Zo wa la a yeke sö ande asenge zo? Bible atene nyen na ndö ni?

Tongana ti so rapport ti Nations unies afa:

• Ti londo na lango 7 ti si na lango 23 ti octobre 2023, bira so ayeke na popo ti Gaza nga na Israël asara si azo ahon 6 400 akui nga azo 15 200 awara kä, so mingi ni ayeke gï asenge zo. Nga, azo saki mingi aquitté ada ti ala.

• Ti si na lango 24 ti septembre 2023, bira so ayeke na popo ti Russie nga na Ukraine asara si azo 9 701 akui nga 17 748 awara kä na Ukraine.

Beku wa la Bible amû na azo so ayeke bâ pasi ndali ti bira?

Mbeni raison ti duti na beku ayeke dä

Bible atene kozo awe so Nzapa ayeke sara ande si “abira ahunzi na ndö ti sese kue.” (Psaume 46:9). Lo yeke sara ande kua na mbeni gouvernement so ayeke na yayu, wala Royaume ti Nzapa, ti zi agouvernement ti azo kue na ti zia ti lo na place ni (Daniel 2:44). Royaume ti Nzapa ayeke zi ande pasi ti azo.

Bâ ye so Jésus Christ, so ayeke Gbia ti Royaume ti Nzapa, ayeke sara ande:

• “Lo yeke zi awayere so atoto ti tene a mû maboko na ala, nga na zo ti mawa na zo kue so zo ti mungo maboko na lo ayeke dä pëpe. Lo yeke bâ mawa ti azo ti mawa nga na ti awayere; lo yeke sö fini ti awayere. Lo yeke zi ala na yâ ti pasi nga na yâ ti ye ti ngangu so a yeke sara na ala.”—Psaume 72:12-14.

Grâce na Royaume ti Nzapa, lo yeke zi ande aye ti vundu kue, apasi so aga na lege ti bira nga na sarango ye ti ngangu na zo.

• “Lo yeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”—Apocalypse 21:4.

Na yâ ti kete ngoi, Royaume ti Nzapa ayeke leke ande akpale so ayeke na ndö ti sese. Bible atene kozo awe so, e yeke mä ande tënë ti ‘abira so atï nduru na e wala abira so atï yongoro na e’ tongana ti so e yeke bâ laso (Matthieu 24:6). Aye so nga na ambeni nde so e yeke vivre ni afa so e yeke na “lâ ti nda ni” ti komandema ti azo.—2 Timothée 3:1.