A wara sioni na li ti ‘ngbâa’ ni pëpe!

“Ngoi ni asi awe ti komanse fango ngbanga na da ti Nzapa.”​—1 PIERRE 4:17.

NA PENTECÔTE ti ngu 33, Jésus azia mbeni “ngbâa” ti mû kobe na tâ ngoi ni na “azo ti da ti Lo”. A si na ngu 1914, a zia Jésus tongana Gbia. Kete na pekoni, ngoi ni asi awe ti bâ kusala ti “ngbâa” so. Na yâ ye mingi, lo bâ so ngbâa ni aduti “be-ta-zo” nga na “ndara”. Tongaso, lo zia lo na ndo “aye ti Lo kue”. (Matthieu 24:45-47, NW ). Ye oko, mbeni ngbâa ti sioni ayeke nga dä so aduti pëpe be-ta-zo nga na ndara.

‘Ngbâa ti sioni so’

² Jésus asala tënë ti ngbâa ti sioni so hio na pekoni so lo sala tënë ti “ngbâa be-ta-zo na ti ndara”. Lo tene: “Me tongana boi [wala ngbâa] ti sioni so atene na bê ti lo, Mveni ti mbi aga fade pëpe; na lo komanse ti pika afon lo boi, na ti te na ti nyon na popo ti ala so sämba asala ala, fade mveni ti boi so asi na lâ ni so lo yeke ku lo pëpe, na l’heure ni so lo hinga pëpe, na fade lo se lo na chicotte ngangu, lo zia lo na popo ti awandendia. Fade azo atoto na ngule, na ala te pembe ti ala kâ.” (Matthieu 24:48-51). Tongana a sala tënë ti ‘ngbâa ti sioni so’, a ye ti gboto lê na ndo tënë so Jésus atene kozo na ndo ngbâa be-ta-zo na ti ndara, ti fa so biani ‘ngbâa ti sioni’ so alondo lani na popo ti ngbâa be-ta-zo ni.a Ye so asi tongana nyen?

³ Kozoni na ngu 1914, azo mingi ti bungbi ti ngbâa be-ta-zo ni ayeke lani na ngangu beku ti tingbi na Fini-koli ti ala na yayu tâ gi na ngu ni so, me abeku ti ala aga tâ tënë pëpe. Ndali ti ye so nga na ti ambeni ye nde so asi, ala mingi awara vundu na yâ bê ti ala na ambeni ato nda ti sala ngonzo. Na popo ti ala, ambeni ato nda ni na lege ti atënë ti yanga ti ala ti “pika” angbele ita ti ala so, na ti bungbi oko na “ala so sämba asala ala”, so ti tene abungbi ti vorongo ti Chrétienté.​—Esaïe 28:1-3; 32:6.

⁴ A bâ na nda ni so angbele Chrétien so ayeke ‘ngbâa ti sioni’, na Jésus ase ala “ngangu”. Tongana nyen? Lo ke ala, na ala girisa beku ti ala ti gue na yayu. Ye oko, a futi ala hio na pekoni pëpe. Kozoni kue, a lingbi ala hon na yâ mbeni ngoi so ala yeke toto na ngule na ala yeke te pembe ti ala na yâ “bingo” so ayeke na “gigi” ti kongregation ti aChrétien (Matthieu 8:12). Ti londo na lâ ni so, ambeni kete wungo ti ala so a sa yingo na ndo ti ala awara mara ti sioni bibe so nga, na fango tele ti ala mveni tongana ‘ngbâa ti sioni’. Ambeni na popo ti “ambeni ngasangbaga” asala tongana ala na dutingo be-ta-zo pëpe (Jean 10:16). Mara ti awato kue ti Christ tongaso ayeke gue gi na yâ oko “bingo ti gigi” so na lege ti yingo.

⁵ Ye oko, ngbâa be-ta-zo na ti ndara ahon lani na yâ a-oko tara legeoko na ‘ngbâa ti sioni so’. Me ahon ti sala ngonzo, ala zia si aye so asi aleke bango ndo ti ala (2 aCorinthien 13:11). Ndoye ti ala teti Jéhovah nga teti aita ti ala akiri akpengba na pekoni. Na nda ni, ala ga “pilier na gere ti tene-biani” na yâ angoi ti wusuwusu ti “lâ ti nda ni” so.​—1 Timothée 3:15; 2 Timothée 3:1.

