Zia bê ti mo kue na Jéhovah

“O Seigneur L’Eternel, Mo yeke Lo so mbi zia bê ti mbi na Mo! Bê ti mbi ayeke na Mo, a komanse na lâ ni so mbi de molenge.”​—PSAUME 71:5.

GOLIATH ayo lani na nduzu amètre ota tongaso. Bê ti e adö pëpe tongana a tene so aturugu kue ti Israël asala mbito ti tiri na lo! Teti ayenga mingi mingi, na ndapelele nga na lakui, yongoro Goliath, mbeni Philistin, ayeke gi yanga ti aturugu ti Israël na hundango na ala ti soro mbeni zo na popo ti ala ti tiri na lo. Na nda ni, a yeke pëpe mbeni turugu ti Israël si ayeda na tiri ni, me mbeni maseka-koli senge. Tongana a yeke ti haka ala use kue, maseka-koli berger David so akpa ye oko pëpe na gbele Goliath, wato ti lo. Peut-être même lo ne alingbi pëpe na nengo ti aye ti bira kue so Goliath ayô na tele ti lo. Ye oko, maseka ni aluti ti koli na gbele Goliath, na lo ga tâ biani fä ti zo so ayeke na mbito pëpe.​—1 Samuel 17:1-51.

² Ye nyen amû maboko na David ti tomba mbito yongoro tongaso? Bâ gi ambeni tënë so David ni asû peut-être na yâ andangba lâ ti fini ti lo: “O Seigneur L’Eternel, Mo yeke Lo so mbi zia bê ti mbi na Mo! Bê ti mbi ayeke na Mo, a komanse na lâ ni so mbi de molenge.” (Psaume 71:5). Biani, na ngoi so lo yeke lani maseka, David azia bê ti lo kue lani na Jéhovah. Tongana lo yeke tingbi na Goliath, lo tene: “Mo yeke ga na mbi na épée na kota likongo na kete likongo; me mbi yeke gue na mo na iri ti L’Eternel Ti Sabaoth, Nzapa ti aturugu ti Israël, so mo bi kamene na lê ti Lo.” (1 Samuel 17:45). Goliath azia bê ti lo lani na kota ngangu ti lo mveni nga na aye ti bira ti lo; me David azia bê ti lo kue lani na Jéhovah. Teti so Gbia ti ndagigi kue ayeke na lo, David abâ pëpe nda ti tënë ti sala mbito na gbele mbeni senge zo, atâa ngangu ti zo ni na agbakuru ti bira ti lo ayeke so wa.

³ Tongana mo yeke diko mbaï ti David, mo ye biani ti zia bê ti mo kue na Jéhovah mingi ahon ti so mo yeke sala? Peut-être azo mingi na popo ti e aye tongaso. Ni la, zia e bâ akapa use so e lingbi ti mû pekoni ti zia bê ti e kue na Jéhovah. Kozoni kue, a lingbi e duti na ngangu na ndo ye kue so alingbi ti sala si e girisa ziango bê ti e na Jéhovah, na e ngbâ lakue ti bata ngangu so. Use ni, a lingbi e manda tâ ye so a hunda ni biani ti zia bê kue na Jéhovah.

Hon ndo ti ye so ayeke kanga lege ka na azo ti zia bê kue na Jéhovah

⁴ Ye nyen ayeke kanga lege na azo ti zia bê kue na Nzapa? Fani mingi, ambeni agi li ti ala gbä na ndo nda ni so sioni asi. A fa na azo mingi so Nzapa si ayeke na gunda ti pasi ti azo. Tongana mbeni ye ti vundu asi na afâ ambeni zo, amokonzi ti lege ti vorongo ayeke tene so Nzapa si “amû” azo ni so ti duti na tele ti lo na yayu. Na ndo ni, mingi ti amokonzi ti lege ti vorongo ayeke fa so Nzapa adiko kozoni aninga awe ye oko oko kue so ayeke gue ti si na sese so, na so andu nga akpale na aye ti sioni oko oko kue. A yeke duti ande ngangu ti zia bê na mara ti Nzapa tongaso, so ayeke na bê pëpe. Satan, so akanga bibe ti azo so ake ti mä na bê na Nzapa, ayeke ndulu ti maï mara ti ‘afango ye ti ayingo sioni’ tongaso.​—1 Timothée 4:1; 2 aCorinthien 4:4.

