Eskê mbeni bira ayeke si ande na yâ ti dunia kue? Bible atene nyen na ndö ni?

Na yâ ti angu 30 so ahon, mingi ti azo apensé so songo so ayeke na popo ti azo na yâ ti dunia kue ayeke lani bien nga aga même nzoni ahon ti kozo. Me, aye so asi ade ti ninga ape afa so tënë ni ayeke tongaso ape.

“Israël na Hezbollah ayeke sara bira na popo ti ala na frontière ti Liban, nga azo ayeke gi bê ti ala so bira so ayeke na popo ti Israël na Gaza ayeke mû ande yâ ti ambeni kodro so ayeke nduru na ala.”—Reuters, 6 janvier 2024.
“Agroupe ti azo so Iran asoutenir ala ayeke attaqué akodro nde nde, nga hio tongaso Iran akiri akomanse ti leke abombe nucléaire. Na ndö ni, Russie na Chine ayeke mû maboko fadeso na Iran. Aye ni so kue la apeut ti ga na kpale na akodro ti Poto.”—The New York Times, 7 janvier 2024.
“Angombe so Russie angbâ ti pika abuba aye mingi na Ukraine.”—UN News, 11 janvier 2024.
“So Chine ayeke na angangu turugu nga konomi ti kodro ti lo ayeke maï, so tënë ti kodro ti Taïwan agbu bê ti azo ti kodro ni mingi, nga so yâ ti songo so ayeke na popo ti Chine na États-Unis awoko apeut ti sara si mbeni bira alondo.”—The Japan Times, 9 janvier 2024.

Eskê Bible asara tënë na ndö ti aye so aga kirikiri na yâ ti dunia so e yeke bâ ni laso? Eskê aye ni so ayeke sara ande si bira alondo na yâ ti dunia kue?

Bible atene kozo awe so aye ni so ayeke si laso

Bible afa mbilimbili tongaso ape akodro so ayeke sara bira laso. Me, Bible atene kozo awe so abira ayeke mû ndo na ngoi ti e nga ayeke zi “siriri na ndö ti sese.”—Apocalypse 6:4.

Mbeti ti Daniel atene kozo awe so “na ngoi ti nda ni,” akodro so akomande dunia kue ayeke “pusu mba ti tiri” wala ala yeke sara mandako na popo ti ala ti fa zo so ayeke na ngangu. Sarango mandako ni so ayeke pusu ala ti fa so aturugu ti ala ayeke na ngangu nga ala yeke dépensé gbâ ti “amosoro” wala nginza.—Daniel 11:40, 42, 43.

Mbeni bira ayeke si ande

Bible afa so situation ti dunia ni ayeke ga ande sioni mingi kozo ti tene aye aga nzoni. Jésus atene kozo awe so “mbeni kota ye ti vundu ayeke si ande, ye ti vundu so mara ni ade ti si lâ oko pëpe ngbene ye so dunia abâ gigi.” (Matthieu 24:21). “Kota ye ti vundu” so ayeke gue ande ti si na mbeni bira so a iri ni Harmaguédon, so ayeke “bira ti kota lâ ti Nzapa, Lo so ngangu ti lo ahon angangu kue.”—Apocalypse 16:14, 16.

Bira ti Harmaguédon ayeke futi azo ape, me a yeke sö ande azo. Na lege ti bira ni, Nzapa ayeke futi ande komandema ti azo so aga na abira so abuba aye mingi. Ti hinga tongana nyen la Harmaguédon ayeke sara ande si siriri angbâ teti lakue lakue, diko a-article so ayeke na gbe ni ge: