Chapitre 111

Fa ti la ti ndani

FADESO a yeke mardi na peko ti midi. Tongana Jésus aduti na ndo hoto ti Oliviers, na lo baa temple na gbele lo, Pierre, André, Jacques, na Jean aga na lo tongana mbeni zo ayeke pepee. Ala bi be ti ala na temple ni, teti Jésus afa na ala fade so tene oko ayeke ngba ande na ndo ti mbeni pepee.

Atene mingi agbu be ti ala tongana ala ga ndulu na Jésus. Ngoi kete kozoni, lo sala tene ti “singo” ti lo, na ngoi so fade “Molenge ti zo asi”. Kozoni nga, lo sala tene na ala ti “hunzingo ti aye ti sese so”. Abazengele aye mingi ti hinga nda ti tene ni.

Ala tene: “Tene na e, fade ye so [so aga na futingo ti Jérusalem na temple ti lo] aga lawa, na fade fa ti singo ti mo, na hunzingo ti aye ti sese so, ayeke nyen?” Biani, ala hunda ye ota. Kozoni, ala ye ti hinga tene na ndo ti futingo ti Jérusalem na temple ni, na pekoni tene na ndo ti singo ti Jésus na ngangu ti Royaume, na ndani tene na ndo ti hunzingo ti aye ti sese so.

Kiringo tene ti Jésus ayo, me na ya ni lo kiri tene na ambage ota kue ti hundango tene ti ala. Lo mu mbeni fa si azo alingbi ti hinga lawa si aye ti aJuif ayeke hunzi; me lo fa aye mingi ahon. Lo mu nga mbeni fa ti zingo na azo so ayeke ga ande adisciple ti lo si ala lingbi hinga ala duti na ngoi ti singo ti lo na ndulu na hunzingo ti aye kue ti sese so.

Tongana ngoi ayeke hon, abazengele abaa tongana nyen tene so Jésus afa kozoni aga taa tene. Biani, aye so lo sala tene ni kozoni atonda ti ga taa tene na ngoi ti ala. Tongaso, achrétien so angba na fini ngu bale ota na ndoni mbasambala na pekoni, na ngu 70, be ti ala ado pepee tongana afuti aye ti aJuif na temple ni.

Ye oko, singo ti Christ na hunzingo ti aye ti sese so asi na ngu 70 ti ngoi ti e pepee. Singo ti lo na ngangu ti Royaume asi ngu mingi na pekoni. Me lawa? Tongana e gi nda ti tene so Jésus afa kozoni e lingbi ti hinga kiringo tene so.

Jésus afa kozoni so fade “ama tene ti bira na atene nde nde ti bira”. Lo tene: “Fade mara alondo ti ke mbeni mara”, na fade kota nzala asi, na sese ayengi na ndo nde nde na akobela so afuti kodoro asi. Fade azo ake adisciple ti lo na afa ala. Aprophète ti wataka ayeke londo na fade ala handa azo mingi. Kengo ndia ayeke wu, na ndoyee ti azo mingi mingi ayeke ga de. Na ngoi oko so, fade afa nzo tene ti Royaume ti Nzapa tongana tene ti témoin na amara kue.

Ataa tene so Jésus afa kozoni aga pepee kue taa tene kozoni na futingo ti Jérusalem na ngu 70, kue ayeke ga taa tene na ngoi ti singo ti lo na hunzingo ti aye ti fadeso. Tongana zo abaa mbilimbili akpale so asi na ndo sese atondani na 1914, a fa na gigi so kota tene so Jésus afa kozoni atonda ti ga taa tene alondo na ngu so.

Mbeni mbage ti fa so Jésus amu ayeke singo ti “sioye so asala si ye aga yangbato”. Na ngu 66 ti ngoi ti e, sioye so ayeke “aturugu” ti Rome so angoro tele ti Jérusalem na awoko gbagba ti temple. “Sioye” so aluti na ndo so a lingbi ti luti da pepee.

Tongana fa ni kue aga taa tene, sioye so ayeke Bungbi ti Amara na bungbi so amu place ti lo, ONU. Chrétienté abaa bungbi so aleke ni ti ga na siriri na ndo sese kue tongana ye so amu place ti Royaume ti Nzapa. So sioye biani! Na pekoni, angangu ti poroso so abungbi na ONU ayeke londo ti ke chrétienté (so Jérusalem aduti fa ti lo giriri) na fade ala futi lo.

Tongaso Jésus afa kozoni tene so: “Fade kota ye ti vundu aga tongana so ade aga pepee atondani na ngoi so asala sese juska fadeso, na fade ye tongaso alingbi ti si mbeni la oko pepee.” Futingo ti Jérusalem na ngu 70 ti ngoi ti e ayeke biani kota ye ti vundu, na azo ahon koto oko akui. Me ye ti vundu so ahon pepee moa na ngoi ti Noé so amu ndo le sese kue. Tongaso tene so Jésus afa kozoni ade aga taa tene kue pepee.

Na beku na la ti ndani

Mardi, lango 11 ti Nisan, aga ndulu ti kondani. Jésus na abazengele ti lo angba ti sala lisoro na ndo fa ti singo ti lo na ya ngangu ti Royaume na hunzingo ti aye ti sese so. Jésus azingo na ala ti tomba peko ti aChrist ti wataka pepee. Lo tene fade agi ti fa lege ti “kirikiri même na azo so Nzapa ahiri ala na gigi”. Me, lege-oko tongana angoualo so abaa ndo yongoro mingi, fade azo so asoro ala ayeke bungbi tele ti ala na ndo so taa kobe ti yingo ayeke, so aye ti tene, na taa Christ na la ti singo ti lo so le abaa pepee. Fade mbeni zo ahanda ala pepee wala ala sala be-oko na mbeni Christ ti wataka pepee.

A-Christ ti wataka alingbi ti si na azo gi na lege so le abaa. Nde na so, azo alingbi ti baa Jésus pepee na la ti singo ti lo. Lege-oko tongana so lo tene lo mveni, la ti singo ti lo ayeke duti ande na ngoi ti kota vundu ti mbai kue ti azo: “Fade la avuko, na nze asu pepee.” Biani, a yeke duti ngoi ti kota bingo na mbai kue ti azo. Fade ye asi lege-oko tongana la asu na kota la pepee, wala nze asu na bi pepee.

Jésus akiri atene: “Na fade ayengi angangu ti ayayu.” Na lege so lo fa na gigi fade ayayu so le ti azo abaa ayeke mu mbito na azo. Ayayu ayeke duti gi ndo ti andeke mbeni pepee, fade alapara ti bira, afusée nga na aye ti baa senda-nduzu ayeke si singo na nduzu. Mbito na salango ye ti ngangu na zo ayeke gue na li ni mingi ahon ngoi kue ti kozoni na mbai ti azo.

A yeke teti aye so si Jésus atene, fade “ye ti vundu aga na popo ti amara na ndo sese, na ala hinga lege pepee ngbanga ti toto ti kota ngu ti ingo na ti mapo ni, na fade azo awoko ngbanga ti mbito so asala ala tongana ala baa ye so ayeke ga na ndo sese”. Biani, lege-oko tongana Jésus atene ni, fade ngoi ti kota bingo teti fini ti azo so ayeke gue na li ni juska a si na ngoi so “fade fa ti Molenge ti zo asi na yayu, na la ni ka fade amara kue ti sese apika tele ti ala mveni na vundu”.

Me fade azo kue ayeke toto na vundu pepee na la ni so ‘Molenge ti zo aga na ngangu’ ti futi aye ti sioni ti fadeso. “Azo so ahiri ala na gigi”, azo 144 000 so ayeke komande ande lege-oko na Christ na ya Royaume ti lo so ayeke na yayu, ayeke toto pepee, na afo ala, azo so Jésus ahiri ala kozoni “ambeni ngasangbaga” ti lo, ayeke toto nga pepee. Ataa ala duti na fini na ngoi ti kota bingo ti mbai kue ti azo ti sese, ala yeda na wango so ti Jésus: “Me tongana ye so atonda ti si, i luti, i yaa li ti i na nduzu, teti la ti zi i aga ndulu awe.”

Ti mu lege na adisciple ti lo so ayeke duti na fini ande na la ti ndani ti hinga nzoni ahon so ndani aga ndulu, Jésus amu tapande so: “Baa keke ti fige, na tanga ti keke kue: tongana afini maboko ni aton, i hinga ngoi ti kota la aga ndulu. Tongaso nga, tongana i baa ye so kue, i hinga royaume ti Nzapa aga ndulu awe. Biani, mbi tene na i: Fade wagame so ahon kete pepee juska ye so kue asi.”

Tongaso, tongana adisciple ayeke baa ambage nde nde ti fa ni atonda ti si, ala lingbi hinga so ndani ti aye ti fadeso aga ndulu awe na Royaume ti Nzapa ayeke ndulu ti lungula aye ti sioni kue. Biani, ndani ayeke si ande na ya fini ti azo so abaa aye so kue so Jésus asala tene ni kozoni! Jésus azingo na adisciple so ayeke duti na fini ande na la ti ndani so ayeke duti sioni mingi tongaso:

“Me i bata nzoni, wala peut-être tengo kobe wala nyongo samba mingi, na kusala ti leke ye ti fini so ane be ti i, na la ni so aga na ndo i tongana son. Teti fade la ni so aga tongana son na ndo ala kue so aduti na le ti sese kue. Me, i bata na ngoi ni kue, i sambela, si i lingbi wara ngangu ti kpe ye kue so fade asi, na ti luti na gbele Molenge ti zo.”

Amasia ti ndara na amasia ti buba

Jésus akiri tene na adisciple ti lo so ahunda mbeni fa ti la ti singo ti lo na ya ngangu ti Royaume. Fadeso, lo fa nda ti ambeni mbage ti fa ni na lege ti atoli wala atapande ota.

Azo so ayeke duti na fini na la ti singo ti lo ayeke baa ande atoli ota so aga taa tene. Lo tonda ti sala tene ti kozo tapande na lege so: “Na la ni ka, fade royaume ti yayu ayeke tongana amasia bale oko so akamata lampe ti ala na ala sigigi ti te fini-koli. Amasia oku ayeke buba, na ambeni oku ayeke na ndara.”

Na lege ti tene so “fade royaume ti yayu ayeke tongana amasia bale oko”, Jésus aye ti tene pepee so mbeni mbage ti azo so ayeke ga ahéritier ti Royaume ti yayu ayeke awabuba na so mbeni mbage ayeke awandara! Oko pepee, me lo ye ti tene so na lege ti Royaume ti yayu, mbeni ye ayeke tongaso wala tongaso, wala aye so andu Royaume ayeke duti ande tongana ye tongaso wala tongaso.

Amasia bale oko aduti fa ti achrétien kue so ayeke, wala so atene ala yeke, mu mbage ti ala na ya Royaume ti yayu. A yeke na la ti Pentecôte ti ngu 33 ti ngoi ti e so amu kongrégation ti achrétien ti sala mariage na Fini-koli so awara gloire, Jésus Christ, lo so ayaa lo na du-kua. Me a yeke sala mariage ni ande na yayu na mbeni ngoi so azo ahinga ni pepee.

Na ya parabole ni, amasia bale oko asigigi ti te fini-koli na ti duti na popo ti azo so ague na matanga ti mariage. Tongana lo si, ala yeke za lampe ti ala na ndo lege ti azo so ague na matanga ti mariage, tongaso ala mu na lo gunda tongana lo gue na fini-wali ti lo na da so aleke ni teti lo. Ye oko, Jésus atene: “Teti ala so ayeke buba, ala gue na lampe ti ala, me ala gue na mafuta ni pepee. Me ala so ayeke na ndara, ala kamata mafuta na ta ti ala, ala gue na ni lege-oko na lampe ti ala. Tongana fini-koli ade na lege, lango asala ala mingi, na ala kue alango.”

Singo ti koli so aninga afa so singo ti Christ tongana Gbia so akomande ayeke duti ande na mbeni ngoi so ade yongoro mingi. Jésus ako na ndo mbata ti komande ti lo gi na ngu 1914. Na ya bi so aninga mingi kozoni na kpale so, amasia ni kue alango. Me afa ngbanga na li ti ala teti ye so pepee. A fa ngbanga na ndo amasia ti buba teti so ala yeke na mafuta na ta ti ala pepee. Jésus afa lege so amasia azingo na lango kozoni na singo ti fini-koli: “Me na bebi, mbeni zo atene na kongo: ‘Baa fini-koli ayeke ga! I sigigi i te lo.’ Tongaso amasia so kue alondo, ala leke meche ti lampe ti ala. Ala so ayeke buba atene na ala so ayeke na ndara: ‘I mu na e mbeni mafuta ti i, teti lampe ti e ayeke mingo.’ Me ala so ayeke na ndara, ala kiri tene: ‘Peut-être mafuta ni alingbi na e na i pepee. Tongaso i gue na ala so aka ye, i vo ti i mveni.’”

Mafuta ayeke fa ti ye so amu lege na ataa chrétien ti su tongana asungoye. A yeke Mbeti ti Nzapa, so achrétien agbu na ngangu, nga yingo ti nzoni-kue so amu na ala maboko ti gbu nda ti Mbeti so. Mafuta ti yingo amu lege na amasia so ayeke na ndara ti za lumière ti yamba fini-koli na ngoi so azo ague na matanga ti mariage. Me bungbi ti amasia ti buba ayeke na ya ala mveni pepee, na ya ta ti ala, mafuta ti yingo so alingbi. Tongaso, Jésus asala tene ti ye so asi:

“Tongana [amasia ti buba] ayeke gue ti vo [mafuta], fini-koli asi, na amasia so aleke ti ala awe, ala li na ya da lege-oko na lo na matanga ti mariage; na a kanga yanga ti da. Na pekoni, ambeni masia so aga nga, ala tene: ‘Seigneur, seigneur, lungula yanga ti da na e!’ Me lo kiri tene: ‘Biani, mbi hinga i pepee.’ ”

Na peko ti singo ti Christ na ya Royaume ti lo so ayeke na yayu, ataa chrétien so asa yingo na ndo ala, bungbi ti amasia so ayeke na ndara, azingo na lege ti matabisi ti ala ti kangbi lumière na ya sese so ayeke na ya bingo ti gunda Fini-koli so akiri awe. Me azo so amasia ti buba aduti fa ti ala ayeke ndulu pepee ti yamba lo na tene ti gunda so. Tongaso, na ngoi so alingbi, Christ azi na ala yanga ti da ti matanga ti mariage so ayeke na yayu pepee. Lo zia ala na gigi, na ya bingo ti sese so avuko mingi, ti wara futingo lege-oko na ambeni zo kue so ake ndia. Jésus akondani na tene so: “Tongaso i bata, teti i hinga la ni wala ngbonga ni pepee.”

Toli ti atalent

Na ndo hoto ti Oliviers Jésus angba ti sala lisoro na abazengele ti lo na lege ti mbeni toli. Use ni na ya molongo ti atoli ota so lo fa. Ambeni lango kozoni, na ngoi so lo yeke na Jéricho, lo fa toli ti amine ti fa biani so Royaume ade yongoro. Toli so lo fa fadeso, akpa kozo toli ni na lege ti ambeni ye, me a sala tene ti ambeni kusala so azo ayeke sala ande na la ti singo ti Christ na ya ngangu ti Royaume. Toli ni afa so tongana ala de na ndo sese adisciple ti lo alingbi ti sala kua si “ye ti lo” aga mingi.

Jésus atondani tongaso: “Teti [aye so andu Royaume ni] ayeke tongana zo so ague na mbeni kodoro nde, kozoni lo hiri angbaa ti lo, lo zia ye ti lo na ti ti ala.” Jésus ayeke koli so, kozoni si lo gue na mbeni kodoro wande so ayeke yayu, amu aye ti lo na angbaa ti lo so ayeke adisciple so alingbi ti duti na yayu na ya Royaume. Aye ti lo so ayeke kungba so zo ayeke na ni pepee, me a duti fa ti mbeni yaka so ade ni, yaka so Jésus lo mveni alu ye da ti tene a le adisciple mingi.

Jésus amu aye ti lo na angbaa ti lo ngoi kete kozo si lo gue na yayu. Lo sala ni na lege wa? Lo mu yanga na ala ti ngba lakue ti sala kua na ya yaka so ade ni na lege ti fa tene ti Royaume juska na mbeni mbage ti sese so ayo. Tongana so Jésus atene: “Lo mu talent oku na ngbaa oko, na talent use na mbeni, na talent oko na mbeni, alingbi na ngangu ti ala oko oko, na lo gue na mbeni sese nde.”

Atalent miombe, so ayeke aye ti Christ, lo kangbi ni alingbi na ngangu na lege ti yingo ti angbaa ti lo. Angbaa aduti fa ti abungbi nde nde ti adisciple ti lo. Na kozo siècle, bungbi ti azo so awara talent oku so, e lingbi ti tene so abazengele ayeke na popo ti ala. Jésus atene na pekoni so ngbaa so awara talent oku na lo so awara talent use asala si ala wu lege use na lege ti fango tene ti Royaume ti ala na salango adisciple. Ye oko, ngbaa so awara talent oko lo gue lo honde ni na ya sese.

Jésus azia mbeni tene da: “Na ndani lango mingi mingi mveni ti angbaa so akiri, lo diko tene ti nginza na ala.” A yeke gi na ngoi ti e, ngu saki oko na ndoni ngbangbo gumbaya na pekoni, si Christ akiri ti diko tene ti nginza ni. Tongaso, a yeke biani “na ndani lango mingi mingi”. Jésus afa nda ti tene so na pekoni:

“Lo so awara talent oku aga na ambeni talent oku, lo tene: ‘Mveni, mo mu na mbi talent oku, baa mbi wara ambeni talent oku na ndoni.’ Mveni ti lo atene: ‘So ayeke nzoni, ngbaa so ayeke nzoni na be-taa-zo! Mo yeke be-taa-zo na ndo akete ye, fade mbi zia ye mingi na ti ti mo ti bata. Mo ga mo duti na ngia na mveni ti mo.’ ” Lege-oko nga ngbaa so amu na lo talent use, lo ga na ambeni use na ndoni, lo wara gunda na anzo ye lege-oko na kozo ngbaa ni.

Me tongana nyen si angbaa so aduti be-taa-zo ali na ya ngia ti mveni ti ala? Ngia ti mveni ti ala, so ayeke Jésus Christ, ayeke ti wara Royaume na ngoi so lo gue na mbeni kodoro wande na Baba ti lo na yayu. Ti angbaa so aduti be-taa-zo na ngoi ti e ti laso, ala yeke na kota ngia mingi ti baa so amu na ala kota kungba so abaa tene ti Royaume, na tongana kpengo loro ti ala na ndo sese ahunzi awe, ala yeke wara kota ngia mingi ti tene ala londo na popo ti awakinda ti duti na ya Royaume ti yayu. Me, e lingbi tene nyen na ndo ngbaa ota ni so?

“Mveni, mbi hinga, mo yeke zo ti sala ngangu na zo”, ngbaa so adema tele ti lo tongaso. “Ni laa mbito asala mbi, mbi gue mbi honde talent ti mo na ya sese. Baa, mo yeke na ye so ayeke ti mo.” Ngbaa so ake na be ti lo ti sala kua ti fa tene na ti sala si azo aga adisciple na yaka so ade ni awe. Ndani laa, mveni ahiri lo “ngbaa ti sioni na ti goigoi”, na lo sala tene ti ngbanga so na ndo lo. “I lungula talent oko so na maboko ti lo. (...) I bi ngbaa ti buba so na bingo ti gigi. A yeke ka si lo yeke toto na lo yeke te pembe ti lo.” Tongana abi ala na gigi awe, amembre ti bungbi ti sioni ngbaa so ayeke na ngia na lege ti yingo oko pepee.

