E leke yâ ti atënë ti sambela ti e nzoni ahon ti kozo

1. Jéhovah ahunda na awakua ti lo ti sara nyen? (Bâ nga foto.)

NA NGOI so e bezoin dengo bê nga na fango lege, zo wa la e peut ti bâ ndo na mbage ti lo? E hinga kiringo tënë na hunda so. E peut ti sambela Jéhovah Nzapa. Lo la lo hunda na e ti sara ni. Lo ye ti tene e sambela lo fani mingi, so ti tene, lo ye ti tene e “ngbâ ti sambela lakue.” (1 aThes. 5:17). E peut ti sambela lo nga ti hunda lo ti fa lege na e na yâ ti aye kue na yâ ti fini ti e, e peut ti sara ni tongana ti so e ye (aProv. 3:5, 6). So Jéhovah ayeke nduru ti mä e, e peut ti sambela lo na ngoi kue so e ye.

2. Nyen la e yeke bâ na yâ ti article so?

² E kiri singila mingi na Jéhovah so amû lege na e ti sambela lo. So e yeke na aye mingi ti sara, a peut ti duti ngangu na e ti wara ngoi ti sambela. E peut nga ti bâ so e bezoin ti leke yâ ti atënë ti sambela ti e nzoni ahon ti kozo. E kiri singila na Jéhovah so e peut ti wara dengo bê nga na fango lege na yâ ti Bible. Na yâ ti article so, e yeke bâ tongana nyen la e peut ti wara ngoi ti sambela tongana e gbu li na ndö ti tapande ti Jésus. E yeke bâ nga tongana nyen la e peut ti leke yâ ti atënë ti sambela ti e nzoni ahon ti kozo na lege so e zia na yâ ni tënë ti aye oku so ayeke kota ye.

JÉSUS AZIA LANI NGOI NDE TI SAMBELA

3. Nyen la Jésus ahinga lani na ndö ti sambela?

³ Jésus ahinga lani so a yeke kota ye mingi ti sambela Jéhovah. Angu mingi kozo ti tene lo ga na sese, lo bâ lani tongana nyen la Babâ ti lo akiri tënë na asambela ti awakua ti lo so ayeke be-ta-zo. Na tapande, Jésus ayeke lani na terê ti Babâ ti lo na ngoi so Lo kiri tënë na asambela ti Hannah, David, Élie nga na ambeni mingi so ayeke be-ta-zo (1 Sam. 1:10, 11, 20; 1 aGbia 19:4-6; Ps. 32:5). Ndani la Jésus afa lani na adisciple ti lo ti sambela fani mingi nga na bê ti ala kue.—Mat. 7:7-11.

4. Nyen la e manda na lege ti asambela ti Jésus?

⁴ Na lege ti asambela so Jésus atene na Jéhovah, lo zia na adisciple ti lo mbeni tapande ti tene ala mû peko ni. Na ngoi ti kua ti fango tënë ti Jésus kue, lo sambela fani mingi. Lo doit lani ti zia mbeni ngoi nde ti sambela ndali ti so fani mingi lo yeke na kua mingi nga gbâ ti azo ayeke na terê ti lo (Marc 6:31, 45, 46). Lo yeke londo lani hio na ndapre tongaso si lo peut ti wara ngoi ti duti lo oko ti sambela (Marc 1:35). Mbeni lâ, lo sambela na mbeni bï kue kozo si lo mû mbeni kota desizion (Luc 6:12, 13). Jésus asambela nga lani fani mingi na bï so na ndade ni lo kui, kozo si lo hunzi kua so a mû na lo ti sara na sese so ayeke ngangu mingi.—Mat. 26:39, 42, 44.

5. Tongana nyen la e peut ti mû tapande ti Jésus na ngoi so e yeke sambela?

⁵ Tapande ti Jésus afa na e so atâa e yeke na kua mingi e bezoin ti wara ngoi ti sambela. Legeoko tongana Jésus, e doit ti zia mbeni ngoi nde ti sambela, na tapande, e peut ti londo hio na ndapre ti sambela wala e peut ti sambela na lakui. Tongana e sara ni, e yeke fa na Jéhovah so e bâ na nene ni pasa so lo mû na e ti sambela lo. Mbeni ita-wali so iri ti lo Lynne adabe ti lo so lo kiri lani singila mingi na ngoi so ti kozoni lo manda ye na ndö ti pasa so e yeke na ni ti sambela. Lo tene: “Na ngoi so mbi hinga lani so mbi peut ti sambela Jéhovah na ngoi kue a-aidé mbi ti bâ lo tongana kota Kamarade ti mbi nga ti leke yâ ti atënë ti sambela ti mbi nzoni ahon ti kozo.” Kite ayeke dä ape so mingi ti e apensé tongaso. Zia e bâ akota ye oku so e peut ti sara tënë ni na yâ ti asambela ti e.

