Tongana e gi ti hinga Nzapa e yeke ga akamarade ti lo
Wasarango e ayeke gï pëpe na ngangu, me lo yeke nga na apendere sarango ye. Lo ye ti tene e manda ye na ndö ti lo nga e ga akamarade ti lo (Jean 17:3; Jacques 4:8). A yeke ndani la lo ye ti fa ye mingi na ndö ti lo.
Nzapa ayeke na iri
“Zia si azo ahinga so, mo so iri ti mo ayeke Jéhovah, mo oko la mo yeke Lo so ayeke na nduzu na ndö ti aye kue, na ndö ti sese kue.”—PSAUME 83:18.
Bible afa so Jéhovah ayeke oko tâ Nzapa. Lo la lo créé aye kue na yâ ti dunia nga aye kue so ayeke na fini. Lo oko la lo lingbi ti tene e voro lo.—Apocalypse 4:11.
Jéhovah ayeke Nzapa ti ndoye
“Nzapa ayeke ndoye.”—1 JEAN 4:8.
Jéhovah afa na e gbâ ti apendere sarango ye ti lo na lege ti Bible nga na aye so lo créé. Ndoye la ayeke kota sarango ye ti lo. Aye kue so lo sara, ndoye la apusu lo ti sara ni. Tongana e manda ye mingi na ndö ti Jéhovah, e yeke ye lo mingi.
Jéhovah ayeke nduru ti pardonné zo
“Mo yeke Nzapa so mo yeke nduru ti pardonné zo.”—NÉHÉMIE 9:17.
Jéhovah ahinga so e yeke mbilimbili-kue ape. Tongaso, lo yeke “nduru ti pardonné” e. Tongana e tene na lo so e hinga afaute ti e nga e sara kue ti zia lege ti aye ti sioni, lo yeke pardonné e na lo yeke punir e pëpe ndali ti asiokpari so e sara ândö.—Psaume 103:12, 13.
Jéhovah aye ti tene e sambela lo
“Jéhovah ayeke nduru na azo kue so ayeke iri lo, . . . lo mä toto so ala toto na lo ti mû maboko na ala.”—PSAUME 145:18, 19.
Jéhovah ahunda na e pëpe ti sara ambeni mbilimbili cérémonie wala ti mû a-image ti voro na lo. Lo yeke mä asambela ti e gï tongana ti so mbeni babâ ti ndoye ayeke mä amolenge ti lo.