Fa na Gigi Bibe ti Ku!

“Fade . . . mbi ku Nzapa ti salut ti mbi. Fade Nzapa ti mbi amä mbi.”​—MICHÉE 7:7.

1, 2. (a) Tongana nyen bango ndo so ayeke nzoni pepe asala sioni na azo ti Israël na yando? (b) Ye nyen alingbi ti si na mbeni Chrétien so alë pepe bibe ti nzoni?

NA YÂ ti fini, a lingbi ti ba aye mingi na nzoni lê wala na sioni lê, alingbi na bibe nga na bango ndo ti e. Na ngoi so azo ti Israël ayeke na yando, a mu na ala manne na lege ti kpene. Ala lingbi la ni ti ba kuru ndo so ayeke na tele ti ala na ala kiri kota singila na Jéhovah teti lo mu ye ti bata fini ti ala. So a yeke fa na gigi mbeni nzoni bibe. Nde na so, ala dabe na mara ti akobe nde nde so ayeke na Égypte na ala dema atene manne anzere pepe. So tâ bibe ti sioni!​—Nombre 11:4-6.

² Bango ndo ti mbeni Chrétien laso alingbi ti sala si mbeni ye anzere wala oko pepe. Tongana mbeni Chrétien ayeke na nzoni bango ndo pepe, lo lingbi ti glisa ngia ti lo hio, na so a yeke duti sioni mingi, tongana ti so Néhémie atene: “Ngia ti Jéhovah ayeke gbagba ti bira ti [e].” (Nehémia 8:10, NW) Bibe so ayeke nzoni, so ayeke na ngia amu maboko ti bata e ngangu na ti maï siriri nga beoko na yâ kongrégation.​—aRomain 15:13; aPhilippien 1:25.

3. Tongana nyen bibe so ayeke na lege ni amu maboko na Jérémie na angoi ti ngangu?

³ Atä so lo yeke na fini na mbeni ngoi so ayeke ngangu mingi, Jérémie afa la ni na gigi mbeni bibe so ayeke nzoni. Atä so lo ba aye ti sioni mingi so asi na tingo ti Jérusalem na ngu 607 K.N.E., lo bi bê la ni na ndo aye ti nzoni so ayeke ga na pekoni. Jéhovah ayeke glisa Israël pepe, na mara ni ayeke sö kuâ. Jérémie asû na yâ buku ti Toto ti Jérémie: “A hunzi e pepe teti nzobe ti L’Eternel, teti be-ti-ndoye ti lo awe pepe. Ala yeke ye ti fini na ndapelele kue; be-biani ti Mo ayeke kota.” (Toto ti Jérémie 3:22, 23) Na yâ mbaï kue, na yâ ti ambeni ye so ayeke ngangu mingi, awakua ti Nzapa agi ti bata nzoni bibe, même bibe ti ngia.​—2 aCorinthien 7:4; 1 aThessalonicien 1:6; Jacques 1:2.

4. Bibe wa Jésus abata lakue, na tongana nyen a mu maboko na lo?

⁴ Ngu ngbangbo omene na peko ti Jérémie, a mu maboko na Jésus ti gbu ngangu ndali ti nzoni bibe ti lo. E diko: “Teti ngia so azia na gbele [Jésus], lo hu pono ti keke ti pasi, na bango kamela ni tongana ye senge, na lo duti na koti ti trône ti Nzapa.” (aHébreu 12:2, NW) Atä kangango lege wala salango ngangu wa a lingbi Jésus aluti na gbele ni, même sana na ndo keke ti pasi, lo yeke bata bibe ti lo na ndo “ngia so azia na gbele lo.” Ngia so ayeke matabisi ti fa mbilimbili ti kota yanga-ti-komande ti Jéhovah na ti sala si iri ti lo aga nzoni-kue, legeoko na beku ti gango na akota deba nzoni na yâ ngoi so ayeke ga na ndo azo so amä yanga.

