngu, lo na koli ti lo ague abâ da ti mbeni sewa so ayeke aTémoin na ala bâ so pupu ni abuba li ti da ni. A sara si bongo ti asewa ni kue ayeke saleté. Anna atene: “E mû abongo ti ala ni, e sukula ni, e repassé ni nga e plié ni e kiri na ni na ala. Na e, ye so e sara ayeke nga kota ye ape, me a sara si e na ala e ga akota kamarade juska laso.” So Anna na koli ti lo aye aita, a pusu ala ti sara mbeni ye ti aidé ala.—1 Jean 3:17, 18.
11. (a) Tongana e sara effort ti ye amba ti e, mingi ni a yeke sara ala tongana nyen? (b) Tongana ti so aProverbe 19:17 atene, tongana e fa so e ndoye azo, nyen la Jéhovah ayeke sara na e?
11 Tongana e sara ye na nzoni bê na amba ti e nga e ndoye ala, ala peut ti bâ so e yeke gi ti sara ye tongana Jéhovah. A peut ti nzere nga na ala mingi ahon ti so e pensé. Khanh, so e sara tënë ti lo fade, adabe ti lo na azo so a-aidé lani lo na anzere na lo mingi. Lo tene: “Mbi kiri singila mingi na aita-wali kue so mbi ye ala mingi so amû mbi, mbi na ala e gue na fango tënë. Ala ga amû na yanga-da, ala tisa mbi ti tene mbi na ala e gue e te ye nga ala kiri na mbi na yanga-da na nzoni terê. Mbi ga ti bâ so ala sara effort mingi. A nzere nga na ala mingi ti sara ni.” Me, a yeke azo kue la ayeke kiri singila na e ndali ti aye so e sara ndali ti ala ape. Khanh atene tënë so na ndö ti azo so a-aidé lani lo, lo tene: “Ti bê ti mbi, mbi ye ti kiri peko ti aye kue so ala sara na mbi na nzoni bê, me mbi hinga ape ndo so ala kue alango dä. Me Jéhovah ahinga ni nga mbi sambela lo ti futa ala ndali ti aye so ala sara ndali ti mbi.” Khanh ayeke na raison. Jéhovah ahinga même akete kete ye so e sara na nzoni bê ndali ti amba ti e. Lo bâ ni tongana mbeni kota sacrifice nga tongana mbeni bon so lo yeke kiri na ni na e.—Diko aProverbe 19:17.
Na ngoi so mbeni zo ayeke gue na li ni, lo yeke gi alege ti aidé amba ti lo (Bâ paragraphe 12)
12. Tongana nyen la aita-koli apeut ti fa so ala ndoye aita ti congrégation? (Bâ nga afoto.)
12 Tongana mo yeke ita-koli, tongana nyen la mo peut ti fa so mo ndoye aita nga mo sara aye ti aidé ala? Jordan, mbeni ita-koli so ade maseka, ahunda mbeni ancien ti hinga aye so lo peut ti sara ti aidé congrégation. Ancien ni agonda lo ndali ti aye so lo sara awe nga lo fa na lo ambeni ye so lo peut ti sara encore. Na tapande, lo wa Jordan ti si hio na Da ti Royaume nga ti bara azo, ti mû mbage na abungbi, ti fa tënë lakue na aita ti groupe ti lo nga ti gbu li na ndö ti aye so lo peut ti sara ti aidé azo. Na ngoi so Jordan asara ye alingbi na awango so, lo manda afini kode ti sarango ye nga lo manda ti ye aita mingi. Jordan amanda so a yeke na ngoi so mbeni ita aga wakua ti mungo maboko la lo komanse ti aidé azo ape, me lo komanse depuis na lo yeke ngbâ ti sara ni.—1 Tim. 3:8-10, 13.
13. Tongana nyen la ndoye apusu Christian, mbeni ita-koli, ti kiri ti ga ancien?
13 Ka tongana mo yeke lani wakua ti mungo maboko wala ancien? Jéhovah adabe ti lo na kua so mo sara lani nga na ndoye so apusu mo ti sara ni (1 aCor. 15:58). So mo ngbâ ti sara ye na ndoye, lo bâ nga ni. Vundu asara lani mbeni ita-koli so iri ti lo Christian, na ngoi so a zi lo na kua ti ancien. Me lo tene: “Mbi mû desizion ti sara ye kue so mbi peut ti sara ti sara na Jéhovah atâa mbi yeke ancien wala pëpe.” Ambeni ngoi na pekoni, lo kiri lo ga ancien. Christian atene: “Mbeto asara mbi kete ti kiri ti sara kua ti ancien. Me mbi tene tongana Jéhovah aye ti tene mbi kiri mbi sara kua tongana ancien, mbi yeke sara ni ndali ti so mbi ye lo nga na aita ti mbi.”
