Chapitre Bale Oko

“Mbeni Ngoi ti Nzobe”

Esaïe 49:1-26

1, 2. (a) Deba nzoni wa Isaïe awara? (b) Atene ti prophétie so a sû na yâ kozo mbage ti Esaïe chapitre 49 andu azo wa?

ABE-TA-ZO kue awara teti ngoi mingi nzobe na batango ndo ti Nzapa. Me Jéhovah asala nzobe na azo kue pepe. A yeke nzoni mbeni zo asala ye alingbi na ye so a hunda ti wara mara ti deba nzoni so ayeke kota mingi. Isaïe ayeke giriri mbeni zo so alingbi na ni. Lo wara nzobe ti Nzapa na Jéhovah asala kusala na lo tongana mbeni gbakuru ti fa ye so bê ti Lo aye na ambeni zo nde. Mbeni tapande ti ye so ayeke na yâ kozo mbage ti chapitre 49 ti prophétie ti Isaïe.

² Na lege ti prophétie, a sala atene so na hale ti Abraham. Na yâ kozo gango tâ tene ni, hale so ayeke mara ti Israël, so alondo na Abraham. Me, a yeke polele so kota mbage ti tene ni andu Hale ti Abraham, Messie ti zendo, so a ku lo a ninga awe. Atene so a sû na gbe ti yingo andu nga aita ti Messie na lege ti yingo, ala so aga mbage ti hale ti Abraham na lege ti yingo, nga ti “Israël ti Nzapa.” (aGalate 3:7, 16, 29; 6:16) Mbilimbili, mbage ti prophétie ti Isaïe so afa songo so ayeke nde mingi, so ayeke na popo ti Jéhovah na Molenge ti Lo so Lo ndoye mingi, Jésus Christ.​—Esaïe 49:26.

Jéhovah Ahiri Lo na Kusala na Abata Lo

3, 4. (a) Maboko wa a mu na Messie? (b) Messie ayeke sala tene na azo wa?

³ Messie awara nzobe ti Nzapa, wala yengo dä ti lo. Jéhovah amu na lo ngangu na aye so a hunda ti sala kusala ti lo nzoni. Tongaso, na lege ni, lo so ayeke ga ande Messie atene: “I mä Mbi, O i azoa; i mä Mbi, i azo so i yeke yongoro kâ. L’Eternel [“Jéhovah,” NW] ahiri Mbi na lâ ti dungo ti Mbi; Lo di iri ti Mbi tongana Mbi de na yâ ti mama ti Mbi.”​—Esaïe 49:1.

⁴ Ge, Messie ni asala atene ti lo na azo so ayeke “yongoro kâ.” Atä so a mu zendo ti Messie ni na aJuif, fade a yeke mu kusala ti lo ti ga na deba nzoni na amara kue. (Matthieu 25:31-33) A lingbi “azoa” na “azo,” atä so ala yeke na mbeni mbele na Jéhovah pepe, abi bê na ndo Messie ti Israël teti a to lo ti ga na salut na azo kue.

5. Tongana nyen a di iri ti Messie ni même kozoni si a dü lo tongana zo?

⁵ Prophétie ni atene so fade Jéhovah ayeke di iri ti Messie kozoni si a dü lo tongana zo. (Matthieu 1:21; Luc 1:31) Ngu mingi kozoni na dungo lo, a di iri ti Jésus “Nzoni Wamungo Wango, Nzapa Ti Ngangu, Babâ Ti Lakue Lakue, Mokonzi Ti Siriri.” (Esaïe 9:5 [9:6, NW]) Emmanuel, peut-être iri ti mbeni molenge-koli ti Isaïe, aga nga mbeni iri ti prophétie teti Messie. (Esaïe 7:14; Matthieu 1:21-23) Même a fa kozoni iri Jésus, so a yeke hinga ande na Messie ni, kozoni na dungo ti lo. (Luc 1:30, 31) Iri so aga na lege ti tene ti Hébreu so aye ti tene “Jéhovah Ayeke Salut.” A yeke polele, Jésus azia lo mveni Christ pepe.