Duti na Bibe ti Ku

5. Na yâ mbilimbili ye wa mbeni bibe ti ku ayeke mu ande na e maboko ti bata nzoni bango ndo na mbage ti aye?

⁵ Tongana e gi ti lë mara bibe so Jésus ayeke na ni, fade e yeke glisa pepe ngia ti Jéhovah atä aye asi lakue pepe tongana ti so e ye nga na ngoi so e ye. Prophète Mika atene: “Ti mbi, fade mbi yä lê ti mbi na L’Eternel; mbi ku Nzapa ti salut ti mbi.” (Michée 7:7; Toto ti Jérémie 3:21) E nga e lingbi ti fa na gigi bibe ti ku. Tongana nyen? Na yâ aye mingi. Kozoni kue, e lingbi ti ba so mbeni ita so ayeke na ngangu ti komande asala ye na lege ni pepe na e ba so a lingbi a sala mbeni ye fade fade ti leke ni. Bibe ti ku ayeke pusu e ande ti hunda, ‘Lo glisa la ni lege biani, wala mbi ba ye na lege ni pepe? Tongana lo glisa lege, a yeke Jéhovah si ayeke zi lege na aye ti si teti lo ba so fade zo ni ayeke gbian, na so a hunda pepe ti sala ye na ngangu hio ti leke tene ni?’

6. Tongana nyen bibe ti ku ayeke mu ande maboko na mbeni zo so ayeke tiri na mbeni kpale ti lo mveni?

⁶ A hunda ti duti na bibe ti ku tongana mbeni kpale ti e mveni abi vundu na bê ti e wala tongana e yeke tiri na mbeni wokongo. Na tongana e hunda mungo maboko ti Jéhovah me kpale ni angbâ, e yeke sala nyen? A lingbi e ngbâ lakue ti sala ye so ngangu ti e amu lege na e ti sala ti leke kpale ni, nga na pekoni ti duti na mabe na yâ atene ti Jésus so: “I ngbâ ti hunda, na fade a mu na i; i ngbâ ti gi, na fade i wara; i ngbâ ti pika yanga-da, na fade a zi na i.” (Luc 11:9, NW) Ngbâ ti sambela, na ku Jéhovah. Na ngoi so alingbi nga na lege so lo mveni aye, fade Jéhovah akiri tene na asambela ti mo.​—1 aThessalonicien 5:17.

7. Na lege wa fade bibe ti ku ayeke leke bango ndo ti e na mbage ti gbungo nda ti Bible so a kiri aleke ni yeke yeke?

⁷ Na ngoi so aprophétie ti Bible ayeke ga tâ tene, a kiri abi lumière mingi ahon na ndo gbungo nda ti Mbeti ti Nzapa so e yeke na ni. Ye oko, na ambeni ngoi e lingbi ti ba so lumière ni aga na ngoi ni pepe. Tongana a yeke ndulu ti ga pepe na ngoi so e ye ti tene a si, e yeke ndulu ti ku? Dabe mo, Jéhovah aba so a lingbi lo sigigi na “tene ti nda-gigi ti Christ” gi kete kete nga na yâ ti ngoi so ayeke ndulu na angu 4 000. (aEphésien 3:3-6) Tongaso, e yeke na mbeni nda ti ye ti tene bê ti e anze? E yeke dë kite so ahiri “ngba ti be-ta-zo na ti ndara” na kusala ti mu na azo ti Jéhovah “kobe ti ala na tâ ngoi ni”? (Matthieu 24:45, NW) Ngbanga ti nyen e yeke gbanzi na tele ti e ngia so alondo na Nzapa ndali ti so e gbu nda ti aye kue pepe nzoni? Dabe mo, a yeke Jéhovah si asoro lawa nga tongana nyen ti fa na gigi ‘atene ti lingo ti lo.’​—Amos 3:7, NW.

8. Tongana nyen be-nze-pepe ti Jéhovah aga na ye ti nzoni na azo mingi?

⁸ Bê ti ambeni zo alingbi ti nze teti ala ba so na peko ti angu mingi so ala sala kusala na dutingo be-ta-zo, ala lingbi pepe ti ngbâ na fini ti ba “kota lâ ti Jéhovah so amu mbito.” (Yoël 2:30, 31, NW) Ye oko, bê ti ala alingbi ti kpengba tongana ala ba anzoni mbage ti ye ni. Pierre amu wango: “I ba be-nze-pepe ti Seigneur ti e tongana salut.” (2 Pierre 3:15) Be-nze-pepe ti Jéhovah azi lege na ambeni zo nde ti bê ti mbilimbili kutu mingi ti manda tâ tene. So ayeke ye ti dongo bê? Na ndo ni, na ngoi kue so Jéhovah angbâ ande ti sala kusala na be-nze-pepe ti lo, e yeke wara nga ngoi mingi ahon si “na lege ti mbito na dongo tele, [e] sala si salut ti [e] aga tâ ye.”​—aPhilippien 2:12; 2 Pierre 3:11, 12.

