“I fa so i yeke duti ndulu”

¹ Na yâ kota prophétie ti lo so andu hunzingo ti aye ti sese so, Jésus agboto mê na ndo ziango pëpe si agingo bê ti fini ti lâ oko oko agboto ngoi ti e kue (Mat. 24:36-39; Luc 21:34, 35). Teti so sungbango ti kota ye ti vundu alingbi ti si na ngoi kue, a yeke tâ kota ye teti e ti bata gbotongo mê ti Jésus so: “I fa so i yeke duti ndulu, teti na mbeni ngbonga so i ku pëpe, Molenge ti zo ayeke ga.” (Mat. 24:44, NW ). Ye wa alingbi ti mû maboko na e na ndo tënë so?

² E tiri na agingo bê nga na aye so agboto le ti zo: Mbeni oko ti agbanda na lege ti yingo so a lingbi e sala hange na ni ayeke agingo bê na ndo aye ti fini (Luc 21:34). Na ambeni kodoro, nzinga, warango kua ti nginza pëpe nga na ngele ti aye so ague na li ni asala si a yeke ngangu ti wara aye so a hunda ti duti na fini. Na ambeni kodoro nde, warango aye ti mitele ayeke ngangu pëpe. Tongana gingo bê na ndo ti aye ti mitele ato nda ti fa lege na bibe ti e, e yeke na yâ kpale so ayeke girisango ti bata lê ti e na ndo atâ ye so Royaume ayeke ga na ni (Mat. 6:19-24, 31-33). Abungbi ti aChrétien ayeke mû maboko na e ti bata lê na ndo ti aye so. Mo sala si guengo na bungbi oko oko kue aga ye so mo zia na gbele mo?​—aHéb. 10:24, 25.

³ Sese ti laso asi singo na aye ti ngia so alingbi ti nzi hio angoi ti e ti ngele ngangu. Salango kusala na ordinateur alingbi ti ga mbeni gbanda tongana zo amû ngoi ahon ndo ni ti gue na ndo ti Internet, ti diko na ti tokua ambeti na lege ti Internet wala ti sala angia so ayeke na ndo ordinateur. Ambeni ye alingbi ti buba ngoi ti e mingi. Na tapande télévizion, alimo, aye so e ye mingi ti sala, dikongo ambeti ti sese so, aye ti wanguru, nga mungo ngoi mingi teti asewa ti e ti mitele ayeke sala si ngoi wala ngangu ti e angbâ gi kete ti tomba peko ti aye ti yingo. Atâa so salango ngia na hungo tele alingbi ti ga na dengo bê teti kete ngoi, mandango Bible e mveni nga na sewa ayeke ga na aye ti nzoni teti lakue lakue (1 Tim. 4:7, 8). Mo yeke vo ngoi ti gbu li na ndo Tënë ti Nzapa lâ oko oko?​—aEph. 5:15-17.

⁴ So bê ti kiri singila si e lingbi ti duti na ni teti so bungbi ti Jéhovah aleke mbeni kapa ti fango ye na lege ti yingo ti mû maboko na e “ti kpe ye kue so fade asi, na ti luti na gbele Molenge Ti Zo”! (Luc 21:36). Zia e wara ye ti nzoni mingi na lege ti alekengo ye ti yingo so na ‘e fa so e yeke duti ndulu’ si mabe ti e alingbi ti duti “tënë ti mû singila, na gloire, na yango-iri, na lâ ti singo ti Jésus Christ.”​—1 Pi. 1:7.