So ayeke mbeni kota tene teti ala kue so atene ala mu peko ti Christ. Tongana ala ye ti wara gunda na ti wara anzoye na mbage ti lo, si abi ala na gigi na ndo so avuko pepee, si ala kui teti lakue lakue pepee, ala lingbi ti sala kua ti sala si aye ti Mveni ti ala ti yayu aga kota na lege ti mungo mbage ti ala mingi na kusala ti fango tene. Mo yeke sala kusala so lakue?

Tongana Christ asi na ngangu ti Royaume

Jésus angba ti duti lakue na abazengele ti lo na ndo hoto ti Oliviers. Ti kiri tene na hundango tene ti ala teti mbeni fa ti singo ti lo na hunzingo ti aye ti sese so, lo fa na ala fadeso ndangba ni na lege ti mbeni tapande ota. Jésus atondani tongaso: “Tongana Molenge ti zo asi na ya gloire ti lo, na a-ange kue na tele ti lo, na la ni so fade lo duti na ndo ngende ti gloire ti lo.”

Azo alingbi pepee ti baa a-ange na ya gloire ti ala na yayu. Tongaso azo alingbi ti baa nga pepee singo ti Molenge ti zo, Jésus Christ, na a-ange na tele ti lo. Singo so asi na ngu 1914. Me ndani nyen? Jésus afa ndani: “Fade amara kue abungbi na gbele lo, na lo kangbi ya ti ala, lege-oko tongana zo ti batango anyama akangbi popo ti angasangbaga na angasa. Fade lo zia angasangbaga na mbage ti lo ti koli, me lo zia angasa na mbage ti lo ti wali.”

Jésus afa ye so ayeke si na azo so ayeda na ala: “Fade gbia atene na ala so ayeke na mbage ti lo ti koli: ‘Ga, i so tene nzoni ti Baba ti mbi ayeke na ndo i, i ga ahéritier ti royaume so aleke teti i giriri na la ni so asala gere ti sese.’” Angasangbaga na ya toli so ayeke komande na tele ti Christ na yayu pepee, me fade ala ga ahéritier ti Royaume na lege so ala yeke duti ande na sese na gbe ni. “A sala gere ti sese” tongana Adam na Eve adu amolenge so alingbi ti wara nzoni na lege ti ye so Nzapa aleke ti ton azo.

Me ngbanga ti nyen akangbi angasangbaga na mbage ti koli ti Gbia ni, ye so afa so lo yeda na ala? Gbia akiri tene da: “Mbi yeke na nzala, na i mu na mbi kobe; mbi yeke na nzala ti ngu, na i mu na mbi ngu. Mbi yeke wande, na i kamata mbi na ya da; mbi yeke na bongo pepee, na i mu bongo na mbi. Mbi yeke na kobela, na i ga ti baa mbi. Mbi yeke na da ti kanga, na i ga ti baa mbi.”

Teti so angasangbaga ayeke na ndo sese, ala ye ti hinga tongana nyen ala lingbi ti sala nzo kusala so teti Gbia ti ala na yayu. Ala hunda na lo: “Seigneur, e baa mo na nzala lawa? si e mu na mo kobe; wala e baa mo na nzala ti ngu lawa? si e mu na mo ngu. E baa mo tongana wande lawa? si e kamata mo na ya da; wala e baa mo yeke na bongo pepee lawa? si e mu bongo na mo. E baa mo na kobela wala na ya da ti kanga lawa? si e ga ti baa mo.”

Gbia atene na ala: “Biani mbi tene na i, teti i sala ye so na mbeni zo so ayeke kete na popo ti aita ti mbi, i sala so na mbi.” Aita ti Christ ayeke tanga ti 144 000 so ayeke na ndo sese so ayeke komande ande na tele ti lo na yayu. Jésus atene tongana zo asala nzoni na ala, a yeke lege-oko tongana asala nzoni na lo.

