GIGI TI MBENI ZO
Mbi wara tâ nzoni duti ndali ti so mbi sara confiance na Jéhovah
TONGANA azo ahunda mbi na ndö ti aye so mbi sara na yâ ti kua ti Jéhovah, mbi yeke tene ka na ala, mbi tene: “Mbi yeke tongana bozo ti voyage so Jéhovah ayeke gue na ni na ndo kue so lo ye.” Mbi ye ti tene so gï tongana ti so mbi yeke mû bozo ti voyage ti mbi mbi gue na ndo kue so mbi ye, mbi ye ti tene Jéhovah na bungbi ti lo asara nga tongaso na mbi, ala fa na mbi ndo so ala ye ti tene mbi gue dä nga lawa la ala ye ti tene mbi gue. Mbi yeda ti gue na ando so a hunda ti tene mbi sara asacrifice nga na ambeni ngoi akpale ayeke dä. Me mbi ga ti hinga so ti sara confiance na Jéhovah la ayeke sara si mbi duti nzoni.
MBI KOMANSE MBENI GIGI SO A HUNDA TI SARA CONFIANCE NA JÉHOVAH
A dü mbi na ngu 1948 na yâ ti mbeni kete kodro na sud-ouest ti Nigéria. Na ngoi ni so Moustapha, babâ kete ti mbi, nga na Wahabi, yaya ti mbi, awara batême ala ga aTémoin ti Jéhovah. Na ngoi so mbi yeke na ngu gumbaya, babâ ti mbi akui. Vundu ahon ndö ti mbi lani. Wahabi atene na mbi so e peut ti bâ Babâ encore na zingongo ti akuâ. Tënë ti dengo bê so apusu mbi ti manda Bible. Mbi wara batême na ngu 1963. Aita ti mbi ti koli ota awara nga batême.
Na ngu 1965, mbi gue na peko ti yaya ti mbi Wilson na Lagos nga a nzere na mbi ti duti na terê ti ambeni pionnier permanent na congrégation ti Igbobi. Ngia so ala yeke na ni nga so ala yapu na yâ ti kua ni apusu mbi ti komanse kua ti pionnier na janvier 1968.
Ita Albert Olugbebi, so ayeke sara kua na Béthel, asara mbeni bungbi na e amaseka ti sara na e tënë ti bezoin ti apionnier spécial na nord ti Nigéria. Mbi ngbâ ti dabe ti mbi na tënë ti Ita Olugbebi so lo tene: “Ala ngbâ amaseka, ala peut ti mû ngoi nga na ngangu ti ala ti sara na Jéhovah. Kua ayeke kâ mingi ndali ti ala.” Mbi ye lani ti sara ye tongana Ésaïe nga ti gue na ndo kue so Jéhovah aye ti tene mbi gue, tongaso mbi sû demande ti ga pionnier spécial.—És. 6:8.
Na mai 1968, a tokua mbi pionnier spécial na gbata ti Kano na nord ti Nigéria. A yeke lani na ngoi ti Bira ti Biafra so akomanse na ngu 1967 ti si na ngu 1970. Bira so asara si azo abâ pasi mingi nga azo akui mingi na nord ti Nigéria, na pekoni a si na est ti Nigéria. Mbeni ita-koli so aye ti tene sioni asi na mbi ape agi ti sara si mbi ke ti gue. Me mbi tene na lo: “Merci so mo gi bê ti mo ndali ti mbi so. Me tongana Jéhovah aye ti tene mbi gue mbi sara kua ti lo kâ, mbi yeke na kite oko ape so lo yeke duti ande na mbi.”
MBI SARA CONFIANCE NA JÉHOVAH NA MBENI NDO SO BIRA ABUBA NI NGANGU
Aye ayeke lani sioni mingi na Kano. Bira abuba kota gbata so. Na ambeni ngoi na fango tënë, e yeke wara kuâ ti azo so akui na yâ ti bira ni. Atâa so gbâ ti acongrégation ayeke lani na Kano, mingi ti aita ni akpe. Awafango tënë 15 tongaso la angbâ, mbeto ahon ndö ti ala nga ala découragé. Terê ti aita so anzere lani mingi na ngoi so e apionnier spécial omene e si. E kpengba ala na bê ti ala adë. E aidé lani ala ti kiri ti sara abungbi, ti fa tënë, ti tokua arapport na Béthel nga ti hunda ambeti.