6. Na lege wa yanga ti Messie ayeke tongana mbeni épée so aza, na tongana nyen a honde lo?

⁶ Atene ti Messie na lege ti prophétie angbâ ti gue: “Lo sala si yanga ti Mbi aga tongana épée so aza; Lo honde Mbi na gbede ti tïtî Lo; Lo sala si Mbi ga tongana kondoro ti nzoni; Lo honde Mbi na yâ bozo ti kondoro ti Lo.” (Esaïe 49:2) Tongana ngoi aga teti Messie ti Jéhovah ti to nda ti kusala ti lo na ndo sese na ngu 29 N.E., atene na akusala ti Jésus aduti biani tongana aye ti bira so yanga ni aza, na so a leke ni nzoni, so alingbi ti lï bê ti azo so ayeke mä lo. (Luc 4:31, 32) Atene na akusala ti lo asala si ngonzo ti kota wato ti Jéhovah, Satan nga na ti azo ti lo, alondo. A to nda ni na lâ ti dungo Jésus, Satan atara ti lungula fini ti Lo, me Jésus ayeke tongana mbeni kondoro so a honde na yâ bozo ti kondoro ti Jéhovah mveni.a Jésus alingbi na bê kue ti ku ti wara batango ndo ti Babâ ti lo. (Psaume 91:1; Luc 1:35) Na ngoi so a diko, Jésus amu fini ti lo teti azo kue. Me ngoi ayeke ga ande so fade lo yeke sigigi tongana mbeni ngangu turugu ti yayu so ayü aye ti bira na mbeni lege nde, na mbeni zango épée so asigigi na yanga ti lo. Ti so, zango épée ni aduti fä ti ngangu ti Jésus ti fâ angbanga na ti sala ye alingbi na ni na tele ti awato ti Jéhovah.​—Apocalypse 1:16.

Akusala ti Awakua ti Nzapa Ayeke Ye Senge Pepe

7. Atene ti Jéhovah na Esaïe 49:3 andu zo wa, na ngbanga ti nyen?

⁷ Fadeso Jéhovah afa atene ti prophétie so: “Mo yeke Boi ti Mbi, Israël, Lo so fade Mbi wara gloire na lege ti Lo.” (Esaïe 49:3) Jéhovah asala tene ti mara ti Israël tongana wakua ti lo. (Esaïe 41:8) Me Jésus Christ ayeke kota Wakua ti Nzapa. (Kusala 3:13) Mbeni créature ti Nzapa so alingbi ti fa na gigi “gloire” ti Jéhovah ti lingbi na Jésus ayeke dä pepe. Tongaso, atä a yeke sala tene mbilimbili na Israël, atene so andu biani Jésus.​—Jean 14:9; aColossien 1:15.

8. Tongana nyen azo ti Messie mveni asala ye na mbage ti lo, me Messie abi lê na zo wa ti fâ ngbanga na ndo nzoni ti kusala ti lo?

⁸ Ye oko, a yeke tâ tene pepe so mingi ti azo ti Jésus ayekia lo pepe na ake lo? Tâ tene. Azo mingi ti mara ti Israël ayeda na Jésus pepe tongana Wakua so Nzapa asa yingo na ndo lo. (Jean 1:11) Aye kue so Jésus asala na ndo sese alingbi ti duti na lê ti amba ti lo tongana ye ti ngele mingi pepe, même senge ye. Messie asala tene na pekoni na ndo ye so a ba atene a yeke bubango kua ti lo: “Mbi sala kusala senge, Mbi futi ngangu ti Mbi teti ye pepe na teti ye senge.” (Esaïe 49:4a) Messie asala tene so pepe ngbanga ti so bê ti lo anze. Ba tene ti lo so aga na peko: “Me fango ngbanga ti Mbi ti mbilimbili ayeke na L’Eternel na futa ti Mbi ayeke na Nzapa ti Mbi.” (Esaïe 49:4b) A yeke Nzapa, pepe azo, si ayeke fâ ngbanga na ndo nzoni ti kusala ti Messie.

9, 10. (a) Kusala ti Messie so alondo na Jéhovah ayeke so wa, na aye wa lo wara na pekoni? (b) Tongana nyen aChrétien laso alingbi ti wara ngangu na lege ti aye so asi na Messie?

