Hon ndö ti mbeto so asara mo na lege so mo sara confiance na Jéhovah

1. Ngbanga ti nyen la na ambeni ngoi mbeto apeut ti sara e?

E KUE e yeke sara mbeto na ambeni ngoi. So e hinga Bible, mbeto ti akuâ, ti asioni yingo wala ti kekereke asara e ape. Me e yeke vivre na mbeni ngoi so “aye so amû mbeto na zo” tongana bira, sarango sioni ye nga na kobela ayeke dä mingi (Luc 21:11). E peut nga ti sara mbeto ti azo, na tapande, akota zo ti kodro so ayeke sara ye ti ngangu na e wala même azo ti sewa ti e so ayeke kanga lege na e ti voro Jéhovah. Ambeni zo asara mbeto so ala lingbi pëpe ti gbu ngangu na yâ ti kpale so ala wara laso wala mbeni kpale so ala peut ti wara ande.

2. Fa ye so asi na David na ngoi so lo yeke na Gath.

² Mbeto asara lani David. Na tapande, na ngoi so Gbia Saül ayeke gi lani David ti fâ lo, lo kpe lo gue na Gath, gbata ti aPhilistin. Hio Akish, gbia ti Gath, amä so David ayeke ngangu zo ti bira so a he lani bia ti gonda lo a tene lo fâ aPhilistin “saki bale-oko, saki bale-oko”. ‘Mbeto asara David mingi.’ (1 Sam. 21:​10-12). Lo gi bê ti lo na ndö ti ye so Akish apeut ti sara na lo. David ahon ndö ti mbeto so asara lo tongana nyen?

3. Ti gue oko na Psaume 56:​1-3, 11, David ahon ndö ti mbeto so asara lo tongana nyen?

³ Na Psaume 56, David afa tënë ti bê ti lo na ngoi so lo yeke na Gath. Na yâ ti psaume so, David afa polele ndani so mbeto asara lo, me lo fa nga ye so a-aidé lo ti hon ndö ni. Na ngoi so mbeto asara David, lo zia bê ti lo na Jéhovah. (Diko Psaume 56:​1-3, 11.) David ayeke lani na anzoni raison ti zia bê ti lo na Jéhovah. Grâce na mungo maboko ti Jéhovah, David asara mbeni ye so ahon gbungo li ti zo. Lo sara ye mo bâ mo tene fou asara lo, na a ga na nzoni ye. Ahon ti tene Akish agi ti fâ David, lo tomba gï lo, tongaso David awara lege ti kpe.—1 Sam. 21:13–22:1.

4. Tongana nyen la e peut ti sara confiance mingi na Jéhovah? Mû mbeni tapande ti fa ni.

⁴ E nga kue e peut ti hon ndö ti mbeto tongana e sara confiance na Jéhovah. Me tongana nyen la e peut ti sara confiance mingi na Jéhovah, mbilimbili tongana mbeto asara e? Bâ mbeni tapande. Tongana mo hinga so mo yeke na mbeni kobela, na tongo nda ni mbeto apeut ti sara mo. Ye oko, tongana mo yeke na confiance na docteur ti mo, mo peut ti gi bê ti mo mingi ape. Peut-être lo soigné gbâ ti azo so ayeke na mara kobela ti mo so awe. Lo yeke mä mo nzoni na ngoi so mo yeke fa na lo ye so asara mo mbeto, nga mo yeke bâ so lo pensé na mo. Lo peut nga ti fa na mo mbeni yorö so a-aidé ambeni zo. Legeoko nga, e peut ti sara confiance mingi na Jéhovah tongana e gbu li na ndö ti aye so lo sara awe ndali ti e, aye so lo ngbâ ti sara ni nga na aye so lo yeke sara ande ndali ti e. A yeke ye so David asara lani. Na ngoi so e yeke bâ ambeni tënë so yingo ti Nzapa apusu David ti tene ni na Psaume 56, gbu li ti bâ tongana nyen la mo nga kue mo peut ti sara confiance mingi na Jéhovah nga ti hon ndö ti mbeto ti mo.

AYE WA LA JÉHOVAH ASARA AWE NDALI TI MO?

