Zia bê kue na Jéhovah na yâ angoi ti ngangu

“Nzapa ayeke Ndo Ti Bata Tele ti e na Ngangu ti e, Lo yeke ndulu na e ti sala na e na yâ ye ti ngangu kue.”​—PSAUME 46:2.

TI TENE so mo zia bê ti mo kue na Nzapa ayeke mbeni ye. Me ti fa ni na yâ asalango ye ti mo ayeke nga mbeni ye nde. Na tapande, teti angu mingi fadeso awe, a yeke bâ na ndo akugbe ti nginza nga na alê ti nginza ti Amerika tënë so: “E zia bê ti e kue na Nzapa.”a Na ngu 1956, badahalezo ti Amerika asigigi na mbeni ndia so amû tënë so tongana atënë so ayeke fa lege na azo ti Amerika na yâ aye ti ala kue. Me nde na ye so a tene, azo mingi, pëpe gi na kodoro so me nga na ndo sese kue, ayeke zia bê ti ala mingi na nginza nga na mosoro ahon ti zia bê na Nzapa.​—Luc 12:16-21.

² Teti so e yeke atâ Chrétien, a hunda ye mingi na mbage ti e ahon gi senge tenengo na yanga so e zia bê kue na Jéhovah. Legeoko tongana “mabe so ayeke na kusala ni pëpe ayeke na fini pëpe”, tënë kue so e lingbi ti tene ti fa so e zia bê ti e kue na Nzapa ayeke ye senge tongana e fa ni pëpe na lege ti akusala ti e (Jacques 2:26). Na yâ article so ahon, e manda so e yeke fa so e zia bê ti e kue na Jéhovah tongana e bâ ndo na mbage ti lo na yâ sambela, e gi fango lege na yâ Tënë ti lo, na e bâ ndo na mbage ti bungbi ti lo ti wara fango lege. Fadeso, zia e bâ tongana nyen e lingbi ti sala ye alingbi na akapa ota so na yâ angoi ti ngangu.

Tongana a zi e na kua wala nginza ti e ayeke gi kete

³ Na yâ angoi ti ‘aye ti ngangu’ so, e aChrétien e yeke tingbi na akpale ti nginza so ambeni zo ayeke wara (2 Timothée 3:1). Ni la, a lingbi ti si hio tongaso ti tene a zi e na kua. Wala e lingbi gi ti sala kua teti angbonga mingi mingi ti wara mbeni kete nginza na nda ni. Na yâ aye tongaso, e lingbi ti bâ so a yeke ngangu ti ‘bata azo ti da ti e’. (1 Timothée 5:8). Nzapa ti Nduzu Ahon Kue ayeke ndulu ti mû maboko na e na yâ ti angoi tongaso? Lo ye biani! E tene pëpe so lo yeke zi e na gbe ti akpale ti fini kue ti sese so, me tongana e zia bê ti e na lo, atënë ti Psaume 46:2 ayeke ga tâ tënë na ndo e: “Nzapa ayeke Ndo Ti Bata Tele ti e na Ngangu ti e, Lo yeke ndulu na e ti sala na e na yâ ye ti ngangu kue.” Ye oko, tongana nyen e lingbi ti fa so e zia bê ti e kue na Jéhovah na ngoi ti akpale ti nginza?

⁴ Mbeni oko lege ti fa so e zia bê ti e kue na Jéhovah ayeke ti bâ ndo na mbage ti lo na lege ti sambela. Me e lingbi ti sambela ndali ti ye wa? Biani, tongana e tingbi na akpale ti nginza, peut-être a hunda na e ti sala kusala na lege ti ndara fadeso mingi ahon ti kozo. Tongaso, sambela biani ngbanga ni! Tënë ti Jéhovah adë bê ti e tongaso: “Tongana mbeni zo na popo ti i amanke ndara, a lingbi lo hunda Nzapa, Lo so amû ye na azo kue senge senge, Lo zingo na ala pëpe, na fade Lo mû na lo.” (Jacques 1:5). Biani, hunda na Jéhovah ndara so ayeke kode ti sala kusala nzoni na hingango ye, gbungo nda ti ye, nga bango nda ti ye ti wara lege ti mû anzoni desizion na ti soro aye nzoni. Babâ ti e ti yayu so andoye e adë bê ti e so fade lo yeke mä amara ti sambela tongaso. Lo yeke même ndulu ti leke lege ti ala so azia bê ti ala kue na lo.​—Psaume 65:3; aProverbe 3:5, 6.

