Lege so e peut ti duti na bango ndo ti Jéhovah na ndö ti awasiokpari

1. Nyen la Jéhovah aye ndali ti azo kue?

JÉHOVAH acréé azo kue na liberté ti soro ye. Mo yeke sara kua na cadeau so lakue tongana mo mû adesizion. Tâ kota desizion so mbeni zo apeut ti mû ayeke ti mû terê ti lo na Jéhovah na ti ga na yâ ti sewa ti azo so ayeke voro lo. Jéhovah aye ti tene azo kue asara ni. Ngbanga ti nyen? Ngbanga ti so lo ye azo nga lo ye nzoni ti ala. Lo ye ti tene ala ga akamarade ti lo na ala ngbâ na fini lakue lakue.—Deut. 30:​19, 20; aGal. 6:​7, 8.

2. Tongana nyen la Jéhovah ayeke bâ azo so asara mbeni kota siokpari me ala changé bê ti ala ape? (1 Jean 2:1).

² Me, Jéhovah ayeke forcé mbeni zo ti sara na lo ape. Lo zia na zo oko oko ti soro ye so lo ye ti sara. Ka tongana mbeni Chrétien so awara batême awe adoro ndia ti Nzapa na lege so lo sara mbeni kota siokpari? Tongana lo changé bê ti lo ape, a doit ti zi lo na yâ ti congrégation (1 aCor. 5:13).a Me, même tongana a zi mbeni zo na yâ ti congrégation, Jéhovah aye biani ti tene zo ni akiri na mbage ti Lo. Ti vrai ni, mbeni kota raison so ndali ni lo mû ye so a futa ti zi azo ayeke ti tene lo pardonné asiokpari ti azo so achangé bê ti ala. (Diko 1 Jean 2:1.) Nzapa ti e so aye e mingi awa azo so asara akota siokpari ti changé bê ti ala.—Zach. 1:3; aRom. 2:4; Jacq. 4:8.

3. Nyen la e yeke bâ na yâ ti article so?

³ Jéhovah aye ti tene e duti na bango ndo ti lo na ndö ti siokpari nga na azo so asara akota siokpari. Article so ayeke fa na e lege so e peut ti sara ni. Na ngoi so mo yeke diko article so, gi ti bâ (1) tongana nyen la, na ngoi ti akozo Chrétien, a bâ lani tënë ti mbeni zo ti congrégation ti Corinthe so asara mbeni kota siokpari, (2) ye so Paul atene na aita ti sara na peko ti so zo ni achangé bê ti lo nga (3) ye so mbaï ti Bible so afa na e na ndö ti bango ndo ti Jéhovah na ndö ti aChrétien so asara mbeni kota siokpari.

YE SO AITA ASARA LANI NA MBENI ITA SO ASARA MBENI KOTA SIOKPARI

4. Nyen la asi ândö na yâ ti congrégation ti Corinthe? (1 aCorinthien 5:​1, 2).

⁴ Diko 1 aCorinthien 5:​1, 2. Na ngoi ti ota tambela ti Paul ti missionnaire, lo mä mbeni sioni sango na ndö ti congrégation ti Corinthe so abâ gigi ade ti ninga ape. Mbeni ita-koli na yâ ti congrégation ni ayeke sara lango-sioni na wali ti babâ ti lo. Mara ti sarango ye so ayeke ye ti songo bê nga “mara ni ayeke même na popo ti azo ti amara pëpe”. Aita ti congrégation ni abâ so ye so ita ni ayeke sara ayeke sioni ape nga lo peut ti ngbâ na yâ ti congrégation. Peut-être ambeni abâ so ala yeke sara ye na nzoni bê tongana Jéhovah la. Me Jéhovah ake ti tene awakua ti lo asara asioni ye. Sioni ye so koli ni asara sân kamene abuba biani nzoni iri ti congrégation. Lo peut nga lani ti pusu ambeni mba ti lo aChrétien ti sara ye tongana lo. Tongaso, nyen la Paul atene na aita ti congrégation ti sara?

5. Paul atene na aita ti congrégation ni ti sara nyen? Lo ye ti tene nyen la? (1 aCorinthien 5:13). (Bâ nga foto.)

⁵ Diko 1 aCorinthien 5:13. Yingo ti Jéhovah apusu lani Paul ti sû lettre na congrégation ni, na yâ ni lo tene so ala doit ti zi na yâ ti congrégation zo ni so asara mbeni kota siokpari na lo changé bê ti lo ape. A-Chrétien so ayeke be-ta-zo adoit ti sara ye na lo tongana nyen? Paul atene na ala ti “zia ti sara songo na” lo. Lo ye ti tene nyen la? Paul afa na ala so ti sara ye alingbi na commandement so, ala doit même ti “te kobe na mara ti zo tongaso pëpe.” (1 aCor. 5:11). Tongana mo na mbeni zo ate kobe ndo oko, ala yeke sara ka pendere lisoro. Tongaso, a yeke polele so Paul aye ti tene aita ti congrégation adoit pëpe ti duti ndo oko na lo ti sara ngia. Ye so ayeke bata congrégation si lo sara sioni na ni ape (1 aCor. 5:​5-7). A peut nga ti aidé zo ni ti bâ so lo zia vundu mingi na bê ti Jéhovah, vundu apeut ti sara lo na lo changé bê ti lo.

