Chapitre 56

Ye nyen asala si zo aga sioni?

FADESO azo mingi ahon ake Jésus. Ambeni disciple mingi azia ti tambela na lo, na nga, aJuif na Judée agi lege ti fa lo, lege-oko tongana ala sala na ngoi so lo gue na Jérusalem teti Pâque na ngu 31.

A yeke fadeso Pâque na ngu 32. Ti sala ye alingbi na ndia ti Nzapa, Jésus ague na Jérusalem ti bata matanga so. Me, lo sala ye na ndara, teti azo aye ti fa lo. Na pekoni lo kiri na Galilée.

Peut-être Jésus ayeke na Capernaüm tongana aFarizien na awafango ndia ti Jérusalem aga na lo. Ala gi lege ti tene lo ke ndia ti Nzapa. “Ngbanga ti nyen si azo ti mo akpe ndia ti akotara ti i pepee?” ala hunda. “Ala yeke te kobe na asioni maboko ti ala so ala sukula ni pepee.” A yeke pepee mbeni ndia ti Nzapa, me na le ti aFarizien a yeke kota siokpari ti bata pepee ndia ti akotara ti sukula maboko juska na nduzu kozo si ala te kobe.

Jésus akiri tene na sioni tene ti ala pepee, me lo fa na ala so na be ti ala kue ala ke ndia ti Nzapa. Lo tene: “Teti nyen i ke ndia ti Nzapa ngbanga ti tene ti akotara ti i? Nzapa atene: ‘A lingbi mo yekia baba na mama ti mo’, na: ‘Zo so azonga baba wala mama ti lo, a lingbi i fa lo!’ Me i tene: ‘Zo so atene na baba wala na mama ti lo: “Ye so mbi lingbi ti mu na mo ti sala nzoni na mo ayeke ye so mbi mu na Nzapa awe”, na i tene, a yeke ngbanga ti lo ti yekia baba na mama ti lo pepee.’”

Biani, aFarizien afa na azo so nginza, kungba wala mbeni ye kue so azia ni nde tongana matabisi teti Nzapa ayeke ti temple, na a lingbi ti mu ni ti sala na mbeni ye nde pepee. Me, biani, matabisi so azia ni nde angba na maboko ti zo so amu ni na Nzapa. Tongaso, mbeni molenge koli alingbi ti kpe kungba ti lo ti mu maboko na baba na mama ti lo so aga kangba awe, na so peut-être ye amanké ala mingi, tongana lo tene nginza wala kungba ti lo ayeke ‘korban’, so aye ti tene matabisi so amu ni na Nzapa wala na temple.

Ngonzo agbu Jésus teti lo baa so na siobe aFarizien asala ye na mayele na ndia ti Nzapa, lo tene na ala: “I sala si tene ti Nzapa aga ye senge senge ngbanga ti tene ti akotara ti i. I awandendia! Tene so Esaïe afa na iri ti Nzapa ngbanga ti i ayeke mbilimbili, lo tene: ‘Azo so ayekia mbi na yanga ti ala, me be ti ala azia mbi yongoro. Ala sambela mbi senge senge, teti tene so ala fa na azo ayeke ndia ti azo.’”

Peut-être azo mingi akiri na peko kete ti mu lege na aFarizien ti hunda tene na Jésus. Fadeso, tongana aFarizien ahinga lege ti kiri tene pepee na ngangu tene ti Jésus, lo hiri azo mingi ti ga ndulu, lo tene na ala: “A lingbi i ma mbi, na a lingbi i hinga ndani. A yeke ye so ague na yanga ti zo so asala si lo ga sioni pepee; me a yeke ye so asigigi na yanga ti zo so asala si lo ga sioni.”

Na pekoni, tongana ala li na mbeni da, adisciple ahunda na lo: “Mo hinga pepee, be ti aFarizien aso na tele ti mo tongana ala ma tene so?”

Jésus akiri tene na ala: “Ye kue so Baba ti mbi na yayu alu pepee, fade agboto ye so. I zia ala. Ala yeke awaziba so afa lege na awaziba. Tongana waziba afa lege na waziba, fade ala use kue ati na du.”

Be ti Jésus ado tongana Pierre ahunda lo, na iri ti adisciple kue, ti fa na ala mbilimbili ye so asala si zo aga sioni. Jésus akiri tene: “I nga, i de i hinga nda ti tene so pepee? I hinga pepee ye kue so ague na yanga ti zo ahon na ya ti lo, na a si na da ti puru? Me ye so asigigi na yanga ti zo alondo na be ti lo, na ye so asala si lo ga sioni. Teti ye so asigigi na be ti zo ayeke bibe ti sioni, tene ti fango zo, lango sioni, ye ti pitan, nzi, salango tene ti témoin ti wataka na zonga. Ye so asala si zo aga sioni; me ti te kobe na maboko so asukula pepee, ye so asala si zo aga sioni pepee.”

Na ndo so Jésus awa azo pepee ti sukula tele ti ala pepee. Lo ke pepee so a yeke nzoni zo asukula maboko ti lo kozo si lo to wala lo te kobe. Me, Jésus ake ndendia ti amokonzi ti Nzapa so na mayele agi lege ti hon andia ti mbilimbili ti Nzapa tongana ala forcé azo ti bata ndia ti akotara so alondo na Bible pepee. Biani, a yeke kusala ti sioni so asala si zo aga sioni, na Jésus afa so a londo na be ti zo. Jean 7:1; Deutéronome 16:16; Matthieu 15:1-20; Marc 7:1-23; Exode 20:12; 21:17; Esaïe 29:13.

▪ Fadeso azo wa ake Jésus?

▪ A-Farizien aklame Jésus na tene wa? Me, na le ti Jésus, na lege wa si aFarizien ake ndia ti Nzapa na be ti ala kue?

▪ Jésus afa so aye wa asala si zo aga sioni?