Amasia ti ndara na ti buba

⁶ Na pekoni so lo sala tënë ti ‘ngbâa ti sioni so’, Jésus amû aparabole use ti fa ngbanga ti nyen ambeni Chrétien so a sa yingo na ndo ti ala ayeke duti be-ta-zo nga na ndara, me na oko ngoi ni, ambeni ayeke duti tongaso pëpe.b Ti fa nene ni ti duti na ndara, lo tene: “Fade royaume ti yayu ayeke tongana amasia bale-oko so akamata lampe ti ala, na ala sigigi ti tê fini-koli. Amasia oku ayeke buba, na ambeni oku ayeke na ndara. Teti ala so ayeke buba, ala gue na lampe ti ala, me ala gue na mafuta ni pëpe. Me ala so ayeke na ndara, ala kamata mafuta na ta ti ala, ala gue na ni legeoko na lampe ti ala.” (Matthieu 25:1-4). Amasia bale-oko so adabe ti e na aChrétien so a sa yingo na ndo ti ala kozoni na ngu 1914. Na lege ti dikongo ye ti ala, ala bâ so fini-koli ni, Jésus Christ, ayeke ndulu ti si. Tongaso, ala “sigigi” ti tingbi na lo, na fango na mbito pëpe so fade “ngoi ti aGentil” ayeke hunzi na ngu 1914.​—Luc 21:24.

⁷ Tënë ti ala ayeke na lege ni. Ngoi ti aGentil ahunzi biani na ngu 1914, na Royaume ti Nzapa so a mû na Christ Jésus ato nda ti sala kusala. Ye oko, ye ni asi na yayu kâ, so zo alingbi bâ ni pëpe. Na ndo sese, azo ato nda ti bâ pasi ti “vundu” so Bible afa tënë ti gango ni kozo (Apocalypse 12:10, 12). Mbeni ngoi ti tara ato nda ni na pekoni. Teti so ala gbu nda ti aye ni kue polele pëpe, aChrétien so a sa yingo na ndo ti ala abâ ti ala atene ‘fini-koli ni asi hio pëpe’. (Fini Mbuki, 2001). Teti ala hinga pëpe ye so ala lingbi ti sala, nga sese ayeke sala ngangu na ala, ala mingi ato nda ti kiri na peko, na kusala ti fango tënë so a leke ni ayeke même ndulu ti kaï kue. Legeoko na amasia ti parabole ni, na lege ti yingo “lango asala ala mingi, na ala kue alango”. A yeke ye so lani ala so atene ala yeke aChrétien me so aduti be-ta-zo pëpe asala na peko ti kuâ ti abazengele ti Jésus.​—Matthieu 25:5; Apocalypse 11:7, 8; 12:17.

⁸ Na pekoni, na ngu 1919 mbeni ye so ala ku tele ti ala na ni pëpe asi. E diko: “Me na bebi, mbeni zo atene na kongo, Bâ, fini-koli ayeke ga! I sigigi ti tê lo. Tongaso amasia so kue alondo, ala leke mèche ti lampe ti ala.” (Matthieu 25:6, 7). Tâ na ngoi so zo abâ atene mbeni beku oko ayeke dä pëpe, a mä mbeni hiringo ndo so ahunda azo ti londo ti mû kusala! Na ngu 1918, Jésus, “Wakua ti mbele ni”, asi na temple ti Jéhovah na lege ti yingo ti bâ kusala ti kongregation ti Nzapa na ti sukula ni (Malachie 3:1). Ti fadeso, a yeke ti aChrétien so a sa yingo na ndo ti ala ti sigigi na ti tingbi na Jésus na yâ asedu ti temple so na sese ge. Ngoi ni asi awe teti ala ti “su” lumière ti ala.​—Esaïe 60:1; aPhilippien 2:14, 15.

⁹ Me bâ so na yâ parabole ni, ambeni masia ni ayeke na kpale. Jésus atene: “Ala so ayeke buba atene na ala so ayeke na ndara, I mû na e mbeni mafuta ti i, teti lampe ti e ayeke mingo.” (Matthieu 25:8). Tongana mafuta ayeke pëpe, alampe ni ayeke za pëpe. Mafuta ti lampe ni adabe ti e na Tënë ti Nzapa so ayeke tâ tënë nga na yingo vulu ti lo, aye so kue ti mû ngangu na atâ wavorongo Nzapa ti za lumière ti ala (Psaume 119:130; Daniel 5:14). Kozoni na ngu 1919, aChrétien ti ndara so a sa yingo na ndo ti ala agi na bê kue ti hinga ye so Nzapa ayeke ku na mbage ti ala atâa so ala woko teti mbeni ngoi. Ni la, a sala si tongana ala mä tisango ndo ti londo ti za lumière, ala leke tele ti ala awe ti sala ni.​—2 Timothée 4:2; aHébreu 10:24, 25.

¹⁰ Ye oko, ambeni zo so a sa yingo na ndo ti ala aleke tele ti ala lani pëpe ti zia ambeni ye wala ti sala kusala na bê kue, atâa so ala ye na bê kue ti duti na tele ti Fini-koli ni. Ni la, tongana ngoi ni asi ti londo ti fa nzo tënë na wâ, ala de ti leke tele ti ala pëpe (Matthieu 24:14). Ala tara même ti sala si aita ti ala so ayeke na wâ akiri na peko na yâ kusala ti ala, na hundango na ala na lege ti fä ti mû mbeni mafuta ti ala ni. Na yâ parabole ti Jésus, tongana nyen amasia ti ndara akiri tënë? Ala tene: “Peut-être mafuta ni alingbi na e [nga] na i pëpe; tongaso i gue na ala so akä ye; i vo ti i mveni.” (Matthieu 25:9). Legeoko nga, aChrétien be-ta-zo so a sa yingo na ndo ti ala ake lani na ngu 1919 ti sala mbeni ye so alingbi ti kiri na peko ngangu so ala yeke na ni ti za lumière ti ala. Na salango tongaso, a wara lani sioni na li ti ala pëpe.

¹¹ Jésus atene na nda ni: “Tongana ala [amasia ti buba] yeke gue ti vo, fini-koli asi; na ala so aleke ye ti ala awe, ala lï na yâ da legeoko na lo na pumba ti mariage; na a kanga yanga ti da. Na pekoni, ambeni masia so aga nga, ala tene, Seigneur, seigneur, lungula yanga ti da na e. Me lo kiri tënë, Biani, mbi tene na i, mbi hinga i pëpe.” (Matthieu 25:10-12). Tâ tënë, ambeni aleke lani tele ti ala pëpe na singo ti Fini-koli ni. Ni la, a wara sioni na li ti ala, na ala girisa matabisi ti duti dä na matanga ti mariage ni na yayu. So tâ ye ti vundu biani!

Parabole ti atalent

¹² Na pekoni so lo fa nene ti duti na ndara, Jésus akiri amû mbeni parabole so afa nene ti dutingo be-ta-zo. Lo tene: “Teti a yeke tongana zo so ague na mbeni kodoro nde, lo hiri aboi ti lo, lo zia ye ti lo na tïtî ala. Lo mû talent oku na boi oko, na talent use na mbeni, na talent oko na mbeni, [“zo oko oko awara ye alingbi na ngangu ti lo”, FM 01]; na lo gue na mbeni sese nde.” (Matthieu 25:14, 15). Zo ti parabole ni ayeke Jésus lo mveni so ‘ague na mbeni sese nde’ tongana lo gue na yayu na ngu 33. Kozoni si lo ma na yayu, Jésus azia ‘aye ti lo’ na tïtî adisciple ti lo be-ta-zo. Tongana nyen?

¹³ Na ngoi so lo yeke fa tënë na sese, Jésus ato nda ti leke mbeni ndo ti kusala na fango nzo tënë ti Royaume na yâ kodoro ti Israël kue (Matthieu 9:35-38). Kozoni si lo “gue na mbeni sese nde”, lo mû ndo ti kusala so na adisciple be-ta-zo ti lo, lo tene: “Tongaso i gue, i fa tënë na amara kue si ala ga adisciple, i batize ala na iri ti Babâ, na ti Molenge, na ti Yingo Vulu; i fa na ala ti bata ye kue so Mbi komande i.” (Matthieu 28:18-20). Na lege ti atënë so, Jésus amû yanga na “aboi” wala angbâa ti lo ti dë buze na ye so lo mû na ala, juska na kiringo ti lo, na ti sala ni “zo oko oko . . . alingbi na ngangu ti lo.”