AKOTA YE OKU SO E PEUT TI SARA TËNË NI NA YÂ TI SAMBELA TI E

6. Tongana ti so Apocalypse 4:10, 11 atene, Jéhovah alingbi na nyen?

⁶ Sepela Jéhovah. Na yâ ti mbeni vision so apika bê mingi, bazengele Jean abâ a-ancien 24 so ayeke voro Jéhovah na yayu. Ala sepela Nzapa ala tene so lo lingbi ti wara “gloire, nengo nga na ngangu”. (Diko Apocalypse 4:10, 11.) A-ange so ayeke be-ta-zo ayeke nga na gbâ ti araison ti sepela Jéhovah. Ala na lo ayeke na yayu na ala hinga lo nzoni. Ala bâ apendere sarango ye ti lo na lege ti aye so lo sara. So ala bâ tongana nyen la Jéhovah ayeke sara aye, bê ti ala apusu ala ti sepela lo.—Job 38:4-7.

7. E peut ti sepela Jéhovah ndali ti nyen?

⁷ A yeke nzoni e nga e sepela Jéhovah na yâ ti asambela ti e, e peut ti sara ni na lege so e tene na lo ndani so e ye lo nga e ne lo. Na ngoi so mo yeke diko Bible nga mo yeke manda ni gi ti bâ asarango ye ti Jéhovah so anzere na mo mingi (Job 37:23; aRom. 11:33). Na pekoni, fa na Jéhovah atene ti bê ti mo na ndö ti asarango ye ni so. E peut nga ti sepela Jéhovah ndali ti so lo aidé e nga na aita ti e kue. Lo yeke bâ lakue lege ti e nga lo yeke bata e.—1 Sam. 1:27; 2:1, 2.

8. Ambeni raison wa la ndali ni e yeke kiri singila na Jéhovah? (1 aThessalonicien 5:18).

⁸ Kiri singila na Jéhovah. E yeke na araison mingi ti kiri singila na Jéhovah na yâ ti sambela ti e. (Diko 1 aThessalonicien 5:18.) E peut ti kiri singila na lo ndali ti anzoni ye kue so e yeke na ni ndali ti so nzoni matabisi kue alondo na lo (Jacq. 1:17). Na tapande, e peut ti kiri singila na lo ndali ti pendere sese ti e nga na apendere ye so lo créé. E peut nga ti kiri singila na lo ndali ti fini so lo mû na e, sewa ti e, akamarade ti e nga na beku ti e. E ye nga ti kiri singila na Jéhovah ndali ti so lo mû lege na e ti duti na pendere songo ti kamarade na lo.

9. Ngbanga ti nyen la peut-être e bezoin ti gi ti kiri singila na Jéhovah?

⁹ Peut-être e bezoin ti sara effort ti gbu li na ndö ti araison so e yeke na ni ti kiri singila na Jéhovah. E yeke na yâ ti mbeni dunia so azo mingi ayeke kiri singila ape. Mingi ni, azo ayeke pensé gï na ndö ti fason so ala ye ti wara na aye so ala ye me pëpe na ndö ti fason so ala peut ti fa so ala kiri singila. Tongana e komanse ti sara ye tongana ala, na yâ ti asambela ti e, e yeke hunda gï ye na Jéhovah. Ti tene ye tongaso asi ape, e bezoin ti ngbâ ti gi ti kiri singila na Jéhovah ndali ti aye kue so lo sara ndali ti e.—Luc 6:45.

10. Tongana nyen la bibe ti kiri singila a-aidé mbeni ita-wali ti gbu ngangu? (Bâ nga foto.)

¹⁰ Bibe ti kiri singila apeut ti aidé e ti gbu ngangu na yâ ti akpale. Bâ ye so asi na ita-wali Kyung-sook so a sara tënë ni na yâ ti Tour ti Ba Ndo ti lango 15 ti janvier ngu 2015. A wara na terê ti lo kobela ti cancer so ague na li ni mingi awe. Lo tene: “Kpale ti seni so mbi wara so ayengi mbi ngangu. Mbi pensé so mbi perdre aye kue awe, nga mbeto ahon ndö ti mbi.” Nyen la a-aidé lo ti gbu ngangu? Lo tene so lakue na bï kozo ti tene lo gue lo lango, lo yeke monté na ndö ti da ti ala na lo yeke sambela na kota go ti kiri singila na Nzapa ndali ti aye oku so lo sara na lo na yâ ti lango ni. A sara si lo gi bê ti lo mingi ape nga apusu lo ti fa na Jéhovah so lo ye lo. Lo bâ tongana nyen la Jéhovah amû maboko na awakua be-ta-zo ti lo na ngoi so ala wara angangu kpale nga lo comprendre so anzoni ye ayeke mingi na yâ ti gigi ti e ahon akpale so e wara. Tongana ti Kyung-sook e yeke na araison mingi ti kiri singila na Jéhovah même tongana e yeke na yâ ti kpale. Ti kiri singila na Jéhovah na yâ ti sambela apeut ti aidé e ti gbu ngangu nga ti ngbâ ti duti na ngia.

