Duti na ngia so mo kanga bê mo yeke ku Jéhovah

Me Jéhovah ahunda na e ti kanga bê ti ku ngoi so lo leke ti sara ye. Ngbanga ti nyen la lo hunda na e ti sara tongaso? Nyen la apeut ti aidé e ti duti na ngia na ngoi so e yeke ku?

NGBANGA TI NYEN LA JÉHOVAH AHUNDA NA E TI KU?

Bible atene: “Jéhovah akanga bê ti lo, lo ku ti sara nzoni na ala, na lo yeke londo ti sara nzoni bê na ala, ndali ti so Jéhovah ayeke Nzapa ti mbilimbili. Ngia ayeke na azo kue so angbâ ti ku lo.” (És. 30:18). Ésaïe atene tënë so lani na aJuif so li ti ala akpengba (És. 30:1). Me ambeni Juif ni ayeke lani be-ta-zo, na tënë so amû na ala beku. Tënë so amû nga beku na awakua ti Jéhovah so ayeke be-ta-zo laso.

Tongaso, e doit ti kanga bê ti ku ndali ti so Jéhovah nga akanga bê ayeke ku. Lo leke awe mbeni ngoi ti futi dunia so, nga lo yeke ku ti tene lango ni nga na l’heure ni asi (Mat. 24:36). Na ngoi ni so, a yeke duti ande polele so atënë so Zabolo abi na ndö ti Jéhovah nga na awakua ti Lo ayeke mvene. Na pekoni, Lo yeke futi Satan na azo kue so amû peko ti lo, me Lo yeke “sara nzoni bê na [e]”.

Ti ku na ngoi ni so, Jéhovah ayeke zi akpale ti e ape, me lo tene so e peut ti duti na ngia na ngoi so e yeke ku. Tongana ti so Ésaïe atene, e peut ti duti na ngia na ngoi so e yeke ku ti tene mbeni nzoni ye asi (És. 30:18).a Tongana nyen la e peut ti duti na ngia na ngoi so e yeke ku? Aye osio apeut ti aidé e.

LEGE TI DUTI NA NGIA NA NGOI SO E YEKE KU

Gbu li na ndö ti anzoni ye so asi na mo. Gbia David abâ asioni ye mingi na yâ ti gigi ti lo (Ps. 37:35). Me lo tene: “Duti kpô na gbele Jéhovah na mo ku gï lo. Zia bê ti mo ason pëpe ndali ti zo so, na mayele, asara si aye ti lo aga nzoni.” (Ps. 37:7). David asara ye alingbi na wango so na lege so lo zia li ti lo na ndö ti beku so lo yeke na ni ti tene a sö lo. Lo kiri nga singila na Jéhovah ndali ti anzoni ye kue so lo sara na lo (Ps. 40:5). E nga kue tongana e zia li ti e na ndö ti anzoni ye so asi na e me pëpe na ndö ti akpale ti e, a yeke duti ande ngangu na e ape ti ku Jéhovah.

Sara nzoni tënë ti Jéhovah na ngoi kue. Zo ti sungo Psaume 71, so na bango ni a yeke David, atene na Jéhovah, atene: “Mbi yeke ngbâ ti ku, mbi yeke kiri ti sepela mo mingi ahon ti kozo.” (Ps. 71:14). Lo yeke sepela Jéhovah tongana nyen? Lo yeke sara tënë ti Jéhovah na azo nga lo yeke he bia ti sepela lo (Ps. 71:​16, 23). Tongana David, e peut ti duti na ngia na ngoi so e yeke ku Jéhovah. E yeke sepela lo na fango tënë, na lege ti alisoro so e yeke sara lâ oko oko nga na lege ti abia so e yeke he ti voro lo. Ti peko, na ngoi so mo yeke he mbeni bia ti Royaume, gbu li nzoni na ndö ti atënë ni so akpengba zo.

Zia si aita akpengba mo. Na ngoi so David awara akpale lani, lo tene na Jéhovah, lo tene: “Na lê ti azo ti mo so ayeke be-ta-zo, mbi yeke fa so mbi zia bê ti mbi na ndö ti iri ti mo.” (Ps. 52:9). E nga kue e peut ti zia si amba ti e aChrétien akpengba e na ngoi ti abungbi, na fango tënë nga na ngoi so e na ala e wara terê ti sara ngia.—aRom. 1:​11, 12.

Gi ti duti na kpengba beku. Psaume 62:5 atene: “Mbi yeke ku Nzapa sân ti zi yanga, ndali ti so beku ti mbi alondo na lo.” A yeke kota ye mingi ti duti na kpengba beku, mbilimbili tongana a futi dunia so hio ape tongana ti so e pensé fade. E doit ti hinga biani so azendo ti Jéhovah ayeke ga tâ tënë atâa ngoi oke la e doit ti ku. E peut ti duti na kpengba beku tongana e manda Bible, na tapande, aprophétie, tongana nyen la atënë ti Bible ague oko nga na anzene nzene tënë so Jéhovah atene na ndö ti lo (Ps. 1:​2, 3). E bezoin nga ti ngbâ ti “sambela na yingo vulu” ti ngbâ ti duti na nzoni songo na Jéhovah na ngoi so e yeke ku ti tene zendo so lo mû na ndö ti fini ti lakue lakue aga tâ tënë.—Jude 20, 21.

Tongana ti Gbia David, e yeke na confiance so Jéhovah ayeke bâ ndo na ndö ti azo so ayeke ku Lo nga Lo yeke fa tâ ndoye na mbage ti ala (Ps. 33:​18, 22). Ngbâ ti kanga bê ti ku Jéhovah na lege so mo zia li ti mo na ndö ti anzoni ye so asi na mo, mo sepela lo, mo zia si amba ti mo Témoin akpengba mo nga mo ngbâ ti duti na kpengba beku.