⁵ Mbeni lege nde ti fa so e zia bê ti e na Jéhovah ayeke ti gi fango lege na yâ Tënë ti Nzapa. Awango ti ndara so a wara na yâ Bible ayeke aye so “alingbi biani ti zia bê na ndo ni.” (Psaume 93:5, NW ). Atâa so a hunzi ti sû ni na gbe ti yingo a sala fadeso angu 1 900 tongaso awe, a yeke wara na yâ ni awango so alingbi ti zia bê na ndo ni, nga tâ ndara so alingbi ti mû maboko na e ti luti ngangu na gbele akpale ti nginza. Bâ ambeni tapande ti ndara so a wara na yâ Bible.

⁶ A sala angu mingi fadeso awe, Gbia ti ndara Salomon atene: “Zo ti kusala alango nzoni tongana lo te kobe kete wala lo te mingi; me ye mingi ti zo ti mosoro agbanzi lango na lê ti lo.” (Zo-ti-fa-tene 5:11). A hunda na e ngoi nga na nginza ti leke akungba ti e tongana a buba, nga ti sukula ni na ti bata ni nzoni. Ni la, tongana a zi e na kua, e lingbi ti gbu ngoi ni so ti kiri ti bâ gigi ti e nzoni, na gingo ti kangbi popo ti aye so a lingbi e duti na ni biani na aye so e sala gi nzara ni. Ti sala si gingo bê ti e akiri na peko kete, a yeke duti nga lege ti ndara ti gbian ambeni ye. Na tapande, e lingbi ti soro ti gue ti lango na mbeni kete da wala ti lungula ambeni kungba so e bâ nene ti dutingo na ni pëpe.​—Matthieu 6:22.

⁷ Na yâ Fango ye ti lo na ndo Hoto, Jésus amû wango so: “Teti tënë so, Mbi tene na i, i gi bê ti i tënë ti fini ti i pëpe, fade i te nyen, wala i nyon nyen, wala i yü bongo ti nyen.”b (Matthieu 6:25). Jésus ahinga lani so azo, teti so ala yeke mbilimbili-kue pëpe, ala yeke gi bê ti ala mingi ti wara aye so atia ala. Ye oko, tongana nyen e lingbi ti ‘zia ti gi bê ti e’ tënë ti aye so? Jésus atene: “I [ngbâ ti] gi royaume ti Nzapa.” Atâa akpale so e yeke tingbi na ni ayeke so wa, a lingbi e ngbâ ti zia vorongo Jéhovah na kozo ndo na yâ fini ti e. Tongana e sala tongaso, fade Babâ ti e ti yayu ‘ayeke mû’ na e aye ti lâ oko oko kue so a lingbi e wara ni. Atâa ye ni ayeke tongana nyen, fade lo yeke mû na e ye so atia e.​—Matthieu 6:33.

⁸ Jésus amû lani nga wango so: “I gi bê ti i tënë ti kekereke pëpe, teti fade kekereke agi ye ti lo mveni.” (Matthieu 6:34). A yeke duti lege ti ndara pëpe ti gi bê ti e ahon ndo ni na ye so alingbi peut-être ti si kekereke. Mbeni wandara atene: “A yeke ngangu ti tene aye so e sala mbito ni ti si kekereke aduti atâ ye biani.” Tongana e bata na tâ be-ti-molenge wango ti Bible ti bâ gi aye so ayeke kota mingi na yâ fini, na ti bâ gi lango ti laso me na gingo bê pëpe na kekereke alingbi ti mû maboko na e ti gi bê ti e ahon ndo ni pëpe.​—1 Pierre 5:6, 7.

⁹ Tongana e tingbi na akpale ti nginza, e lingbi nga ti fa so e zia bê ti e kue na Jéhovah tongana e gi mungo maboko na yâ ambeti ti “ngbâa be-ta-zo na ti ndara”. (Matthieu 24:45, NW ). Ngoi na ngoi, a yeke wara na yâ Réveillez-vous! a-article so ayeke mû anzoni wango na ndo lege ti hon ndo ti akpale ti nginza. Article “Au chômage – Que faire?” so asigigi na yâ Réveillez-vous! ti lango 8 ti août ngu 1991, afa apendere wango miombe so amû maboko na azo mingi ti luti na gbele kpale ti nginza nga ti vundu ti bê tongana a zi ala na kua.c Biani, a yeke nzoni ti tene tongana a sala kusala na awango, a girisa nga pëpe so nginza ayeke nga na tâ ngele ti lo na yâ fini. A yeke ye so article “Plus important que l’argent” so asigigi gi na yâ oko numéro so afa.​—Zo-ti-fa-tene 7:12.

Tongana a yeke kpale ti seni

¹⁰ A yeke na lege ni ti zia bê kue na Jéhovah na ngoi ti ngangu kobela? Biani, a yeke tâ na lege ni. Jéhovah ayeke sala mawa ti azo ti kobela so ayeke na popo ti azo ti lo. Nga a hon so, lo yeke ndulu ti mû maboko na ala. Bâ gi tapande ti Gbia David. Lo mveni mbeni ngangu kobela agbu lo na ngoi so lo yeke sû mbeti ti fa lege so Nzapa ayeke sala na ye na mbage ti azo ti mbilimbili so atï kobela. Lo tene: “L’Eternel abata lo na ndo tange ti kobela; fade Mo leke tange ti lo na lâ ti kobela ti lo.” (Psaume 41:2, 4, 8, 9). Ziango bê kue ti David na Nzapa angbâ ngangu; na nda ni, gbia ni akiri awara sava ti tele. Me tongana nyen e lingbi ti zia bê ti e na Nzapa tongana e yeke na kpale ti kobela?

¹¹ Tongana tele ti e aso, mbeni lege ti fa so e zia bê ti e na Jéhovah ayeke ti hunda lo na yâ sambela ti mû maboko na e ti gbu ngangu. E lingbi ti hunda na lo ti mû maboko na e ti sala kusala na “ndara” si e lingbi ti gi ti bâ tâ seni so dutingo ti e amû lege biani na e ti wara kamême (aProverbe 3:21). E lingbi nga ti hunda lo ti mû maboko na e ti duti na be-nze-pepe nga ti gbu ngangu ti wara lege ti hon ndo ti kobela ni. Na ndo ni kue, e ye ande ti hunda lo ti mû maboko na e, na salango si e wara ngangu ti ngbâ be-ta-zo na lo na ti yengi pëpe, atâa aye so alingbi ti si (aPhilippien 4:13). Ti bata be-biani ti e na Nzapa ayeke même kota ye mingi ahon batango fini ti e laso. Tongana e bata be-biani ti e, fade Kota Zo ti futa ye ayeke mû na e teti lakue lakue mbeni fini na seni so ayeke mbilimbili-kue.​—aHébreu 11:6.

¹² Ziango bê ti e kue na Jéhovah apusu nga e ti gi tâ fango lege so alingbi na ni na yâ Tënë ti lo Bible. Akpengba-ndia so a wara na yâ Mbeti ti Lo alingbi ti mû maboko na e ti mû anzoni desizion na ndo tënë ti ayorö ti kaïngo kobela. Na tapande, tongana e hinga so Bible ake “tënë ti yorö” wala asalango ye so andu ayingo sioni, fade e yeke ke ti tene a gi ti kaï kobela ti e na lege ti mbeni ye so andu ye ti ayingo sioni (aGalate 5:19-21; Deutéronome 18:10-12). Ge so, e wara mbeni tapande nde ti ndara ti Bible so zo alingbi ti zia bê kue dä: “Zo so li ti lo ayeke dä pëpe, lo yeda na tënë kue, me zo ti ndara abata lege ti lo nzoni.” (aProverbe 14:15). Ni la, tongana e gi ti bâ tënë ti ayorö ti kaïngo kobela, e yeke sala ye na ndara ti gi atënë so ayeke tâ ye biani, ahon ti “yeda na tënë kue”. ‘Salango ye na lege ni’ tongaso alingbi ti mû maboko na e ti bâ aye so e soro so nzoni, na ti mû mbeni nzoni desizion.​—Tite 2:12, Fini Mbuki, 2001.

¹³ E lingbi nga ti fa so e zia bê ti e kue na Jéhovah na gingo nda ti aye na yâ ambeti ti ngbâ be-ta-zo. Ngoi na ngoi, Tour ti Ba Ndo na Réveillez-vous! asigigi na ambeni article so amû lege na e ti hinga tënë na ndo gbâ ti akpale so andu seni nga na ambeni kobela.d Na ambeni ngoi, a yeke wara na yâ apériodique so a-article na ndo ti ambeni zo so awara lege ti hon ndo ti amara ti kobela nde nde. Na ndo ni, ambeni article ni amû anzoni wango so aluti na ndo Bible so afa tongana nyen ti duti na fini na akpale ti kobela so aninga na tele ti mo.

¹⁴ Na tapande, na yâ Réveillez-vous! ti lango 22 ti janvier ngu 2001, a yeke wara mbeni molongo ti a-article na ndo li ti tënë “Maladie, infirmité: du réconfort.” A-article so amû akpengba-ndia so aluti na ndo Bible nga na atënë so alondo tâ na yanga ti azo so ahinga tënë na ndo ni nzoni mingi, so abâ pasi teti angu mingi na kobela so anze mbage ti tele ti ala. Article so li ti tënë ni ayeke “Comment vivre au mieux avec votre déficience physique” amû wango so: Manda gbâ ti aye so mo lingbi ti manda so andu kobela ti mo ni (aProverbe 24:5). Gi ambeni nzoni ye ti salango ni na yâ fini ti mo, na tapande ti mû maboko na amba ti mo, me hinga nga so mo lingbi pëpe ti sala ye kue so amba ti mo alingbi ti sala (Kusala 20:35; aGalate 6:4). Kpe ti duti gi mo oko yongoro na tanga ti azo (aProverbe 18:1). Sala si azo ayeke na ngia na ngoi so ala ga ti bâ mo (aProverbe 17:22). Na ndo ni kue, ngbâ na songo so akpengba mingi na Jéhovah nga na kongregation (Nahum 1:7; aRomain 1:11, 12). Bê ti e akiri singila pëpe teti fango lege so e lingbi ti zia bê kue dä, so Jéhovah amû na lege ti bungbi ti lo?

Tongana mbeni wokongo angbâ gi ngbango

¹⁵ Bazengele Paul asû na mbeti: “Ye oko ti nzoni ayeke na yâ mbi pëpe, so atene, na ya mitele ti mbi.” (aRomain 7:18). Paul amanda na ndo lo mveni so a yeke tâ ngangu mingi ti tiri na anzara nga na awokongo ti mitele so ayeke mbilimbili-kue pëpe. Ye oko, Paul ayeke nga na beku so biani fade lo yeke hon na ngangu (1 aCorinthien 9:26, 27). Na lege wa? Na ziango bê ti lo kue na Jéhovah. Ndani la, Paul alingbi lani ti tene: “Mbi yeke zo ti vundu mingi! Fade zo nyen alungula mbi na yâ tele ti kui so? Mbi mû merci na Nzapa, na lege ti Jésus Christ Seigneur ti e!” (aRomain 7:24, 25). Ka ti e ayeke tongana nyen? E nga kue e yeke tiri na awokongo ti e ti mitele. Na ngoi so e yeke tiri na awokongo so, e lingbi hio ti girisa ziango bê ti e so na Jéhovah, na ti tene na bê ti e so biani e lingbi lâ oko pëpe ti hon na ngangu. Me Jéhovah ayeke mû ande maboko na e tongana e zia bê ti e kue na lo me pëpe na ngangu ti e, legeoko na Paul.