⁵ Satan aye si azo azia bê ti ala pëpe na Jéhovah. Wato ti Nzapa so aye pëpe si e hinga tâ ye so ayeke na gunda ti pasi ti azo. Nga, tongana e manda ti hinga anda ti tënë so asala si e bâ pasi, Satan aye si e girisa ni. Nda ni la, a yeke nzoni teti e ti kiri ti bâ ngoi na ngoi ambilimbili nda ti tënë ota so asala si pasi ayeke dä na sese. Na salango tongaso, e lingbi ti dë bê ti e so Jéhovah ayeke pëpe na gunda ti apasi so e yeke tingbi na ni na yâ fini ti e.​—aPhilippien 1:9, 10.

⁶ Mbeni oko nda ti tënë so a fa ngbanga ti nyen azo ayeke bâ pasi ayeke so Satan aye ti futi be-biani ti awakua be-ta-zo ti Jéhovah. Lo tara lani kue ti futi be-biani ti Job, me lo sala gbä. Ye oko, lo zia lege ti atara ti lo ni pëpe. Teti so lo yeke mokonzi ti sese so, lo gi ti “te” awakua be-ta-zo ti Jéhovah, e oko oko kue (1 Pierre 5:8). Satan aye ti gue na e si e zia ti sala na Jéhovah. Ni la, fani mingi, lo yeke pusu azo ti sala ngangu na e. Atâa songo ti peko ti pasi tongaso ayeke so wa, e yeke na anda ti tënë biani ti ngbâ ti gbu ngangu. Na salango tongaso, e yeke mû lege ti fa so Satan ayeke gi mbeni wamvene na tongaso ti zia ngia na bê ti Jéhovah (Job 2:4; aProverbe 27:11). Na ngoi so Jéhovah ayeke kpengba e ti luti na gbele asalango ngangu, ziango bê ti e kue na lo ayeke kono gi konongo.​—Psaume 9:10, 11.

⁷ Mbeni use ye so afa nda ti pasi ti azo ayeke ti so a wara na yâ kpengba-ndia so: “Ye so zo alu, fade lo fâ lengo ni nga.” (aGalate 6:7). Ngoi na ngoi, azo ayeke lu ye na lege ti mungo asioni desizion, na ala yeke ko na pekoni ye ti vundu. Ala lingbi ti soro ti kpe na kutukutu ti mbana, me na nda ni ala yeke wara ndao. Azo mingi asoro ti nyon manga, na ye so aga na ala kobela ti bê wala cancer ti fufu. Ala so asoro ti sala ye ti pitan alingbi ti buba songo ti sewa ti ala, ti girisa nengo tele ti ala, ti wara kobela ti koli na wali, nga ti mû ngo so ala ye fade ni pëpe. Azo alingbi ti bi tënë na li ti Nzapa ndali ti mara ti pasi tongaso, me biani ala yeke bâ gi pasi ti peko ti sioni desizion so ala mveni amû.​—aProverbe 19:3.

⁸ Mbeni ota ye so afa nda ti pasi ti azo ayeke ti so a wara na Zo-ti-fa-tene 9:11: “Mbi kiri, mbi bâ na gbe ti lâ, a yeke azo so akpe fade fade pëpe ti bangbi lege so awara futa, na a yeke awalombe pëpe so ahon zo na bira, na a yeke awandara pëpe so awara kobe, na a yeke azo ti mayele pëpe so awara mosoro, na a yeke awakode pëpe so awara be-nzoni; me lâ na pasa [“ngoi na ye so zo aku pëpe”, NW ] asi na ala kue.” Ngoi na ngoi, a yeke azo ni si atï nzoni pëpe na ngoi so kpale ni asi. Atâa angangu ti e mveni wala awokongo ti e ayeke so wa, pasi na kui alingbi ti tï na ndo ti e kue na mbeni ngoi so e ku tele ti e na ni pëpe. Na tapande, na ngoi ti Jésus mbeni tour na Jérusalem atï na afâ azo 18. Jésus afa so Nzapa ayeke fâ lani ngbanga pëpe na ndo ala teti ambeni siokpari so ala sala kozo (Luc 13:4). Biani, a lingbi a bi tënë pëpe na li ti Jéhovah teti mara ti pasi tongaso.

⁹ Ti hinga nzoni ambeni ye so ayeke na gunda ti pasi ti azo ayeke kota ye mingi. Ye oko, mbeni mbage ti tënë ni ayeke nga dä so a yeke tâ ngangu na azo mingi ti gbu nda ni. A yeke ngbanga ti nyen Jéhovah Nzapa azia lege na pasi.