11. Na peko ti so Jésus akiri na yayu, ngbanga ti nyen la adisciple ti lo abezoin ti sara ye na mbeto ape?

¹¹ Hunda Jéhovah ti aidé mo ti sara ye na mbeto ape na fango tënë. Kete kozo ti tene Jésus kiri na yayu, lo dabe ti adisciple ti lo na kua ti ala so ayeke ti sara tënë ti témoin na ndö ti lo na “Jérusalem, na yâ ti Judée kue nga na Samarie, nga juska na ambage ti sese so ayeke tâ yongoro.” (Kus. 1:8; Luc 24:46-48). Ngoi kete na pekoni, akota zo ti aJuif agbu bazengele Pierre na Jean ala gue na ala na gbele Sanhédrin, ala mû yanga na akoli be-ta-zo so ti zia ti fa tënë, ala zia même mbeto na yâ ti ala (Kus. 4:18, 21). Pierre na Jean asara ye lani tongana nyen?

12. Ti gue oko na Kusala 4:29, 31, nyen la adisciple asara lani?

¹² Ti kiri tënë na akota zo ti nzapa ti aJuif, Pierre na Jean atene: “Wala a yeke nzoni na lê ti Nzapa ti tene e mä ala ahon ti mä Nzapa, a yeke na ala ti bâ. Me ti e, e lingbi ti kaï pëpe ti sara tënë na ndö ti aye so e bâ na e mä.” (Kus. 4:19, 20). Na ngoi so a zi Pierre na Jean, adisciple asambela Jéhovah ti aidé ala ti sara ye so bê ti lo aye. Ala sambela ala tene: “Mû lege na angbâa ti mo ti ngbâ ti fa tënë ti mo na mbeto oko pëpe.” Jéhovah akiri lani tënë na sambela so, so ala sara ni na bê ti ala kue.—Diko Kusala 4:29, 31.

13. Nyen la e peut ti manda na lege ti tapande ti Jin-hyuk?

¹³ Tongana akota zo ti kodro ahunda na e ti zia ti fa tënë, e peut ti sara ye tongana ti so adisciple asara lani. Bâ tapande ti Ita-koli Jin-hyuk so a kanga lo lani ndali ti so lo duti nde. Na kanga, a mû lo ti bâ lege ti ambeni zo ti kanga so a zia ala gï ala oko na yâ ti cellule ti ala, me a mû lege na lo ti sara tënë na ala gï na ndö ti aye so ala bezoin ni, a mû lani lege na lo ape ti sara tënë na ala na ndö ti Bible. Lo sambela ti sara ye na mbeto ape nga ti sara ye na ndara ti fa tënë na alege kue so azi (Kus. 5:29). Lo tene: “Jéhovah akiri tënë na asambela ti mbi na lege so lo mû na mbi courage nga na ndara ti komanse ti sara étude na azo penze-ngbonga oku na yanga ti porte ti acellule ti ala. Na pekoni, na bï, mbi yeke sû alettre so mbi yeke mû na amba ti mbi azo ti kanga na ndade ni.” E nga kue e peut ti hinga na bê ti e kue so Jéhovah ayeke aidé e ti sara kua ti e ti fango tënë. Legeoko tongana Jin-hyuk, e peut ti sambela Jéhovah ti aidé e ti sara ye na mbeto ape nga ti mû na e ndara.

14. Na ngoi so e wara akpale, nyen la apeut ti aidé e? (Psaume 37:3, 5).

¹⁴ Hunda Jéhovah ti aidé mo ti gbu ngangu atâa akpale so mo wara. Mingi ti e ayeke gbu ngangu na yâ ti akpale wala e découragé: Na tapande kpale ti seni, kuâ ti mbeni zo so e ye lo, kpale ti sewa, sarango ye ti ngangu na zo wala mbeni kpale nde. Akobela so ayeke mû ndo nga na abira asara si a yeke même ngangu mingi ti gbu ngangu na yâ ti mingi ti akpale so. Zi bê ti mo na Jéhovah. Fa na lo ye so asi na mo tongana ti so mo yeke fa ni na mbeni kota kamarade ti mo. Duti na confiance so Jéhovah ‘ayeke sara ye ndali ti mo.’—Diko Psaume 37:3, 5.