¹⁶ Tongana mbeni wokongo ti mitele angbâ gi ngbango, e lingbi ti fa so e zia bê ti e kue na Jéhovah na totongo na lo na yâ sambela. A yeke ti e ti hunda, na même ti voro, Jéhovah ti mû maboko na e na lege ti yingo vulu (Luc 11:9-13). E lingbi ti hunda mbilimbili ti tene lo mû na e ngangu ti kanga nzara ti tele, so ayeke mbeni oko ti lengo ti yingo ti Nzapa (aGalate 5:22, 23). Ye nyen a lingbi e sala tongana e kiri e tï na yâ oko wokongo so? Atâa ye ni ayeke tongana nyen, a lingbi e tene pëpe so ti e awe. Zia e nze lâ oko pëpe ti sambela na tâ be-ti-molenge Nzapa ti e ti be-nzoni, na hundango na lo ti pardone e na ti mû maboko na e. Fade Jéhovah ayeke ke lâ oko pëpe bê so “afâ awe na ayeke na vundu” ndali ti mbeni ye so asala nzoni pëpe na yingo-ti-hinga ti zo ni (Psaume 51:19). Tongana e toto na lo na tâ bê so ayeke na vundu, fade Jéhovah ayeke mû maboko na e ti luti na gbele atara.​—aPhilippien 4:6, 7.

¹⁷ E lingbi nga ti fa so e zia bê ti e kue na Jéhovah tongana e gi mungo maboko ti lo na yâ Tënë ti lo. E lingbi ti sala kusala na Concordance wala na Index ti atënë so a bâ na yâ Tour ti Ba Ndo ti gi kiringo tënë na hundango tënë so: ‘Bibe ti Jéhovah ayeke tongana nyen na ndo wokongo so mbi yeke tiri na ni?’ Tongana e gbu li na ndo bibe ti Jéhovah na ndo ti tënë ni, a lingbi ti kpengba nzara ti e ti nzere na lo. Ni la, e lingbi ti wara lege ti duti na oko bibe ti lo, na kengo ye so lo ke (Psaume 97:10). Ambeni abâ nzoni ti batango na li aversê ti Bible so andu mbeni mbilimbili wokongo so ala yeke tiri na ni. Kpale ti e ayeke so e yeke sala ngonzo hio mingi? Tongana a yeke tongaso, e lingbi ti bata na li aversê tongana aProverbe 14:17 nga aEphésien 4:31. A yeke ngangu na e ti bata yanga ti e? E lingbi ti manda ti diko na li aversê tongana aProverbe 12:18 na aEphésien 4:29. Bê ti e ayeke pusu e na mbage ti angia so ayeke nzoni pëpe? E lingbi ti tara ti dabe e na aversê tongana aEphésien 5:3 nga aColossien 3:5.

¹⁸ Ti gi mungo maboko na mbage ti a-ancien so yingo ti Nzapa asoro ala na yâ kongregation ayeke nga mbeni lege nde ti fa so e zia bê ti e kue na Jéhovah (Kusala 20:28). Teti biani, ‘matabisi ti azo’ so ayeke mbeni ye so Jéhovah amû na lege ti Christ ti bata na ti bâ ndo na ndo kundu ti lo (aEphésien 4:7, 8, 11-14). Tâ tënë, a lingbi ti duti ngangu ti hunda mungo maboko ti tiri na mbeni wokongo so e yeke na ni. E lingbi ti sala kamene, na dutingo na mbito so fade a-ancien ayeke bâ e na nzoni lê pëpe. Me kite ayeke pëpe so akoli biazo na lege ti yingo tongaso ayeke yekia e ande mingi teti so e bi kamene yongoro ti ga ti hunda mungo maboko na ala. Na ndo ni, a-ancien ayeke sala kue ti lë alengo ti Jéhovah na yâ salango ye ti ala na mbage ti kundu ni. Awango na atënë so ala mû na yâ Bible ti dë na bê ti e, na so alingbi na ni nzoni, alingbi ti duti tâ ye so a hunda e ti duti na ni ti leke na bê ti e kue ti hon ndo ti wokongo ti e.​—Jacques 5:14-16.