6. Nyen la lettre ti Paul apusu congrégation ni ti sara? Ye so aita asara apusu koli ni ti sara nyen?

⁶ Na peko ti so Paul atokua lettre na aChrétien ti Corinthe, lo yeke hunda terê ti lo wala ala yeke sara ande ye tongana nyen. Na nda ni, Tite atene na lo mbeni tënë so anzere na lo mingi. Congrégation ni asara ye alingbi na wango ti Paul na ala zi koli ni na yâ ti congrégation (2 aCor. 7: 6, 7). Na ndö ni, na yâ ti anze so ahon ngbene ye so Paul atokua lettre ni, koli ni achangé bê ti lo. Lo zia sioni sarango ye ti lo, lo changé bango ndo ti lo nga lo komanse ti sara ye alingbi na andia ti Jéhovah (2 aCor. 7:​8-11). Nyen la Paul atene na ala ti sara na pekoni?

FASON SO AITA ADOIT TI SARA YE NA MBAGE TI ZO SO ACHANGÉ BÊ TI LO

7. So ala zi koli ni na yâ ti congrégation aga na nzoni ye wa? (2 aCorinthien 2:​5-8).

⁷ Diko 2 aCorinthien 2:​5-8. Paul atene so “sukungo so mingi ti ala asuku na koli so alingbi awe”. So ti tene, na peko ti so a zi koli ni na yâ ti congrégation, lo bâ so lo bezoin ti changé bê ti lo. Me so lo changé bê ti lo awe, aita adoit ape ti ngbâ ti ke ti sara songo na lo.—aHéb. 12:11.

8. Nyen la Paul atene na aita ti sara na pekoni?

⁸ Paul atene na aita, lo tene: “Ala pardonné [ita so asara siokpari] na bê ti ala kue nga ala dë bê ti lo” na ala “fa na lo so biani ala ndoye lo.” Bâ so Paul aye lani ti tene aita azia lo kiri na bungbi, me ala doit ti ngbâ gï ge ape. Paul aye ti tene ala fa na lo, na lege ti atënë ti ala nga na asarango ye ti ala, so ala pardonné lo nga ala ye lo na bê ti ala kue. Na sarango tongaso, lo yeke bâ polele so a nzere na ala so lo kiri na popo ti ala.

9. Ngbanga ti nyen la peut-être a yeke lani ngangu na ambeni ita ti pardonné ita so achangé bê ti lo?

⁹ Eskê a yeke lani ngangu na ambeni ita ti yamba zo so achangé bê ti lo na ngoi so lo kiri na yâ ti congrégation? Bible afa ape, me peut-être a yeke lani tongaso. Bê ti ambeni ita apeut lani ti son ndali ti so lo ga na akpale na yâ ti congrégation. Ti ambeni, vundu apeut ti sara ala ndali ti so siokpari so lo sara andu ala. So aita ti congrégation asara lani ngangu ti ngbâ ti mä yanga ti Jéhovah, peut-être ambeni abâ so a yeke na lege ni ape ti tene a zia mbeni zo so asara akota siokpari ti kiri na yâ ti congrégation. (Bâ Luc 15:​28-30.) Me ngbanga ti nyen la a yeke lani kota ye ti tene aita afa tâ ndoye na mbage ti ita so achangé bê ti lo so?

10-11. Nyen la apeut lani ti si tongana a-ancien ake ti pardonné zo so achangé bê ti lo?

¹⁰ Imaginé ye so apeut lani ti si tongana a-ancien ake ti zia si zo so achangé bê ti lo biani akiri na yâ ti congrégation wala tongana, na peko ti so lo kiri, aita ake ti fa so ala ye lo. “Vundu so asara lo mingi” apeut lani ti ‘woko lo’. Peut-être lo yeke bâ so lo peut lani ti kiri ti voro Jéhovah lâ oko ape. Lo peut nga lani ti pensé so Jéhovah apeut ti pardonné lo lâ oko ape tongaso mbeni raison ti gi ti changé ayeke dä ape.

¹¹ Ye so ayeke sioni mingi ayeke so, tongana aita ake ti pardonné mbeni zo so achangé bê ti lo, ala peut ti buba songo ti ala na Jéhovah. Ngbanga ti nyen la e tene tongaso? Ngbanga ti so ala yeke sara ye tongana Jéhovah ape so ayeke pardonné azo so achangé bê ti ala, me ala yeke sara ye tongana Satan so asara ye na nzoni bê oko ape. Ala yeke zia si Zabolo asara kua na ala ti kanga lege na zo ni ti sara na Jéhovah.—2 aCor. 2:​10, 11; aÉph. 4:27.