5. Ti tene David ahon ndö ti mbeto so asara lo, nyen la lo gbu lani li na ndö ni? (Psaume 56:​12, 13).

⁵ Na ngoi so fini ti David ayeke lani na yâ ti kpale, lo zia li ti lo na ndö ti anzoni ye so Jéhovah asara ândö. (Diko Psaume 56:​12, 13.) A yeke ye so David ayeke sara lani na yâ ti gigi ti lo. Na tapande na ambeni ngoi, lo gbu li na ndö ti aye so Jéhovah acréé. A dabe ti lo so Jéhovah ayeke na ngangu mingi nga lo ye azo mingi (Ps. 65:​6-9). Lo gbu nga lani li na ndö ti aye so Jéhovah asara awe ndali ti ambeni zo (Ps. 31:19; 37:​25, 26). Lo gbu li lani mbilimbili na ndö ti aye so Jéhovah asara lani ndali ti lo wani. Jéhovah a-aidé David nga abata lo ngbene ye na ngoi so lo ngbâ bébé (Ps. 22:​9, 10). Kite ayeke dä ape so, so David agbu li na ndö ti aye so a-aidé lo ti sara confiance mingi na Jéhovah.

6. Tongana mbeto asara e, nyen la ayeke aidé e ti sara confiance na Jéhovah?

⁶ Tongana mbeto asara mo, hunda terê ti mo: ‘Nyen la Jéhovah asara ândö?’ Gbu li na ndö ti aye so lo créé. Na tapande, tongana e ‘bâ nzoni’ tongana nyen la Jéhovah ayeke bâ lege ti andeke nga na afleur, so lo sara ni na image ti lo ape nga so apeut ti voro lo ape, a yeke sara si e duti na confiance mingi so Jéhovah ayeke bâ nga lege ti e (Mat. 6:​25-32). Gbu nga li na ndö ti aye so Jéhovah asara ndali ti awakua ti lo. Mo peut ti manda ye na ndö ti mbeni zo so Bible afa so lo yeke na kpengba mabe, wala mo peut ti diko ye na ndö ti mbeni wakua ti Jéhovah ti ngoi ti e.a Na ndö ni, gbu li na ndö ti aye so Jéhovah asara ti bâ lege ti mo. Tongana nyen la lo aidé mo ti hinga lo? (Jean 6:44). Tongana nyen la lo kiri tënë na asambela ti mo? (1 Jean 5:14). Tongana nyen la lâ oko oko mo yeke bâ nzoni na lege ti sandaga ti Molenge ti lo so lo ye lo mingi?—aÉph. 1:7; aHéb. 4:​14-16.

7. Tapande ti prophète Daniel a-aidé Vanessa tongana nyen ti hon ndö ti mbeto so asara lo?

⁷ Ita-wali Vanessa,b so ayeke na Haïti, awara lani mbeni kpale so asara lo mbeto mingi. Mbeni koli ti quartier ti lo ayeke iri lo na téléphone nga ayeke tokua message na lo lakue ti hunda na lo ti tene ala sigi. Vanessa atene na lo polele so lo ye ape. Me koli ni asara ngonzo ngangu, lo tene même so lo yeke sara sioni na ita-wali ni. Vanessa atene: “Mbeto ahon ndö ti mbi.” Lo hon ndö ti mbeto ti lo tongana nyen? Lo sara ambeni ye ti bata terê ti lo. Mbeni ancien a-aidé lo ti sara tënë ni na akota zo ti kodro. Me lo gbu nga li na ndö ti fason so Jéhovah abata awakua ti lo ândö. Vanessa atene: “Kozo zo so mbi gbu li na ndö ti lo ayeke prophète Daniel. Atâa so lo sara lani ye oko ape, a bi lo na yâ ti dû ti abamara so nzara ahon ndö ti ala. Me Jéhovah abâ lani lege ti lo. Mbi hunda lani na Jéhovah ti leke kpale ni. Na pekoni, mbeto asara mbi encore ape.”—Dan. 6:​12-22.

AYE WA LA JÉHOVAH AYEKE SARA NDALI TI MO LASO?

