Yeda si azo adë bê ti mo nga dë bê ti azo

Mbeni kpengba ye so alingbi ti mû maboko na e ti gbu ngangu ayeke dengo bê so e yeke wara na mbage ti afami ti e, akamarade ti e nga na aita ti e aChrétien.

Anzoni tënë so mbeni kamarade ti e atene na e na ndoye alingbi ti duti tongana mbeni ye so ayeke dë bê ti e nga amû ngangu na e (aProv. 16:24; 18:24; 25:11). Me atâ Chrétien ayeke gi gi pëpe ti tene azo adë bê ti ala. Ala yeke gi ti “dë bê ti ala so ayeke na yâ ti ye ti vundu nde nde kue, na lege ti dengo bê so Nzapa angbâ ti dë bê ti [ala aChrétien ni] na ni.” (2 aCor. 1:4; Luc 6:31). A yeke ye so Antonio, mbeni surveillant ti district na Mexique avivre ni.

Na ngoi so adocteur atene na Antonio so lo yeke na mbeni cancer ti mênë, vundu ahon ndo ti lo. Me lo sara ngangu ti hon ndo ni. Lo sara tongana nyen? Lo gi ti dabe ti lo na abia ti Royaume na lo he ni na kota go na mbeni lege so lo lingbi ti gbu li na ndo ti atënë ni. Ambeni ye so adë nga bê ti lo mingi ayeke asambela so lo sara na kota go nga dikongo Bible.

Me Antonio ahinga nga so mbeni ye so amû maboko na lo mingi ayeke aita ti lo aChrétien. Lo tene: “Lani na angoi so mbi na wali ti mbi e bâ so vundu ahon ndo ti e, e yeke hunda na mbeni fami ti e so ayeke ancien ti ga na ndo ti e nga ti sambela na e. Ye so adë bê ti e nga asara si e yeke na siriri.” Lo kiri lo tene: “Grâce na mungo maboko ti afami ti e nga na ti aita ti e aChrétien, e wara lege ti hon ndo ti avundu ti e na yâ ti kete ngoi.” Lo yeke na ngia ti wara akamarade so ayeke sara ye na ndoye nga ayeke bi bê ti ala na zo.

Mbeni ye so alingbi ti mû maboko mo na ngoi so mo yeke na yâ ti aye ti vundu ayeke yingo vulu so Nzapa amû zendo ti mû na e. Bazengele Pierre atene so yingo vulu ti Nzapa ayeke “matabisi so a mû senge senge.” (Kus. 2:38). Yingo vulu so aga lani na ndo ti azo mingi na ngoi ti Pentecôte ti ngu 33 afa so tënë so ayeke tâ tënë. E lingbi nga ti tene so yingo vulu ayeke mbeni matabisi so e kue e lingbi ti wara ni. Jéhovah ayeke mû matabisi so na e lakue. Tongaso, ngbanga ti nyen mo hunda ti wara ni mingi ape?​—És. 40:28-31.

BI BÊ TI MO MINGI NA AZO SO AYEKE BÂ PASI

Bazengele Paul agbu lani ngangu na yâ ti aye ti ngangu mingi, angbâ même kete lo kui na mbeni ngoi (2 aCor. 1:8-10). Ye oko, Paul asara mbeto ti kuâ ahon ndo ni pëpe. Lo hinga so Nzapa ayeke na lo, ye so asara si bê ti lo adë. Lo tene: “Zia a gonda Nzapa na Babâ ti Seigneur ti e Jésus Christ, Babâ so ayeke sara nzoni bê mingi na zo nga Nzapa ti dengo bê kue, lo so adë bê ti e na yâ ti ye ti vundu kue so e wara.” (2 aCor. 1:3, 4). Paul amû lege pëpe na akpale ti lo ti hon ndo ti lo. Me atara so lo gbu ngangu na yâ ni amû maboko na lo ti hinga ti zia tere ti lo na place ti amba ti lo, ye so asara si lo hinga nzoni mingi ti dë bê ti azo na ngoi so ala yeke na bezoin ni.

Na ngoi so Antonio awara sava, lo kiri na kua ti lo ti surveillant so ague na ando nde nde. Lani lo yeke bi bê ti lo lakue na aita ti lo aChrétien, me ti fadeso lo na wali ti lo ayeke sara ngangu mingi ti gue ti bâ aita so ayeke na kobela nga ti dë bê ti ala. Na tapande, na peko ti so Antonio ague abâ mbeni ita-koli so ayeke tirika na mbeni ngangu kobela, lo mä a tene ita ni aye ti gue na bungbi ape. Antonio atene: “A yeke pëpe ndali ti so lo ye Jéhovah ape wala aita ape, me a yeke kobela ni la asara lo vundu asara si lo bâ tere ti lo so lo yeke ye oko pëpe.”

Mbeni ye so Antonio asara lani ti kpengba ita so tere ti lo ason so ayeke so lo hunda na ita ni ti sambela na ngoi ti mbeni matanga so ala sara. Atâa so ita ni abâ tere ti lo so lo lingbi ape, lo yeda ti sambela. Antonio atene: “Lo tene mbeni pendere sambela, nga na pekoni lo sara ye mo bâ mo tene a yeke lo ape. Lo bâ so lo lingbi ti kiri ti sara ambeni ye.”

Biani, e kue ye ti vundu asi na e awe so e gbu ngangu dä, atâa a yeke ngangu mingi wala a yeke ngangu mingi ape. Me tongana ti so Paul atene, ye so asara si e ga azo so ahinga ti dë bê ti azo na ngoi so ala yeke na bezoin ni. Tongaso, zia e bi bê ti e na aita ti e aChrétien so ayeke bâ pasi nga e mû tapande ti Jéhovah, Nzapa ti e, na dengo bê ti amba ti e.