Ndoye so mbeni mama ayeke na ni afa ndoye ti Nzapa

“Wali alingbi girisa molenge ti lo so anyon me ti lo? si lo sara be-nzoni pëpe na molenge ti yâ ti lo. Oui, ala lingbi girisa, me fade Mbi girisa mo lâ oko pëpe.”​—ESAÏE 49:15.

MBENI fini bébé aduti na nzerengo tere na yâ ti maboko ti mama ti lo na ngoi so lo yeke nyon me. Gi na bango ni, zo alingbi ti tene so mama ni na molenge ni aye tere mingi. Mbeni mama ti molenge so iri ti lo ayeke Pamé atene: “Na ngoi so mbi yô fini bébé ti mbi ti kozoni na yâ ti maboko ti mbi, tere ti mbi anzere mingi ahon ndo ni; me mbi bâ nga so mbi yeke na kota kua ti sara ndali ti lo.”

Azo mingi ahinga kozoni awe so ndoye so mbeni mama ayeke na ni na mbage ti molenge ti lo ayeke sara ngangu mingi na ndo ti maïngo ti molenge ni. Azo ti gingo nda ti ye ayeda so tënë so ayeke tâ tënë biani. Mbeni bungbi ti Bendo ti Gigi (OMS) so ayeke bâ lege ti azo ndali ti kobela ti li atene: “Agingo nda ti ye afa so amolenge so a dö ala azia na tongaso ala yeke na tere ti amama ti ala pëpe ayeke na ngia pëpe nga ala tï na yâ ti kota vundu, na ngoi na ngoi mbeto ayeke hon ndo ti ala.” Oko gingo nda ti ye so asara tënë na ndo ti mbeni gingo nda ti ye nde so afa so amolenge so a ye ala nga a bâ lege ti ala nzoni ngbene ye na ngoi so ala de kete, mingi ti ala ayeke manda ye hio mingi ahon ala so a bâ lege ti ala pëpe.

Alan Schore so ayeke mbeni wafango mbeti na ndo ti seni ti li na mbeni da senda-gi ti Amerika afa nene ti ndoye ti mama na mbage ti molenge, lo tene: “Kozo songo so atingbi molenge na mbeni zo, so ti tene songo ti lo na mama ti lo, ayeke sara ngangu na ndo ti lege so lo yeke lë songo na azo nde nde.”

Ye ti mawa ni ayeke so kota vundu, kobela wala ambeni kpale nde alingbi ti sara si mbeni mama abâ lege ti molenge ti lo pëpe wala même ti “girisa molenge ti lo so anyon me ti lo”. (Esaïe 49:15). Me mara ti ye tongaso ayeke si ka mingi pëpe. Ti tâ tënë ni, ye ni ayeke mo bâ mo tene a yeke na yâ ti sarango ye ti amama ti ye amolenge ti ala. Azo ti gingo nda ti ye abâ so na ngoi ti dungo molenge, mbeni ye (so a iri ni oxytocine) ayeke maï mingi na yâ ti tere ti mbeni mama na ayeke mû maboko ti tene molenge ni asigigi na yâ ti lo. Ye ni so ayeke sara nga na pekoni si ngu ti me ti mama ni aga. Azo abâ so oko ye so, so ayeke maï na yâ ti tere ti akoli na awali, ayeke pusu mbeni mama ti ye molenge ti lo na bê ti lo kue.

Ndoye alondo na zo wa?

Azo so ayeke maï atënë ti fango ye so atene zo aga na lege ti nyama afa so yengo zo na bê kue, tongana ti so a yeke wara ni na popo ti mbeni mama na molenge ti lo, aga gi tongaso na azo angbâ lakue ti ye amba ti ala ndali ti so a yeke ga na aye ti nzoni na azo. Na tapande, mbeni mbeti-sango (Mothering Magazine) atene: “A yeke kozo mbage ti mongoli ti e so e wara na lege ti anyama tongana ngbo si ayeke pusu e ti fa so e yeke na ngia wala na vundu. A yeke mbage ti mongoli so si ayeke mû lege na amama na amolenge ti ala ti ye tere mingi.”

Azo ti gingo nda ti ye afa so mbage ti mongoli ti e so ayeke sara kota ye mingi na yâ ti aye so ayeke sara si e duti na ngia wala na vundu. Ye oko, mo bâ ti mo so a yeke na lege ni ti tene so ndoye so mbeni mama ayeke na ni na mbage ti molenge ti lo aga gi tongaso na lege ti mongoli ti mbeni nyama tongana ngbo?