8. Nyen la David ahinga lani na bê ti lo kue? (Psaume 56:8).

⁸ Atâa so fini ti David ayeke lani na yâ ti kpale na ngoi so lo yeke na Gath, li ti lo aga kirikiri ape. Me, lo soro ti gbu li na ndö ti aye so Jéhovah asara ndali ti lo na ngoi ni so. David abâ so Jéhovah ayeke fa lege na lo nga ayeke bata lo nga Lo comprendre lo. (Diko Psaume 56:8.) David ayeke nga lani na akota kamarade, na tapande Jonathan nga na Kota prêtre Ahimélec, so akpengba lo nga a-aidé lo (1 Sam. 20:​41, 42; 21:​6, 8, 9). Atâa so Gbia Saül aye lani ti fâ David, lo kpe. Lo hinga lani biani so Jéhovah ahinga nzoni mingi ye so ayeke si na lo, nga na vundu so asara lo.

9. Nyen la Jéhovah ayeke bâ na mbage ti e oko oko kue?

⁹ Tongana mo wara mbeni kpale so asara mo mbeto, girisa ape so Jéhovah ahinga ni nga lo hinga ye so kpale ni asara na mo. Na tapande, Jéhovah abâ lani aye ti ngangu so a sara na azo ti Israël na Égypte nga lo bâ “pasi so ala yeke bâ [lani].” (Ex. 3:7). David ahe lani bia atene so Jéhovah abâ “pasi” ti lo nga na “kota vundu” ti lo (Ps. 31:7). Tongana awakua ti Nzapa ayeke bâ lani pasi, même na peko ti asioni desizion so ala mû, a “sara lo vundu”. (És. 63:9). Tongana mbeto asara mo, Jéhovah ahinga ni na lo yeke nduru ti aidé mo ti hon ndö ni.

10. Ngbanga ti nyen la mo hinga biani so Jéhovah ayeke pensé na mo nga lo yeke aidé mo ti gbu ngangu na yâ ti akpale kue so mo wara?

¹⁰ Tongana mo wara mbeni kpale so asara mo mbeto, peut-être mo yeke bâ ape tongana nyen la Jéhovah ayeke aidé mo. Nyen la mo peut ti sara? Hunda lo ti aidé mo ti bâ tongana nyen la lo yeke aidé mo (2 aGbia 6:​15-17). Na pekoni, hunda terê ti mo: Eskê mbeni diskur wala commentaire na ngoi ti mbeni bungbi akpengba mo awe? Eskê mbeni mbeti ti e, mbeni vidéo wala mbeni bia so ayeke nde akpengba mo awe? Eskê mbeni zo afa na mo awe mbeni pensé wala mbeni versê so adë bê ti mo? A peut ti duti ngangu ape ti bâ tongana senge ye sewa ti e ti aita so aye e nga na akobe ti yingo so e yeke wara. Me, a yeke akota cadeau so Jéhovah amû na e (És. 65:13; Marc 10:​29, 30). Ala fa so lo yeke pensé na e (És. 49:​14-16). Ala fa nga so mo peut ti sara confiance na lo.

11. Nyen la a-aidé Aida ti hon ndö ti mbeto so asara lo?

¹¹ Aida, so ayeke na Sénégal, abâ lani tongana nyen la Jéhovah a-aidé lo na ngoi ti mbeni kpale. So lo la lo yeke yaya, babâ na mama ti lo aku na mbage ti lo ti wara nginza so alingbi ti bâ lege ti lo nga na ala. Me na peko ti so Aida agi ti duti na aye mingi ape tongaso si lo sara kua ti pionnier, lo wara kpale ti nginza. Sewa ti lo asara ngonzo nga adiko tënë na terê ti lo. Lo tene: “Mbeto ti tene mbi yeke wara lege ape ti aidé babâ na mama ti mbi nga ti tene azo kue ake mbi asara lani mbi. Mbi tene même lani so Jéhovah la asara si ye ni aga ngangu na mbi.” Na pekoni, lo mä mbeni diskur na ngoi ti bungbi. Lo tene: “Zo ti mungo diskur ni adabe ti e so atâa kä wa la ayeke na bê ti e, Jéhovah ahinga ni. Yeke yeke, wango so a-ancien nga na ambeni zo amû na mbi asara si mbi hinga biani so Jéhovah aye mbi. Na ngoi so mbi sambela Jéhovah, mbi komanse ti duti na confiance mingi so lo yeke aidé mbi nga bê ti mbi adë ti bâ so lo kiri tënë na asambela ti mbi.” A si na mbeni ngoi, Aida awara mbeni kua so a-aidé lo ti bâ lege ti lo na yâ ti kua ti lo ti pionnier nga ti bâ lege ti babâ na mama ti lo nga na ambeni zo. Lo tene: “Mbi manda ti zia bê ti mbi kue na Jéhovah. Fadeso, na peko ti so mbi sambela, mingi ni mbeto ayeke sara mbi ape.”