9. Tongana mbeni ye akanga lege na e na yâ kusala ti Jéhovah, bibe ti ku ayeke mu ande maboko na e ti gbu ngangu tongana nyen?

⁹ Bibe ti ku ayeke mu maboko na e ti tene bê ti e anze pepe tongana kangango lege, kobela, gango mbakoro, wala ambeni kpale nde aye ti kanga lege na e na yâ kusala ti Royaume. Jéhovah aku ti tene e sala na lo na bê ti e kue. (aRomain 12:1) Ye oko, Molenge ti Nzapa, so ‘asala be-nzoni na wanzinga na zo so ye amanqué lo mingi,’ ahunda ye na e pepe ahon so e lingbi ti mu; na Jéhovah ahunda nga tongaso pepe. (Psaume 72:13) Ni la a wa e ti sala ye so e lingbi ti sala, na kungo na be-nze-pepe juska aye agbian, atä na yâ bungbi ti aye ti fadeso wala na yâ ti so ayeke ga. Dabe mo: “Nzapa ayeke kirikiri pepe si Lo lingbi glisa kusala ti i, ndoye so i fa giriri teti iri ti Lo, teti i sala kusala teti azo ti be-vulu, na i de ti sala tongaso.”​—aHébreu 6:10.

10. Zo so ayeke na bibe ti ku alingbi ti kpe lengo wa so Nzapa ake? Fa nda ni.

¹⁰ Bibe ti ku ayeke mu nga maboko na e ti kpe fandara. Ambeni ti azo so aga a-apostat aye la ni pepe ti ku. Peut-être ala ba so a lingbi a leke ambeni ye, na yâ gbungo nda ti Bible wala na yâ lekengo ye na yâ bungbi ti Jéhovah. Ye oko, ala yeda pepe so yingo ti Jéhovah ayeke pusu ngba ti be-ta-zo na ti ndara ti kiri ti leke aye na ngoi so Lo diko, pepe na ngoi so e ba e tene a lingbi asala ni. Na a lingbi aye kue so akiri aleke ague legeoko na ye so bê ti Jéhovah aye, pepe abibe ti e mveni. A-apostat ayeke zi lege na fandara ti buba yâ ti kode ti gbungo li ti ala na a sala si ala tï. Me tongana ala gi fade ti duti na bibe ti Christ, ka ala lingbi ti bata ngia ti ala na ti ngbâ na popo ti azo ti Jéhovah.​—aPhilippien 2:5-8.

11. Tongana nyen e lingbi ti sala nzoni kusala na ngoi so e yeke mu ti ku, na mungo tapande ti azo wa?

¹¹ Biani, batango bibe ti ku aye pepe ti tene salango goigoi wala salango kusala oko pepe. E yeke na aye ti sala. Na tapande, a hunda e ti duti na kusala mingi ti sala na yâ mandango Bible e mveni, tongaso e yeke fa na gigi oko kota nzala ti aye ti yingo so aprophète be-ta-zo na même a-ange afa. Na salango tene ti nzala tongaso, Pierre atene: ‘Aprophète . . . ahunda nda ti tene ti salut so giriri, ala gi na ngangu ti hinga lege ni . . . A-ange aye mingi ti ba nda ti ye so.’ (1 Pierre 1:10-12) A yeke pepe gi mandango Bible e mveni si ayeke kungba ti e me guengo nga lakue na bungbi nga na sambela. (Jacques 4:8) Ala so ayeke fa na gigi dutingo na donzi teti aye ti yingo so atia ala na lege so ala ngbâ lakue ti kamata kobe ti yingo na ti bungbi na afon ala Chrétien afa so ala wara awe bibe ti Christ.​—Matthieu 5:3.

Ba Ye Tâ na Lege Ni

12. (a) Dutingo yamba wa Adam na Ève agi ni giriri? (b) Ye nyen asi na nda ni tongana azo amu tapande ti Adam na Ève?