E apionnier spécial e komanse ti manda yanga ti Hausa. Azo mingi ti ndo ni amä e na ngoi so e fa tënë ti Royaume na ala na yanga ti kodro ti ala. Ye oko, azo ti bungbi ti nzapa so azo ayeke gue dä mingi na Kano aye lani ape ti tene e fa tënë, tongaso e doit ti sara ye na hange mingi. Mbeni lâ, mbeni koli atomba mbi na mba ti mbi so mbi na lo e yeke fa tënë na zembe. E kpe e hon koli ni na lo wara lege ti gbu e ape. Atâa akpale so kue, Jéhovah asara si e “duti na siriri,” nga wungo ti awafango tënë akomanse ti gue na li ni (Ps. 4:8). Laso, wungo ti awafango tënë ahon 500 ayeke na yâ ti acongrégation 11 na Kano.
A SARA AYE TI NGANGU NA E NA NIGER
Mbi sara kua ti pionnier spécial na Niamey, na Niger
Ambeni ngoi na pekoni, na août 1968, na peko ti so e sara nze mingi ape na Kano, a tokua mbi na apionnier spécial use na Niamey, li-kodro ti Niger. Hio e bâ so Niger, so ayeke na Afrique de l’ouest, ayeke mbeni oko ti akodro so ndo achauffé dä mingi na ndö ti sese. E doit ti manda ti kanga bê na ndowa nga ti manda Français so ayeke yanga ti kodro so a yeke tene ni kâ. Atâa akpale so kue, e sara confiance na Jéhovah na e komanse ti fa tënë na Niamey, e na kete wungo ti awafango tënë so ayeke kâ. Na yâ ti kete ngoi, azo kue so ayeke na Niamey, so ahinga ti diko mbeti, awara buku Ta Tene so aga na Zo Fini ti La Koue La Koue. Azo ayeke gi même peko ti e ti wara buku ni.
Hio e ga ti bâ so akota zo ti kodro ni aye lani aTémoin ti Jéhovah ape. Na juillet 1969, e bungbi ti sara kozo kota bungbi ti circonscription so a sara na yâ ti kodro ni, wungo ti azo so aga ayeke lani 20 tongaso. E yeke ku lani kungo ti batize afini wafango tënë use. Ye oko, na kozo lango ti kota bungbi ni, azo ti lapolice aga na ala hunda na e ti zia ti sara bungbi ni. Ala mû e apionnier spécial nga na surveillant ti circonscription ni ala gue na e na lapolice. Na peko ti so ala hunda yâ ti e, ala hunda na e ti kiri ti ga na ndade ni. E bâ so akota zo ni apeut ti ga na e kpale, tongaso e leke ti tene a sara diskur ti batême ni na da ti mbeni ita, na pekoni e batize aita ni na hondengo ni.
Ambeni yenga na pekoni, Ministre ti intérieur atomba e apionnier spécial na yâ ti kodro ni. Ala mû na e lango use ti quitté kodro ni, na e wani la e doit ti gi lege ti hon. E quitté na e gue droit na Béthel ti Nigéria, kâ a tokua e na mbeni fini ndo.
A tokua mbi na Orisunbare, mbeni kete kodro na Nigéria, kâ mbi na kete groupe ti awafango tënë so ayeke kâ e fa tënë pendere nga e manda Bible na azo. Me nze omene na pekoni, Béthel ahunda na mbi ti kiri na Niger. Na tongo nda ni, li ti mbi akpe nga mbeto asara mbi, me na pekoni mbi ku kungo ti kiri ti wara terê na aita na Niger.