¹⁹ Girisa pëpe so Satan ahinga so ngoi ti lo angbâ gi kete (Apocalypse 12:12). Lo ye ti sala kusala na aye ti buba ti fini na yâ sese so ti sala si e nze na e kiri na peko. Zia e fa na gigi mara ti beku so a wara na aRomain 8:35-39: “Fade zo nyen alingbi kangbi e na ndoye ti Christ? pono? wala ye ti vundu? wala ye ti ngangu mingi? wala boma? wala tele senge? wala ye so aye ti fâ zo? wala épée? . . . Me, na lege ti Lo so andoye e, e hon ye so kue na ngangu. Teti mbi hinga biani, fade kui, wala fini, wala a-ange, wala akozo-gere-ti-komande, wala ye ti fadeso, wala ye so ayeke ga, wala angangu, wala yongo ni na nduzu, wala yongo ni na gbe ti sese, wala mbeni ye nde so A créé awe, alingbi kangbi e pëpe na ndoye ti Nzapa so ayeke na yâ Christ Jésus Seigneur ti e.” Atënë so afa tâ ziango bê kue na Jéhovah biani! Ye oko, mara ti ziango bê kue tongaso na Nzapa andu ye mingi ahon gi bibe senge. A yeke mbeni ziango bê kue na Lo so andu adesizion so e gbu li nzoni dä lâ na lâ ti mû na yâ fini ti e. Ni la, zia e leke na bê ti e ngangu ti zia bê kue na Jéhovah na angoi ti ngangu.

[Akete tënë na gbe ni]

Mo dabe mo na ni?

• Tongana e tingbi na akpale ti nginza, na lege wa e lingbi ti fa so e zia bê ti e kue na Jéhovah?

• Tongana nyen e lingbi ti fa so e zia bê ti e kue na Nzapa na yâ akpale ti kobela?

• Tongana wokongo ti mitele angbâ gi ngbango, tongana nyen e lingbi ti fa so biani e zia bê ti e kue na Jéhovah?

[Ahundango tënë ti manda na ye]

1, 2. (a) Tapande wa afa so gi tenengo na yanga so e zia bê ti e kue na Nzapa alingbi pëpe? (b) Ngbanga ti nyen a lingbi ziango bê ti e na Jéhovah aduti pëpe gi tënë ti yanga?

3. Akpale ti nginza wa ayeke si na awakua ti Jéhovah na yâ ‘aye ti ngangu’ so? Na e hinga tongana nyen so Nzapa ayeke ndulu ti mû maboko na e?

4. Tongana e tingbi na akpale ti nginza, e lingbi ti sambela teti ye wa? Na tongana nyen Jéhovah ayeke mä mara ti asambela tongaso?

5, 6. (a) Ngbanga ti nyen e lingbi ti bâ ndo na mbage ti Tënë ti Nzapa ti wara fango lege ti luti na gbele akpale ti nginza? (b) Ye nyen e lingbi ti sala ti tene gingo bê ti e akiri na peko kete tongana a zi e na kua?

7, 8. (a) Tongana nyen Jésus afa lani so lo hinga so azo ayeke ka ndulu ti gi bê ti ala mingi na ndo aye ti mitele? (Bâ nga kete tënë na gbe ni). (b) Wango ti ndara wa Jésus amû na ndo lege ti kpe gingo bê ahon ndo ni?

9. Tongana e tingbi na kpale ti nginza, e lingbi ti wara mungo maboko wa na yâ ambeti ti “ngbâa be-ta-zo na ti ndara”?

10. Tongana nyen tapande ti Gbia David afa so a yeke na lege ni ti zia bê kue na Jéhovah na gbele kobela ti ngangu?

11. Tongana kobela agbu e, ye nyen e lingbi ti hunda na Babâ ti e ti yayu?

12. Akpengba-ndia wa ti Bible alingbi ti mû maboko na e ti mû anzoni desizion na ndo tënë ti ayorö ti kaïngo kobela?

13, 14. (a) A-article wa a sigigi na ni na yâ Tour ti Ba Ndo na Réveillez-vous! ti mû lege na e ti hinga tënë na ndo ambeni kobela? (Bâ a-article so a fa na lembeti 17). (b) Na yâ Réveillez-vous! ti lango 22 ti janvier 2001, wango wa a mû na ndo gbungo ngangu atâa na gbele akobela so aninga na tele ti zo?

