Ngbanga ti nyen la atënë ti yanga ti mbi ayeke son ka gï bê ti zo so?

“Na ambeni temps, mbi yeke bata yanga ti mbi, me parfois mbi bâ so mbi yeke sara ka tënë sân ti gbu li.”​—Jacques.

“Tongana ngonzo agbu mbi, mbi yeke tene tënë sân ti gbu li, na tongana terê ti mbi anzere, mbi yeke diko tënë mingi. Ti vrai ni, a yeke ngangu na mbi ka ti duti kpô.”​—Marie.

Bible atene: “Langue ayeke . . . tongana mbeni wâ” na “gï mbeni kete wâ alingbi ti gbi mbeni kota gbako!” (Jacques 3:5, 6). Eskê mo yeke wara ka tënë na amba ti mo ndali ti atënë ti yanga ti mo? Tongana a yeke tongaso, mbeti so apeut ti aidé mo.

• Ngbanga ti nyen la mbi yeke tene atënë so ayeke son bê ti zo?

• Bata yanga ti mo

• Amba ti mo atene ti ala nyen

Ngbanga ti nyen la mbi yeke tene atënë so ayeke son bê ti zo?

Siokpari. Bible atene: “Tongana mbeni zo apika gere ti lo na tënë ti yanga ti lo pëpe, zo tongaso ayeke mbilimbili-kue.” (Jacques 3:2). Teti so e yeke azo so siopkari ayeke na terê ti e, e lingbi ti pika gere ti e tongana e yeke tambela nga ti tene mbeni tënë so alingbi ti son bê ti amba ti e.

“So mbi yeke na mbeni cerveau nga na mbeni langue so siokpari ayeke na terê ni, tongana mbi tene so mbi yeke contrôlé aye use so nzoni mingi, andâ mbi wani mbi handa terê ti mbi la.”​—Anna.

Ti diko tënë mingi. Bible atene: “Tongana zo adiko gbâ ti tënë, lo yeke manke pëpe ti sara ye so ake ndia.” (aProverbe 10:19). A yeke ka facile na azo so ayeke diko tënë mingi, na so aye ka ti mä amba ti ala ape, ti sara atënë so apeut ti son bê ti amba ti ala.

“Azo so ayeke diko ka tënë mingi la ayeke pëpe azo so ahinga ka ndo mingi ahon amba ti ala. Jésus la ayeke zo so ahinga ndo ahon tanga ti azo kue, me atâa so kue na ambeni temps lani, lo yeke duti kpô.”​— Julie.

Atënë ti hengo zo. Bible atene: “Tënë so zo atene sân ti gbu li ayeke kpo zo tongana épée.” (aProverbe 12:18). Mbeni tapande ti atënë so zo atene sân ti gbu li ayeke atënë ti hengo zo, so ti tene atënë so zo atene ti bi nengo ti mba ti lo na sese. Azo so ayeke tene atënë ti hengo zo ayeke tene ka atene: “Gi tënë ti ngia la mbi tene so!” Me, ti bi nengo ti zo na sese ayeke mbeni ye so zo adoit ti bâ ni tongana tënë ti ngia la ape. Bible atene na e ti zi yongoro na terê ti e “zonga  . . nga [na] asioni ye kue.”​—aÉphésien 4:31.

“Mbi ye ka ti tene tënë ti ngia mingi; ye so ague na mbi ti he amba ti mbi, na mingi ni mbi yeke wara problème na pekoni.”​—Oksana.

Bata yanga ti mo

Ti manda ti contrôlé atënë ti yanga ti mo ayeke kete ye ape, me amama-ndia ti Bible apeut ti aidé mo. Na tapande, gbu li na ndö ti atënë so ge so:

“Ala diko tënë na yâ ti bê ti ala, . . . na ala zi yanga pëpe.”​—Psaume 4:4.

Na ambeni temps, nzoni fason ti kiri tënë na zo ayeke ti zi yanga ape. Mbeni maseka-wali so iri ti lo ayeke Laura atene: “Aye so mbi sentir ni na temps so ngonzo agbu mbi ayeke parfois nde na ati so mbi sentir ni ambeni ngoi na pekoni. Na peko ti so bê ti mbi adë awe, terê ti mbi ayeke nzere so mbi tene tënë kirikiri ape.” Ti mû ngoi kete ti gbu li kozo si mo sara tënë ayeke aidé mo si mo tene atënë so ason bê ti zo ape.

“Mê ayeke tara tënë tongana ti so langue ayeke tara kobe ape?”​—Job 12:11.

Mo yeke kpe akpale mingi tongana mo sara kua na ahundango ndo so ge kozo si mo tene mbeni tënë so mo ye ti tene:

• Eskê tënë ni ayeke vrai? Eskê a yeke sara nzoni na zo ni? Eskê a yeke kota ye ti tene ni?​—aRomain 14:19.

• Tongana mbeni zo la atene mara ti tënë ni so na mbi, a yeke sara mbi tongana nyen?​—Matthieu 7:12.

• Tongana mbi tene tënë ni so, eskê a yeke fa so mbi bâ pensé ti lo na nene ni?​—aRomain 12:10.

• Eskê a yeke nzoni ngoi ti sara tënë ni la?​—Zo-ti-fa-tene 3:7.

“Ala sara terê ti ala kete na ala bâ amba ti ala tongana azo so ayeke kota ahon ala.”​—aPhilippien 2:3.

Wango so ayeke aidé mo ti pensé na nzoni ti amba ti mo, sarango tongaso ayeke aidé mo ti bata yanga ti mo nga ti gbu li ti mo kozo si mo sara tënë. Tongana asi so mo tene mbeni tënë so ason bê ti mbeni zo, tongana mo sara terê ti mo kete, mo yeke hunda pardon; mo yeke gi ti hunda pardon hio, tongana lege ayeke da (Matthieu 5:23, 24). Tongaso, leke na bê ti mo ti kpe ti tene atënë so ason bê ti zo.