¹² Na ngoi so Nzapa aleke kozo koli na wali, lo bata teti lo mveni droit ti zia na sese asalango ye ti nzoni na ti sioni. (Genèse 2:16, 17) Adam na Ève aye la ni ti duti nde na fango lege ti Nzapa, na ye so aga na sese so e ba angoro e laso. Bazengele Paul atene: “Na lege ti koli oko siokpari aga na sese na kui aga na lege ti siokpari, na tongaso kui asi na azo kue teti ala kue asala siokpari.” (aRomain 5:12, NW) Angu saki omene ti mbaï ti azo, ngbele ye na ngoi ti Adam, afa so atene ti Jérémie so ayeke tâ tene: “O L’Eternel, mbi hinga lege ti zo ayeke na tïtî lo mveni pepe; na a yeke na bê ti zo so atambela ti fa lege na gere ti lo nga pepe.” (Jérémie 10:23) Ti yeda so atene ti Jérémie ayeke tâ tene aye pepe ti tene so ye akara zo. A yeke bango ye na lege ni. A fa peko ti asiècle mingi so ahon, so na yâ ni “zo akomande mba ti lo zo ti sala pasi na lo,” teti azo akomande yamba na Nzapa.​—Zo-ti-fa-tene 8:9, NW.

13. Nzoni bango ndo wa aTémoin ti Jéhovah ayeke na ni na ndo ye so azo alingbi ti sala?

¹³ Ndali ti dutingo ti sese, aTémoin ti Jéhovah aba akatikati ayeke dä na yâ ti aye so a lingbi ti sala na yâ bungbi ti aye ti fadeso. Bibe so aba ye na nzoni lê alingbi ti mu maboko ti bata ngia ti e, me a yeke pepe yorö teti ye kue. Na tongo nda ti angu 1950, mbeni mokonzi ti lege ti vorongo so ayeke zo ti Amérika asigigi na mbeni buku so a kä ni mingi, so a hiri ni The Power of Positive Thinking. Buku so atene a lingbi ti hon ndo ti aye mingi so akanga lege tongana a ba ni na nzoni lê. Bango ye na nzoni lê ayeke biani pendere mingi. Me aye so zo amanda na yâ fini afa so hingango ye, kode, akungba ti mitele, nga na ambeni ye mingi ayeke kanga lege na ye so e azo e lingbi ti sala. Na tongana aba tene ni na ndo sese kue, a lingbi ti tene so akpale akono mingi si azo alingbi pepe ti leke ni nzoni, atä so ala ba ye na nzoni lê!

14. A-Témoin ti Jéhovah ayeke ba ye pepe na nzoni lê? Fa nda ni.

¹⁴ Teti ala ba aye tongaso tâ na lege ni, ngoi na ngoi a yeke bi tene na li ti aTémoin ti Jéhovah na tenengo so ala yeke ba ye na nzoni lê pepe. Nde na so, ala yeke na kota nzala ti fa na azo ye na ndo lo Oko so alingbi ti leke nzoni ahon dutingo ti azo teti lakue lakue. Na yâ ye so nga, ala yeke mu tapande ti bibe ti Christ. (aRomain 15:2) Na ala yeke na kusala mingi ti sala na mungo maboko na azo ti wara nzoni songo na Nzapa. Ala hinga so na nda ni, ye so ayeke sala ande ye ti nzoni mingi.​—Matthieu 28:19, 20; 1 Timothée 4:16.

15. Tongana nyen kusala ti aTémoin ti Jéhovah asala si azo aga nzoni ahon?

¹⁵ A-Témoin ti Jéhovah ake pepe ti ba akpale so ayeke na popo ti azo so angoro ala, mbilimbili asalango ye so asala si zo aga sioni na so ague nde na Mbeti ti Nzapa. Kozo si mbeni zo so asala nzala ti tene aga Témoin ti Jéhovah, lo gbian aye, mingi ni a hunda lo ti hon ndo ti asioni kode so asala lo ngba, so anzere pepe na Nzapa. (1 aCorinthien 6:9-11) Na lege so aTémoin ti Jéhovah amu maboko na azo so ayeda ti sala ye nzoni ti hon ndo ti nyongo samba mingi, dutingo ngba ti mbangi, ye ti pitan, na kota nzala ti ngia ti nginza. Azo tongaso, so agbian lege ti ala, amanda ti mu ye teti sewa ti ala na yongo kungba ti ala nga na salango ye na lege ni. (1 Timothée 5:8) Tongana a mu maboko na azo oko oko nga na asewa na lege so, a sala si akpale so ayeke na popo ti azo akiri na peko kete, azo so ayeke ngba ti mbangi ayeke mingi pepe, a yeke wara mingi pepe salango ngangu na yâ sewa, na ambeni ye tongaso. Na dutingo ala mveni awakodoro so abata ndia nga na mungo maboko na ambeni zo ti gbian fini ti ala ti ga nzoni, aTémoin ti Jéhovah asala si nene kungba ti andokua, so kusala ti ala ayeke ti tiri na akpale so ayeke na popo ti azo, ayapu.