15. Tongana nyen bazengele Paul awara lege ti hon ndo ti awokongo ti lo? Na ye wa alingbi ti dë bê ti e?

16. Tongana mbeni wokongo ti mitele angbâ gi ngbango, a lingbi e sambela teti ye wa? Na ye nyen a lingbi e sala tongana e kiri e tï na yâ wokongo ni?

17. (a) Ngbanga ti nyen a yeke nzoni ti gbu li na ndo lege so Jéhovah ayeke bâ na mbeni wokongo so e yeke tiri peut-être na ni? (b) Aversê wa e lingbi ti bata na li tongana (1) e yeke ndulu ti sala ngonzo? (2) e hinga ti bata yanga ti e pëpe? (3) bê ti e apusu e na mbage ti angia so ayeke sioni?

18. Ngbanga ti nyen a lingbi e sala kamene pëpe ti hunda na a-ancien mungo maboko ti hon ndo ti wokongo ti e?

19. (a) Na lege wa Satan agi ti sala kusala na aye ti buba ti fini na yâ sese so? (b) Ti zia bê kue na Nzapa andu ye wa? Na a lingbi e leke na bê ti e ngangu ti sala nyen?

[Kete tënë na lembeti 17]

Mo dabe mo na a-article so?

Tongana e yeke tiri na mbeni kobela so amû vundu na e, a yeke sala nzoni mingi na e tongana e diko mbaï ti ambeni zo so awara lege ti gbu ngangu na gbele akobela ti ala. Na gbe ni ge, bâ ambeni article ti Tour ti Ba Ndo na ti Réveillez-vous!

“J’ai surmonté mes faiblesses”: Article so afa tongana nyen mbeni ita ahon ndo ti asioni bibe so lo yeke na ni na ndo lo mveni nga na ngangu suingo bê.​—Tour ti Ba Ndo na français ti 1 mai 1990.

“Même un poumon d’acier n’a pu l’empêcher de prêcher.”​—Réveillez-vous! ti 22 janvier 1993.

“Loida, ou la victoire sur le silence.” Article so afa tongana nyen ti luti na gbele kobela ti li.​—Réveillez-vous! ti 8 mai 2000.

“Mon combat contre l’endométriose.”​—Réveillez-vous! ti 22 juillet 2000.

“Mon combat contre la sclérodermie.”​—Réveillez-vous! ti 8 août 2001.

“Ma victoire contre la dépression postnatale.”​—Réveillez-vous! ti 22 juillet 2002.

“Jéhovah Afa na E Bê So Azia Pëpe nga Gbungo Ngangu.” Article so afa tongana nyen mbeni ita-wali agbu ngangu atâa so kobela asala si mbage ti tele ti lo anze.​—Tour ti Ba Ndo ti 1 février 2002.

“Ti sala na ambeni zo adë pasi ti mbi kete.” Article so afa tongana nyen mbeni ita-koli aluti na gbele mbeni kobela so abuba aye na yâ mongoli ti lo si ambeni mbage ti tele ti lo anze.​—Tour ti Ba Ndo ti 1 juillet ngu 2003.

[Foto na lembeti 15]

Tongana a zi e na kua, a lingbi ti duti lege ti ndara ti kiri ti bâ dutingo ti e mveni

[Foto na lembeti 16]

Ye so asi na Loida afa tongana nyen ziango bê kue na Jéhovah ayeke mû maboko na zo ti gbu ngangu (Bâ tënë so ayeke na lembeti 17)

[Foto na lembeti 18]

A lingbi e sala kamene pëpe ti hunda mungo maboko ti hon ndo ti awokongo ti e