Mo yeke zia si Jéhovah aduti ye ti mo?

“Ala ngbâ ti gi royaume ti Nzapa na mbilimbili ti lo kozoni, na fade a yeke zia na ala aye so kue na ndo ni.”​—MAT. 6:33.

1, 2. (a) “Israël ti Nzapa” so a sara tënë ni na aGalate 6:16 ayeke azo wa? (b) “Akete mara bale-oko na use ti Israël” so a sara tënë ti ala na Matthieu 19:28 ayeke azo wa?

TONGANA mo diko iri Israël na yâ ti Bible, nyen la ayeke ga na li ti mo? Mo yeke pensé na Jacob, molenge ti Isaac, so iri ti lo achangé aga Israël? Wala mo yeke pensé na ahale ti lo so ayeke mara ti Israël ti giriri? Bible asara nga tënë ti Israël ti yingo, wala “Israël ti Nzapa.” Wungo ti ala ayeke 144 000, na a soro ala na lege ti yingo vulu ti ga agbia nga na aprêtre na yayu (aGal. 6:16; Apoc. 7:4; 21:12). Me na Matthieu 19:28 a sara nga kusala na iri Israël ndali ti mbeni ye nde.

² Jésus atene: “Na ngoi so a yeke kiri ti leke aye kue ti ga fini, tongana Molenge ti zo ayeke duti na ndo ti trône ti lo ti gloire, ala so amû peko ti mbi, fade ala nga kue ayeke duti na ndo ti atrône bale-oko na use, na ala yeke fâ ngbanga ti akete mara bale-oko na use ti Israël.” Na yâ ti versê so, “akete mara bale-oko na use ti Israël” ayeke azo so ayeke duti ande na fini lakue lakue na yâ ti Paradis na ndo ti sese. Azo 144 000 ayeke sara kusala ande tongana ajuge na aprêtre ndali ti ala.

3, 4. Nzoni tapande wa aChrétien be-ta-zo so a soro ala ti gue na yayu azia?

³ Legeoko tongana aprêtre nga na aLévite giriri, laso aChrétien so a soro ala ti gue na yayu abâ kusala so ala yeke sara na Jéhovah na nene ni mingi (Nom. 18:20). A-Chrétien so asoro ala ti gue na yayu aku pëpe ti wara mbeni ndo na sese ge. Nde na so, Apocalypse 4:10, 11 afa so ala yeke ngbâ ande ti sara kusala na Jéhovah na yayu, ndo so ala yeke duti dä tongana agbia na aprêtre na tere ti Jésus Christ.​—Ézéch. 44:28.

⁴ Na ngoi so aChrétien so a soro ala ti gue na yayu angbâ na ndo ti sese, a lingbi ala duti na fini na lege so afa so Jéhovah la ayeke ye ti ala. Kusala so ala yeke sara na Jéhovah la ayeke kota mingi na lê ti ala. Ala mä na bê na sandaga ti Christ nga ala mû peko ti lo lakue “ti sara si iringo so a iri na ala nga sorongo so a soro na ala aduti tâ ye biani.” (2 Pi. 1:10). Ngangu ti ala ayeke nde nde nga dutingo ti ala ayeke nde nde, me ala bâ pëpe akatikati ti ala so tongana mbeni raison ti sara gi kua kete na yâ ti kusala ti Nzapa. Me nde na so, ala zia kusala ti Nzapa na kozo ndo na yâ ti fini ti ala nga ala yeke sara ye kue so ala lingbi ti sara. Ala yeke nga mbeni nzoni tapande ndali ti azo so ayeke na beku ti wara fini na yâ ti paradis na ndo ti sese.

5. Tongana nyen aChrétien kue alingbi ti mû Jéhovah tongana ye ti ala? Ngbanga ti nyen a lingbi ti duti ngangu ti sara ni?

