Ngbanga ti nyen la aTémoin ti Jéhovah ayeke sara ka Pâques ape?
Atënë so azo atene ka
Tënë so azo atene: A-Témoin ti Jéhovah ayeke sara ka Pâques ape ndali ti so ala yeke aChrétien ape.
Tâ tënë ni: E mä na bê so Jésus Christ ayeke Sauveur ti e, nga e yeke sara kue ti “mû peko ti gere ti lo mbilimbili.”—1 Pierre 2:21; Luc 2:11.
Tënë so azo atene: A-Témoin ti Jéhovah amä na bê ape so Jésus azingo na kuâ.
Tâ tënë ni: E mä na bê so a zingo Jésus na kuâ; e hinga so zingongo ti Jésus na kuâ ayeke na gunda ti aye so aChrétien amä na bê na ni, nga e yeke fa ni na azo na yâ ti fango tënë ti e.—1 aCorinthien 15:3, 4, 12-15.
Tënë so azo atene: A sara nga ye oko na ala ape ti kanga lege na amolenge ti ala ti sara matanga ti Pâques, so ayeke mbeni ngoi ti ngia.
Tâ tënë ni: E ye amolenge ti e; e yeke sara ye kue so e peut ti sara ti fa ye na ala nga ti sara si ala duti na ngia.—Tite 2:4.
Ngbanga ti nyen la aTémoin ti Jéhovah ayeke sara ka Pâques ape, so a tene ayeke matanga ti zingongo ti Jésus na kuâ?
Matanga ti Pâques ni so ayeke mbeni matanga so Bible asara tënë ni ape.
Jésus ahunda na e ti dabe ti e na kuâ ti lo, me pëpe ti dabe ti e na zingongo ti lo na kuâ. Ngu oko oko, a si na lango so Jésus akui na ni, e yeke bungbi ti dabe ti e na kuâ ti lo.
E hinga so matanga ti Pâques ayeke mbeni matanga so Nzapa ayeda na ni ape, ndali ti so matanga ni alondo na ambeni sarango ye ti akotara so azo ayeke sara ni ândö ti tene ala dü gbâ ti amolenge. Nzapa ahunda na e ti tene e ‘voro gï lo oko awe,’ na a yeke son bê ti lo tongana e yôro ambeni sarango ye so lo ke ni na yâ ti vorongo so e yeke voro na lo.—Exode 20:5; 1 aGbia 18:21.
E hinga na bê ti e kue so desizion so e mû ti ke ti sara matanga ti Pâques aluti biani na ndö ti Bible. Bible ahunda na e ti sara kua na ‘ndara ti sara ye ti nzoni, nga na kode so e yeke na ni ti gbu li nzoni’ ahon ti mû gï peko ti angobo ti sarango ye ti azo (aProverbe 3:21; Matthieu 15:3). Tongana e yeke fa atënë ti mabe ti e na azo na ndö ti Pâques, e yeke ne nga droit so zo oko oko ayeke na ni ti sara ye so lo ye ti sara.—1 Pierre 3:15.