16. Ngbanga ti nyen aTémoin ti Jéhovah ayeke bi tele pepe na yâ abungbi ti sese so atiri ti gbian aye?

¹⁶ Tongaso, aTémoin ti Jéhovah agbian salango ye ti azo so amu sese kue? Biani, na yâ ti angu mingi so ahon, wungo ti aTémoin so ayeke sala kusala ague na li ni, a londo ndulu na 3 800 000 ti si ndulu na 6 000 000. So ayeke mbeni guengo na li so asi ndulu na 2 200 000, so mingi na popo ni azia lege ti asalango ye so ayeke mbilimbili pepe na ngoi so ala ga aChrétien. Fini ti azo mingi agbian aga nzoni! Ye oko, wungo so ayeke kete mingi tongana a haka ni na guengo na li ni ti wungo ti azo ti sese na oko ngoi ni, 875 000 000! A-Témoin ti Jéhovah aba so ti mu maboko na azo so ayeda ti sala ye nzoni ayeke lingu ti ngia, atä ala ba so gi kete wungo na popo ti azo si ayeke mu lege ti fini. (Matthieu 7:13, 14) Na ngoi so aTémoin ti Jéhovah ayeke ku akota ye so ayeke gbian ande na ndo sese kue ti ga nzoni ahon, so gi Nzapa si alingbi sala ni, ala bi tele pepe na yâ ti abungbi ti azo ti sese so ayeke tiri ti gbian aye so atambela na lege ni pepe, so mingi ni ayeke to nda ni na anzoni bibe me ayeke hunzi na suingo bê na même ye ti ngangu.​—2 Pierre 3:13.

17. Ye nyen Jésus asala la ni ti mu maboko na azo so ayeke ndulu na lo, me ye nyen lo sala pepe?

¹⁷ Na salango tongaso, aTémoin ti Jéhovah afa oko ziango bê kue na Jéhovah so Jésus ayeke na ni na ngoi so lo yeke na sese. Kâ na kozo siècle, Jésus asala aye ti kpene na lo lungula kobela ti azo. (Luc 6:17-19) Lo zingo même akuâ. (Luc 7:11-15; 8:49-56) Me lo lungula pepe kpale ti kobela wala lo hon pepe na ngangu wato so ayeke kuâ. Lo hinga la ni so ayeke pepe ngoi so Nzapa adiko ti sala ni. Na dutingo na akode ti zo ti mbilimbili-kue so ayeke kota mingi, Jésus alingbi la ni ti sala ye mingi ti leke akota kpale ti poroso na ala so ayeke na popo ti azo. A ba so ambeni ti azo so ayeke na fini na ngoi ti lo aye ti tene lo ga gbia na ti leke akpale tongaso, me Jésus ake. E diko: “Tongana azo so aba fä so Jésus asala, ala tene, Biani, Zo so ayeke Prophète so ayeke ga na sese so. Tongaso, tongana Jésus ahinga ala ye ti ga ti kamata Lo ti sala si Lo ga gbia, Lo zia ala mbeni, na Lo gue na hoto gi Lo oko.”​—Jean 6:14, 15.

18. (a) Tongana nyen Jésus afa lakue bibe ti ku? (b) Tongana nyen akusala ti Jésus agbian ngbele ye na ngu 1914?

¹⁸ Jésus ake ti bi tele na yâ atene ti poroso wala ti mu maboko na azo na lege ti konomi ngbanga ti lo hinga so ngoi teti lo ti mu ngangu ti komande ti gbia na ti sala akusala ti lungula kobela na tele ti azo kue na ndo kue ade ti si pepe. Na peko ti guengo ti lo na yayu tongana zo ti yingo na yâ fini so alingbi ti kui pepe, lo yeke la ni ndulu ti ku ngoi so Jéhovah adiko, kozo ti sala mbeni ye. (Psaume 110:1; Kusala 2:34, 35) Ye oko, ngbele ye na dutingo ti lo na ndo trône tongana Gbia ti Royaume ti Nzapa na ngu 1914, lo yeke gue na li ni ti “hon na ngangu, na lo gue ti hon na ngangu.” (Apocalypse 6:2; 12:10) So tâ bê ti kiri singila si e yeke na ni ti yeda na dutingo ti lo tongana gbia, na ngoi so ambeni zo so atene ala yeke Chrétien asoro ti ngbâ ti hinga ye oko pepe na ndo afango ye ti Bible na ndo Royaume!

Ti Ku: A ga na Vundu Wala Ngia?

19. Na ngoi wa kungo ye “amu kobela na bê ti zo,” na lawa si ayeke mbeni lingu ti ngia?

¹⁹ Salomon ahinga la ni so ti ku alingbi ti ga na vundu. Lo sû na mbeti: “Ye ti beku so asi fade pepe amu kobela na bê ti zo.” (aProverbe 13:12) Biani, tongana mbeni zo ayeke ku mbeni ye so gunda ni ayeke dä pepe, bê ti lo alingbi ti nze. Ye oko, kungo aye ti ngia, peut-être lango ti mariage, lango ti dungo molenge, wala bungbingo na azo so e ndoye ala, alingbi ti sala si e si na ngia ngoi mingi kozo na lango so ye ni aga tâ tene. Ngia so akiri akono tongana e sala kusala na lege ti ndara na ngoi so e yeke ku, na lekengo aye teti ye so ayeke ga.

20. (a) Akpengba ye wa ti dongo bê e yeke ku ti ba? (b) Tongana nyen e lingbi ti wara ngia na ngoi so e yeke ku ti tene aye so Jéhovah aleke ti sala aga tâ tene?

²⁰ Tongana e hinga na bê kue so fade aye so e yeke ku ayeke ga tâ tene, tongana e ngbâ ti ku, a yeke ‘mu pepe kobela na bê ti e,’ même atä e hinga pepe lawa si ala yeke ga tâ tene. Awavorongo Jéhovah be-ta-zo ahinga so Komandema ti Ngu Saki Oko ti Christ aga ndulu mingi. Ala hinga na bê kue so fade ala ba hunzingo ti kui na kobela. Na dutingo na kota nzala ti ba ni, na ngia, ala yeke ku ngoi so fade ala yeke yamba azo kutu mingi so akui giriri, so na popo ni azo so ala ndoye mingi ayeke dä. (Apocalypse 20:1-3, 6; 21:3, 4) Na yâ sese so laso aye so angoro zo abuba, ala yeke lakue na beku ti ba Paradis so azia na ndo sese. (Esaïe 35:1, 2, 7) Tongaso, ba tongana nyen ayeke lege ti ndara ti sala kusala nzoni na ngoi so e ngbâ ti ku, “i wu na kusala ti Seigneur lakue”! (1 aCorinthien 15:58) Ngbâ lakue ti te kobe ti yingo. Gi lakue ti lë mbeni songo so akpengba ahon na Jéhovah. Gi ambeni zo so bê ti ala apusu ala ti sala na Jéhovah. Wa afon mo wamabe. Gi ti wara aye ti nzoni ahon na yâ ngoi kue so Jéhovah azi lege na ni. Tongaso, fade kungo Jéhovah ayeke ‘mu kobela na bê’ ti mo lâ oko pepe. Nde na so, a yeke sala si mo si na ngia!

Mo Lingbi ti Fa Nda Ni?

• Tongana nyen Jésus afa giriri bibe ti ku?

• Na yâ ti aye wa a hunda ti tene aChrétien aduti na bibe ti ku?

• Ngbanga ti nyen aTémoin ti Jéhovah ayeke na ngia ti ku Jéhovah?

• Tongana nyen a lingbi ti sala si kungo Jéhovah aga lingu ti ngia?

[Afoto na lembeti 23]

Jésus agbu ngangu teti ngia so azia na gbele lo

[Foto na lembeti 24]

Atä na peko ti angu mingi ti kusala, e lingbi ti bata ngia ti e

[Afoto na lembeti 26]

Azo kutu mingi asala si fini ti ala aga nzoni ahon na gango Témoin ti Jéhovah