Atene so Azo Ahunda

A-barre so a sala na kusala ti yö na arche ti mbele aduti la ni tongana nyen, teti so 1 aGbia 8:8 afa so zo so aluti na Ndo ti Nzoni-kue alingbi ba ala?

Na ngoi so Jéhovah amu na Moïse plan ti tabernacle na yando, mbeni kpengba ye ni ayeke la ni arche ti mbele. A yeke tongana mbeni sanduku so a zia lor na tele ni kue, so na yâ ni a yeke wara a-tablette ti Ndia na ambeni ye nde. A bata ni na yâ ti mbeni mbage ti da kâ na yâ ni, so a hiri ni Ndo ti Nzoni Ahon Kue. Na ndo ti yanga ti Arche ni, a leke ambeni chérubin ti lor use so agbala akpangbi ti ala. Na mbage na mbage ti Arche ni, a sala a-anneau (wala awen na dü) ti mu lege ti yö Arche ni na a-barre use, so a sala ni na keke ti acacia na a zia lor na tele ni kue. Na lege ni, a-barre ni alï nzoni na yâ a-anneau ni, na a yeke na tele ti yongo ti Arche ni. Na lege so, tongana Arche ni aduti na place ti lo na yâ Ndo ti Nzoni Ahon Kue ti tabernacle, so a ba ndo na mbage ti tö, a-barre ni ayeke ba ndo na mbage ti banga-mbongo. Ngoi mingi na pekoni, a yeke legeoko tongaso nga, tongana a zia Arche na yâ temple so Salomon aleke.​—Exode 25:10-22; 37:4-9; 40:17-21.a

Mbeni rideau akangbi la ni popo ti Ndo ti Nzoni Ahon Kue, na Ndo ti Nzoni-kue (kubu ti gigi). Aprêtre so ayeke na yâ Ndo ti Nzoni-kue alingbi pepe ti ba ndo na yâ ti Ndo ti Nzoni Ahon Kue, na ti ba Arche ni, so na ndo ni Nzapa ayeke fa tele ti lo. (aHébreu 9:1-7) Tongaso, a lingbi ti duti ngangu ti gbu nda ti 1 aGbia 8:8: “Barre ni ayo mingi, tongana zo so ayeke na Ndo ti Nzoni-kue na gbele Ndo ti Nzoni Ahon Kue alingbi ba yanga ni, me zo so ayeke na gigi alingbi ba barre ni pepe.” A sala oko tene so na 2 Chronique 5:9. Na lege wa zo so ayeke na Ndo ti Nzoni-kue ti temple alingbi ba a-barre ni?

Ambeni zo atara ti bi bê so a-barre ni andu tele ti rideau ni, na a sala akutu so zo alingbi ba. Me a lingbi ti duti tongaso pepe tongana a-barre ni aba ndo na mbage ti banga-mbongo, na rideau ni aba ndo na tele ti a-barre ni. (Nombre 3:38) Mbeni fango nda ti tene nde ayeke dä so ayeke na lege ni mingi ahon. A lingbi fade ti ba a-barre ni gi tongana mbeni kete place akangbi popo ti rideau na gbagba ti temple, wala tongana a lingbi kota prêtre alï na yâ ti Ndo ti Nzoni Ahon Kue. Rideau ni akanga lege na lê ti zo ti ba Arche ni mveni, me a-barre ni so ayo mbage na mbage alingbi ti sigigi polele na yâ place ni so. Atä so fango nda ti ye so alingbi ti duti na lege ni, e lingbi ti luti pepe na ndo ni tongana gi oko fango nda ti ye so ayeke tâ na lege ni.

Ti ba ni polele, anzene nzene ye mingi ayeke dä so angbâ na e ti manda. Bazengele Paul afa ambeni mbage ni na yâ ti mbeti ti lo na aHébreu. Na pekoni, lo tene: “E lingbi ti sala tene ti ye so kue fadeso pepe.” (aHébreu 9:5) Londongo ti azo ti be-biani na popo ti awakinda ayeke zi lege ande na apendere ngoi ti mandango ye na mbage ti azo tongana Moïse, Aaron, Bézalel, na ambeni zo nde so ahinga la ni nzoni mingi plan na kusala ti tabernacle.​—Exode 36:1.

[Kete Tene na Gbe Ni]