Na pekoni, Gbia asala tene na angasa. “I zia mbi, i so zonga ayeke na li ti i, i gue na wa ti lakue lakue so aleke awe teti Diable na a-ange ti lo. Teti mbi yeke na nzala, na i mu na mbi kobe pepee, mbi yeke na nzala ti ngu, na i mu na mbi ngu pepee. Mbi yeke wande, na i kamata mbi na ya da pepee; bongo ayeke na mbi pepee, na i mu na mbi bongo pepee; mbi yeke na kobela, na mbi yeke na da ti kanga, na i ga ti baa mbi pepee.”

Angasa adema tele ti ala tongaso: “Seigneur, lawa e baa mo yeke na nzala, wala na nzala ti ngu, wala wande, wala lawa e baa mo yeke na bongo pepee, wala na kobela, wala na da ti kanga? si e sala na mo pepee.” A fa ngbanga ti sioni na ndo angasa na lege ti tene oko so amu lege ti fa ngbanga ti nzoni na ndo ti angasangbaga. Jésus akiri tene na ala: “Teti i sala ye so pepee na mbeni zo so ayeke kete na popo ti aita ti mbi, i sala so na mbi pepee.”

Tongaso singo ti Christ na ngangu ti Royaume, ngoi kete kozoni na hunzingo ti aye ti sioni ti sese so na ya kota ye ti vundu, ayeke ngoi ti fa ngbanga. Angasa “ayeke gue na futingo ti lakue lakue, me azo ti mbilimbili [angasangbaga] ayeke gue na ya fini ti lakue lakue.” Matthieu 24:2–25:46; 13:40, 49; Marc 13:3-37; Luc 21:7-36; 19:43, 44; 17:20-30; 2 Timothée 3:1-5; Jean 10:16; Apocalypse 14:1-3.

▪ Ye nyen apusu abazengele ti hunda tene so? Me ala bi be ti ala na tene wa nga?

▪ Mbage wa ti prophétie ti Jésus aga taa tene na ngu 70, me ye nyen asi na la ni ka pepee?

▪ Kozo ngoi so prophétie ti Jésus aga taa tene ayeke so wa? Me a yeke ga taa tene kue lawa?

▪ Na kozo ngoi ni, nga na ngoi ti ndani, sioye ayeke nyen?

▪ Ngbanga ti nyen kota ye ti vundu aga taa tene kue pepee na la ti futingo ti Jérusalem?

▪ Ye nyen so asi na ndo sese kue afa so Christ asi awe?

▪ Lawa fade ‘amara kue ti sese apika tele ti ala mveni na vundu’? Na ngoi ni so adisciple ti Christ ayeke sala nyen?

▪ Jésus amu tapande wa ti mu maboko na azo so ayeke ga adisciple ti lo ande ti hinga nzoni ahon so ndani aga ndulu awe?

▪ Jésus amu wango wa na adisciple ti lo so ayeke duti na fini na la ti ndani?

▪ Amasia bale oko aduti fa ti azo wa?

▪ Amu zendo ti mariage ti kongrégation na fini-koli ni lawa? Me fini-koli asi ti gue na fini-wali ti lo na matanga ti mariage lawa?

▪ Mafuta ni aduti fa ti nyen? Amasia so ayeke na ndara alingbi ti sala nyen teti ala yeke na mafuta so?

▪ Asala matanga ti mariage na ndo wa?

▪ Amasia ti buba aglisa futa wa so ayeke nzoni mingi? Na ye nyen asi na ala?

▪ Kota tene wa afa na e na ya toli ti atalent?

▪ Angbaa so ayeke azo wa? Ye so amu na ala ti sala kua na ni ayeke nyen?

▪ Lawa si mveni so akiri ti diko tene ti nginza? Na ye nyen lo wara?

▪ Ngia so angbaa so ayeke be-taa-zo ali na ya ni ayeke so wa? Ye nyen asi na ngbaa ota ni, ngbaa ti sioni?

▪ Ngbanga ti nyen azo ayeke baa na le ti ala pepee singo ti Christ? Lo sala kusala wa na ngoi so?

▪ Na lege wa angasangbaga aga ahéritier ti Royaume?

▪ A “sala gere ti sese” lawa?

▪ Na lege ti nyen si afa ngbanga na ndo zo ti ga ngasangbaga wala ngasa?