14. Nyen la mo manda na lege ti atënë so mbeni ita-wali so ayeke na Géorgie atene?
14 Awakua ti Jéhovah ayeke fa nga ndoye ti ala na mbage ti azo kue (Mat. 22:37-39). Na tapande, Ita-wali Elena so ayeke na Géorgie atene: “Na tongo nda ni, ye so apusu mbi lani ti fa tënë ayeke ndoye ti mbi ndali ti Jéhovah. Me na ngoi so mbi ye Babâ ti mbi ti yayu mingi, mbi ye nga azo mingi. Mbi tara ti imaginé akpale so ala yeke wara nga na atënë so apeut ti ndu bê ti ala. So mbi pensé na ala mingi tongaso, a sara si mbi ye mingi ti aidé ala.”—aRom. 10:13-15.
ANZONI YE SO E YEKE WARA TONGANA E NDOYE AZO
Mbeni ye so e sara na ndoye apeut ti ga na anzoni ye na gbâ ti azo (Bâ paragraphe 15-16)
15-16. Tongana ti so afoto so afa, anzoni ye wa la e yeke wara tongana e ndoye azo?
15 Tongana e ndoye aita ti e, gï ala la ayeke bâ nzoni dä ape. Na peko ti so COVID-19 akomanse, Ita Paolo na wali ti lo a-aidé aita-wali mingi so ayeke ambakoro ti sara kua na téléphone, tablette wala ordinateur ti ala ti fa tënë. Mbeni ita-wali so kozo a yeke ngangu na lo ti sara kua na ni awara lege ti sara ni. Lo wara lege ti sara kua na ni ti tisa afami ti lo na Mémorial. Azo 60 na popo ti azo so lo tisa ala awara lege ti sara Mémorial na lege ti vidéoconférence. Ita-wali ni na afami ti lo abâ nzoni na lege ti a-effort so Paolo na wali ti lo asara. Na pekoni, ita-wali ni atokua mbeti na Paolo, lo tene: “Merci so mo fa ye na e ambakoro. Mbi yeke girisa lâ oko ape so Jéhovah apensé na e mingi nga na a-effort so mo sara ti aidé e.”
16 Mara ti aye so asi so afa na Paolo mbeni kpengba ye ti manda. A fa na lo so ndoye ayeke kota mingi ahon hingango ye wala kode so a dü zo na ni. Lo tene: “Mbi yeke lani surveillant ti circonscription. Laso, mbi bâ so, atâa so peut-être aita agirisa adiskur so mbi sara, ala girisa ape aye so mbi sara ti aidé ala.”
17. Tongana e sara ye na ndoye, e yeke bâ nzoni dä tongana nyen?
17 Tongana e sara ye na ndoye, e wani e yeke bâ nzoni dä na alege so e ku terê ti e na ni ape. Jonathan, so ayeke na Nouvelle-Zélande, ayeda na tënë so. Na mbeni samedi na après-midi so ndo achauffé mingi, lo bâ mbeni pionnier so ayeke fa tënë na terê ti lege lo oko. Jonathan amû desizion ti tene lo na pionnier ni afa tënë na asamedi na après-midi. Lo hinga lani ape so na ngoi ni so lo wani lo yeke bâ nzoni mingi na lege ti ye so lo sara na nzoni bê so. Jonathan atene: “Na ngoi ni so, mbi ye lani fango tënë ape. Me so mbi bâ fason so pionnier ni ayeke fa na ye nga tongana nyen la alë lengo, a zia nzara ti kua ni na yâ ti mbi. Mbi wara nga mbeni kota kamarade so a-aidé mbi ti gue na li ni na lege ti yingo, ti ye fango tënë nga ti ga nduru mingi na Jéhovah.”
18. Nyen la Jéhovah aye ti tene e sara?
18 Jéhovah aye ti tene e kue e ye lo nga na amba ti e mingi. Tongana ti so e bâ, e peut ti ye Jéhovah mingi tongana e diko Bible, e gbu li na ndö ni nga e sambela lo lakue. E peut ti ye aita ti e mingi tongana e sara ambeni ye ti aidé ala. Tongana ndoye ti e ayeke maï, e yeke ga nduru mingi na Jéhovah nga na aita ti e. Songo ti kamarade so ayeke ngbâ ande lakue.
BIA 109 Ndoye zo ngangu na bê kue
a Atâa e ga na yâ ti tâ tënë fini fini wala e yeke sara na Jéhovah a sara angu mingi awe, e kue e peut ti ngbâ ti gue na li ni. Na yâ ti article so, e yeke bâ tongana nyen la e peut ti ngbâ ti gue na li ni. E yeke sara ni na lege so e gi ti ye mingi Jéhovah nga na amba ti e. Na ngoi so mo yeke gbu li na ndö ti article so, bâ tongana nyen la mo gue na li ni awe nga aye so mo peut ti sara ti ngbâ ti gue na li ni.
b A changé ambeni iri ni.