⁹ Jésus abi bê mbilimbili na ndo yengo dä wala nzobe ti Nzapa. Na yâ prophétie ni, Messie atene: “Fadeso L’Eternel atene, Lo so aleke Mbi ti ga Boi ti Lo na lâ ti dungo ti Mbi ti kiri Jacob na Lo, na ti bungbi Israël na Lo (teti, na lê ti L’Eternel, Mbi yeke na gloire, na Nzapa ti Mbi aga ngangu ti Mbi).” (Esaïe 49:5) Messie aga ti kiri na bê ti amolenge ti Israël na mbage ti Babâ ti ala ti yayu. Atä so mingi ti ala ayeda pepe, ambeni ayeda. Ye oko, tâ futa ti lo ayeke na Jéhovah Nzapa. A yeke diko nzoni ti kusala ti lo na lege ti asalango ye ti Jéhovah mveni, me pepe na lege ti atene ti azo.

¹⁰ Laso, adisciple ti Jésus alingbi ti ba ngoi na ngoi so ala yeke sala kusala senge senge. Na ambeni ndo, aye so aga na peko ti fango tene ti ala alingbi ti kpa ye so ayeke senge tongana a haka ni na wungo ti kusala na ngangu so ala sala. Me ala gbu ngangu teti tapande ti Jésus akpengba ala. Ala wara nga ngangu na lege ti atene ti bazengele Paul, so asû na mbeti: “Teti tene so, aita ti mbi so mbi ndoye i mingi, i duti kpö, i zia ye ayengi i pepe, i wu na kusala ti Seigneur lakue, teti i hinga kusala ti i ayeke senge pepe na yâ Seigneur.”​—1 aCorinthien 15:58.

“Lumière ti A-Gentil”

11, 12. Tongana nyen Messie aduti tongana “lumière ti aGentil”?

¹¹ Na yâ prophétie ti Isaïe, Jéhovah awa Messie na dango bê ti lo so dutingo Wakua ti Nzapa ayeke pepe “kete ye mingi.” Kusala ti Jésus ayeke ti “yä amara ti Jacob, na ti kiri tanga ti azo ti Israël.” Jéhovah akiri afa nda ni: “Mbi sala si Mo ga lumière ti aGentil nga si salut ti Mbi alingbi si na nda ti sese kue.” (Esaïe 49:6) Tongana nyen Jésus amu lumière na azo a “si na nda ti sese kue” tongana kusala ti lo na ndo sese angbâ gi na Israël?

¹² Tondo ti Bible afa so “lumière ti aGentil” ti Nzapa amingo pepe tongana Jésus azia sese. Ndulu na angu 15 na peko ti kuâ ti Jésus, amissionnaire Paul na Barnabas afa peko ti prophétie ti Esaïe 49:6 na ala tingbi ni na adisciple ti Jésus, aita ti lo na lege ti yingo. Ala fa nda ni: “Seigneur akomande e tongaso, Lo tene, Mbi sala si Mo ga lumière ti aGentil si Mo lingbi mu salut juska na nda ti sese kue.” (Kusala 13:47) Kozoni na kuâ ti lo mveni, Paul aba nzo tene ti salut asi gi na aJuif pepe me “na azo kue na gbe ti yayu.” (aColossien 1:6, 23) Laso, tanga ti aita ti Christ so a sa yingo na ndo ti ala angbâ ti sala kusala so. Teti “azo mingi so asi singo,” so ayeke kutu mingi, ayeke mu maboko na ala, ala sala kusala tongana “lumière ti aGentil” na yâ kodoro ahon 230 na ndo sese kue.​—Apocalypse 7:9.

13, 14. (a) Azo asala ye tongana nyen na gbele kusala ti fango tene ti Messie na adisciple ti lo? (b) Agbiango ye wa asi?

¹³ Jéhovah afa biani so lo yeke ngangu so ayeke na peko ti Wakua ti lo Messie, aita ti Messie so a sa yingo na ndo ti ala, nga na ala kue ti azo mingi so asi singo so, legeoko na ala, angbâ ti sala kusala ti fango nzo tene. Biani, legeoko tongana Jésus, adisciple ti lo aluti na gbele kengo ndo na salango ngangu. (Jean 15:20) Me na ngoi so lo diko, Jéhovah agbian lakue aye ti sö awakua be-ta-zo ti lo na ti futa ala. Na ndo Messie, so ayeke “Lo so azo ake Lo,” na “Lo so mara ni ake Lo,” Jéhovah amu zendo: “Fade agbia aba Lo, na ala londo; fade amokonzi aba Lo nga, na ala sambela; teti L’Eternel ayeke Be-Ta-Zo, Lo Ti Nzoni-kue ti Israël, Lo so ahiri Mo.”​—Esaïe 49:7.