AYE WA LA JÉHOVAH AYEKE SARA ANDE NDALI TI MO?

12. Ti gue oko na Psaume 56:​9, nyen la David ayeke lani na confiance na ni?

¹² Diko Psaume 56:9. Versê so afa mbeni ye nde so a-aidé lani David na ngoi so mbeto asara lo. Même na ngoi so fini ti lo ayeke lani na yâ ti kpale, lo gbu li na ndö ti ye so Jéhovah ayeke sara ande ndali ti lo. David ahinga so Jéhovah ayeke sö lo tâ na ngoi ni. David ahinga ni ndali ti so Jéhovah atene so lo yeke ga gbia ti Israël (1 Sam. 16:​1, 13). Na lê ti David, ye kue so Jéhovah amû zendo ti sara lo yeke sara ni.

13. Nyen la e peut ti hinga biani so Jéhovah ayeke sara ni?

¹³ Nyen la Jéhovah amû zendo ti sara na mo? E yeke ku pëpe ti tene lo kanga lege na akpale kue so e peut ti wara.c Me atâa kpale wa la e wara na yâ ti dunia so, Jéhovah ayeke zi ni ande na yâ ti fini dunia so ayeke ga (És. 25:​7-9). Lo so acréé e ayeke biani na ngangu ti zingo akuâ, ti sava akobela ti e, ti dë bê ti e nga ti zi awato ti e kue.—1 Jean 4:4.

14. Nyen la e peut ti gbu li ti e na ndö ni?

¹⁴ Tongana mbeto asara mo, gbu li na ndö ti aye so Jéhovah ayeke sara ande. Gbu li ti bâ tongana Satan ayeke dä encore ape, a futi asioni zo kue na gï azo ti mbilimbili la ayeke dä nga tongana lâ oko oko yeke yeke e yeke ga mbilimbili-kue, a yeke sara ande mo tongana nyen? Mbeni démonstration so a sara lani na ngoi ti kota bungbi ti lango ota ti ngu 2014 afa tongana nyen la e peut ti gbu li na ndö ti beku ti e. Mbeni babâ na azo ti sewa ti lo asara lisoro ti bâ tongana nyen la atënë so ayeke na 2 Timothée 3:​1-5 apeut ti changé tongana ayeke sara tënë ti gigi ti azo na yâ ti Paradis. Lo tene: “Na yâ ti fini dunia, ngia ayeke duti ande dä mingi, ngbanga ti so azo ayeke ndoye ande amba ti ala, ala yeke ye ti hinga ye na ndö ti Nzapa, ala yeke bâ terê ti ala kete, ala yeke sara terê ti ala kete, ala yeke gonda Nzapa, ala yeke mä yanga ti ababâ na amama ti ala, ala yeke hinga ti kiri singila, ala yeke duti be-ta-zo, ala yeke ye mingi azo ti sewa ti ala, ala yeke ye ti mä terê na amba ti ala, ala yeke tene lakue nzoni tënë ti mba, ala yeke kanga nzara ti bê ti ala, ala yeke duti anzoni zo, ala yeke ndoye nzoni ye, zo apeut ti sara confiance na ala, li ti ala akpengba ape, ala yeke azo ti wuma ape, ala yeke ndoye Nzapa ahon ti ndoye ngia, ala yeke voro Nzapa na bê ti ala kue; ga nduru na mara ti azo tongaso.” Eskê mo na azo ti sewa ti mo wala amba ti mo aChrétien asara lisoro awe ti hinga gigi ayeke duti ande tongana nyen na yâ ti fini dunia?