¹⁴ Tënë so aye ti fa so dutingo ti aChrétien ti kozo siècle ni kue ayeke lani oko pëpe. Ambeni tongana Paul na Timothée alingbi lani ti mû mbage ti ala kue na kusala ti fango tënë na ti fango ye. Me dutingo ti ambeni asala peut-être si a yeke ngangu mingi na ala ti sala kusala kue so ala ye ti sala. Na tapande, ambeni Chrétien ayeke lani angbâa, na ambeni ayeke na kobela, ngu ti ala ahon mingi wala ala yeke na asewa. Nga biani, ambeni matabisi na yâ kongregation ayeke ti adisciple kue pëpe. Awali so a sa yingo na ndo ti ala na ambeni koli ni nga ayeke fa ye pëpe na yâ kongregation (1 aCorinthien 14:34; 1 Timothée 3:1; Jacques 3:1). Ye oko, atâa dutingo ti ala oko oko ayeke lani tongana nyen, adisciple ti Christ kue so a sa yingo na ndo ti ala, akoli wala awali, awara kungba ti dë buze na ye so ala wara, na salango kusala nzoni na angoi nga na alege so azi na ala ti fa tënë tongana aChrétien. A yeke ye so aChrétien so a sa yingo na ndo ti ala ti ngoi ti fadeso angbâ ti sala la.

Ngoi ti bango kusala ti ala ato nda ni!

¹⁵ Parabole ni atene na pekoni: “Na nda ni lango mingi mingi, mveni ti [angbâa] so akiri, lo diko tënë ti nginza na ala [‘lo hiri ala ti tene ala ga afa na lo peko ti ye so ala sala na nginza ni’, FM 01].” (Matthieu 25:19). Na ngu 1914, biani alango mingi mingi na peko ti ngu 33, Christ Jésus asi tongana Gbia. Ngu ota na ndambo na pekoni, na ngu 1918, lo ga na temple ti Nzapa na lege ti yingo na lo sala ye alingbi na tënë ti Pierre so: “Ngoi ni asi awe ti komanse fango ngbanga na da ti Nzapa.” (1 Pierre 4:17; Malachie 3:1). Ngoi ni asi lani awe ti bâ kusala so ala oko oko asala na ye so a mû na ala.

¹⁶ Ye nyen angbâa ni, so ayeke aita ti Jésus so a sa yingo na ndo ti ala, asala na “atalent” so Gbia ni amû na ala? Ti londo na ngu 33 ti ga na ni, so andu nga angu so aga kozo na ngu 1914, azo mingi na popo ti ala so a sa yingo na ndo ti ala asala kusala ngangu ti “dë buze” na ye so Jésus amû na ala (Matthieu 25:16). Même na ngoi ti kozo bira so a mû sese kue, ala fa so ala yeke tâ na kota nzara ti sala na Mveni ni. Fadeso a yeke na lege ni ti mû na ala so angbâ be-ta-zo afini lege wala matabisi ti ‘dengo buze’. Ngoi ti hunzingo ti aye ti sese so asi lani awe. A lingbi a fa nzo tënë na ndo sese kue. A lingbi a fâ “le-kobe ti sese”. (Apocalypse 14:6, 7, 14-16). Ngoi ni asi lani awe ti gi andangba zo ti bungbi ti “nzo le-kobe” nga na ti bungbi “azo mingi so asi singo” ti ambeni ngasangbaga.​—Apocalypse 7:9; Matthieu 13:24-30.