¹⁴ Na pekoni bazengele Paul asû mbeti na aChrétien ti Philippes na ndo gbiango ti aye so a sala tene ni kozoni. Lo fa Jésus tongana mbeni zo so a zia kamela na lê ti lo na ndo keke ti pasi me so Nzapa ayä lo na pekoni. Jéhovah asala si Wakua ti lo ‘awara yango iri mingi na amu na Lo iri so ahon mbeni iri kue; si na iri ti Jésus a lingbi likuni oko oko kue akuku.’ (aPhilippien 2:8-11) A tene na adisciple be-ta-zo ti Christ so fade a yeke sala ngangu na ala nga. Me legeoko tongana Messie, a dë bê ti ala so ala wara nzobe ti Jéhovah.​—Matthieu 5:10-12; 24:9-13; Marc 10:29, 30.

“Mbilimbili Ngoi so Alingbi”

15. Mbilimbili “ngoi” wa a sala tene ni na yâ prophétie ti Isaïe, na ye so aye ti tene nyen?

¹⁵ Prophétie ti Isaïe angbâ ti gue na mbeni tene so nda ni ayeke kota mingi. Jéhovah atene na Messie: “Na mbeni ngoi ti nzobe mbi kiri tene na mo, nga na mbeni ngoi ti salut mbi mu maboko na mo; na mbi ngbâ ti bata mo si mbi lingbi mu mo tongana mbeni mbele teti azo.” (Isaïe 49:8a, NW) A sala tene nga ti oko mara ti prophétie so na Psaume 69:13-18 (NW). Wasungo psaume asala tene ti “mbeni ngoi ti nzobe,” na salango kusala na tene “mbeni ngoi so alingbi.” Atene so aye ti tene so a kono yâ ti nzobe na batango ndo ti Jéhovah na mbeni lege so ayeke nde, me gi na mbeni mbilimbili ngoi so ayeke ninga lakue pepe.

16. Ngoi ti Jéhovah ti nzobe teti Israël ti giriri ayeke nyen?

¹⁶ Ngoi ti nzobe so ayeke la ni lawa? Kozoni giriri, atene so ayeke mbage ti mbeni prophétie ti kiri ti leke ye na afa kozoni londongo ti aJuif na ngba ti kiri na kodoro ti ala. Mara ti Israël awara mbeni ngoi ti nzobe tongana ala lingbi la ni ti “kiri ti leke kodoro ni si aga nzoni” na ti kiri ti wara “aye ti héritier so aga yangbato.” (Isaïe 49:8b, NW) Ala yeke mbeni pepe “awakanga” na Babylone. Na ngoi ti tambela ti ala ti kiri na kodoro, Jéhovah abata si “nzala ti kobe” wala “nzala ti ngu” asala ala pepe, atä “wâ wala sungo ti lâ azö ala pepe.” Azo ti Israël so akangbi na ndo nde nde abungbi akiri na kodoro ti ala, ala londo “yongoro . . . , azo ti banga, ti do.” (Esaïe 49:9-12) Atä so ye so aga tâ tene kozoni na mbeni lege so adö bê, Bible afa so ambeni gango tâ tene nde ti prophétie ni ayeke nga dä.

17, 18. Ngoi ti nzobe wa Jéhovah adiko na kozo siècle?

¹⁷ Kozoni kue, na ngoi ti dungo Jésus, a-ange ato mbela ti siriri na ti nzobe, wala yengo dä, ti Nzapa na mbage ti azo. (Luc 2:13, 14) A mu nzobe so, pepe na azo kue, me gi na ala so afa mabe na gigi na Jésus. Na pekoni, Jésus adiko na gbele azo kue prophétie ti Esaïe 61:1, 2 na lo tingbi ni na lo mveni tongana wafango “ngu ti Jéhovah so alingbi.” (Luc 4:17-21, NW) Bazengele Paul atene so Christ awara mbilimbili batango ndo ti Jéhovah na ngoi so lo yeke na yâ mitele. (aHébreu 5:7-9) Tongaso, ngoi ti nzobe so andu yengo dä ti Nzapa na ndo Jésus na ngoi ti fini ti lo tongana zo.