Ngbanga ti nyen Jéhovah azia lege na pasi?

¹⁰ Mbeni tënë so bazengele Paul asû ni na yâ ti mbeti ti lo na aRomain amû lege ti gbu nda ti kota tënë so. Paul asû na mbeti: “Création aku na nzara mingi ti bâ singo ti amolenge ti Nzapa. Teti A sala si création aga ngbâa ti [buba ye], a yeke ye so création mveni aye pëpe, me a yeke ye so Lo ye, Lo so asala si création aga ngbâa, teti création mveni aku si A zi lo na yâ ye ti futi so asala lo na ngbâa, na A zia lo na yâ liberté ti gloire ti amolenge ti Nzapa. Teti e hinga ye kue ti création abima na gua ate ala juska fadeso.”​—aRomain 8:19-22.

¹¹ Ti gbu nda ti atënë ti yâ ti aversê so, a lingbi e gi kozoni kue ti gbu nda ti ambeni kpengba hundango tënë. Na tapande, zo wa asala si création aga ngbâa ti buba ye? Ambeni atene so a yeke Satan; ambeni nga afa Adam. Me a yeke azo use so pëpe. Ngbanga ti nyen? Ngbanga ti so lo so asala si création aga ngbâa ti ye ti buba asala ni ti tene “création mveni aku” mbeni ye. Biani, lo mû beku na abe-ta-zo ti ku si na nda ni ‘a zi ala na yâ ye ti futi so asala ala na ngbâa’. Adam wala Satan alingbi oko pëpe ti mû mara ti beku tongaso. Gi Jéhovah oko si alingbi ti mû ni. Ni la, a yeke polele so a yeke lo si asala création ngbâa ti buba ye.

¹² Me “création” ni so a sala tënë ti lo na yâ versê so ayeke nyen? Ambeni zo atene so “création” so aye ti sala tënë ti aye kue so angoro zo na sese, so andu nga anyama na akeke. Me anyama na akeke ayeke na beku ti wara “liberté ti gloire ti amolenge ti Nzapa”? Oko pëpe (2 Pierre 2:12). Ni la, “création” aye ti sala gi tene ti azo. A yeke création so la si siokpari na kui asala ngangu na ndo ni ngbanga ti kengo yanga so a bâ gigi na Éden; na a yeke oko création so si ayeke ku na kota nzara ni ti wara mbeni beku.​—aRomain 5:12.

¹³ Kengo yanga so asala nyen mbilimbili na ndo azo? Paul afa ye ti pekoni na lege ti tënë so: buba ye.a Mbeni bakari afa so tënë so aye ti fa “mbeni ye so a leke fade ni ti sala kusala me so asala kusala ni pëpe si aga tâ gi mbeni buba ye.” A leke lani azo ti ngbâ teti lakue lakue, ti sala kusala tongana mbeni sewa so ayeke mbilimbili-kue na so abungbi oko ti bâ lege ti mbeni sese ti paradis. Me nde na so, fini ti ala aninga mingi pëpe, asi singo na ye ti vundu, na fani mingi abi vundu na bê. Tongana ti so Job atene ni giriri, “zo so wali adü lo ayeke na lâ mingi pëpe, na vundu ti lo asi singo.” (Job 14:1). A yeke tâ buba ye biani!

¹⁴ Fadeso, e tï na ndo ti kota hundango tënë ni: Ngbanga ti nyen “Juge ti sese kue” azia lege si azo aduti na mbeni fini so asi singo na pasi na abi vundu na bê mingi? (Genèse 18:25). A yeke lani lege ti mbilimbili teti lo ti sala tongaso? Dabe mo gi na ye so akozo babâ na mama ti e asala. Tongana ala ke yanga ti Nzapa, ala mû mbage ti Satan so adë kite ngangu na kota yanga-ti-komande ti Jéhovah. Na yâ asalango ye ti ala, ala yeda na tënë so atene zo ayeke duti nzoni mingi tongana lo zi tele ti lo na gbe ti Jéhovah, lo komande tele ti lo mveni na gbe ti fango lege ti mbeni zo ti yingo so ake yanga. Na fango ngbanga na ndo ala so ake yanga ti lo, Jéhovah amû biani na ala ye so ala hunda ti wara. Lo mû lege na zo ti komande tele ti lo mveni na gbe ti ngangu ti Satan. Na yâ aye so, nzoni desizion nde alingbi ti duti dä pëpe gi ti sala si azo aga ngbâa ti ye ti buba, me na ziango mbeni beku na gbele ala. Mo bâ tongaso pëpe?