⁵ Jésus atene so a lingbi Chrétien oko oko kue, atâa beku ti lo ayeke ti gue na yayu wala ti ngbâ na ndo ti sese, ‘ake tere ti lo wani na lo yô keke ti pasi ti lo na lo mû peko ti ni lakue lakue.’ (Mat. 16:24). Azo kutu mingi so ayeke na beku ti wara fini na yâ ti Paradis na ndo ti sese ayeke voro Nzapa nga ala yeke mû peko ti Christ na lege so. Ala yeke gi pëpe ti sara gi kua kete na yâ ti kusala ti Nzapa tongana ala hinga so ala lingbi ti sara aye mingi. Ambeni agi ti duti na aye mingi pëpe na yâ ti fini ti ala na ala mû kua ti pionnier. Ambeni nga ayeke sara ngangu ti mû kua ti pionnier teti ambeni nze na yâ ti ngu oko oko. Me ti ambeni, atâa so ala lingbi pëpe ti sara kusala ti pionnier, ala yeke sara ngangu ti fa tënë. Ala yeke tongana Marie so atuku lani mafuta so a zia yombo dä na tere ti Jésus. Jésus atene: “Ye so lo sara na mbi ayeke nzoni mingi. . . . Wali so asara ye so alingbi na ngangu ti lo.” (Marc 14:6-8). E yeke na yâ ti mbeni dunia so Satan la akomande na ndo ni, ye so asara si a yeke kete ye pëpe ti sara ye kue so e lingbi ti sara. A lingbi e sara ngangu na e zia bê ti e kue na Jéhovah. Zia e bâ tongana nyen e lingbi ti sara ni na yâ ti aye osio.

Gi Royaume ti Nzapa kozoni

6. (a) Na lege wa azo ti dunia so afa so ye ti ala ayeke gi na yâ ti fini ti laso? (b) Ngbanga ti nyen a yeke nzoni mingi ti mû tapande ti David?

⁶ Jésus afa na adisciple ti lo ti gi Royaume ti Nzapa na mbilimbili ti lo kozoni. Mingi ni, azo ti dunia so ayeke gi kozoni ye so ayeke nzoni gi ndali ti ala wani. Bible asara tënë ti ala tongana “azo ti sese, ala so awara ye ti ala na fini so.” (Diko Psaume 17:1, 13-15.) Azo tongaso abi bê ti ala na Jéhovah pëpe. Azo mingi ayeke bi bê gi na ndo ti nzoni duti ala, dutingo na mbeni sewa, nga ziango mbeni ye ti héritier ndali ti amolenge ti ala. Ye ti ala ayeke gi na yâ ti fini ti laso. David ayeke ti lo lani nde. Lo ye ti duti na ‘nzoni iri’ na gbele Jéhovah. Na pekoni molenge ti lo Salomon atene so a yeke nzoni azo kue agi ti duti na ‘nzoni iri’ na gbele Jéhovah (Zo-ti. 7:1). Legeoko na Asaph, David ahinga so dutingo kamarade ti Jéhovah ayeke nzoni mingi na yâ ti fini ti zo ahon gingo ye ti zo wani. Ye so asara si David ayeke na ngia. Na ngoi ti e laso, aChrétien mingi afa so kusala so ala yeke sara na Jéhovah ayeke kota ye mingi ahon kua ti nginza ti ala.