12. Tongana nyen la congrégation ni apeut lani ti sara ye tongana Jéhovah?

¹² Tongana nyen la aita ti congrégation ti Corinthe apeut lani ti sara ye tongana Jéhovah, me tongana Satan ape? Tongana ala pardonné azo so achangé bê ti ala tongana ti so Jéhovah asara. Bâ atënë so ambeni zo ti sungo Bible atene na ndö ti Jéhovah. David atene: “Mo yeke nzoni nga mo yeke nduru ti pardonné zo.” (Ps. 86:5). Michée atene: “Zo wa la ayeke Nzapa tongana mo zo wa? Mo so mo yeke pardonné afaute nga mo yeke zi siokpari.” (Mi 7:18). Nga Ésaïe atene: “Zia zo ti sioni azia lege ti lo, nga zia zo so aye gï ti sara sioni azia lege ti apensé ti lo. Zia lo kiri na mbage ti Jéhovah, so ayeke sara nzoni bê na lo, zia lo kiri na mbage ti Nzapa ti e, ndali ti so lo yeke pardonné zo kue kue kue.”—És. 55:7.

13. Ngbanga ti nyen la a yeke lani na lege ni ti kiri na koli so achangé bê ti lo na yâ ti congrégation? (Bâ encadré “Lawa la a kiri na koli ni na yâ ti congrégation ti Corinthe?”)

¹³ Ti sara ye tongana Jéhovah, aita ti congrégation ti Corinthe adoit lani ti yamba koli so achangé bê ti lo na yâ ti congrégation nga ti sara si lo hinga biani so ala ye lo. So aita asara ye alingbi na wango ti Paul na ala yamba zo so achangé bê ti lo na yâ ti congrégation, ala fa so ala “mä yanga na yâ ti ye kue.” (2 aCor. 2:9). Atâa so a zi lo na yâ ti congrégation a sara gï ambeni nze, lo changé bê ti lo. Tongaso, a-ancien abezoin ape ti ku ngbii si ala kiri na lo na yâ ti congrégation.

MÛ TAPANDE TI MBILIMBILI NGA NA NZONI BÊ TI JÉHOVAH

14-15. Aye wa la e manda na lege ti aye so asi na Corinthe? (2 Pierre 3:9). (Bâ nga foto.)

¹⁴ A zia mbaï ti fason so a-ancien abâ tënë ti koli so asara siokpari na ngbene gbata ti Corinthe na yâ ti Bible ti “fa ye na e”. (aRom. 15:4). Mbaï so afa na e so Jéhovah ayeke zia pëpe si azo so asara akota siokpari si ala changé bê ti ala ape angbâ na yâ ti congrégation. Ambeni zo apensé so ndali ti so Jéhovah ayeke sara nzoni bê na zo, lo yeke zia si mbeni zo so achangé bê ti lo ape angbâ na yâ ti congrégation, me so ayeke fason so Jéhovah ayeke fa nzoni bê la ape. Atâa so Jéhovah ayeke sara ye na nzoni bê, lo yeke yeda pëpe ti tene awakua ti lo asara gï ye ti bê ti ala. Ye so lo tene ayeke na lege ni wala ayeke na lege ni ape achangé ape (Jude 4). Tongana Jéhovah azia si azo so achangé bê ti ala ape angbâ na yâ ti congrégation, so sarango ye na nzoni bê la ape, ndali ti so a peut ti sara sioni na congrégation ni kue.—aProv. 13:20; 1 aCor. 15:33.

¹⁵ Atâa so kue, e manda so Jéhovah aye ti tene a futi zo oko ape. Lo ye ti sö azo tongana lege ayeke dä. Lo yeke sara nzoni bê na azo so achangé bê ti ala na so aye ti leke songo ti ala na lo. (Ézéch. 33:11; diko 2 Pierre 3:9.) Ndani la, na peko ti so koli so ayeke na Corinthe achangé bê ti lo na lo ke siokpari ti lo, Jéhovah asara kua na Paul ti fa na congrégation ni so ala doit ti pardonné lo nga ti yamba lo.

16. Fason so a sara ye na mbage ti koli so ayeke na Corinthe asara mo tongana nyen?

¹⁶ Tapande ti congrégation ti Corinthe afa na e so Jéhovah ayeke sara ye na ndoye nga lo ye fango ngbanga ti mbilimbili (Ps. 33:5). Ti hinga ni asara si e ye ti gonda Nzapa mingi. E kue e yeke sara siokpari na e bezoin ti tene lo pardonné e. E kiri singila na Jéhovah ndali ti so lo mû ye so a futa ti zi azo tongaso si lo peut ti pardonné e. Ti hinga so Jéhovah aye azo ti lo mingi nga lo ye gï ye so ayeke nzoni ndali ti ala adë bê ti e mingi.

17. Nyen la e yeke bâ na yâ ti a-article ti peko?

¹⁷ Ka ti bango tënë ti azo so asara kota siokpari laso? Tongana nyen la a-ancien apeut ti sara ye tongana Jéhovah so aye ti aidé azo so asara siokpari ti changé bê ti ala? Aita ti congrégation adoit ti sara ye tongana nyen na ngoi so a-ancien amû desizion ti zi mbeni zo na yâ ti congrégation wala ti kiri na mbeni zo na bungbi? E yeke kiri tënë na ahunda so na yâ ti a-article ti peko.