Gbu li na ndo ti mbeni lege nde so a lingbi ti fa na nda ti tënë so. Bible atene so Nzapa asara azo na image ti lo, so ti tene so azo alingbi ti duti na asarango ye ti lo (Genèse 1:27). Ndoye ayeke kota sarango ye ti Nzapa. Bazengele Jean atene: “Zo so ayeke na ndoye pëpe, lo hinga Nzapa pëpe.” Ndali ti nyen? Ndali ti so “Nzapa ayeke Ndoye.” (1 Jean 4:8). Bâ so versê so atene pëpe so Nzapa ayeke na ndoye. Me a tene so Nzapa ayeke ndoye. Ndoye alondo na Nzapa.

Bible atene na ndo ti ndoye atene: “Ndoye anze fade pëpe, na asara be-nzoni; bê asara ndoye pëpe; ndoye asara baba pëpe; ndoye ayeke na be-kota pëpe, ndoye asara kirikiri pëpe, ndoye agi ye ti lo mveni pëpe, bê ti ndoye aso fade pëpe, ndoye adiko sioye pëpe; ndoye awara ngia na ye ti kirikiri pëpe, me ndoye awara ngia na tene-biani; ndoye agbu ngangu na yâ tënë kue, ndoye amä tënë kue na bê ti lo, ndoye aku ye kue, ndoye aduti kpô na yâ ye kue. Fade ndoye awe lâ oko pëpe.” (1 aCorinthien 13:4-8). Mo bâ ti mo so a yeke na lege ni ti tene so pendere sarango ye so, so ayeke kota mingi ahon atanga ni kue aga gi tongaso?

Ye so andu mo tongana nyen?

Na ngoi so mo yeke diko aye so a tene na ndo ti ndoye na yâ ti paragraphe so ahon, mo yeke na kota nzara ti tene mbeni zo aye mo tongaso? A yeke na lege ni ti tene zo asara nzara ti tene a ye lo tongaso. Ndali ti nyen? Ndali ti so “e yeke ahale ti Nzapa”. (Kusala 17:29). A sara e ti tene a fa mara ti ndoye tongaso na mbage ti e nga ti tene e kue e fa ni. Nga, zia e hinga na bê ti e kue so Nzapa aye e mingi (Jean 3:16; 1 Pierre 5:6, 7). Versê so a zia na tongo nda ti article so afa so ndoye so Nzapa ayeke na ni na mbage ti e ayeke même kota mingi ahon ndoye so mbeni mama ayeke na ni na mbage ti molenge ti lo nga ayeke ninga mingi ahon ndoye ti mama na mbage ti molenge ti lo.

Peut-être mo yeke hunda tere ti mo, mo tene: ‘Tongana Nzapa ayeke Nzapa ti ndara, ti ngangu nga na ti ndoye, ngbanga ti nyen lo hunzi pasi pëpe? Ngbanga ti nyen lo zia lege si amolenge ayeke kui nga sarango aye ti ngangu na zo angbâ lakue ti gue? Ngbanga ti nyen lo zia lege na azo ti buba sese na lege so ala yeke bâ lege ni nzoni pëpe nga ala yeke gi ye na lege ti kion?’ So ayeke apendere hundango tënë so a lingbi a kiri tënë nzoni na ni.

Ambeni zo atene so zo alingbi pëpe ti hinga tâ tënë na ndo ti Nzapa. Atâa ye so azo so atene, zo alingbi biani ti wara anzoni kiringo tënë na atënë so. Azo kutu mingi na yâ ti gbâ ti akodoro awara anzoni kiringo tënë na atënë so na pekoni so aTémoin ti Jéhovah amanda Bible na ala. Azo so asigigi na Tour ti Ba Ndo atisa mo ti sara nga tongaso. Na ngoi so mo yeke hinga ye mingi na ndo ti Mbeti ti Nzapa nga na aye so lo créé, mo yeke bâ so Nzapa ayeke nduru na mo nga zo alingbi ti hinga lo. Kite ayeke dä pëpe so mo yeke bâ biani so Nzapa ayeke “yongoro pëpe na e oko oko kue”.​—Kusala 17:27.

[Kete tënë na lembeti 8]

Ndoye ti Nzapa na mbage ti e ayeke ninga mingi ahon ndoye ti mbeni mama na mbage ti molenge ti lo