¹⁵ Biani, a yeke “ye so création mveni aye pëpe”. A dü e ti ga angbâa ti siokpari na ye ti futi, na e lingbi ti kpe ni pëpe. Me Jéhovah na lege ti be-nzoni ti lo azia lege na Adam na Ève ti ngbâ na fini na ti dü amolenge. Atâa so, e ahale ti ala, e yeke angbâa ti ye ti futi ti siokpari na kui, lege azi na e ti sala ye so Adam na Ève asala giriri pëpe. E lingbi ti mä Jéhovah na ti hinga biani so kota yanga-ti-komande ti lo ayeke tâ na lege ni nga mbilimbili-kue, me komandema so azo asala na zingo tele ti ala na gbe ti Jéhovah aga tâ gi na pasi, vundu na bê, na ye ti buba (Jérémie 10:23; Apocalypse 4:11). Nga, ngangu so Satan asala na ndo azo asala si aye aga tâ gi sioni ahon ti kozo. Mbaï ti azo amû lege ti bâ gango tâ tënë ti aye so.​—Zo-ti-fa-tene 8:9.

¹⁶ Ti bâ ni nzoni, Jéhovah ayeke na anda ti tënë ti sala si azo aga ngbâa ti buba ye. Ye oko, ye so aye ti tene so Jéhovah ayeke lingu ti buba ye na pasi so e oko oko kue e yeke hinga ni laso? Haka ye so na mbeni juge so adiko peko ti mbeni ngbanga so a fâ na lege ni na ndo mbeni zo so ake ndia. Peut-être zo ti kengo ndia ni alingbi ti bâ pasi ngangu na ngoi so lo yeke na gbe ti ngbanga so; ye oko, lo lingbi ti bi tënë na li ti juge ni na tenengo so a yeke ngbanga ti lo si ni yeke bâ pasi? Oko pëpe. Na nga, Jéhovah aduti lâ oko pëpe na gunda ti ye so ayeke sioni. Jacques 1:13 atene: “Sioye alingbi handa Nzapa pëpe, na Lo mveni ahanda zo oko pëpe.” Nga, zia e dabe ti e so Jéhovah afa tënë ti ngbanga so ‘ti tene création aku’ na beku. Na lege ti ndoye ti lo, lo leke aye ti tene ahale ti Adam so ayeke be-ta-zo abâ hunzingo ti buba ye na ala wara ngia na yâ “liberté ti amolenge ti Nzapa.” Teti lakue lakue, fade azo ayeke gi bê ti ala lâ oko pëpe so création ayeke kiri ti tï na yâ mara ti dutingo ti pasi tongana ti so. Lege so Jéhovah aleke na tënë ni nzoni ayeke fa na gigi ande tâ mbilimbili ti kota yanga-ti-komande ti lo teti lakue lakue.​—Esaïe 25:8.

¹⁷ Na ngoi so e kiri e bâ aye so afa ngbanga ti nyen azo ayeke bâ pasi, e bâ mbeni ye ti bi tënë na li ti Jéhovah ti tene so lo yeke na gunda ti aye ti sioni? Wala mbeni nda ti tënë ayeke dä ti zia bê kue pëpe na lo? E bâ ni pëpe, me nde na so, mara ti mandango ye so e wara apusu e ti yeda na atënë ti Moïse so: “Tênë ni, kusala ti Lo alingbi kue, lege ti Lo kue ayeke mbilimbili; Lo yeke Nzapa ti be-biani, Lo yeke na sioni oko pëpe, Lo yeke mbilimbili na nzoni kue.” (Deutéronome 32:4). Na ngoi so e yeke gbu li na ndo aye so, zia e tara ti bâ ngoi na ngoi wala e lingbi ti kiri tënë e mveni na ahundango tënë so. Na lege so, tongana e tingbi na aye ti ngangu, fade e yeke luti na gbele angangu ti Satan ti lu tënë ti kite na yâ li ti e. Me ti use kapa ni so e sala tënë ni na tongo nda ni ayeke tongana nyen? Ti zia bê na Jéhovah ahunda nyen?

Ti zia bê kue na Jéhovah aye ti tene nyen?