¹⁸ Ye oko, mbeni gango tâ tene nde ti prophétie ni ayeke nga dä. Na pekoni so lo fa atene ti Isaïe na ndo ngoi ti nzobe, Paul angbâ ti tene: “Ba! Fadeso a yeke mbilimbili ngoi so alingbi. Ba! Fadeso a yeke lâ ti salut.” (2 aCorinthien 6:2, NW) Paul asû atene so angu 22 na peko ti kuâ ti Jésus. Biani, na dungo kongrégation ti aChrétien na Pentecôte ti ngu 33 N.E., Jéhovah akono yâ ti ngu ti nzobe ti lo si a ndu nga adisciple ti Christ so a sa yingo na ndo ti ala.

19. Tongana nyen aChrétien laso alingbi ti wara nzoni na lege ti ngoi ti nzobe ti Jéhovah?

¹⁹ Ti adisciple ti Jésus laso a yeke tongana nyen, ala so a sa yingo na ndo ti ala pepe tongana ahéritier ti Royaume ti yayu ti Nzapa? Azo so ayeke na beku ti ngbâ na sese alingbi ti wara nzoni na lege ti ngoi so alingbi? Biani. Apocalypse, buku ti Bible, afa so e yeke na mbeni ngoi ti nzobe ti Jéhovah na mbage ti azo mingi so asi singo so fade ayeke londo “na yâ kota ye ti vundu” ti wara fini na ndo mbeni sese ti paradis. (Apocalypse 7:13-17) Tongaso, aChrétien kue alingbi ti wara nzoni na lege ti ngoi so ayeke na nda ni, so na yâ ni Jéhovah amu nzobe ti lo na azo so ayeke mbilimbili-kue pepe.

20. Na lege wa aChrétien alingbi ti kpe ti glisa nda ti nzobe ti Jéhovah so ala lingbi na ni pepe?

²⁰ Bazengele Paul amu mbeni tene ti gbotongo mê kozoni ti fa tene ti ngoi ti Jéhovah so alingbi. Lo hunda mingi na aChrétien ‘ti yeda pepe na nzobe ti Nzapa so ala lingbi na ni pepe, si na pekoni ala glisa nda ni.’ (2 aCorinthien 6:1, NW) A lingbi na ni, aChrétien agbu ngoi oko oko so ala yeke na ni ti nzere na Nzapa na ti sala ye so bê ti lo aye. (aEphésien 5:15, 16) A yeke nzoni ala mu peko ti wango ti Paul: “I bata, aita, si bê ti sioni so mabe atia ni amaï pepe na yâ mbeni zo na popo ti i, na hongo yongoro na Nzapa so ayeke na fini; me i ngbâ ti wa tele na popo ti i lâ na lâ, na ngoi kue so alingbi ti hiri ni ‘Laso,’ si ngangu ti handa ti siokpari akpengba pepe bê ti mbeni zo na popo ti i.”​—aHébreu 3:12, 13, NW.

21. Tene ti ngia wa ahunzi kozo mbage ti Esaïe chapitre 49?

²¹ Na ngoi so atene na lege ti prophétie na popo ti Jéhovah na Messie ti lo aga ndulu ti hunzi, Isaïe atene na ngia: “I sala bia, O ayayu; mo sala ngia, O sese; i sala bia na kongo, O ahoto; teti L’Eternel alungula vundu ti azo ti Lo, na Lo sala be-nzoni na azo so ye ti vundu asala ala.” (Esaïe 49:13) So tâ apendere tene ti lungula vundu teti azo ti Israël ti giriri nga teti kota Wakua ti Jéhovah, Jésus Christ, legeoko nga teti awakua ti Jéhovah so a sa yingo na ndo ti ala na afon ala “ambeni ngasangbaga” laso!​—Jean 10:16.