Mbi kiri na Niamey. Lango oko na peko ti so mbi si kâ, mbeni zo ti dengo buze so ayeke zo ti Nigéria ahinga so mbi yeke Témoin na lo komanse ti hunda tënë na mbi na ndö ti Bible. Mbi manda Bible na lo, na peko ti so lo zia nyongo manga nga na nyongo sämba ahon ndö ni lo wara batême. A nzere na mbi ti tene mbi na aita na ando nde nde na Niger e fa tënë, nga ti bâ tongana nyen la tongana angu ayeke hon azo ayeke yeda na tâ tënë. Na ngoi so mbi si lani kâ pan, aTémoin ayeke lani 31 na yâ ti kodro ni, na ngoi so mbi quitté, wungo ti ala ayeke 69.
“E HINGA YE MINGI APE NA NDÖ TI KUA TI ROYAUME NA GUINÉE”
Na décembre 1977, mbi kiri na Nigéria ti tene a formé mbi. Na hunzingo ti yenga ota ti cours ni, Ita Malcolm Vigo, so ayeke coordinateur ti Komite ti filiale, amû na mbi mbeni lettre so filiale ti Sierra Leone atokua ti tene mbi diko. Aita ni ayeke gi lani mbeni ita-koli pionnier, so ayeke kumbamba, so ayeke na nzoni seni, so ayeke tene Anglais nga na Français, so apeut ti sara kua tongana surveillant ti circonscription na Guinée. Ita Vigo atene na mbi so a yeke formé mbi ti tene mbi gue kâ la. Lo fa na mbi polele so a yeke kete kua ape. Lo tene na mbi, lo tene: “Gbu li ti mo nzoni kozo si mo mû desizion.” Hio mbi tene na lo: “So Jéhovah la atokua mbi, mbi yeke gue.”
Mbi gue na Sierra Leone na mbi wara terê na aita na Béthel. Mbeni membre ti Komite ti filiale atene na mbi, atene: “E hinga ye mingi ape na ndö ti kua ti Royaume na Guinée.” Atâa so aita ti filiale ti Sierra Leone la ayeke bâ lege ti kua ti fango tënë na Guinée, ala peut ti wara sango ti awafango tënë kâ ape ndali ti so kpale ti poroso ayeke na yâ ti kodro ni. Fani mingi, ala gi ti tokua mbeni ita ti sara vizite na aita na Guinée, me ala wara lege ape. Tongaso, a hunda na mbi ti gue na Conakry, so ayeke li-kodro ti Guinée, ti gi ti wara mbeti so ayeke mû lege na mbi ti ngbâ kâ.
“So Jéhovah la atokua mbi, mbi yeke gue”
Na ngoi so mbi si na Conakry, mbi gue na ambassade ti Nigéria na mbi wara terê na ambassadeur ni. Mbi fa na lo so mbi yeke na nzara ti fa tënë na Guinée. Lo wa mbi ti ngbâ kâ ape, ndali ti so a peut ti gbu mbi wala ti sara sioni na mbi. Lo tene: “Kiri na Nigéria mo fa tënë kâ.” Mbi tene na lo: “Mbi leke na bê ti mbi ti ngbâ ge.” Tongaso, lo tokua mbeti na Ministre ti intérieur ti Guinée ti aidé mbi, na lo aidé mbi.
Kete na pekoni, mbi kiri na Béthel ti Sierra Leone na mbi fa na aita desizion ti ministre ni. Aita adekongo na ngia tongana ala bâ tongana nyen la Jéhovah asara tufa na ndö ti voyage ti mbi ni. Gouvernement amû lege na mbi ti ngbâ na Guinée.
Mbi sara kua ti circonscription na Sierra Leone
Ti londo na ngu 1978 ti si na ngu 1989, mbi sara kua ti circonscription na Guinée, Sierra Leone nga tongana suppléant ti surveillant ti circonscription na Libéria. Na tongo nda ni, terê ti mbi ason fani mingi. Na ambeni ngoi, terê ti mbi ason na ando so ayo. Me aita ayeke sara kue ti gue na mbi na hôpital.