¹⁸ Tënë ti Nzapa awa e: “Zia bê ti mo kue na L’Eternel, na zia bê ti mo na hingango ye ti mo mveni pëpe. Mo bi bê ti mo na Lo na lege ti mo kue, na fade Lo sala si lege ti mo aga mbilimbili.” (aProverbe 3:5, 6). Atënë so ayeke anzerengo tënë so adë bê ti zo biani. Mbeni zo nde ayeke biani dä pëpe na yâ ndagigi, so e lingbi ti zia bê ti e kue na lo ahon Babâ ti e ti ndoye so ayeke na yayu. Ye oko, ti diko atënë ti versê so ayeke ngangu pëpe; kpale ni alondo tongana a yeke ti sala ye alingbi na ni.

¹⁹ Azo mingi ahinga tâ nzoni pëpe ye so ziango bê kue na Jéhovah aye ti tene. Ti ambeni zo, mara ti ziango bê tongaso ayeke gi tënë ti bê ti zo, mbeni bibe ti nzerengo tele so a lingbi a sua gi lo oko tongaso na yâ bê ti zo. Ambeni zo aye ti tene ti ala so ziango bê kue na Nzapa aye ti tene so e yeke ku na mbage ti lo ti zi e na gbe ti akpale oko oko kue, ti leke ni nga ti zi ni kue yamba tongana ti so bê ti e aye, na lê ni lê ni! Me abibe so kue ayeke tâ na lege ni pëpe. Ziango bê kue na zo andu ye mingi ahon gi senge bibe, na a yeke pëpe ye so ayeke gi tongana bango li. Ti akangba, ziango bê na mba ahunda ti mû adesizion na pekoni so mo gbu li na mo bi bê dä nzoni.

²⁰ Bâ nga ye so versê ti aProverbe 3:5 atene. Lo fa kangbi so ayeke na popo ti ziango bê kue na Jéhovah na ziango bê na hingango ye ti e mveni, ti fa so e lingbi pëpe ti sala ala use kue legeoko. So ti tene so a mû lege pëpe na e ti sala kusala na angangu ti e ti gbungo nda ti ye? Oko pëpe, teti Jéhovah so amû angangu so na e ayeke ku na mbage ti e ti sala kusala na ni teti lo (aRomain 12:1). Me tongana e yeke mû adesizion, e yeke zia bê ti e na nyen wala e yeke luti na ndo nyen? Tongana gbungo li ti e ague oko pëpe na ti Jéhovah, e yeke yeda na ndara ti lo teti so a hon ti e tâ ngangu mingi? (Esaïe 55:8, 9). Ti zia bê kue na Jéhovah aye ti tene ti zia si bibe ti lo afa lege na bibe ti e.

²¹ Zia e mû mbeni tapande: tara ti bâ mbeni kete molenge so aduti na peko na yâ ti mbeni kutukutu, na ababâ na mama ti lo aduti ti ala na devant. A yeke babâ ti lo si ayeke kpe na kutukutu ni. Tongana ambeni kpale abâ gigi na ngoi so ala yeke na lege, peut-être kpale ni andu nzoni lege ti mû ni, wala mbeni kpale ndali ti lê ti nduzu ni wala ti bubango ti lege ni, mbeni molenge so amä ndo na so azia bê kue na babâ ti lo ayeke sala ye tongana nyen? Lo yeke duti na peko kâ ti fa alege so a lingbi ala mû, na fango na babâ ti lo tongana nyen ti kpe na kutukutu ni? Fade lo yeke ke adesizion so ababâ na mama ti lo ayeke mû ni, wala lo yeke ke yanga ti ala tongana ala tene na lo ti ngbâ na place ti lo? Oko pëpe. Lo yeke zia bê ti lo kue na ababâ na mama ti lo ti leke amara ti tënë tongaso, atâa so ala yeke mbilimbili-kue pëpe. Jéhovah ayeke ti lo Babâ so ayeke mbilimbili-kue. A lingbi e zia bê ti e kue pëpe na lo, mbilimbili tongana e tingbi na akpale ti ngangu?​—Esaïe 30:21.

²² Ye oko, aProverbe 3:6 afa so a lingbi e ‘bi bê ti e na Jéhovah na yâ alege ti e kue’, me pëpe gi tongana e tingbi na akpale. Ni la, a lingbi adesizion so e yeke mû lâ oko oko afa so e zia bê ti e kue na Jéhovah. Tongana akpale abâ gigi, a lingbi e nze pëpe, li ti e akpe kirikiri pëpe, wala e ke pëpe fango lege so alondo na Jéhovah ti leke atënë nzoni mingi. A lingbi e bâ atara tongana alege so azi na e ti mû mbage ti kota yanga-ti-komande ti Jéhovah, ti fa so Satan ayeke wamvene, na ti leke bê ti e ti ngbâ ti mä yanga na ti lë ambeni lengo so anzere na Jéhovah.​—aHébreu 5:7, 8.