Jéhovah Ayeke Glisa Azo ti Lo Pepe

22. Tongana nyen Jéhovah agboto lê na ndo tene so fade lo yeke glisa lâ oko pepe azo ti lo?

²² Fadeso Isaïe angbâ ti fa peko ti anengo tene ti Jéhovah. Lo fa kozoni so fade azo ti Israël so ayeke angba ayeke duti ndulu ti nze na ti zia beku. Isaïe atene: “Sion atene, L’Eternel azia mbi awe, na Seigneur aglisa mbi awe.” (Esaïe 49:14) A yeke tâ tene? Jéhovah azia azo ti lo na lo glisa ala awe? Na salango kusala tongana watokua ti Jéhovah, Isaïe angbâ ti tene: “Wali alingbi glisa molenge ti lo so anyon me ti lo? si lo sala be-nzoni pepe na molenge ti yâ ti lo. Oui, ala lingbi glisa, me fade Mbi glisa mo lâ oko pepe.” (Esaïe 49:15) So mbeni kiringo tene ti Jéhovah na ndoye! Ndoye ti Nzapa teti azo ti lo ayeke kota ahon ndoye ti mbeni mama teti molenge ti lo. Lo yeke bi bê lakue na ndo abe-ta-zo ti lo. Lo dabe na ala mo ba mo tene a sû biani iri ti ala na yâ maboko ti lo: “Ba, Mbi kpo iri ti Sion na ndimbo na yambati ti Mbi; gbagba ti bira ti mo ayeke na gbele Mbi lakue.”​—Esaïe 49:16.

23. Tongana nyen Paul awa aChrétien ti zia bê na Jéhovah so lo yeke glisa ala ande pepe?

²³ Na yâ mbeti ti lo na aGalate, bazengele Paul awa aChrétien: “A lingbi bê ti e anze pepe na salango kusala ti nzoni; teti na ngoi so alingbi, fade e fâ lengo ni ti nzoni, tongana bê ti e anze pepe.” (aGalate 6:9) Na aHébreu lo sû atene so akpengba zo: “Nzapa ayeke kirikiri pepe si Lo lingbi glisa kusala ti i, ndoye so i fa giriri teti iri ti Lo.” (aHébreu 6:10) A lingbi e ba lâ oko pepe so Jéhovah aglisa awe azo ti lo. Legeoko tongana Sion ti giriri, aChrétien ayeke na nzoni nda ti ye ti sala ngia na ti ku Jéhovah na be-nze-pepe. Lo yeke sala ye lakue alingbi na ambele nga na azendo ti lo.

24. Na lege wa fade a kiri aleke Sion, na ahundango tene wa lo yeke hunda ande?

²⁴ Na lege ti Isaïe, Jéhovah akiri amu atene ti lungula vundu. Azo so “akinda [Sion],” atä a yeke azo ti Babylone wala aJuif apostat, ayeke lingu ti kpale mbeni pepe. “Amolenge” ti Sion, aJuif so ayeke angba, so abata be-biani na Jéhovah, “aga fade fade.” Fade ala “kue abungbi tele ti ala.” Teti ala kiri hio awe na Jérusalem, fade aJuif so akiri na kodoro ti ala ayeke duti aye ti pendere ti kota gbata ti ala, legeoko tongana “fini-wali” ayü “ye ti pendere.” (Esaïe 49:17, 18) Ando ti Sion aga “yangbato.” Tara ti ba dongo bê ti lo tongana lo wara fade fade awakodoro mingi si ando ti duti ti lo asi singo na azo na a lingbi na ala mbeni pepe. (Diko Esaïe 49:19, 20.) Tâ na lege ni, lo hunda na ndo wa si amolenge so kue alondo dä: “Fade mo tene na bê ti mo, Zo nyen adü amolenge so na mbi? teti amolenge ti mbi akui awe, mbi yeke ngombo, a gue na mbi na ngba, na mbi yeke zo ti fono fonongo. Zo nyen abata ala so? Ba, a zia mbi senge giriri; me ala so, ala londo na ndo wa?” (Esaïe 49:21) So mbeni pendere dutingo teti Sion so kozoni adü amolenge pepe!

25. Na ngoi ti laso, tongana nyen a kiri aleke Israël ti yingo?

²⁵ Atene so aga tâ tene na ngoi ti laso. Na yâ akpengba ngu ti kozo bira so amu sese kue, Israël ti yingo awara mbeni ngoi ti dutingo yangbato na ti ngba. Me a kiri aleke lo na lo ga ti duti na yâ mbeni paradis ti yingo. (Esaïe 35:1-10) Legeoko tongana gbata so aga la ni yangbato, so Isaïe asala tene ni, lo yeke na ngia mingi, tongana a lingbi ti tene tongaso, ti ba so lo wara gbâ ti awavorongo Jéhovah so ayeke na kota ngia na ayeke sala kusala.