¹⁷ Ngoi ti kongo le-kobe ayeke ka mbeni ngoi ti ngia (Psaume 126:6). Ni la, a yeke na lege ni so na ngu 1919, tongana Jésus amû ambeni kungba na ndo ni na aita ti lo be-ta-zo so a sa yingo na ndo ti ala, lo tene: ‘I yeke aboi so aduti be-ta-zo na yâ ye oko oko, fade mbi zia ye mingi na tïtî i ti bata; i ga i duti na ngia na mveni ti i.’ (Matthieu 25:21, 23). Na ndo ni, ngia ti Mveni ni ti duti fini Gbia na ndo Royaume ti Nzapa ahon angia kue so e lingbi ti gbu nda ni (Psaume 45:2, 3, 7, 8). Bungbi ti ngbâa be-ta-zo ni akangbi ngia so na salango kusala na iri ti Gbia ni nga na maïngo aye ti lo ge na sese (2 aCorinthien 5:20). A bâ ngia ti ala na yâ atënë ti prophétie so a wara na Esaïe 61:10: “Fade Mbi duti na ngia mingi na yâ L’Eternel, âme ti Mbi ayeke na ngia na yâ Nzapa ti Mbi; teti Lo yü Mbi na bongo ti salut.”

¹⁸ Mawa ni ayeke so a wara sioni na li ti ambeni. E diko: “Zo so akamata talent oko aga, lo tene, Monsieur, mbi hinga mo, mo yeke zo ti sala ngangu na zo, mo fâ kobe na ndo so mo lu ye dä pëpe, mo bungbi ye na ndo so mo pe ye dä pëpe; na mbito asala mbi, mbi gue mbi honde nginza ti mo na yâ sese; bâ, ye ti mo ayeke so.” (Matthieu 25:24, 25). Legeoko nga, ambeni Chrétien so a sa yingo na ndo ti ala abi tele ti ala pëpe ti “dë buze”. Kozoni na ngu 1914, ala duti na wâ pëpe ti kangbi beku ti ala na amba ti ala, na ala ye lani pëpe ti to nda ti sala ni na ngu 1919. Ye nyen Jésus asala na ala ndali ti kpengba bê ti ala so? Lo lungula amatabisi kue so ala wara. Lo ‘bi ala na yâ bingo ti gigi. Fade ala toto na ngule, na ala te pembe ti ala kâ.’​—Matthieu 25:28, 30.

A ngbâ lakue ti bâ kusala ti ala

¹⁹ Biani, na ngoi so Jésus ato nda ti bâ kusala ti adisciple ti lo na ngu 1918, mingi ti ala so ayeke gue ti ga angbâa ti Christ so a sa yingo na ndo ti ala na yâ ngoi ti nda ni ade lani ti sala na Jéhovah pëpe. So ti tene so a yeke bâ kusala ti ala pëpe na ngbanga? Oko pëpe. Kapa ti bango kusala ti ala ni ato gi nda ni na ngu 1918 ti si na 1919, tongana bungbi ti ngbâa be-ta-zo na ti ndara asigigi na yâ ni na tënë na li ti lo pëpe. Ye oko, a ngbâ ti bâ na lege ti ngbanga kusala ti aChrétien oko oko so a sa yingo na ndo ti ala juska na ngoi so a zia sceau biaku na ndo ala (Apocalypse 7:1-3). Teti ala hinga ye so, aita ti Christ so a sa yingo na ndo ti ala aleke na bê ti ala ti ngbâ ti ‘dë buze’ be-ta-zo na lo. Ala leke na bê ti ala ti duti na ndara, na dutingo na gbâ ti mafuta tongaso si lumière ti ala aza ngangu. Ala hinga so tongana zo oko oko ahunzi fini ti lo ge na sese na dutingo be-ta-zo, fade Jésus ayeke yamba lo na yayu.​—Matthieu 24:13; Jean 14:2-4; 1 aCorinthien 15:50, 51.

²⁰ Azo mingi so asi singo ti ambeni ngasangbaga amû tapande ti aita ti ala so a sa yingo na ndo ti ala. Ala hinga biani so hingango ye so ala wara na ndo aye so Nzapa aleke ti sala aga na kota kungba (Ezéchiel 3:17-21). Ni la, na lege ti mungo maboko ti Tënë ti Jéhovah na yingo vulu, ala nga kue abata si mafuta asi lampe ti ala ni na lege ti mandango ye nga na guengo na bungbi. Na ala zia si lumière ti ala ni aza, na mungo mbage na kusala ti fango tënë nga na ti fango ye; na lege so, ala yeke ‘dë buze’ na tele ti aita ti ala so a sa yingo na ndo ti ala. Ye oko, aChrétien so a sa yingo na ndo ti ala ahinga biani na bê ti ala so a zia atalent ni na maboko ti ala. A lingbi ala kiri tënë na lege so a yeke sala ye na aye ti Seigneur ni na sese ge. Atâa so wungo ti ala ayeke gi kete, ala lingbi pëpe ti dö kusala ti ala ti zia na ala so asi singo. Na batango ye so na li, ngbâa be-ta-zo na ti ndara angbâ lakue ti mû li ni ti dë buze ti Gbia ni, na ala kiri singila teti mungo maboko so azo so asi singo na so ayeke sala kusala na bê kue aga na ni na ala. Ala so ayeke ti azo mingi so asi singo ahinga kungba ti aita ti ala so a sa yingo na ndo ti ala, na ala bâ tongana matabisi teti ala ti sala kusala na gbe ti fango lege ti aChrétien so.

²¹ Biani, aparabole use so amû lege ti hinga nzoni aye so asi na ngu 1919, wala ndulu na ngu ni so. Ye oko, akpengba-ndia ti yâ ni andu nga atâ Chrétien kue so ayeke na lâ ti nda ni. Na lege so, atâa so wango so Jésus amû na hunzingo ti parabole ti amasia bale-oko andu kozoni kue aChrétien so a sa yingo na ndo ti ala kozoni na ngu 1919, kpengba-ndia ti yâ ni angbâ ti ndu nga Chrétien oko oko. Ni la, zia e kue e bata na bê ti e atënë ti Jésus so: “I bata, teti i hinga lâ ni wala l’heure ni pëpe.”​—Matthieu 25:13.

[Kete tënë na gbe ni]

Mo lingbi ti fa nda ni?

• Lawa si Jésus ato nda ti bâ kusala so adisciple ti lo asala na ye so a mû na ala? Na ye nyen lo bâ?

• Ngbanga ti nyen ambeni Chrétien so a sa yingo na ndo ti ala alë bibe ti ‘ngbâa ti sioni so’?

• Tongana nyen e lingbi ti fa so e yeke na ndara na lege ti yingo?

• Legeoko na aita be-ta-zo ti Jésus so a sa yingo na ndo ti ala, na lege wa e lingbi ti ngbâ ti ‘dë buze’?

[Ahundango tënë ti manda na ye]

1. Ye nyen Jésus awara lani tongana lo ga ti bâ kusala ti “ngbâa” ni?

2, 3. ‘Ngbâa ti sioni so’ alondo na ndo wa? Na ye so amaï lani tongana nyen?

4. Jésus asala lani tongana nyen na ‘ngbâa ti sioni so’ nga na ala so kue afa mara ti bibe ti lo so?

5. Nde na salango ye ti ‘ngbâa ti sioni’, ngbâa be-ta-zo na ti ndara asala ti lo ye tongana nyen na peko ti atara so lo hon na yâ ni?

6. (a) Tongana nyen Jésus afa ndara so bungbi ti ngbâa be-ta-zo ayeke duti na ni? (b) Kozoni na ngu 1914, aChrétien so a sa yingo na ndo ti ala ayeke fa lani tokua wa?

7. Lawa nga ngbanga ti nyen aChrétien so a sa yingo na ndo ti ala ‘atï na lango’ na lege ti fä?

8. Ye nyen asi so amû lege ti mä tisango ndo so: “Bâ, fini-koli ayeke ga!”? Ngoi ni asi lani teti aChrétien so a sa yingo na ndo ti ala ti sala nyen?

9, 10. Na ngu 1919, ngbanga ti nyen ambeni Chrétien ayeke lani na “ndara” me ambeni ayeke “buba”?

11. Ye nyen asi na amasia ti buba?

12. (a) Parabole wa Jésus asala na kusala ti fa nene ti duti be-ta-zo? (b) Zo ni so ‘ague na mbeni sese nde’ ayeke zo wa?

13. Fa tongana nyen Jésus aleke lani mbeni kota ndo ti kusala na lo mû yanga na “aboi” ti lo ti dë buze na ye so lo mû na ala.