²³ E lingbi ti fa so e zia bê ti e kue na Jéhovah atâa akpale so alingbi ti si ande na e. E yeke fa ni na yâ asambela ti e nga na yâ lege so e yeke bâ ndo na mbage ti Tënë ti Jéhovah nga na bungbi ti lo ti wara fango lege. Ye oko, e lingbi ti fa tongana nyen mbilimbili so e zia bê ti e kue na Jéhovah na ngoi so e yeke tingbi na akpale ti sese ti laso? Fade article ti peko ayeke kiri tënë na ni.

[Kete tënë na gbe ni]

Fade mo kiri tënë tongana nyen?

• Tongana nyen David afa lani so lo zia bê ti lo kue na Jéhovah?

• Fa aye ota so asala si azo abâ pasi laso. Ngbanga ti nyen a yeke nzoni ti kiri ti bâ aye so ngoi na ngoi?

• Jéhovah afâ ngbanga wa na ndo azo? Na ngbanga ti nyen a yeke lani tâ na lege ni?

• Ti zia bê kue na Jéhovah andu aye wa?

[Ahundango tënë ti manda na ye]

1. Maseka-koli David ayeda ti kiri tënë na gingo yanga wa?

2, 3. (a) Ngbanga ti nyen David asala mbito oko pëpe ti tingbi na Goliath? (b) Fade e yeke bâ akapa use wa so amû lege na e ti zia bê kue na Jéhovah?

4, 5. Ngbanga ti nyen azo mingi abâ so a yeke tâ ngangu mingi ti zia bê kue na Nzapa?

6. Tongana nyen 1 Pierre 5:8 afa mbeni nda ti tënë oko ti apasi ti azo?

7. Mbeti ti aGalate 6:7 amû maboko na e ti hinga nda ti tënë wa so a sala si azo abâ pasi?

8. Na lege ti Zo-ti-fa-tene 9:11, ngbanga ti nyen azo ayeke bâ pasi?

9. Ye nyen azo mingi agbu nda ni pëpe na ndo apasi?

10, 11. (a) Na lege ti aRomain 8:19-22, ye nyen asi lani na “création mveni”? (b) Tongana nyen e lingbi ti hinga biani zo so a sala si création aga ngbâa ti buba ye?

12. Atënë wa a mû ni kirikiri ti fa nda ti tënë “création”? Na tongana nyen a lingbi ti kiri tënë na hundango tënë so?

13. Ye nyen kengo yanga na Éden aga na ni na ndo azo?

14, 15. (a) Fä wa ti salango ye mbilimbili asigigi polele na yâ ngbanga so Jéhovah afâ na ndo ti azo? (b) Ngbanga ti nyen Paul atene so création aga ngbâa ti buba ye atâa so a yeke “ye so création mveni aye pëpe”?

16. (a) Ngbanga ti nyen e lingbi ti hinga biani so Jéhovah ayeke pëpe na gunda ti pasi so e yeke bâ na sese ti laso? (b) Beku wa Jéhovah amû ni na ndoye na abe-ta-zo ti lo?

17. A lingbi bango aye so afa ngbanga ti nyen pasi ayeke na sese laso asala ngangu na ndo e tongana nyen?

18, 19. Na lege ti atënë wa Bible awa e ti zia bê ti e kue na Jéhovah? Me na ndo tënë so, abibe wa so ayeke na lege ni pëpe ambeni zo ayeke na ni?

20, 21. Ti zia bê kue na Jéhovah aye ti tene nyen? Fa mbeni tapande.

22, 23. (a) Ngbanga ti nyen a lingbi e zia bê ti e kue na Jéhovah tongana e yeke tingbi na akpale? Nga tongana nyen e lingbi ti sala tongaso? (b) Ye nyen e yeke bâ na yâ article ti peko?

[Afoto na lembeti 8]

David azia bê ti lo kue na Jéhovah

[Foto na lembeti 10]

Jésus afa so tongana mbeni tour atï lani na ndo azo na Jérusalem, a yeke pëpe Jéhovah la asala si ye so asi