15. Tongana nyen la sambela apeut ti aidé e ti “gbu ngangu na yâ ti aye ti vundu”? Mû mbeni tapande ti fa ni.

¹⁵ Tongana e ngbâ ti sambela ayeke aidé e ti “gbu ngangu na yâ ti aye ti vundu.” (aRom. 12:12). Jéhovah ahinga akpale so awakua ti lo ayeke gbu ngangu dä, “lo mä toto so ala toto na lo ti mû maboko na ala”. (Ps. 145:18, 19). Kristie, mbeni pionnier so ayeke na ngu 29, abâ so tënë so ayeke tâ tënë. Lo komanse lani ti wara angangu kpale ti seni so lo ku terê ti lo na ni ape. A sara si lo tï na yâ ti kota vundu. Ambeni ngoi na pekoni, lo mä so a wara na terê ti mama ti lo mbeni kobela so ayeke gue na lo ti fâ lo. Kristie atene: “ Mbi sambela Jéhovah mingi ti mû na mbi ngangu so mbi bezoin ni lâ na lâ. Mbi sara ngangu ti voro Jéhovah lakue na lege so mbi gue na abungbi nga mbi manda ye mbi wani.” Lo kiri lo tene: “Sambela a-aidé mbi ti gbu ngangu na angoi ti kpale. Mbi hinga lani so Jéhovah ayeke lakue dä, na a dë bê ti mbi mingi. Atâa so akobela ti mbi ni akaï na lê ni lê ni ape, Jéhovah akiri tënë na sambela ti mbi na lege so lo mû na mbi siriri ti bê nga na dengo bê.” Zia e girisa lâ oko ape so “Jéhovah ahinga tongana nyen ti zi na yâ ti tara azo so avoro lo na bê ti ala kue”.—2 Pi. 2:9.

16. Ngbanga ti nyen la e bezoin mungo maboko ti Jéhovah ti dö sese na tara?

¹⁶ Hunda Jéhovah ti aidé mo ti dö sese na tara. So e yeke mbilimbili-kue ape, e bezoin lakue ti dö sese na bê ti e so ayeke pusu e ti sara sioni ye. Satan ayeke sara ye kue so lo peut ti sara ti sara si a yeke ngangu na e ti dö sese. Mbeni lege so lo yeke gi ti buba yâ ti pensé ti e ayeke na lege ti asioni ngia. Asioni ngia apeut ti yôro asioni ye na yâ ti li ti e, na a peut ti sara si e ga sioni na lê ti Jéhovah nga apeut ti pusu e ti sara akota siokpari.—Marc 7:21-23; Jacq. 1:14, 15.

17. Na peko ti so e sambela ti wara mungo maboko, nyen la e doit ti sara? (Bâ nga foto.)

¹⁷ Tongana e ye ti tene bê ti e apusu e ti sara sioni ye ape, e bezoin mungo maboko ti Jéhovah. Jésus ahunda lani ye so na yâ ti tapande ti sambela so lo fa: “Gue na e na yâ ti tara pëpe, me zi e na maboko ti Zo ti sioni.” (Mat. 6:13). Jéhovah aye ti aidé e, me e doit ti hunda ni na lo. E doit nga ti sara ye alingbi na sambela ti e. E peut ti sara ye kue so e peut ti sara ti kpe asioni pensé so ayeke mingi na yâ ti dunia ti Satan so (Ps. 97:10). E peut ti yôro anzoni pensé na yâ ti li ti e na lege so e diko Bible nga e manda ni. Gango na abungbi nga mungo mbage na fango tënë ayeke bata nga apensé ti e. Jéhovah atene so lo yeke zia pëpe si a tara e ahon ti so e peut ti kanga bê dä.—1 aCor. 10:12, 13.

18. Na ndö ti tënë ti sambela, nyen la e kue e bezoin ti sara?

¹⁸ E kue e bezoin ti sambela mingi ahon ti kozo si e ngbâ be-ta-zo na Jéhovah na lâ ti nda ni so ayeke ngangu so. Leke kapa ti sambela na bê ti mo kue lâ oko oko. Jéhovah aye ti tene e ‘zi bê ti e kue na lo’ na yâ ti sambela (Ps. 62:8). Sepela Jéhovah nga kiri singila na lo ndali ti aye kue so lo sara. Hunda lo ti aidé mo ti fa tënë na mbeto ape. Voro yanga na lo ti aidé mo ti gbu ngangu na yâ ti akpale kue so mo wara nga ti dö sese na atara so mo peut ti wara. Zia pëpe si mbeni ye wala mbeni zo akanga lege na mo ti sambela Jéhovah lakue. Me Jéhovah ayeke kiri tënë na asambela ti e tongana nyen? E yeke kiri tënë na kota hunda so na yâ ti article ti peko.