Chapitre 34

Lo hiri abazengele ti lo

A SALA fadeso ndulu na ngu oko na ndambo so Jean Wabatizengo zo afa Jésus tongana Molenge ti Ngasangbaga ti Nzapa na Jésus alondo ti sala kusala ti fango tene ti lo na gbele azo. Na la ni ka André, Simon Pierre, Jean na peut-être Jacques (ita ti Jean), na nga Philippe na Nathanaël (so ahiri lo nga Barthélemy), aga akozo disciple ti lo. Na pekoni, ambeni zo mingi abungbi na tele ti ala ti ga na peko ti Christ.

Jésus aye fadeso ti hiri abazengele ti lo. Ala yeke duti ndulu mingi na lo, na lo yeke fa ye mingi na ala. Me kozo ti hiri ala, Jésus ague na mbeni hoto na lo ngba ti sambela na bi so kue. Lo hunda Nzapa ti mu na lo ndara na ti hiri nzoni tene na ndo lo. Ndade na ndapelele, lo hiri adisciple ti lo kue si ala ga na tele ti lo na lo soro azo bale oko na ndoni use. Me, teti so ala ngba ti manda ye na tele ti Jésus, a ngba ti hiri ala adisciple nga.

Azo omene so Jésus asoro ala, azo so adi iri ti ala na nduzu ge, ayeke azo so aga la ni akozo disciple ti lo. Lo soro nga Matthieu, so lo hiri lo na da ti lapo. Ambeni oku so lo soro ala ayeke Judas (so ahiri lo nga Thaddée), Judas Iscariote, Simon mbeni Cananite, Thomas na Jacques, molenge ti Alphée. A hiri Jacques so nga Jacques Ngambe Ni, peut-être ngbanga ti so lo yeke kete na tele ti mbeni bazengele so ayeke na iri ti Jacques nga, wala ngbanga ti so ngu ti lo ayeke mingi tongana ti Jacques so pepee.

Akoli bale oko na ndoni use so aduti na Jésus a ninga awe, na Jésus ahinga ala nzoni. Biani, ambeni ayeke ti sewa ti lo. Jacques na ita ti lo Jean ayeke aita ti Jésus. Alphée ayeke peut-être ita ti Joseph, baba ti batango Jésus. Tongana a yeke tongaso, molenge ti Alphée, bazengele Jacques, ayeke nga ita ti Jésus.

E hinga a yeke ngangu na Jésus pepee ti dabe lo na iri ti abazengele ti lo. Na mo, mo lingbi ti dabe mo na ala? Mo dabe mo so aSimon ayeke use, aJacques ayeke use na aJudas ayeke use, na Simon ayeke na mbeni ita so iri ti lo ayeke André, na Jacques ayeke na mbeni ita so iri ti lo ayeke Jean. Tongaso, mo hinga iri ti abazengele miombe awe. Na popo ti ambeni bazengele osio e wara zo ti kamata lapo (Matthieu), mbeni so adekite na pekoni (Thomas), mbeni so aduti na gbe ti keke tongana Jésus ahiri lo (Nathanaël) na mba ti lo Philippe.

Abazengele bale oko na ndoni oko alondo na Galilée, kodoro ti Jésus. Nathanaël ayeke ti Cana. Philippe, Pierre na André alondo kozoni na Bethsaïda. Me, Pierre na André alango na pekoni na Capernaüm, kodoro so peut-être Matthieu aduti da nga. Jacques na Jean ayeke azo ti gingo susu, na ala nga alango na Capernaüm wala ndulu na ni. Judas Iscariote, lo so aka Jésus na pekoni, ayeke bazengele oko so alondo na Judée. Marc 3:13-19; Luc 6:12-16.

▪ Abazengele wa ayeke peut-être ti sewa ti Jésus?

▪ Abazengele ti Jésus ayeke azo wa? Mo lingbi ti dabe mo na iri ti ala tongana nyen?

▪ Abazengele alondo na akodoro wa?