7. Ye ti nzoni wa mbeni ita-koli awara ndali ti so lo zia Royaume na kozo ndo?

⁷ Bâ tapande ti Jean-Claude so ayeke na République Centrafricaine. Lo yeke ancien nga lo yeke na wali nga na amolenge ota. Warango kua ti nginza na yâ ti kodoro so ayeke ngangu mingi na mingi ti azo ayeke sara kue ti bata kua ti ala. Mbeni lâ kota zo ti place ti kua ti Jean-Claude ahunda na lo ti to nda ti sara kua na bï. Kua ni ayeke komanse na 6:30 ti lakui na yâ ti yenga ni kue. Jean-Claude atene na lo so na ndo ti so ni yeke bâ lege ti sewa ti ni na lege ti mitele, ni yeke mû nga maboko na ala ti duti na nzoni songo na Nzapa. Lo tene nga so a lingbi ni mû maboko na congrégation. Kota zo ni atene na lo: “Tongana mo wara pasa ti wara kua ti nginza, a lingbi mo dö aye kue mo zia, même wali ti mo, amolenge ti mo, nga na akpale ti mo. A lingbi mo mû fini ti mo kue gi ndali ti kua ti mo. A yeke na mo ti soro: eglize ti mo wala kua ti nginza ti mo.” Tongana a yeke mo, mo yeke sara nyen? Jean-Claude ahinga so tongana a zi lo na kua, Nzapa ayeke bâ lege ti lo. Lo yeke ngbâ ti duti na aye mingi ti sara na yâ ti kusala ti Nzapa, nga Jéhovah ayeke mû maboko na lo ti bata sewa ti lo na lege ti mitele. Tongaso lo gue na bungbi ti peko ti yâ ti yenga ni. Na peko ti bungbi ni, lo sara hio ti gue na kua, atâa so lo hinga pëpe wala lo yeke ngbâ na kua ni. Mo ye ti bâ, a iri lo na téléphone. A zi kota zo ni so na kua, me ita ti e Jean-Claude angbâ ti lo na kua ti lo.

8, 9. Na lege wa e lingbi ti duti tongana aprêtre na aLévite nga ti mû Jéhovah tongana ye ti e?

⁸ Azo so mara ti ye tongaso asi na ala alingbi ti hunda tere ti ala atene: ‘Mbi yeke sara ande tongana nyen ti bâ lege ti sewa ti mbi tongana a zi mbi na kua?’ (1 Tim. 5:8). Me atâa ye tongaso asi na mo wala pëpe, kite ayeke pëpe so aye so asi na mo asara si mo hinga na bê ti mo kue so tongana mo mû Jéhovah tongana ye ti mo nga tongana mo zia kusala ti lo na kozo ndo na yâ ti fini, lo yeke zia mo lâ oko pëpe. Na ngoi so Jésus atene na adisciple ti lo ti ngbâ ti gi royaume kozoni, lo mû zendo na ala lo tene so fade Nzapa ayeke mû na ala tanga ti aye kue, aye tongana ye ti tengo ni, ye ti nyongo ni, wala ye ti yungo ni.​—Mat. 6:33.

⁹ Gbu li na ndo ti aLévite so awara lani pëpe mbeni sese tongana ye ti héritier. Teti so kusala ti ala ayeke ti fa lege na azo ti mara ni na yâ ti tâ vorongo, a lingbi ala hinga na bê ti ala kue so Jéhovah ayeke mû na ala ye so ala yeke na bezoin ni na lege ti mitele, teti Jéhovah atene: “Mbi yeke ye ti mo.” (Nom. 18:20). Atâa so laso e yeke sara na Jéhovah na yâ ti mbeni temple pëpe tongana ti so aprêtre nga na aLévite ayeke sara lani, e nga kue e lingbi ti hinga na bê ti e kue so Jéhovah ayeke bâ lege ti e. Na ngoi so alango ti nda ni ayeke pusu nduru nduru ti hunzi, a yeke nzoni e zia bê ti e na Jéhovah mingi ahon ti kozo ti bâ lege ti e.​—Apoc. 13:17.

Gi mbilimbili ti Nzapa kozoni

10, 11. Tongana nyen ambeni zo azia bê ti ala na Jéhovah na ndo ti tënë ti kua ti nginza? Fa mbeni tapande.

¹⁰ Jésus awa nga adisciple ti lo ti ‘ngbâ ti gi mbilimbili ti Nzapa kozoni’. (Mat. 6:33). Ye so aye ti tene so e yeke sara ye ague oko na bango ndo ti Jéhovah na ndo ti ye so ayeke nzoni na ye so ayeke sioni me e yeke sara ye pëpe alingbi na bango ndo ti azo. (Diko Ésaïe 55:8, 9.) Peut-être mo dabe ti mo so ândö ambeni zo ayeke fâ yaka ti manga wala ala yeke kä ni, ambeni ayeke fa na azo ti sara bira, wala ala yeke leke angombe na ala kä ni. Me na ngoi so ala hinga tâ tënë, mingi ti ala achangé kua ti ala na ala wara batême.​—És. 2:4; 2 aCor. 7:1; aGal. 5:14.

¹¹ André ayeke mbeni tapande ni. Na ngoi so lo na wali ti lo amanda ye na ndo ti Jéhovah, ala mû desizion ti sara na lo. André aye kua ti nginza ti lo mingi me lo zia ni. Ngbanga ti nyen? Ndali ti so ndokua so lo yeke sara kua na yâ ni amû mbage na yâ ti bira, na André aye ti sara ye so ayeke nzoni na lê ti Jéhovah. Na ngoi so André ake kua ti lo, lo yeke na amolenge use nga nginza so lo yeke na ni alingbi ti mû maboko na lo gi teti ambeni nze. Na bango ndo ti zo, ye ni ayeke mo bâ mo tene lo yeke na mbeni “ye ti héritier” oko pëpe. Lo zia bê ti lo na Nzapa na lo gi mbeni kua nde. Fadeso, tongana André na sewa ti lo apensé na ndo ti ngoi ni so, ala lingbi ti tene so tïtî Jéhovah ayeke nduru pëpe (És. 59:1). Teti so André na wali ti lo agi ti ngbâ ti duti na aye mingi pëpe na yâ ti fini ti ala, ala wara lege ti mû kua ti pionnier. André atene so na ambeni ngoi ala gi bê ti ala ndali ti tënë ti nginza, ndo ti lango, seni ti ala, nga ndali ti so ala komanse ti ga mbakoro. Me lakue Jéhovah ayeke mû maboko na ala. Na kite pëpe ala lingbi ti tene so sarango na Jéhovah ayeke ga na ye ti nzoni na zo nga a yeke mbeni kota pasa so ahon atanga ni kue so zo ayeke na ni.a​—Zo-ti. 12:15.

12. Ye wa a lingbi e duti na ni si e gi mbilimbili ti Nzapa kozoni? Fa ambeni tapande ti ndo so mo yeke dä.

¹² Jésus atene na adisciple ti lo atene: “Tongana ala yeke na mabe so akono tongana lê ti keke ti moutarde, fade ala tene na hoto so: ‘Londo ge, mo gue mo duti kâ,’ na fade lo londo ti gue. Nga, fade ye oko ti kara ala ayeke dä pëpe.” (Mat. 17:20). Mo yeke ngbâ ti gi mbilimbili ti Nzapa kozoni tongana sarango tongaso ayeke ga na mo akpale? Tongana mo yeke gi bê ti mo wala mo lingbi ti sara ni wala pëpe, sara lisoro na ndo ni na ambeni zo na yâ ti congrégation. Kite ayeke pëpe so aye so asi na ala so afa tongana nyen Jéhovah amû maboko na ala ayeke kiri ti kpengba mabe ti mo.

Kiri singila ndali ti aye so Jéhovah amû

13. Tongana e sara ngangu ti sara kusala ti Jéhovah, nyen la e lingbi ti ku ti wara na mbage ti lo na lege ti yingo?

¹³ Tongana mo bâ na nene ni pasa so mo yeke na ni ti sara na Jéhovah, mo lingbi ti hinga na bê ti mo kue so lo yeke mû na mo aye so mo yeke na bezoin ni na lege ti mitele nga na lege ti yingo tongana ti so lo sara lani na aLévite. Gbu li na ndo ti David. Atâa so lo yeke lani na yâ ti dû ti tênë, lo hinga na bê ti lo kue so Nzapa ayeke mû maboko na lo. E nga kue e lingbi ti zia bê ti e na Jéhovah même na ngoi so mo bâ mo tene zo oko ti mungo maboko na e ayeke dä pëpe. Dabe ti mo so a yeke na ngoi so Asaph aga na “Ndo ti Nzoni-kue ti Nzapa” la lo ga ti hinga ye so asara lani si lo yeke na vundu (Ps. 73:17). Legeoko nga, a lingbi e bâ ndo na mbage ti Jéhovah ti wara kobe ti yingo. Ye so ayeke fa so e bâ na nene ni kusala so e sara na Jéhovah atâa dutingo ti e ayeke tongana nyen. E yeke zia si Jéhovah aduti ye ti e.

14, 15. A yeke nzoni e sara ye tongana nyen na ngoi so a changé lege so e gbu na nda ti mbeni versê? Ngbanga ti nyen?

¹⁴ Mo yeke sara ye tongana nyen na ngoi so Jéhovah asara si lumière asu na ndo ti “aye ti Nzapa so nda ni alï mingi” so ayeke na yâ ti Bible? (1 aCor. 2:10-13). Bazengele Pierre ayeke mbeni nzoni tapande na ndo ti tënë so na ngoi so Jésus atene na azo so ayeke mä lo lo tene: “Tongana ala te nyama ti tere ti Molenge ti zo pëpe na ala nyon mênë ti lo pëpe, ala yeke na fini na yâ ti ala pëpe.” Teti so mingi ti adisciple ni apensé so Jésus ayeke sara tënë ti tâ nyama ti tere ti lo nga na mênë ti lo, ala tene: “So ayeke tënë ti songo bê. Zo wa si alingbi ti mä ni?” Ala ‘kiri na tere ti aye so ala dö lani azia’. Me Pierre atene: “Seigneur, e gue ande na mbage ti zo wa? Mo yeke na atënë so amû na zo fini ti lakue lakue.”​—Jean 6:53, 60, 66, 68.

¹⁵ Pierre amä lani yâ ti tënë ti Jésus so kue pëpe. Me lo hinga na bê ti lo kue so Jéhovah ayeke sara kusala na Jésus ti mû maboko na azo ti gbu nda ti tâ tënë. Laso, tongana a changé lege so e gbu na nda ti mbeni tâ tënë so ayeke na yâ ti Bible, mo yeke gi ti hinga araison so a fa ni na yâ ti Bible so a changé ni ndali ni so? (aProv. 4:18). Azo ti Bérée na ngoi ti akozo Chrétien ‘ayeke tâ nduru ti yeda na tënë ni na ngoi so ala wara ni, na lâ na lâ ala yeke gi nda ti Mbeti ti Nzapa nzoni’. (Kus. 17:11). Tongana mo mû tapande ti ala, mo yeke bâ na nene ni mingi ahon ti kozo kusala so mo yeke sara na Nzapa. Mo yeke kiri ande singila mingi so mo mû Jéhovah tongana ye ti mo.

Sara mariage gi na yâ ti Seigneur

16. Ti gue oko na 1 aCorinthien 7:39, na lege wa aChrétien so ayeke kumbamba alingbi ti zia si Nzapa aduti ye ti ala?

¹⁶ Mbeni ye so na yâ ni a lingbi aChrétien abata lakue na li ti ala ye so Nzapa aleke ti sara ayeke sarango ye alingbi na commandement ti Bible so ahunda ti sara mariage “gi na yâ ti Seigneur.” (1 aCor. 7:39). Azo mingi asoro ti ngbâ kumbamba ahon ti sara ye ague nde na commandement so. Nzapa ayeke bâ lege ti azo so asara ye tongaso. Na ngoi so David abâ so lo yeke gi lo oko nga so mbeni zo ti mungo maboko na lo ayeke dä pëpe, lo sara nyen? David atene: “Mbi fa ye so ason bê ti mbi na gbele Lo [Nzapa], na mbi fa ye ti vundu ti mbi na gbele Lo. Tongana ngangu ti yingo ti mbi awe na yâ ti mbi.” (Ps. 142:2-4). Jérémie ayeke lani kumbamba na ngoi so lo sara na Jéhovah na bê ti lo kue teti angu mingi. Lo nga kue lo lingbi ti bâ so lo yeke gi lo oko. Mo lingbi ti manda ye na ndo ti tapande ti lo na yâ ti chapitre 8 ti buku Dieu nous parle par Jérémie.

17. Nyen la mbeni ita-wali asara na ngoi so lo bâ so lo yeke gi lo oko?

¹⁷ Mbeni ita-wali na kodoro ti Amerika atene so ni tene lâ oko pëpe so ni yeke ngbâ kumbamba. Lo ye ti sara mariage tongana lo wara nzoni zo so lo lingbi ti sara mariage na lo. Mama ti lo so ayeke Témoin pëpe aye gi ti tene molenge ti lo asara mariage atâa koli ni ayeke tongana nyen. Ita ni ahunda na mama ti lo ni atene lo ye ti tene ni sara mbeni mariage so ayeke nzoni pëpe? Me na ngoi so mama ni abâ so molenge ti lo ni ayeke na mbeni nzoni kua ti nginza, lo yeke bâ lege ti lo wani nzoni, nga lo yeke na ngia, lo mama ni lo zia lege ti sarango tënë na lo mingi na ndo ti mariage. Na ambeni ngoi ita-wali so abâ so lo yeke gi lo oko. Lo tene: “Mbi gi ti zia bê ti mbi kue na Jéhovah. Lo girisa mbi lâ oko pëpe.” Nyen la amû maboko na ita-wali so ti zia bê ti lo kue na Jéhovah? Lo tene: “Sambela amû maboko na mbi ti bâ so Nzapa ayeke dä biani nga ti bâ so mbi yeke gi mbi oko pëpe. Lo ti Nduzu Ahon Kue ayeke mä mbi, ye so asara si mbi bâ tere mbi tongana mbumbuse zo pëpe nga mbi yeke na ngia.” Lo mä na bê na tënë ti Bible so atene: “Ngia ayeke mingi tongana zo amû ye na zo ahon ti wara ye na maboko ti zo.” Tongaso, lo gi ti mû maboko na ambeni zo sân ti ku ti wara ye na pekoni. Lo kiri lo tene: “Na ngoi so mbi yeke gbu li ti mbi mbi tene, ‘Nyen la mbi lingbi ti sara ti mû maboko na zo so?’ Mbi yeke na ngia na yâ ti bê ti mbi.” (Kus. 20:35). Lo mû Jéhovah tongana ye ti lo, nga lo yeke na ngia na yâ ti kusala so lo yeke sara na lo.

18. Mo lingbi ti sara nyen ti ga ye ti Jéhovah?

¹⁸ Atâa dutingo ti mo ayeke so wa, mo lingbi ti zia si Nzapa aduti ye ti mo. Tongana mo sara ni, mo lingbi ti duti na popo ti azo ti lo so ayeke na ngia (2 aCor. 6:16, 17). Ye so ayeke sara si mo ga ye ti Jéhovah, tongana ti ambeni wakua ti Nzapa giriri. (Diko Deutéronome 32:9, 10.) Legeoko tongana ti so mara ti Israël aga lani ye ti Nzapa na popo ti amara, Nzapa alingbi ti soro mo ti duti ye ti lo nga ti bâ lege ti mo nzoni.​—Ps. 17:8.

[Kete tënë na gbe ni]

Mo yeke kiri tënë tongana nyen?

Na lege wa mo lingbi ti zia si Jéhovah aga ye ti mo

• na gingo Royaume ti Nzapa nga na mbilimbili ti lo kozoni?

• na bango na nene ni kobe ti yingo so lo mû na mo?

• na sarango ye alingbi na commandement ti Nzapa ti sara mariage gi na yâ ti Seigneur?

[Kete tënë na lembeti 16]

Jéhovah ayeke ga ye ti e tongana e zia kusala ti lo na kozo ndo na yâ ti fini ti e

[Foto na lembeti 18]

Tapande ti Jérémie amû ngangu na zo