Aye so mo peut ti sara ti duti nzoni na yâ ti fini congrégation so mo gue dä

Nicolas na Céline awara ti ala mbeni kpale nde. Filiale ti France atokua lani ala na mbeni fini congrégation. Ala tene: “Na tongo nda ni, terê ti e anzere lani mingi me na pekoni akamarade ti e akomanse ti manke e. Ade e duti na kpengba songo na aita ti fini congrégation ti e ape.”a Atâa so a yeke ngangu, tongana nyen la mo peut ti duti na ngia nga ti sara kua mingi na yâ ti fini congrégation ti mo? Nyen la aita apeut ti sara ti aidé? Na alege wa la mo na aita ti fini congrégation ti mo apeut ti kpengba mba?

AMAMA-NDIA OSIO SO AYEKE AIDÉ MO TI DUTI NZONI NA YÂ TI FINI CONGRÉGATION TI MO

1. Zia bê ti mo na Jéhovah (Ps. 37:5). Kazumi, so ayeke na Japon, aquitté lani congrégation so lo sara ngu 20 dä na ngoi so a tokua koli ti lo na mbeni ndo ndali ti kua. Tongana nyen la lo “zia si Jéhovah afa lege na [lo]”? Lo tene: “Mbi zi lani bê ti mbi mbi fa na Jéhovah aye kue so asara mbi mbeto, so mbi yeke gï mbi oko nga gingo bê so mbi yeke na ni. Lakue tongana mbi sara tongaso, lo yeke mû na mbi ngangu so mbi bezoin ni.”

Tongana nyen la mo peut ti zia bê ti mo na Jéhovah mingi ahon ti kozo? Legeoko tongana ti so mbeni keke abezoin ngu nga na vitamine so ayeke na yâ ti sese si akono, mabe ti e abezoin nga ngu na kobe na lege ti fä si akpengba. Nicolas, so e sara tënë ti lo fade, abâ so gbungo li na ndö ti tapande ti akoli so asara asacrifice ti sara ye so bê ti Nzapa aye, tongana Abraham, Jésus nga na Paul, asara si lo yeke na confiance mingi so Jéhovah ayeke aidé lo. Tongana mo yeke manda Bible lakue ayeke aidé mo ti sara ye alingbi na achangement kue so asi na yâ ti gigi ti mo, nga mo yeke hinga aye so mo peut ti sara kua na ni ti kpengba aita ti fini congrégation ti mo.

2. Haka fini congrégation ti mo na ngbene ni ape (Zo-ti. 7:10). Jules adoit lani ti sara ye alingbi na mbeni ngobo so ayeke nde mingi na ngoi so lo quitté Bénin lo gue na États-Unis. Lo tene: “Mbi bâ lani so mbi doit ti fa ye kue na ndö ti mbi na zo kue so mbi wara lo.” So sarango tongaso ayeke nde mingi na ye so lo yeke sara ka, lo komanse ti kpe aita kpengo. Me na peko ti so lo hinga aita nzoni, lo changé bango ndo ti lo. Lo tene: “Mbi bâ so atâa ndo wa la e yeke dä na ndö ti sese so, azo kue ayeke oko. Fason ti sarango tënë nga na ti sarango ye ti ala la ayeke nde nde. A yeke nzoni ti yeda na azo ti sara ye tongana ti so ala yeke sara ka.” Tongaso, haka fini congrégation ti mo pëpe na ngbene ni. Anne-Lise, so ayeke mbeni pionnier, atene: “Mbi quitté lani ngbanga ti so mbi ye ti manda afini ye, me pëpe ngbanga ti so mbi pensé so aye kue na fini ndo so mbi yeke dä adoit ti duti tâ gï tongana ti ngbene ni.”

A-ancien nga kue adoit ti haka pëpe fini congrégation ti ala na ngbene ni. Ti sara aye na mbeni fason nde ayeke lakue sioni ape. A yeke nzoni mo hinga ye nzoni na ndö ti fini ndo ni kozo si mo fa ambeni ye so a peut ti sara (Zo-ti. 3:​1, 7b). A yeke nzoni mingi ti tene mo zia nzoni tapande na aita-koli ahon ti tene mo gi ti forcé ala ti pensé tongana mo.—2 aCor. 1:24.

3. Duti na aye mingi ti sara na yâ ti fini congrégation ti mo (aPhil. 1:27). Guengo na mbeni ndo ahunda gbâ ti ngoi nga na ngangu, me a yeke kota ye ti gue na abungbi na fini congrégation ti mo gï na tongo nda ni. Aita ti fini congrégation ti mo abezoin ti bâ mo fani mingi tongaso si ala bâ so ala yeke nduru na mo nga ala peut ti aidé mo. Lucinda, so lo na amolenge ti lo ti wali use aquitté ague na mbeni kota gbata na Afrique du Sud, atene: “Akamarade ti mbi awa mbi ti ga nduru mingi na aita ti fini congrégation ti mbi, ti fa tënë legeoko na ambeni nga ti mû mbage na abungbi. E tene nga na aita so a peut ti sara bungbi ti fango tënë na ndo ti e.”

Tongana mo na aita ti fini congrégation ti mo ‘atiri na terê ti mba’ na yâ ti akua ti congrégation ayeke sara si “mabe [ti ala] so aga na lege ti nzoni tënë” akpengba. A-ancien awa lani Anne-Lise, so e sara tënë ti lo fade, ti fa tënë na aita kue ti fini congrégation ti lo. Ye ti peko ni ayeke nyen? Lo tene: “Hio mbi bâ so sarango tongaso ayeke mbeni nzoni lege ti bâ so mbi yeke mbage ti congrégation ni. Nga, tongana mo duti volontaire ti sara akua tongana nettoyengo Da ti Royaume nga bango lege ni ayeke fa na aita so mo yeke fadeso mbage ti congrégation ni. Tongana mo sara akua ti congrégation mingi, hio aita ayeke bâ so ala yeke nzoni na terê ti mo nga mo yeke bâ so sewa ti mo la.

