Chapitre 52
Jésus amu kobe na azo saki mingi na lege ti ye ti kpene
ABAZENGELE bale oko na ndoni use awara ngia na kusala ti fango tene na ya sese ti Galilée. Fadeso, ngoi kete na peko ti kua ti Jean Wabatizengo zo, ala kiri na tele ti Jésus ti fa na lo peko ti aye ti nzoni so ala sala. Lo baa so tele ti ala awoko na teti so azo mingi ayeke ga na ambeni ayeke gue ala wara même lege ti te kobe pepee. Tongaso, Jésus atene na ala: “Zia e mveni e gue na mbeni ndo so ayeke kpo, si i wo tele ti i da kete.”
Ala mu ngo ti ala, peut-être ndulu na gbata ti Capernaüm, ala gue na mbage ti to ti Jourdain, na mbeni ndo so zo ayeke da pepee, na peko ti kodoro ti Bethsaïda. Azo mingi abaa ala na guengo ni, na ambeni ama tene ni. Tongaso ala kpe na gere ti ala na yanga ti ngu, na tongana ngo ni asi da, azo ni ayeke ku ala.
Tongana Jésus asigigi na ya ti ngo na lo baa gba ti azo so, lo ye ti sala be-nzoni na ala, ngbanga ti so ala yeke tongana angasangbaga so ayeke na zo ti bata ala pepee. Tongaso lo zi kobela ti ala na lo tonda ti fa na ala nda ti tene mingi.
Me ngoi ayeke hon hio, tongaso adisciple ti Jésus aga na ala tene na lo: “Ndo so, zo ayeke da pepee, na ngbonga ahon awe. Mo to ala si ala gue na ayaka na akodoro so ayeke ndulu na ndo so, si ala vo kobe ti ala ti te.”
Me Jésus akiri tene na ala: “I mveni i mu na ala kobe ti te.” Na pekoni, teti so Jésus ahinga awe ye so lo yeke sala, lo tara be ti Philippe na lege ti hunda na lo: “E lingbi vo mapa na ndo wa si azo so alingbi te ye?”
Na le ti Philippe, ala lingbi ti mu kobe na azo so kue la oko pepee. Wungo ti akoli kue ayeke saki oku, na nga awali na amolenge so wungo ti ala kue aga peut-être ndulu na saki bale oko! Tongaso Philippe akiri tene na lo: “Mapa ti denier ngbangbo use [denier oko ayeke futa ti kusala ti lango oko na la ni ka] alingbi na ala pepee, si ala oko oko kue alingbi wara kete mapa.”
Ti fa so ala lingbi ti mu kobe na azo mingi mingi so oko pepee, André atene na lo: “Mbeni molenge ti koli ayeke na ndo so, na lo yeke na mapa ti orge oku na akete susu use”, lo kiri lo tene: “Me so alingbi sala nyen na azo mingi mingi so?”
Ye so asi ngoi kete kozoni na Pâque ti ngu 32 ti ngoi ti e na peko ti ngoi ti pikango ti ngu, tongaso fini pele asi singo. Tongaso Jésus amu yanga na adisciple ti lo ti tene azo ni aduti abungbi tele ti ala na ndo fini pele. Azo ni aduti, ambeni bale oku, ambeni ngbangbo oko. Na pekoni Jésus akamata amapa oku na asusu use so, lo yaa le ti lo na nduzu, lo sambela na ndoni. Na lo fa ya ti amapa na lo kangbi ya ti asusu ni, lo mu ni na adisciple ti lo, na ala kangbi ya ni na azo. Ye ti dongo be ayeke so, zo oko oko ate kobe alingbi na nzala ti lo.
Na ndani Jésus atene na adisciple ti lo: “I bungbi ndulu kobe ni so angba, si mbeni aglisa pepee.” Tanga ti kobe so ala ro asi sakpa bale oko na ndoni use! Matthieu 14:13-21; Marc 6:30-44; Luc 9:10-17; Jean 6:1-13.
▪ Ngbanga ti nyen Jésus agi mbeni ndo so ayeke kpo teti abazengele ti lo?
▪ Jésus ague na adisciple ti lo na ndo wa? Ngbanga ti nyen ala lingbi ti wo tele ti ala ka pepee?
▪ Tongana ngbonga ahon awe, adisciple awa Jésus ti sala nyen? Me lo sala nyen ti bata azo ni?