15. Atâa so mbeto asara lani Tanja, nyen la a-aidé lo ti hon ndö ni?

¹⁵ Tanja, mbeni ita-wali na nord ti Macédoine, ahon ndö ti mbeto so asara lo na lege so lo gbu li na ndö ti anzoni ye so ayeke ga. Babâ na mama ti lo akanga lege na lo ngangu na ngoi so lo komanse ti manda Bible. Lo tene: “Ambeni ye so mbeto ni asara mbi asi. Lakue tongana mbi londo na bungbi mbi kiri, mama ti mbi ayeke pika mbi. Babâ na mama ti mbi atene so ala yeke fâ mbi tongana mbi ga Témoin ti Jéhovah.” Na nda ni, ala tomba Tanja na da. Lo sara ye lani tongana nyen? Lo tene: “Mbi zia li ti mbi na ndö ti ngia so mbi yeke duti ande na ni mingi teti lakue lakue ndali ti so mbi soro ti ngbâ be-ta-zo. Mbi gbu nga li ti bâ tongana nyen la Jéhovah ayeke futa ande mbi na yâ ti fini dunia ndali ti aye kue so mbi peut ti perdre ni na yâ ti ngoi so nga mbi gbu li ti bâ tongana nyen la azo ayeke girisa ande asioni ye kue.” Tanja angbâ lani be-ta-zo. Grâce na Jéhovah, lo wara mbeni ndo ti lango. Laso, Tanja asara mariage na mbeni ita-koli so ayeke be-ta-zo na ala yeke na ngia ti sara kua ti ngoi kue.

SARA CONFIANCE NA JÉHOVAH MINGI LASO

16. Nyen la ayeke aidé e ti ngbâ ti sara ye na mbeto ape na ngoi so e bâ aye so prophétie so ayeke na Luc 21:​26-28 asara tënë ni ayeke si?

¹⁶ Na ngoi ti kota ye ti vundu, azo “ayeke kui na mbeto”. Me awakua ti Nzapa ayeke ngbâ ti luti ngangu nga ala yeke sara ye na mbeto ape. (Diko Luc 21:​26-28.) Ngbanga ti nyen la e yeke sara ande ye na mbeto ape? Ngbanga ti so e manda ti sara confiance na Jéhovah awe. Tanja, so e sara tënë ti lo fade, atene so aye so asi na lo ândö a-aidé lo ti gbu ngangu na yâ ti ambeni ngangu kpale so lo wara. Lo tene: “Mbi bâ so Jéhovah apeut ti aidé e ti gbu ngangu na yâ ti akpale kue nga lo yeke sara tufa na ndö ti e. Na ambeni ngoi, na bango ni azo ayeke sara na e aye so ala ye ti sara, me ti tâ tënë ni, ala yeke sara gï ye so Jéhovah amû lege na ala ti sara. Me atâa mbeni kpale ayeke ngangu tongana nyen, a yeke hunzi.”

17. Versê ti e ti ngu 2024 ayeke aidé e tongana nyen? (Bâ foto ti couverture ni.)

¹⁷ Laso, gbâ ti aye ayeke dä so apeut ti sara e mbeto. Me legeoko tongana David, e peut ti ke ti zia si mbeto ahon ndö ti e. Versê ti e ti ngu 2024 ayeke sambela so David atene na Jéhovah, so lo tene: “Na ngoi so mbeto asara mbi, mbi zia bê ti mbi na ndö ti mo.” (Ps. 56:3). Bâ ye so mbeni wandara ti Bible atene na ndö ti versê so: “David angbâ lani ti pensé na aye so asara lo mbeto wala akpale ti lo ape. Me lo zia bê ti lo na ndö ti Lo so ayeke zi lo na yâ ni.” Na yâ ti anze so ayeke ga, gbu li na ndö ti versê ti e ti ngu so, mbilimbili tongana mo tingbi na aye so asara mo mbeto. Mû ngoi ti gbu li na ndö ti aye so Jéhovah asara ândö, aye so lo sara laso nga na aye so lo yeke sara ande. Tongaso, tongana David, mo peut ti tene: “Mbi zia bê ti mbi na ndö ti Nzapa, mbeto asara mbi pëpe.”—Ps. 56:4.