4. Gi ti wara afini kamarade (2 aCor. 6:​11-13). Ti pensé na azo ayeke nzoni lege ti wara akamarade, tongaso mû ngoi ti sara lisoro na aita kozo nga na peko ti bungbi nga gi ti hinga ala. Gi ti hinga iri ti ala. Tongana mo dabe ti mo na iri ti azo nga mo sara lisoro na ala na ngia nga tongana a yeke ngangu ape ti sara lisoro na mo ayeke sara si azo asara lisoro na mo nga kite ayeke dä ape so ala yeke ga anzoni kamarade.

Ahon ti gi bê ti mo wala azo ayeke yeda na asarango ye ti mo, mû lege na afini kamarade ti mo ti hinga avrai sarango ye ti mo. Mû tapande ti Lucinda so atene: “Fadeso e yeke na akota kamarade ndali ti so e mû li ni ti tisa aita na ndo ti e.”

“ALA YAMBA TERÊ NA POPO TI ALA”

Ti linda na yâ ti mbeni Da ti Royaume so asi singo na azo so mo hinga ala ape apeut ti sara mbeto na ambeni zo. Tongaso, tongana nyen la mo peut ti sara si mbeto asara ape azo so aga fini fini? Bazengele Paul atene: “Ala yamba terê na popo ti ala legeoko tongana ti so Christ nga ayamba ala.” (aRom. 15:7). Tongana a-ancien amû tapande ti Christ, ala peut ti aidé afini zo ti bâ so a yamba ala nzoni. (Bâ encadré “Aye so ayeke sara si mo wara ngia na fini ndo so mo gue dä.”) Ye oko, azo kue na yâ ti congrégation, même amolenge, apeut ti aidé afini zo ti bâ so ala yeke na ndo ti ala.

Ti yamba azo aye ti tene ti tisa ala na ndo ti mo nga ti sara mbeni ye ti aidé ala. Na tapande, mbeni ita-wali amû ngoi ti fa na mbeni fini zo so aga yâ ti gbata so ala yeke dä nga lo fa na lo tongana nyen la a yeke mû bus nga na train. Ye so ita-wali ni asara so andu bê ti fini zo ni mingi nga a-aidé lo ti duti nzoni na fini ndo ni.

MBENI LEGE TI GUE NA LI NI

Na ngoi so mbeni gbadora ayeke kono, poro ti terê ti lo ayeke changé fani mingi kozo si lo sara kua na akpangbi ti lo ti huru. Legeoko nga, tongana mo gue na mbeni fini congrégation, mo bezoin ti zi agingo bê kue so ayeke kanga lege na mo ti huru na lege ti fä na yâ ti kua ti Jéhovah. Nicolas na Céline atene: “Guengo na mbeni ndo ayeke mbeni pendere ngoi ti manda ye. Ti habitué na afini zo nga na mbeni fini ndo, e doit lani ti gi ti duti na afini sarango ye.” Jean-Charles, so e sara tënë ti lo fade na tongo nda ni, afa anzoni ye so sewa ti lo awara. Lo tene: “Changement so e sara asara si amolenge ti e amaï na yâ ti fini congrégation ni. A sara anze mingi ape, molenge ti e ti wali akomanse ti sara devoir nga molenge ti e ti koli aga wafango tënë so ade ti wara batême ape.”

Ka tongana dutingo ti mo amû lege na mo ape ti gue na mbeni ndo, na tapande, na ndo so a bezoin awafango tënë dä mingi? Mo peut ti sara si congrégation ti mo aga fini ni tongana mo sara ambeni ye so a fa na yâ ti article so. Na ngoi so mo yeke zia bê ti mo na Jéhovah, ngbâ ti sara akua mingi na yâ ti congrégation na lege so mo leke ti fa tënë legeoko na ambeni ita nga mo gi ti wara afini kamarade wala mo gi ti kpengba songo so ayeke na popo ti mo na angbene ni. Peut-être mo peut ti mû li ni ti aidé azo so aga fini fini wala azo so ayeke na yâ ti bezoin. So ndoye ayeke ye so a hinga na atâ Chrétien, tongana mo aidé azo apeut ti sara si mo ga nduru mingi na Jéhovah (Jean 13:35). Mo peut ti hinga na bê ti mo kue so “a yeke mara ti asandaga tongaso la si anzere na Nzapa mingi.”—aHéb. 13:16.

Atâa akpale so aChrétien mingi awara na ngoi so ala gue na mbeni fini congrégation, ala wara lege ti duti na ngia nga ti sara akua mingi, mo nga kue mo peut ti sara tongaso. Anne-Lise atene: “So mbi gue na mbeni fini congrégation a-aidé mbi ti maï ndoye so ayeke na bê ti mbi.” Fadeso Kazumi ahinga na bê ti lo kue so tongana “mo gue na mbeni ndo, mo peut ti bâ maboko ti Jéhovah na mbeni lege so mo bâ ni kozo ape.” Ka ti Jules ayeke tongana nyen? Lo tene: “Akamarade so mbi wara a-aidé mbi ti bâ so mbi yeke na ndo ti mbi. Fadeso, mbi bâ so mbi yeke nduru mingi na aita ti fini congrégation ti mbi; a yeke duti ngangu na mbi ti quitté.”