14. Ngbanga ti nyen a yeke ku lani pëpe na mbage ti ala kue so a sa yingo na ndo ti ala ti sala gi mara ti kua oko?

15, 16. (a) Lawa si ngoi ni asi awe ti bâ kusala so zo oko oko asala na ye so a mû na lo? (b) Afini lege wa ti ‘dengo buze’ a mû ni na ala so ayeke be-ta-zo?

17. Na lege wa aChrétien be-ta-zo so a sa yingo na ndo ti ala ‘aga aduti na ngia na mveni ti ala’?

18. Ngbanga ti nyen a wara sioni na li ti ambeni? Na ye nyen asi na pekoni?

19. Na lege wa a ngbâ lakue ti bâ kusala ti awakua ni oko oko? Na aChrétien kue so a sa yingo na ndo ti ala aleke ti sala nyen?

20. (a) Ye nyen ala ti ambeni ngasangbaga laso aleke na bê kue ti sala? (b) Ye nyen ala so a sa yingo na ndo ti ala ahinga biani na bê ti ala?

21. Wango wa abâ aChrétien kue a londo na angu so aga kozoni na ngu 1919 juska na ngoi ti e?

[Kete tënë na lembeti 16]

LAWA SI JÉSUS AYEKE GA?

Na Matthieu chapitre 24 na 25, a sala tënë ti ‘singo’ wala gango ti Jésus na alege nde nde. So ti tene pëpe so lo yeke zia tongaso ndo so lo yeke dä ti ‘ga’. Nde na so, lo yeke ‘ga’ na lege so lo yeke bi lê ti lo na mbage ti azo wala ti adisciple ti lo, na fani mingi a yeke teti fango ngbanga. Ni la, na ngu 1914, lo ‘ga’ wala lo si ti to nda ti komandema ti lo tongana Gbia (Matthieu 16:28; 17:1; Kusala 1:11). Na ngu 1918, lo ‘ga’ tongana watokua ti mbele, na lo to nda ti fâ ngbanga na ndo ala so atene ala yeke sala na Jéhovah (Malachie 3:1-3; 1 Pierre 4:17). Na Harmaguédon, fade lo yeke ‘ga’ ti futi awato ti Jéhovah.​—Apocalypse 19:11-16.

Gango wala singo ti lo so a sala tënë ni fani mingi na yâ Matthieu 24:29-44, nga na chapitre 25:31-46 ayeke si na “kota ye ti vundu”. (Apocalypse 7:14). Na mbeni mbage nde, gango ti Jésus so a sala tënë ni lege mingi na Matthieu 24:45 ti si na 25:30 andu fango ngbanga so lo yeke ga na ni na ndo ala so atene ala yeke adisciple ti lo a londo na ngu 1918 ti ga na ni. A yeke duti na lege ni pëpe ti tene so futango ngbâa be-ta-zo ni, fango ngbanga ti amasia ti buba nga na ti ngbâa so aye kua pëpe na so ahonde talent ti Mveni ni, ayeke aye so ayeke si gi tongana Jésus ‘aga’ na lâ ti kota ye ti vundu. So aye ti tene so a yeke wara ande aChrétien mingi na popo ti ala so a sa yingo na ndo ti ala, so ayeke duti ande be-ta-zo pëpe na ngoi ni so, na so biani a lingbi a zia ambeni zo nde na place ti ala. Ye oko, Apocalypse 7:3 afa so angbâa ti Christ kue so a sa yingo na ndo ti ala ayeke ‘wara sceau’ biaku kozoni na ngoi ni so.

[Foto na lembeti 14]

‘Ngbâa ti sioni’ awara deba nzoni oko pëpe na ngu 1919

[Foto na lembeti 15]

Amasia ti ndara aleke lani tele ti ala awe tongana fini-koli ni asi

[Foto na lembeti 17]

Angbâa so aduti be-ta-zo abi tele ti ala lani na yâ ‘dengo buze’

Ngbâa so aye kua pëpe asala ti lo tongaso pëpe

[Afoto na lembeti 18]

Ala so a sa yingo na ndo ti ala, nga na “azo mingi so asi singo” angbâ lakue ti zia si lumière ti ala aza