‘Bendere Teti Azo’

26. Jéhovah afa lege tongana nyen na azo ti lo so a zi ala?

²⁶ Na lege ti prophétie, fadeso Jéhovah ague na Isaïe na ngoi so a yeke zi ande azo ti Lo na gbe ti Babylone. Fade ala wara mbeni fango lege ti Nzapa? Jéhovah akiri tene: “Fade Mbi yä tïtî Mbi na amara, Mbi yä bendere ti Mbi teti azo ni; fade ala ga na amolenge ti mo ti koli na maboko ti ala, na fade ala yö amolenge ti mo ti wali na ndogo ti ala.” (Esaïe 49:22) Na yâ kozo gango tâ tene ni, Jérusalem, so ayeke giriri ndo ti ngorogbia na ti temple ti Jéhovah, aga “bendere” ti Jéhovah. Même akota zo na ala ti ngangu ti ambeni mara nde, tongana “agbia” na “agbia-wali,” ayeke mu maboko na azo ti Israël na yâ tambela ti ala ti kiri kâ. (Esaïe 49:23a) Agbia ti Perse tongana Cyrus na Artaxerxès Yongoro Maboko na azo ti da ti ala aduti na popo ti azo so amu maboko ni. (Esdras 5:13; 7:11-26) Nga atene ti Isaïe ayeke na mbeni gango tâ tene nde.

27. (a) Na yâ kota gango tâ tene ni, fade azo akpe na mbage ti “bendere” wa? (b) Fade ye wa ayeke ga na peko ti so a gbu amara kue ti zuku na gbe ti komandema ti Messie?

²⁷ Esaïe 11:10 asala tene ti ‘bendere teti azo.’ Bazengele Paul atingbi atene so na Christ Jésus. (aRomain 15:8-12) Tongaso, na yâ kota gango tâ tene ni, Jésus na afon lo gbia so a sa yingo na ndo ti ala ayeke “bendere” ti Jéhovah so azo akpe na mbage ni. (Apocalypse 14:1) Na ngoi so a diko, azo kue ti sese, atä abungbi ti azo ti komande ti laso, ayeke zuku ande na gbe ti komandema ti Messie. (Psaume 2:10, 11; Daniel 2:44) Ye ti pekoni ayeke nyen? Jéhovah atene: “Fade mo hinga Mbi yeke L’Eternel [“Jéhovah,” NW]; na azo so aku Mbi, fade kamela agbu ala pepe.”​—Esaïe 49:23b.

“Salut ti E Aga Ndulu na E Awe”

28. (a) Na lege ti atene wa Jéhovah akiri adë bê ti azo ti lo so a yeke zi ala ande? (b) Mungo yanga wa ti Jéhovah angbâ lakue teti azo ti lo?

²⁸ Ambeni ti azo so ayeke angba na Babylone alingbi ti hunda, ‘Lege ayeke dä biani ti tene a zi ande Israël?’ Jéhovah abi bê na tene so na hundango: “Ye so walombe agbu na bira, zo alingbi lungula na tïtî lo? Wala zo alingbi zi angba ti zo ti mbilimbili?” (Esaïe 49:24) Kiringo tene ni ayeke: biani. Jéhovah adë bê ti ala: “Fade a lungula angba na tïtî walombe, na a zi azo so zo so asala ngangu na zo agbu ala.” (Esaïe 49:25a) So mbeni tene ti dengo bê! Na ndo ni, nzobe ti Jéhovah na mbage ti azo ti lo aga legeoko na mbeni mungo yanga ti bata ala. Na lege ti atene so aluti mbilimbili, lo tene: “Fade Mbi tiri na zo so atiri na mo, na fade Mbi sö amolenge ti mo.” (Esaïe 49:25b) Mungo yanga so angbâ lakue. Tongana ti so a sû na Zacharie 2:8, Jéhovah atene na azo ti lo: “Zo so andu mo, lo ndu lê ti L’Eternel mveni.” Tâ tene, fadeso e yeke na ngoi ti nzobe so na yâ ni azo na ndo sese kue ayeke na lege ti ga na Sion ti yingo. Ye oko, ngoi ti nzobe so ayeke hunzi ande.

29. Ye ti vundu wa ayeke ku azo so ake ti mä Jéhovah?

²⁹ Fade ye wa ayeke si na azo so na kpengba-li ake lakue ti mä Jéhovah na so même asala ngangu na awavorongo lo? Lo tene: “Azo so asala ngangu na mo, fade Mbi sala si ala te mi ti ala mveni, na ala nyon mênë ti ala mveni juska a sala ala tongana fini vin asala zo.” (Esaïe 49:26a) So ye ti vundu so ayeke ku ala! Gigi ti kekereke ti awato ti kpengba-li tongaso ayo pepe. Fade a futi ala. Tongaso, na songo azo ti lo nga na futingo awato ti ala, fade a yeke ba Jéhovah tongana mbeni Sauveur. “Fade mi kue ahinga Mbi, L’Eternel, Mbi yeke Sauveur ti mo, na Zo Ti Ton mo, Lo Ti Ngangu ti Jacob.”​—Esaïe 49:26b.