Mbeni lâ, mbi wara mbeni sioni palu nga na aver. Na ngoi so mbi wara sava, mbi mä so aita ayeke gi lani ti hinga ndo so ala yeke lu ande mbi dä. Atâa asioni ye so asi na mbi so, mbi pensé lâ oko ape ti zia kua ti mbi. Mbi hinga na bê ti mbi kue so gï Nzapa la apeut ti bata e nzoni ndali ti so même tongana e kui lo peut ti kiri na e na fini.
MBI NA WALI TI MBI E SARA CONFIANCE NA JÉHOVAH
Na lango ti mariage ti e na ngu 1988
Na ngu 1988, mbi wara Dorcas, mbeni ita-wali so ayeke pionnier, so aye Jéhovah mingi nga so asara terê ti lo kete mingi. E sara mariage na mbi na lo e sara kua ti circonscription. Dorcas asara kua ngangu na terê ti mbi na lo yeke nduru ti sara sacrifice mingi ndali ti Jéhovah. Mbi na lo e tambela akilomètre 25 ti gue na acongrégation, e yô akungba ti e na li. Ti gue na acongrégation so ayo, e voyagé na ye kue so e wara ti voyagé na ni. E hon na ando so popoto nga na dû ayeke dä.
Dorcas asara ye na mbeto oko ape. Na tapande, na ambeni ngoi e doit ti fâ angu so angunde asi singo na yâ ni. Mbeni lâ, e doit ti sara voyage lango oku nga e doit ti fâ mbeni ngu na ngo ndali ti so pont ni so a sara na keke afâ awe. So Dorcas alondo ti sigi na yâ ti ngo ni, lo tï na yâ ti ngu so alï mingi. Mbi na lo e hinga ti nagé ape nga angunde ayeke na yâ ti ngu ni. Nzoni ni ayeke so ambeni maseka ahuru na yâ ti ngu ni ala sigi na lo. E use kue e lango na bï ape na ambeni ngoi ndali ti kpale so, me e ngbâ na yâ ti kua ti circonscription.
Amolenge ti e, Jahgift na Eric, acadeau so Jéhovah amû na e
Na tongo nda ti ngu 1992, li ti e akpe kue ti hinga so Dorcas ayeke na ngo. Ngu mingi so e sara na yâ ti kua ti ngoi kue ahunzi awe la? E tene lani, e tene: “So mbeni cadeau la Jéhovah amû na e so.” Tongaso, e zia iri ti molenge ti e ti wali ni Jahgift. Ngu osio na peko ti Jahgift, e dü ita ti lo ti koli Eric. Amolenge ti e use kue ayeke biani acadeau so Jéhovah amû na e. Jahgift asara kua teti mbeni ngoi na yâ ti bureau ti traduction so ayo na Béthel na Conakry, na Eric ayeke wakua ti mungo maboko.
Atâa so Dorcas azia lani kua ti pionnier spécial, lo ngbâ ti sara kua ti pionnier permanent na ngoi so lo yeke bata amolenge ti e. Grâce na mungo maboko ti Jéhovah, mbi ngbâ ti sara gï kua ti ngoi kue. Na peko ti so amolenge ti e akono awe, Dorcas akiri encore na yâ ti kua ti pionnier spécial. Fadeso, e use kue e yeke sara kua ti missionnaire na Conakry.
JÉHOVAH LA AYEKE BATA E
Mbi gue lakue na ndo kue so Jéhovah ague na mbi dä. Fani mingi mbi na wali ti mbi e bâ so Jéhovah abata e nga lo sara tufa na ndö ti e. So e sara confiance na Jéhovah ahon ti sara confiance na aye ti sese, e wara pëpe gbâ ti akpale nga na agingo bê. Aye so mbi na Dorcas e vivre ni afa na e so tâ ndo ti batango terê ayeke na mbage ti Jéhovah, “Nzapa ti salut ti e”. (1 Chron. 16:35). Mbi yeke na confiance so azo so asara confiance na Jéhovah, lo yeke “bata fini ti [ala] nzoni tongana ti so zo ayeke bata aye ti nginza mingi na yâ ti bozo.”—1 Sam. 25:29.