Ngbanga ti nyen la aTémoin ti Jéhovah ayeke gi ti sara lisoro na azo so aye lani ti mä ala ape?
Ndoye so aTémoin ti Jéhovah ayeke na ni ndali ti Nzapa nga ndali ti amba ti ala apusu ala ti fa tënë na azo kue, même azo so atene ala ye lani ti mä e ape (Matthieu 22:37-39). Yengo so e ye na Nzapa apusu e ti sara ye alingbi na commandement so Molenge ti lo amû na e ti tene e “fa tënë na azo”. (Kusala 10:42; 1 Jean 5:3). Ti sara ni, e yeke kiri fani mingi ti fa tënë na azo ni, tongana ti so aprophète ti ândö asara lani (Jérémie 25:4). Ndali ti so e ndoye amba ti e, e yeke gi ti fa “nzoni tënë ti Royaume” na azo kue ti tene ala sö fini ti ala, so na popo ni a yeke wara azo so atene lani ala ye ti mä e ape.—Matthieu 24:14.
Mingi ni, e ye ka ti kiri ti bâ azo so aye lani ti mä e ape. Bâ ambeni raison ni ota:
Azo ni apeut ti quitté.
Ambeni zo so ayeke na yanga-da ni apeut ti yeda na tënë so e fa na ala.
Azo apeut ti changé. Aye so ayeke passé na yâ ti dunia wala akpale so azo ni awara apeut ti sara si ambeni abâ so “ala yeke na bezoin ti aye ti yingo”. (Matthieu 5:3). Même azo so lani akanga lege na e apeut ti changé bango ndo ti ala, tongana ti so bazengele Paul asara lani.—1 Timothée 1:13.
Ye oko, e yeke forcé azo ape ti tene ala mä e (1 Pierre 3:15). E hinga so zo oko oko la adoit ti mû desizion na ndö ti bungbi ti Nzapa so lo ye ti sara.—Deutéronome 30:19, 20.