30. Akusala ti songo zo wa Jéhovah asala teti azo ti lo, na ye wa angbâ ti tene lo sala?

³⁰ Atene so aga tâ tene kozoni tongana Jéhovah asala kusala na Cyrus ti zi azo ti Lo na gbe ti ngba ti Babylone. Ala ga nga tâ tene na ngu 1919 tongana Jéhovah asala kusala na Molenge ti lo so aga gbia, Jésus Christ, ti zi azo ti Lo na gbe ti ngba ti yingo. Tongaso, Bible asala tene ti Jéhovah nga na Jésus tongana asauveur. (Tite 2:11-13; 3:4-6) Jéhovah ayeke Sauveur ti e, na Jésus, Messie ni, ayeke “Mokonzi” ni. (Kusala 5:31) Biani, akusala ti songo zo ti Nzapa na lege ti Jésus Christ ayeke pendere. Na lege ti nzo tene, Jéhovah azi azo ti bê ti mbilimbili na gbe ti ngba ti lege ti vorongo ti wataka. Na lege ti sadaka ti kota ngele, lo zi ala na gbe ti ngba ti siokpari na kui. Na ngu 1919, lo zi aita ti Jésus na gbe ti ngba ti yingo. Nga na yâ bira ti Har–Maguédôn so ayeke ga na loro, fade lo zi azo mingi so asi singo so ayeke be-ta-zo na gbe ti futingo so ayeke tï ande na ndo awasiokpari.

31. A lingbi aChrétien asala nyen teti ala wara nzobe ti Nzapa?

³¹ Tongaso, so kota matabisi ti wara nzobe ti Nzapa! Zia e kue e sala kusala na ndara na ngoi so alingbi. Na zia e sala ye alingbi na ngangu ti ngoi ti e, na batango atene ti Paul na aRomain: “I hinga ngoi ni, teti fadeso l’heure alingbi awe ti zingo na lango; teti salut ti e aga ndulu na e awe, a hon ti lâ ni so e mä na bê. Bï aga ndulu ti hon, na lâ aga ndulu ti si. Tongaso, a lingbi e lungula kusala ti bingo, na e yü ye ti bira ti lumière. A lingbi e tambela mbilimbili legeoko tongana azo atambela na kota lâ. I tambela pepe na lege ti pumba kirikiri na nyongo samba, wala na lege ti lango sioni na ye ti pitan, wala na lege ti papa na salango bê; me i yü Seigneur Jésus Christ, na i bi bê ti i na ye ti mitele pepe ti sala si nzala ni asi.”​—aRomain 13:11-14.

32. Dengo bê wa azo ti Nzapa ayeke na ni?

³² Fade Jéhovah angbâ lakue ti sala nzobe na azo so abata wango ti lo. Fade lo mu na ala ngangu na akode so a hunda ti sala kusala ti fango nzo tene. (2 aCorinthien 4:7) Jéhovah ayeke sala kusala ande na awakua ti lo tongana ti so lo sala kusala na Mokonzi ti ala, Jésus. Lo yeke sala ande si yanga ti ala aga “épée so aza” ti tene ala ndu bê ti azo ti be-ti-molenge na tokua ti nzo tene. (Matthieu 28:19, 20) Fade lo bata azo ti lo “na gbede ti tïtî Lo.” Legeoko tongana “kondoro ti nzoni,” fade lo honde ala “na yâ bozo ti kondoro ti Lo.” Biani, fade Jéhovah azia azo ti lo pepe!​—Psaume 94:14; Esaïe 49:2, 15.

[Kete tene na gbe ni]

[Foto na lembeti 139]

Messie ayeke tongana “kondoro ti nzoni” na yâ bozo ti kondoro ti Jéhovah

[Foto na lembeti 141]

Messie aduti tongana “lumière ti aGentil”

[Foto na lembeti 147]

Ndoye ti Nzapa teti azo ti lo ayeke kota ahon ndoye ti mbeni mama teti molenge ti lo